1 Ulo Yesu apwishishe ukwebekesha abasambi bakwe ikumi limo na babili, aile ku misumba ya palamineko iya mu Galile uko ali kufunda no kubila.

2 Ulo Yowane ali mu kifungo, alyumfwile ifyo Klistu ali kukita, epakutumako abasambi bakwe. 3 Baile kwipusha Yesu ati, "Bushe ni webo walingilile ukwisa nangula tule kupembelela umbi?"

4 Yesu alibasukile ati, "Bwekelenimo kuli Yowane muye kumweba ifyo mu koumfwa no kubona, 5 impofu shikobona, ne filema fikoenda, abakuba ne fibashi bakosanguluka, na bankomyamatwi bakoumfwa, abakufwa bakoba no mweo, na balanda bakobililwa Imbila Yabune. 6 Wakushuka uutaipuntula pa mulandu wangi."

7 Ulo abatuminwe bali mu kubwekelamo, Yesu naye epakutampa ukulanda ku ma bumba pali Yowane: "Ulo mwaile kuli Yowane mu kiswebebe, nindo mwaile kubonako? Litete ilyakupungaila ku mwela?" 8 Nindo mwaile kubona? Muntu wafwele nsalu shabune? Abafwala ifyo ni balya basangwa kufipango fya mfumu. 9 Ngebeniko, nindo mwaile kubona? bushe ni Kasesema? Emukwai, kabili uwakukilapo napali kasesema. 10 Pantu ni pali Yowane epo amalembo yalandila ati, Lesa alilandile ati, "Nkatuma intumi ku kumitangilila mu kumipekanishisha inshila. 11 Mukine kine nkomweba ati, Yowane kabatisha mukulupo pali bonse abana ba bantu abafyalwa ku banakashi. Nomba uwakupelekeshapo mu Bufumu bwa mwiulu ena alikililepo pali Yowane. 12 Ukufuma apo Yowane kabatisha ali kubila ukushinta pali nomba, Ubufumu bwa mwiulu bwa kulwila na babulwila ebabupoka ku maka. 13 Ukwisakushinta fye pali Yowane, bakasesema bonse na mafunde yakwa Mose yali kulanda pa Bufumu bwakwa Lesa. 14 Nga muli iteyenye ukusumina, Yowane wine e Eliya uwalino kwisa. 15 Uuli na matwi ya kumfwa nga omfwe.

16 "Ni kundo ni ngapalakanyako inkulo ino? Yakuba nga abaike abakoangala mu lubansa lwa kisankano, bakoikuuta ati, 17 ‘Twamilishishe ulwimbo lwa bwinga, mwebo tamwakindile. Mpaka twa mimbila ikimbo kya malilo, kabili mwalikene ukuloosha.’ 18 Ulo Yowane alishile, tali kulya nangula ukunwa, bali kumweba ati aliba ne kibanda. 19 Elo paisapo Umwana wa Muntu ali kulya no kunwa, bali kumweba ati, ‘kabunduulu kabili munwi, kibusa wa bakasonkesha na babembu.’ Nomba ifikitwa fya mano yakwa Lesa filashinika muli bukine bwa fitumbukamo."

20 Yesu akukalipila bantu mu misumba umo ali kupanga ifisungusho ifyakufula nomba tabalapile. 21 "Kalanda kuli webo Kolazine, na webo Betesaida! Ifisungusho fyakitikile muli mwebo afikitikila muli Turi na Sidoni nga kale balapile no kufwala amasaamu mwitoi! 22 Nkokweba ati Lesa akalangulukilako abena Turi na bena Sidoni ukukila pali webo. 23 Na webo kapenamu, walyebele ati ukaitumpwila kwiulu? Ukesa kukulukila mu mukonko wamfwa. Ifisungusho fyakitikile muli webo afikitikilako mu Sodoma, nga epo akili na kali lelo. 24 Ekyo wibushe ati, Lesa akalangulukilako abena Sodoma ukukilapo pali webo."

25 Pali ilya nshita, Yesu alyebele ati, "Namitasha Tata mwe Mfumu ya mwiulu na pesonde apo mwafishile fi fintu kubakukengela na bamano elo mwaisa kufisokolola ku baike. 26 Efyo Tata mwafwaile ati kibe.

27 "Tata fyonse alimpeela. Takulipo awaishiba Umwana kano fye Wishi. Kabili tapalipo uwaishiba Wishi kano fye Umwana nabo Umwana asalilepo ukusokolwela.

28 "Iseni mwense mwe banakile pa kusenda ifipe fya kulema nandi nkomileka mutuusheko. 29 Musende ikoli lyangi no kusambilishiwa kuli nebo apo naliba uwakunakilila no kuikefya mu mutima elo mukosangapo ukutuusha. 30 Pantu ikoli lyangi lyakwanguka, ne kipe kyangi kya kupepuka."