1 Ulo Yesu alikutentemukile lupili na bantu abakuti ubwingi balimukonkele. 2 Elo uwafibashi alimufukamine ati, "Mukwai nga mukofwaya lekeni nsangululwe kuli mwebo."

3 Yesu naye epakutambalikapo ukuboko kwakwe no kumwikata ati, "Nkofwaya, sanguluwa." Pekapo no wafibashi alisangulukile. 4 Elo Yesu alimwebele ati, "Witulisha ili lyashi ku muntu nangula umo. Kailange fye kuli nshimapepo no kupeela ikyabupe ikyo Mose amyebele pa kwebati abantu bashininkishe ukuposhiwa kobe."

5 Pa kwingila mu Kapenamu, Yesu bamukumanya ku mukulu wa fita amweba ati, 6 "Mukwai, umubomfi wangi alilwele ubulebe, alele fye ku ng'anda akokalipwa sana."

7 Elo Yesu alyasukile ati, "Nkoisa kumuposha."

8 Umukulu wa fita alimwasukile ati, Shikulu takilingile ati webo wise kwingila mwangi mung'anda, nomba landa fye shiwi lyeka no mubomfi wangi akoposhiwa. 9 Pantu nandibo ndanakila kubakulu pali nebo. Ndikwetepo na bashilika abanakila kuli nebo, nga naeba umo ati, "Kabuye," naye kuya. Nga naeba umbi ati, "Isa kuno," naye kwisa. Ikyo naeba umubomfi wangi ekyo akita.

10 Yesu pa kumfwe fyo kyalimupapwishe. Epakweba abali kumukonka ati, "Mukine fye ntatala sangapo ikiteketelo ikyakukula ngeki muli Islaeli onse. 11 Nkomyeba, abengi baka fumina ku kabanga na ku mbonshi, no kwikala na Ablahamu, Isaki na Yakobo pa mutebeto wa mu Bufumu bwa mwiulu. 12 Nomba abana ba Bufumu bena bakapooswa mu mfinshi umo bakalekulila no kusumanya ameno." 13 Yesu epakweba ikita ati, "Kabuye kobe, fikokitika nge fyofine uteketele." Pekapo, umubomfi alipolele.

14 Ulo Yesu aile ku ng'anda kwa Petelo alisangileko nyinafyala lyakwa Petelo alilwele mpepo. 15 Epakumwikata pa kuboko. Pekapo, no bulwele bwa mpepo bwali fuminemo, a alamuka, atampa no ku mutangata.

16 Pa kyungulo, bamuleteele abengi abali ne fibanda, naye alitamfishemo imipashi yabubi ukubomfye kyebo. 17 Epakufikilisha ikyo kasesema Isaya alandile ati, "Alisendele amalwele yesu yonse no kukonswa konse."

18 Ulo Yesu abwene ibumba lya mushingulukile, alyebele abasambi bakwe ukuya bushilya bwa bemba. 19 Kafundisha wa mafunde umo alishile no kweba Yesu ati, "kasambilisha nkokukonka konse ukoya."

20 Yesu naye alimwasukile ati, "Bamumbwe balikwetepo imimba no tuni tulikwetepo ifinsa, nomba u Mwana wa Muntu ena takwatapo na pa kusaika umutwi."

21 Umusambi umbi naye alyebele Yesu ati, "Shikulu lekeni ngale nge kushiika batata."

22 Yesu alimwasukile ati, "Leka abakufwa baye kushiika abakufwa banabo, nomba webo twende unkonke."

23 Elo Yesu apateme mu bwange, na basambi bakwe bali mukonkele. 24 Kabili palya penefye pali bemba palimine ikipuupu ikukulu ikyakuti amaaba yakoima na menshi ukule kwingila mu bwange, apo ninshi Yesu alilele mu bwange. 25 Abasambi epakwalamusha Yesu no kumwebati, "Shikulu, tupusushe tukofwa!"

26 Epakubeba ati, "Mweba kiteketelo kinini, nindo mwakwatilo mwenso?" Elo alimakene no kukalipila ikipuupu na maaba na bemba alitalele tondolo.

27 Abasambi abali nakwe balipapile ikyakwebati batampile no kule kwipusha ati, "Muntu wakuba shani uwakwebati ikipuupu na maaba fikomunakila!"

28 Ulo Yesu afikile mu kyalo kya Gadala, bushilya bwa bemba, balimukumenye ku baume babili abafumine mu nshishi, abali ne fibanda, abakukalipisha ikyakuti takwalipo angapitako muli ilyenshila. 29 Pamuku umowine balipundile ati, "Nindo ukofwaya kuli fwebo, Yesu Mwana Lesa? Waisa mu kutukanda ulo inshita tailati kufika?"

30 Akatalamukila fye palipo umukuni uukulu wa nkumba ishali shikolya. 31 Ifibanda fyali papatile Yesu ati, "Ngamukotutamfya tutumeni tuye mu mukuni wa nkumba."

32 Naye Yesu epakufitamfishamo. No mukuni onse wali swatukile mu matelo ya lupili no kuipoosa muli bemba no kufwila mu menshi.

33 Ulo abakemi bankumba babutukile, baile kushimikila abekashi bamuli ulya musumba fyonse ifyakitikile ku bantu bali ne fibanda. 34 Abantu bonse baile kuli Yesu no kumupapata ati afumemo mu kyalo kyabo.