Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
Isu è ji pha ithua thoh marui, chiih-è ai luaramuii shii miegthi pha bran nyi è jao ne ai idoh luagieng, "Gasa shii bushun rek phi bo, Dawid pha dufuii wo!" Ithek è ziak. Isu è hò bucho khud mage shii, miegthi pha bran nyi aishii wuii thog, chiih-è ai è ithek shii sai, "Gu è nasa shii gang rek ruii phrone nasa migi rek ne bey?"
"Oh masdo" Isa è chang.
"Chiihphado Isu ne ithek mieg shii khoh srane yao, nasa è migi rek pha ji è hì è rey mage bo!" Chiih-è ithek ro mieg ne dinne wie rey ge. "Isu è isa shii gang è yao, ji ne hanyie shii ayao rabo."
Jishii ithek ne dun srane Isu chiang pha mua ne zab soh hà yao phi.
Isu nane samoythek è Jerikho thoh ne dun ramuii shii bran ibrog de ithek idoh shii luagieng. Miegthi pha bran nyi ne lumuii shii dug ne yoi shii Isu ne thiichiih shii dong ne luaramuii pha yoi mage ne ithek jao ne ziak, "Dawid Saja pha Dufuii wo! Gasa shii bushun rek phi bo!" Masdo!
Ibrog è ithek shii aro yi pha giung, jimagunde ithek ne lamuna gang ziak, "Dawid Saja pha Dufuii wo! Masdo! Gasa shii bushun now phi bo!"
Isu è thiichiih thung srane isa shii ho. "Gu è nasa shii nyie rek phi bone yang ga?" Ai è isa shii sai.
Isa è chang, "Masdo! Gasa ne gasa mieg ji doh din yi pha rek phi bo yang ro!"
Isu è isa shii bushun rek srane isa mieg shii khoh phi; khthiie isa ne doh mua dun, chiih-è isa de ai idoh luagieng.
Ithek ne Bethsaida hà wuii thog shii, ithek è miegthi pha jia ne Isu moe shii noh srane Isu shii khung ne yao, "ìujia khoh mage bo" Isu è miegthi pha bran wad chaing srane thiichiih pha thiig è fuang noh srane ai mieg shii chan cho srane wad è khoh ne aishii sai, "Na mieg ne doh sha bey?"
Chiihphado hù ne riig srane yao, "Oh, gune branthek shii doh sha ruii ro, jishii ithek ne hingmuii duiine lua pha doh muii ro."
Isu è dinne ai mieg shii wad è khoh, chiihphado ai mieg ne idoh thog din ruii ne ai mieg ne wuangwuang doh din dun. Chiihphado Isu è, aishii yao, "Hò hà dun bo chiih-è ji pha thiig hà dinne awuii sha rabo."
Ji è rek ched marui ne Isu ne Thaire thiig shii thoh din marui ne Sidon pha thiig è dong srane Galili khabang iring shii wuii thog. Chiih-è sua thawunthek rone beng pha ithua è dong ne lua. Ji hà lua shii giak thek è bi-ìe jia noh ne wuii thog ruii. Ithek è aishii wad è khoh pha Isu shii khung ne yao. Ji-è Isu ne ji pha bran shii awai ji noh dun srane awai wad è khohthek shii khoh srane chan cho phi, chiih-è, ji pha bran ri shii de khoh mage. Ji è rek srane Isu è hamangkhung hà riig srane lubu è wie now srane ji pha bran shii yao, "Ephphatha," Hì ne hong mage bo! Iyao pha miyao siu ji ro.
Ji è rekdang pha ji shii ji pha bran ro ikhuii è yoi dang dun, chiih-è, ai sem gliog pha de wie re dang ne agliog pha yao dun. Ji è rek ched pha idoh è Isu ne thiichiih um pho thek shii ji rek pha ji ne hanyie shii de ayao dang yi pha rek phro. Isu è khama nyuak doh ne ruii, ji è de muna ithek ne yao maphi. Hanyie thek è jithek rek pha ji yoi mage ne zab ne bajo nyu-dang dun ro. Ithek ne awaithek chung yao rai, "Ai ne hì thek rek phane khi-è mua dun phlei? Ai ne khoh ayoi pho shii de yoi yi dun, sem ayao mua pho de yao mua yi dun!"
Ithek ne Jerikho hà wuii thog ne Isu è samoythek nane bran ibrog rog shii jipha ithua è fuang thoh ne wuiiramuii shii, Thimaeyus pha dufuii Barthimaeus miegthi pha nane chayem jia lumuii shii dug ne rai iang doh ro. Jipha bran è jine Isu Nazareth rone yoi mage shii, Isu shii ziak ne ho, "Isu, Dawid Saja pha Dufuii wo! Gu shii de bushun now phi bo!"
Branthek è aishii aro rabo ne bajo giung. Jishii, ai ne din è de gang ziak ne ho mage, "Dawid pha Dufuii wo! Gu shii bushun noh bo!"
Isu è khan srane yao, "Aishii ho mage bo."
Ji-è, ithek è miegthi pha bran jishii ho ne yao, "Sang srane jai ne wuii mage bo, Isu è na shii ho muii ro."
Ji è yao mage ne ai ne awai yung de fen marui srane ran ne Isu moe hà wuii thog ruii.
Isu è aishii sai, "Gune na shii nyie rek phi bo è yang lei?" miegthi pha ji è yao.
"Masdo, gu ne dinne mieg doh mua yi pha yang ro."
Isu è aishii yao, "Dun mage bo, nawai migi ji è nawai shii gang rek jong phi ro."
Ji è yao mage shii ai ne mieg doh dun ro. Ji-è, chiihphado ai de Isu rog shii lumuii hà luagieng.
Isu yi Jerikho hà wuiiramuii shii, lumuii hà miegthi jia chayem than ne rai iang. Ibrogthek yi ai è rek dun pha yoi srane, ai è sai, "Hì nyielei?"
Ithek è aishii yao, "Nazareth pha Isu rek ramuii ro."
Chiih-è ai choh srane yao, "Isu, Dawid pha dufuii! gu shii de bushun rek bo!"
Thiichiih ibi shii um pha branthek è aishii giung srane aishii yao aro dang rabo, jimagunde ai è dinne de ji è lahuak bo ziak ne yao, "Dawid pha dufuii! Gu shii bushun rek bo!"
Ji-è Isu thiihchiih riu srane yung, ji pha miegthi shii gu moe hà now mage bo. Ai yi nui hà wuii thog mage shii, Isu è aishii sai, "Gu è na shii nyie rek phi bo è now lei?"
Ai è chang, "Masdo," "Gu dinne doh pha now ro."
Isu è aishii yao, "Chiihphado doh mage bo! Nawai migi è na shii wie rek ge ro."
Thiihchiih shii ai ne doh muii dang dun, chiih-è ai ne Isu rog shii lua gieng srane Hamangkhung-aphuii shii laso phi. Ibrogthek è ji riig srane ithek de zab Hamangkhung-aphuii shii laso phi.
Isu yi luaramuii shii nyagiak dang ne imiegthi pha bran jia doh. Ai samoy è sai, "Masdo, nyagiak dang ne ai miegthi hì ne hanyie layog mutho lei? Chiih-è hì pha miiriie ne awai layog mutho bey asi pha ai aphuii-amuii layog mutho bey?"
Isu è aishii chang, airo imiegthi hì ne awai layog è de asi ro chiih-è ai aphuii-amuii pha layog de asi ro. Airo imiegthi hì ne Hamangkhung-aphuii ro blu aishii blia rek rone doh yi pha ji mirey ro. Gu shii thoh ge pha airo blia ne inai nya um ba shii gethek ne atho pha rek chid phro, chiih-è hanyie de blia arek mua pha habiu ne thog sharuii ro. Gu ichiih sohjambling shii um ba shii ne gune sohjambling pha muchuang ro. Ai ji è yao pha iidoh shii, Isu è nyiak shii chan cho srane nyiakphlab ji shii nog ne ji pha bran mieg shii sun ne yao, "Wuii srane nawai mizia Siloam khabang shii mi mage bo." (Hì pha ibeng yi "Tho" ge phro). Ji pha bran è wuii srane mieg mi ne iidoh dun shii mieg jine doh ne dun thog ruii.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Chiihphado hìa è riie pha ji aishii wuii ne, lagiung niing srane yao, "Masdo! Na è rek pha yang arone, gu shii so nyarab mua phi phro."
Isu è awai wad phia srane aishii khoh. "Gu è rek phi pha yang muii ro" Ai è yao! "So rey bo!" Khthiie ji pha bran ne gang dun. Chiihphado Isu aishii yao, "Yoi bo! Hanyie shii de ayao rabo, jimagunde miang phabi hà wuii srane aishii riig yi bo, chiihphado na wie rey ge rone zab shii khagi rek ne, Moses muyung pha khlem ji zid phi bo."
Thiisa hà giak bran è slemriie pha bran jia shii awai biang rog shii thieng ne noh thog. Isu è ithek ro migi um pha ji riig mage shii, ai è slemriie pha bran ji shii yao, "lububo rek bo, gu dufuii! Na layogthek ne khungjong phi ro."
Chiihphado Iphey yua pha masdothek è awaithek chung yao rai, "Hì pha bran ne makhakriing yao ramuii ro!"
Isu ne ithek munow rai pha ji thieg, jiè ai yao, nathek ne nyie rek ne awie pha thek now phlei?
Naro layogthek ne khung jong phi ro è yao pha ji wie ba asi jai ne lua mage bo è yao pha ji wie bey? Gu nathek shii khagi rek, chiihphado, ji pha Bran Dufuii shii ne ichiih sohnyiak shii layog khung phi pha riichai um ro. Ji-è ai è slemriie pha bran shii yao, jai ne, nawai lawio chiing ne, chiih-è hò dun bo!
Jipha bran jai fad srane awai hò hà dun dun.
Thiichiih shii wad shii slemriie pha bran jia um iang. Giak branthek ne Isu awai mirek pha ichiig nin pha branthek khan ne um. Ji-è, ithek ne Isu shii sai, "Thung pha inai shii gang phi pha ji ne Iphey pha shuang asi bey?"
Isu è ithek shii yao din, "Nathek de Thung pha inai shii nawaithek shiishai jia yi nyahiung hà chiihdun arone, ji pha shiishai shii khoh ne fuang akhia phi ne bey? Ji-è, bran ne shiishai ji è de bajo boh ro! Gethek Iphey ne Thung pha Inai shii branthek shii nyanong mua." Ji è yao ched dang Isu è wad slemriie riie pha bran ji shii yao, "Na wad phiang phia mage bo."
Ai è de wad phia mage shii ji pha slemriie pha ji ne gai pha wad duiine wie rey dun.
Thiisa hà Simon ro khiing ne hakhang zia ne rad muii. Isu è thiichiih shii thog dang mage shii ithek è aishii yao. Isu ne ai moe shii wuii srane aishii wad è sasey è chaing srane riu yi. Ji è rek mage shii hakhang zia pha ji ne gang re dun ro. Chiihphado ai ne ithek shii chie niing pha rab ne phi.
Awiedang pha hìa è rad pha jia yi Isu moe shii wuii thog ne yao, na è wie rek pha now arone, hì pha hìa riie pha ji ne wie nyarek mua phi.
Isu è bushun now ne awai wad è aishii khoh srane yao, "Gune wie rek phi pha yang muii ro." Ji-è, Isu è yao, wie re mage bo, Ji è yao mage shii ji pha hìa ne wie redun.
Bran wi è slemriie pha ji shii oh srane Isu moe hà nohthog. Bran bajo um pha ji è ithek wi ne Isu moe shii noh ne awuii mua ro. Ji-è, ithek ne Isu khrug lakhung pha hò mugoh ji hong srane aishii lawiao rog shii Isu ibi shii zun mage. Bran wi ji è bajo migi rek pha doh mage ne Isu è slemriie ne rad pha ji shii yao, gu ani wo! Na layog ne gu è khungjong phi ro.
Ji è yao magunde, Iphey yua pha masdothek è awaithek lubu hà ug ne now, nyie khi-èrek ne ai ne hì è rek ne yao mua phlei? Hì ne makhakriing rek pha miyao ro, nyieliieshii, layog shii khung mua phi phane Hamangkhung-aphuii bie ro.
Ithek è nyie now pha ji ne Isu ne ibi thieg dun ro. Ji-è, Isu è din ne ithek shii yao, nyie rek ne nathek ne ji è now phlei? Slem riie pha ji shii hì è sai pha, naro layogthek ne khung jong phi ro è yao pha ji wie bey, asi pha jiie srane nawai lawio chiing ne lua mage bo è yao muii pha ji ne wie bey? Bran Dufuii hìne sohnyiak shii layog khung phi pha riichai um ara rone izai doh yi ro, gu nathek shii khagi rek ruii phro. Ji-è ai è slem rad pha ji shii yao, "Gu na shii yao, sieng srane nawai lawio ji chiing ne nawai hò hà dun mage bo."
Ithek è riig dang pha ji shii, ai ne sieng ne awai lawio chiing srane awai hò hà dun dun ro. Ji è rek mage shii, ithek ne rum ne Hamangkhung-aphuii shii yao, na shii laso ro! "Hì è rek pha blia ne gathek khuchung de adoh ba ro."
Ji-è rek ched mage shii, Isu ne Jewthek misiahò hà idoh dun shii, thiisa hà wad shii slemriie pha jia um. Thiisa hà giak thek è Isu shii ichiig they pha khan ne rai iang ro. Ji-è, ithek ne Isu moe shii wuii ne, Jewthek Thung pha Inai shii gang rek phi bey ne, ji riig pha khan ne rai. Isu è wad shii slemriie pha jishii yao, "Gu moe shii wuii mage bo!" Ji è yao ched ne, Isu è ithek shii sai, Jew Thung pha Inai gethek thiigpha Iphey è gethek shii nyie rek bo ne zey lei? Nong phi pha zey bey? Asi buii rek phi bo è zey bey? Chiih-è branthek ro chai shii ragia rek phi ne bey? Asi pha chai shii mua muii ne bey?
Ji è sai mage ne, ji pha branthek ne nyie de ayao muluii pha re dun phro. Isu è ithek ne lubu siie now ne rai pha thieg ne bajo zo dun, ji-è, ai ne lijieg srane ithek shii shan srane riig mage ne wad zi ne rad pha ji shii yao, "Na wad ne gu shii phia mage bo," ai è wad phia mage shii, ji pha wad ne gang re dun.
Luang jia Isu yi gai pha thiig hà rairamuii shii, thiichiih shii buii saduii rek ne rad pha bran de jia um. Ai è Isu shii doh mage ne, awailum ne buzam bam srane Isu shii khung ne yao, "Masdo, na è rek yang arone, na è gu shii so nyarek mua phi phro!"
Isu è awai wad phia srane, chiih-è aishii khoh srane. Chang, "Gu è rek pha now ro. So rey dun bo!" Ji è yaodang pha ji shii Miiriie ji de bran è thoh dun.
Giak branthek è slem è riie pha bran jia shii lawiao rog shii han ne wuii thog ruii, chiih-è ithek è bidiang ne hò bucho hà noh ne Isu ibi shii ruii pha rek. Jimagunde bran bajo um pha ji è, lumuii amua phi ne ithek è aishii Isu moe shii noh ne awuii mua, ji è ithek zak lakhung hà noh srane saphai hong ne, awai lawiao rog shii buzam bran ibrog um pha duchoi Isu ibi shii ziin phi. Isu è ithek shii bajo migi um pha ji doh mage ne, ai è bran jishii yao, gu ijak "Naro layog ne khungjong phi ro."
Ji è yao pha ji nuii srane Iphey yao pha masdo nane Pharisithek awaithek chung yao rai, "Makhak-riing yao pha bran hì ne hanyie ga? Layog khung phi pha ne Hamangkhung-aphuii jia bie ro!"
Isu è ithek munow jithek thieg srane ithek shii yao, "Nathek ne hì nyie rek ne now phlei? Hì è rek ne yao pha ji ne wie ba bey? Na layogthek ne khungjong phi ro è yao pha ji wie ba asi pha nawai lawiao chiing ne jai ne lua mage bo è yao pha ji wie bey? Gu ne nathek shii Bran Dufuii ne sohnyiak shii layog khung phi pha riichai um pha doh yi." Ji è ai ne slemriie pha bran jishii yao, "Gu na shii yao, jai srane, nawai lawiao chiing ne hò hà dun shabo!" Ji pha bran è zab pha bran moe è khthiie jaifad srane, thiichiih wiao pha lawiao yie ne awai hò hà dun srane Hamangkhung-aphuii shii laso phi.
Dinpha Jewish Thung pha Inai shii Isu Jewthek misiahò hà wuii srane ithek shii yua. Thiisa hà wad phazoy shii slemriie pha bran de jia um. Giak Iphey yua pha masdothek nane giak Pharisithek ne Isu è chun pha blia rek muii rone nin yang mage ne Jewish Thung pha Inai shii gang phi bey ne wie riig ne rai. Ji shii Isu è ithek munow jithek thieg mage ne bran jishii yao, "Jai srane ibi hà wuii mage bo." Ji pha bran ji è jai srane thiichiih shii riu. Chiihphado Isu è aishii yao, "Gu na shii sai, Jewish Thung pha Inai gethek Iphey shii nyie rek pha zen ga? Nong phi pha ji bey? Asi pha chun phi ji bey? Bran shii ragia rek phi pha ji bey? Asi pha chun phi pha ji bey?" Ai è ithek shii zab shan ne riig srane ji pha bran shii yao, "Naro wad phia mage bo." Ai è ji è rek, chiih-è ai wad de wie rey dun.
Isu è branthek shii jithek zab yao ched maruii shii, awai ne Khaphernaum hà wuii dun. Roman dumuii è bajo bushun rek pha airo khiao jia um; ji pha bran ye rad ne iy sha pha rek. Dumuii è Isu ro mua ji yoi mage ne, ai è Jewish dukhothek shii ai khiao jishii gang phi pha ho pha thoh ge. Ithek è Isu shii wuii srane wie khung ne yao, "Ji pha bran ne izai naro nong chid pha um ro. Ai ne gathek bran shii miie chiih-è ai awai è gathek shii Jewthek misiahò de rung phi phro."
Ji-è Isu de ithek rog shii wuii gieng. Ai ji pha hò è ruang asi ba shii dumuii ji awai ijakthek shii thoh ne aishii yao yi, "Masdo, nawai shii diig arek chid rabo, Na gu hò shii wuii mua pha ne gu shii ne chua oi ro. Ji è gu de na shii wuii mua sapho asi ro, nane yao bie mage bo, ji arone guro khiao ji ne gang dun phro. Gu, è de dumuiithek boh iliing shii pha bran ro, chiih-è gu iliing shii de sandrithek um ro. Gu è jia shii ‘Wuii’ bo è yung arone, ai de wuii dun phro! Chiih-è gai shii, ‘Thawuii!’ bo è yao arone ai de thawuii phro; chiih-è gu gui khiao, ‘Shii hì rek!’ bo è yao arone ai ne rek phi."
Isu è ai miyao ji nuii srane wiengphleg ne idoh rei srane ai rog shii lua pha iphiingthek shii yao, "Gu nathek shii yao, hì duiine pha migi ne thiih de adoh ba ro, chiih-è Israel shii magunde adoh ba ro!"
Muapho idoh dumuii hò hà dun shii airo khiao yi gang iang pha doh.
Hò-amuii jia yi awie pha ragung thoh ne dam snamiliao mucho è rad ne ai yi bam srane khuchung de miang arek mua. Isu è aishii doh mage ne, ai è aishii ho, Hò-amuii, nane nawai murad ji è wie rey saro! Ai è awai wad ai lakhung ruii mage shii, ai yi khthiie laziung miang riu srane Hamangkhung-aphuii shii laso phi.
Luang jia Jewsih Thung pha inai shii Isu michie chie pha Pharisithek pha dumuii jia hò hà wuii dun; branthek è Isu shii bajo wie è riig ne rai. Lai wad phieng ne rad pha bran jia Isu shii wuii thog, chiih-è Isu è Pharisithek shii nane Iphey pha masdothek shii sai, "Jewish thung pha nai shii gethek Iphey shii wie nyarek mua ne ba asi arek mua ne bey?"
Jishii ithek è nyie de ayao, Isu è ji pha bran jishii noh srane aishii gang phi, chiih-è aishii thoh ge.
Isu awai yi Jerusalem hà rai ne wuiiramuii shii, ai è Samaria nane Galili pha sohthug è dong ne lua. Ai yi thiig è wuiiramuii shii awiedang hìa è riie pha bran sua shii si. Ithek yi ai è ìujia ruang hà riu ne um, chiih-è ziak mage, "Isu! Masdo! Gathek shii de bushun rek bo!"
Isu è ithek shii riig srane ithek shii yao, "Nathek phabi shii wuii srane riig yi bo."
Lumuii hà ithek shii so rab phi ro. Ithek jia è riig shii ai ne gang rey sha, ai iidoh dun srane goh gang è ziak ne Hamangkhung-aphuii shii laso phi. Ai awailum ne buzam Isu lai shii bam srane aishii laso phi. Ji pha bran yi Samarithan ro. Isu è yao, "Bran sua ne gang reyjong pha ji è; digey ne khi hà lei? Nyie um ne hì pha fuang pha bran awai ji jia iidoh wuii srane Hamangkhung-aphuii shii laso phi phlei?" Chiih-è Isu aishii yao, "Jai srane dun mage bo; nawai migi è na shii wie rek phi ro."
Ji-è rey ched pha iidoh shii, Isu de Jerusalem hà giang sai pha ji shii wuii dun. Chiih-è Jerusalem pha Shiishai Gak moe shii khabang rog shii sibiang guii rab ne um, chiih-è Hebrew è jishii bethzatha ro è yao. Chiih-è Miegthi pha, lai aluii mua pha nane slemriie ne rai pha ji de sibiang shii bajo thieng ne rai. Ithek ne kho sid pha ji khan ne rai, nyieliieshii ai ne Hamangkhungkhliie wuii ne kho shii nai pha ji khan ne rai. Kho ji nai mage shii hanyie yi igobi lung arone aishii ne nyie miiriie um magungde gang rey dun ro. Chiih-è dam sa-uom è miliao è rad pha bran jia de um. Isu è ai thiichiih shii um pha ji riig srane, chiih-è bajo idam è rad pha ji thieg srane; ai è ji pha bran shii sai, "Na wie rey pha now bey?" Ji pha rad pha bran ji è yao, "Masdo, gu shii ne hanyie è de khabang ji nai mage shii wo phi pha oi ro, jiè kho ji nai pha ishak shii gu de wo pha rek riig shii, gu è ne ithek bi wo dun ro." Isu è aishii yao, "Jai srane, Nawai lawiao chiing ne lua mage bo." Khthiie ji pha bran ji gang rey srane, awai lawiao han srane jao ne lua. Ji-è rek pha inai shii yi Jew Thung pha inai ro.
Chiihphado ai è kho è phuii rab muii pha ithua Galili pha thawun Khana shii iidoh wuii thog mage shii, thiisa hà Khaphernaum pha badri pha dumuii jia ro ani rad ne um iang. Ai è Isu yi Judea è Galili hà wuii thog pha yoi mage shii, Isu shii wuii thog srane yao, Khaphernaum hà wuii ne gu dufuii shii gang rek phi bo, nyieliieshii ai ne iy sha pha rek muii ro. Isu è aishii yao, "Na ne buangthek pha blia ariig sapho shii ne migi arek ro." Ophis pha dumuii jiè chang, "Masdo," gu dufuii a-iy ba pha ibi shii gu rog wuii gieng bo. Isu è aishii yao, dun sha bo, "Na ro dufuii ne wie rey ge ro!" Chiihphado ji pha bran è Isu miyaogamthek ji migi now srane dun dun. Ji-è rek ne ai dunramuii shii airo khiaothek si ne mua yao iang, "Naro dufuii ne wiejong sha ro!" Chiih-è ji pha bran è aishii sai nyie ishak shii gu dufuii ne wie rey ge phlei? Chiihphado ai è chang, "Diyu ishak jia rey shii airo khrug rak pha ji ne wie rey ge ro." Chiihphado ai aphuii è nowkhlei, ji pha ishak ne diyu Isu è airo dufuii wie rey sha ro è yao pha ishak ji ro. "Ji-è ai nane airo hòpho zab migi rek dun." Judea è Galili hà wuii pha iidoh Isu è buang pha blia yi nyi chiieng rek sha ro.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Idam snanyi è diig rek ne grab noi ne riie pha hò-amuii jia è idoh wuii srane Isu yung jiu shii khoh mage. Ai è awai shii yao, "Gu è airo yung shii khoh bie nede, gu ne gang rey dun phro."
Isu è idoh rai ne hò-amuii shii riig, srane yao, lububo rek bo, "Gu dimi wo! Naro migi ji è nawai shii wie rek ge ro." "Ji è yao pha ishak shii hò-amuii ji ne wie rey dun."
Thiisa hà dam snanyi è grab rek ne rad pha bimi jia um iang, Jipha bimi ne bajo maphothek shii wuii ne riig yi ne de, chiih-è bajo bang phi ne mathek rek ne de awie phi. Ai ne wie re khlei pha asi pha bajo muna rad khlei dun. Isu è rek pha bliathek yoi mage ne bimi jine ibrog um pha Isu moe shii wuii thog. Awai è awai shii yao, "Gu è ai yung shii kho mage arone, gu ne gang re ruii phro."
Bimi jiè Isu yung shii kho mage shii, ai grab rek pha ji ne them dun. Ji-è ai ne awaishii than ruii, ai rad ne diig rek pha ji ne them dun ro.
Ithek duchoi shii hò-amuii jia yi grab rek ne diig ne rai pha dam snanyi rey sha; ai è awai shii nyie um pha ji zab mahpho shii phi srane wie rey yi pha rek shii, Jishii hanyi è de aishii wie arek mua. Ai è ibrog shii Isu idoh wuii srane airo rugud jiu shii khoh mage, chiih-è airo grab noi pha ji ne limdang dun. Isu è ithek shii sai, "Gu shii hanyie mukhoh lei?"
Zab è yao, gathek ne akhoh ro, chiih-è Phithar è yao, hanyie de akhoh ro, "Masdo, bran ibrog zab ne na shii gung ramuii ro."
Jishii Isu è yao, "Hanyie lei jia ne gu shii khoh ro, gu ne thieg, blu ne gu è fuang khia dun ro." Hò-amuii ji è shii riig shii aishii ne thieg dun, ji è ai ne sham srane wuii ne awailum ne Isu lai shii bam. Ai è nyie rek ne khoh chiih-è khi-èrek ne khthiie wie dun pha ji thiichiih ai ibi shii um phothek moe Isu shii yao. Isu è hò-amuii jishii yao, "Gu dimi, nawairo migi è na shii wie rek ge ro, liingsed ne dun bo."
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
Isu è ji yao ramuii shii, Jewish pha dumuii è aishii wuii thog ne lagiungniing, srane yao, "Gu ro dimi ne iyjong dun ro, Jishii, thawuii srane nawai wad è aishii khoh mage bo chiih-è ai ne sieng ruii phro."
Ji-è Isu jai srane ai idoh luagieng, chiih-è airo samoythek de ai rog shii wuii gieng.
Chiihphado Isu ne dumuii hò hà wuii dun. Iy pha ben khuang pho nane branthek choh ne rai iang pha doh mage shii, ai è yao, zab ne fuang dun mage bo! "Bimi ne a-iy ba ro—Ai ne men bie ro!" Chiihphado ithek zab aishii siak. Khthiie dang shii branthek fuang dun ched mage shii Isu è bimi ji pha ùgud hà wuii srane bimi ji pha wad shii chaing mage, chiih-è bimi ji de sieng khlei ruii.
Jairus chiih-è thiigpho Jewthek ro Jewthek misiahò pha dumuiithek Isu moe shii wuii thog. Jairus è Isu shii doh mage ne khungdang ne yao, "Gu dimi duiine bajo rad muii ro, na ne wuii srane wad è aishii kho phi bo, chiihphado, ai ne gang dinne sieng ruii phro."
Ji è yao mage ne Isu è ji pha bran rog shii wuii dun. Gai thek de Isu rog shii bajo wuii gieng pha ji è Isu moe shii ne zab ley dun.
Ithek Jairus hò hà thog shii, Isu è yoi, ithek ne anomuluii pha ziak ne cho ramuii ro. Isu-è iliing hà wuii srane ithek shii yao, "Nathek ne nyie rek ne anomuluii pha rey phlei? Chiih-è nathek nyie rek muii ne choh phlei? Ani ne a-iy ba ro, ai ne men bie ramuii ro."
Ji è yao mage ne ithek ne Isu shii siak, jiè Isu ne ithek shii fuang hà thoh maruii srane ani ji pha aphuii chiih-è amuii chiih-è awai samoy uom shii noh ne ani men pha ùgud bucho hà khud dun. Ai è bimi shii awai wad è giak srane yao, "Thalitha, khoum" jine "Bimi duii rone ho pha ji ro, gu è na shii sieng mage bo è yao ramuii ro!"
Bimi ji è siengfad srane lua mage, (ai yi dam snanyi rey sha pha bimi ro), ji è rek mage shii, thiichiih um pho thek ne ji riig ne wiengdun.
Isu è yao din, "Chiihphado duchung pha branthek shii, khi-èrek ne chua ne yao sha phlei? Ithek ne khi-èrek pha duiine lei? Ithek ne bajarai pha ithua shii dug ne rai pha aniphiing duiine ro. Gai ibrog è gai shii ziak srane yao, ‘Gathek ne phiyiy pha ben nathek shii khuang phi, jishii nathek è asiu! Gathek è bi-iy ibai bai shii ithek è achoh phi!’ Jon Khowo phi pha ji wuii thog ne, chiih-è ai ne minyie nyie srane phuii de aniing, chiih-è ithek è yao, ‘Ai iliing shii ne ibuii um ro!’ Bran Dufuii yi wuii thog mage ne, chiih-è chie niing shii, ithek è yao, ‘Hì pha bran shii riig bo! Ai ne sugow ne chie niing pha jia ara, chiih-è ai ne mijin than phothek nane layogthek pha ijak ro è yao!’ Hamangkhung-aphuii pha khani è, hanyie è nuii lei ne ji ne izai chak rone doh yi phro."
Pharisi jia è Isu shii ai hò hà michie chie pha ho, ji è Isu yi ji pha Pharisi hò hà wuii srane michie chie sha pha dug. Ji pha thawun shii layog rek ne sieng pha hò-amuii de jia rai. Ai è Isu ne Pharisithek hò hà michie chieramuii pha yoi, ji è ai ne rem no pha (alabasther) sumaro ley jariie yie ne wuii thog ne,
Chiihphado è Jairus beng pha bran jia de thiichiih wuii thog; ai ne thiisa pha Jewthek misiahò pha dumuii ro. Ai awailum ne buzam Isu lai shii bam srane aishii khung ne ai hò hà wuii bo è yao, nyieliieshii airo idimi dam snanyi rey sha pha ji ne iy pha rek.
Isu ai rog shii wuiiramuii shii ai mai pha zab ithua shii bran iphiing khrab thog dun.
Isu ji yao ramuii shii, mua yao pha bran jia dumuii hò è wuii thog. Ai è Jairus shii yao, "Naro dimi ne iy dun ro. Masdo shii dinne muna diig aphi chid rabo."
Jishii Isu è nuii srane Jairus shii yao, "Arum rabo; migi now bie bo, chiih-è na dimi ne wie rey phro."
Ai è hò hà wuii thog mage shii, ai è Phithar, Jon, nane James chiih-è ani ro aphuii amuii shii noh ne iliing hà wuii srane gai hanyie shii ai rog shii awuii noh. Thiichiih shii um pha branthek è ani chiang shii choh ramuii, Isu è yao, "Achoh rabo, ani ne a-iy ro ai ne men bamuii ro!"
Ithek è aishii siak, nyieliieshii ithek ne thieg ai ne iyjong ro. Jishii Isu è aishii awai wad shii giak srane ho mage, "Sieng mage bo, gu ani!" Ai ro chai ne khid din srane thiichiih shii siangfad mage, chiih-è aishii chie pha nyie magunde phi mage bo è yao ne Isu è ithek shii yung. Ai ro aphuii amuii ne wiengphleg dun, Jishii Isu è nathek shii yung, ithek shii nyie rey pha ji ne hanyie shii de ayao rabo.
Lazaras beng pha bran jia Bethany hà rai muii pha ji yi rad. Ji pha thawun Bethany ne Mery nane ai khuii Martha rai muii pha ji ro. (Ji pha Mery beng pha ji ne rem no pha ji è Ithong lai shii shun srane khajiang rek ne sad phi pha ji ro; chiih-è rad pha ji ne ai buphuii Lazaras ji ro.) Lazaras ro amuii è Isu shii mua thoh ge, "Ithong, naro bushun ijak ne rad muii ro."
Isu è ji yoi mage shii, ai è yao, "Lazaras murad jine iy sapho asi ro; hì rey pha ji ne Hamangkhung-aphuii shii biisiie doh yi pha ji rey ro. Hì pha blia è Hamangkhung-aphuii pha Dufuii shii bo biisiie mua ruii phro." Isu è Martha nane ikhuii chiih-è Lazaras shii miie rek. Ai ne Lazaras rad pha mua ji yoi magungde ai ne thiisa hà danyi rai din marui. Chiihphado è ai è awai samoy shii yao, "Cho gethek ne Judea hà iidoh dun sha rai haro." Chiihphado shii samoy è yao, "Masdo," "Ìujia inai pha ibi shii ai è nathek shii lubao rek ne chao pha rek; jimagunde thiisa hà dun din pha phak ne bey?" Isu è chang, "Nathek jia shii ishak snanyi oi chak bey? Ji-è hanyie magunde hanai bo hà lua arone khuchung de akham phro, chiih-è ai ne sohjambling pha muchuang ji doh ruii phro. Jishii ai ne habiu hà lua arone kham dun phro, nyieliieshii aishii ne muchuang oi ro." Isu è ji è yao srane dinne yao, "Gu ijak Lazaras ne men dun ro, jimagungde gune wuii srane aishii sieng din yi pha ro." Samoythek è chang, Ithong, "Ai men mua arone, ai ne wie rey din ruii phro." Ji ne Isu è Lazaras iy dun pha ji yao, jimagungde ithek mugao yi izai men pha ji gao. Isu è ithek shii wie yao, Lazaras ne iyjong dun ro,
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
Isu run shii in dun, chiih-è awai samoythek rog shii wuii dun. Humblo shii hasam boh sam ne khabang shii reng mage, chiih-è run ne buii è zem sha pha rey dun, jimagunde Isu men dun. Samoythek è aishii wuii srane aishii chun. "Ithong wo gathek shii ragia rek phi bo!" Ithek è yao. "Gathek ne iy sha bsa ro!"
"Nathek ne nyama nyie rek ne rum phlei? Isu è chang, nathek shii ne migi ìujia bie ara ro!" Chiihphado ai sieng srane ji pha hasamthek nane gasauthek shii yung ne them yi. Chiih-è thiisa hà ne boh them dun.
Zab ne wiengphleg dun. "Hì ne khi-èrek pha bran ga?" Ithek è yao. "Hasamthek nane gasauthek rangde ai miyao nuii dun ro!"
Jipha habjuang airo samoythek wuii thog srane yao, "Gethek ne bajo chia sha dun ro, chiih-è ichiih pha ithua ne liijiing ro. Branthek shii thiigthek hà thoh ne awai chie pha pheg yi haro!"
Ithek shii athoh ge rabo, Isu è chang, "ithek shii nawaithek è chie pha phi mage bo!"
"Ichiih gethek shii ne iweb guii nane ù nyi um bie ro, ithek è chang."
Isu è ithek shii yao din, "Jithek ne ichiih gu moe shii yie mage bo." Ai è branthek shii saing lakhung shii dug pha yung; chiiphado ai è iweb guii nane ù nyi ji yie srane hamangkhung hà hù ne riig ne, Hamangkhung-aphuii shii laso phi. Ai è iweb ji phed srane samoythek shii phi. Chiih-è samoythek è branthek shii phi. Zab branthek è lumuiidang pha chie. Chiihphado nyie khe pha ji yi siridthek snanyi ley chiing. Hanyie chie pho ne hò-aphuii ne itham guii ro chiih-è hò-amuii nane aniphiing shii ne atham ro.
Hamiang riang uom nane riig rey pha ishak shii Isu è kho lakhung è lua ne samoythek moe shii wuii thog.
Isu è awai samoythek shii ho srane yao, "Gu ne ichiih pha branthek shii bajo bushun now muii ro, nyieliieshii, ithek de gu rog shii inai da-um rey sha pha rai gieng dun ro, thuh shii ithek shii chie pha nyie de oi sha ro. Gu ne nathek shii nyie de achie yi pha dun ge pha anow ro, yang ne ithek ne lumuii hà chi-iy ne thud pha de um phro."
Samoythek è Isu shii sai, "Gethek ne khi-èrek ne ichiih balimuang shii um pha ibrog shii phi ne chie mua mage phlei?"
Isu è ithek shii sai, "Nathek shii iweb khama um ga?"
Ithek è chang, "Iweb miley chiih-è ù ìujia um bie ro."
Isu è ji pha ibrogthek shii nyaliag shii dug pha yung. Chiihphado ai è iweb miley nane ù jithek chiing srane Hamangkhung-aphuii shii laso phi srane phed ne samoythek shii phi, samoythek è branthek shii phi ne chie yi. Ithek zab è ji lumuii dang pha chie. Chiih-è led marui pha ji ne samoythek è sirid miley chiing. Thiichiih um shii chie pha branthek ne itham Sawi um dun ro, hò-amuii nane aniphiing shii atham ro.
Isu nane airo samoythek Khaphernaum shii wuii thog mage shii, Misiahò pha mijin thanpho è Phithar shii wuii ne sai, "Na ro masdo de Misiahò pha mijin phi chak ne bey?"
Phithar è chang, "Than chak."
Phithar è hò bucho wuii thog mage shii, Isu è ibi yaodun, "Simon, na ro munow ne nyie ga? Hanyie è soh pha sajathek blia rek ne chiih-è mijin phi phlei? Soh pho mijin ba asi pha gai sohphothek mijin ba?"
Phithar è chang, "Ji ne gai sohphothek mijin ro."
Isu è chang, "Wie ro," Jipha miyaosiu è gethek sohphothek ne athan chid. Jishii, gethek ne hì pha bran shii lijieg yi pha ayang ro. Ji-è khabang shii wuii srane akhiiriie ria mage bo. Naro akhiiriie shii igobi fog ruii pha ù yie ne chiih-è ai sem shii sikhi jia doh ruii ne gu chiang nane na chiang pha Misiahò pha mijin ji cho yi phro. Yie srane gethek ro muthanthek mijin ishak shii phi.
Jipha thimiang riang duiine shii Isu è rajan hà wuiiramuii shii, Isu ne chi-iy ruii. Ai è iphem hingmuii jia lumuii moe shii um pha doh ne ji pha iphem hingmuii shii wuii dun, jimagunde ji shii nyie de oi pha irabthek um bie iang, ji-è, ai ne hingmuii ji shii yao, "Na ne khuchung de iwoi awoi sha phro!" Ji è yaodang pha ji shii ji pha iphem hingmuii ne gow dun.
Samoythek è ji doh mage ne zab wiengphleg dun. Ithek è sai, "Khi è rek ne ji pha iphem hingmuii ne ribjia gow dun phlei?"
Isu è chang, "Gu ne nathek yao, nathek ne migi now ne ìujia de athan arone, nathek de gu è hì pha iphem hingmuii shii rek pha duiine nyarek mua phro. Hì jia asi pha yi nathek ne hì pha phiing shii nyayao mua." "Hùg ne khamuii hà chiih dun bo è yao ne de ji nyarey dun. Nathek è migi now arone, nawaithek è sia ne nyie lia pha ji phi ruii phro."
Humblo shii hasam boh sam mage, chiih-è khasao ne run lakhung shii jao thog. Isu ne run pha idoh hà dun srane awai khrug shii tharo rone athan dang pha men dun. Samoythek è Isu shii chun ne ho, "Masdo, gathek iy sha pha rek muii pha ji ne na athieg bey?"
Isu è jai srane ji pha hasam nane khasao shii yung, ji è giung dang shii ji pha hasam ne them dun. Thiichiih ne bajo liijiing rey dun. Chiihphado, Isu è awai samoy shii yao, "Nathek ne nyie rek ne rum phlei? Thuh de nathek ne migi oi ba bey?"
Jishii ithek ne Isu blia ji doh mage ne bajo rum dun chiih-è awaithek chung yao rai, "Hì ne hanyie lei? Hasam nane khajaothek de ai miyao nuii dun ro!"
Ji è rek ne rai shii, bajo chia dun pha ji è habjuang re sha pha rek mage ne, ai samoythek è ai moe shii wuii srane yao, "Gethek ne bajo chia jong dun ro, ichiih shii ne thiigthek de inui oi pha ithua ro. Ithek shii thoh sha mage bo, chiihphado, awaithek è thiigthek chiih-è raighò sow srane awai thek chie niing pha nya pheg mua phro."
Isu è yao, "Nathek ne ithek shii chie pha phi mage bo."
Ithek è Isu shii sai, "Gathek è bajarai hà wuii srane liiman simedthek wieng nyi pha iweb pheg ne phi ne chie yi pha yang bey?"
Ji-è Isu ne ithek shii sai, "Nathek shii khama iweb um lei ne riig mage bo." Samoythek è ithek shii sai nathek shii iweb khama um lei, ithek è yao gathek shii ne iweb guii chiih-è ù nyi um bie ro. Ji-è ithek è Isu shii yao, "Iweb guii chiih-è ù nyi um ro."
Ji è yao mage ne Isu è awai samoythek shii yung, "zab thek shii ibrog yo rek ne saing lakhung shii dug yi bo." Ji-è ithek ne ibrog yo rek srane dug iang yi, giak ibrog shii ne wieng jia, chiih-è giak ibrog shii ne saguii rek srane dug dun ro. Chiih-è, Isu è iweb guii chiih-è ù nyi ji yi srane hamangkhung hà mau ne Hamangkhung-aphuii shii laso phi. Chiih-è, iweb ji chiing ne phed srane awai samoythek shii phi ne ithek shii thang yi. Chiih-è, ù shii de thang yi. Ji-è ithek ne lumuii dang pha chie dun. Chiihphado samoythek ne led pha iweb chiih-è ùthek sirid snanyi ley dang pha khrab gieng phro. Thiichiih chie noh pho ne itham guii ro.
Isu è awai samoythek shii run iliing hà bajo diigchiao rek ramuii pha doh ruii, nyieliieshii, Hasamkhanoi khed ramuii pha ji è ithek run ne shao thiwie pha rek dun. Ji-è Isu ne hamiang riang shii kho lakhung è lua ne samoythek moe hà wuii ruii, Isu ithek moe thog pha re ramuii shii Isu è kho lakhung shii lua mage ne ithek ne zab rum ne ziak ne yao, "Ai ne ibuii ro!" Ithek è aishii doh mage ne zab rum dun phro.
Isu è ithek shii yao, "Arum chiid pha lubu boh now mage bo! Hì ne gu ro!" Ji è yao srane awai de samoythek rog run shii in mage shii Hasam de awai lum ne them dun. Ji è rek mage ne samoythek ne zab wiengphleg ne wieng dun.
Din shii de ithek ne Isu miyao nuii pha bajo wuii thog ne rai dun. Chiihphado thiichiih shii ithek chie pha nyie de oi, jiè Isu ne samoythek shii ho srane yao, "Gu ne hìthek pho shii bajo bushun now mua ro, nyieliieshii ithek de gu rog shii rai ne inai da-uom re sharo, jiè chie pha nyie de oi pha re dun ro. Gu è ithek shii nyie magunde aphi achie yi pha lui isloi hò dun din gey arone, yang ne lumuii hà chi-iy ne khrisiang ne re mage phro, nyieliieshii giak ne bajo ruang è wuii pha de um phro."
Ai samoythek è sai, "Ichiih balimuang shii ne ithek nyama shii chie yi pha michie ne khi-è yi mage phlei?"
Isu è sai, "Nathek shii iweb khama um lei?" Ithek è yao, "Sudoh ne iweb miley um bie ro."
Ai è ithek shii nyiaklieg shii dug pha yung. Chiih-è iweb miley ji yi srane Hamangkhung-aphuii shii laso phi, chiih-è iweb ji phed srane awai samoythek shii phi ne zab shii thang yi. Samoythek de ji è rek phi. Chiih-è, ithek shii ù de ìujia um bie. Isu è ji de yi srane Hamangkhung-aphuii shii laso phi srane, awai samoythek shii phi ne thang yi. Itham wi branthek de lumuiidang pha iweb chiih-è ù chie phro, chiih-è, ikhe de sirid miley ley um ba dun phro.
Jipha thimiang shii, Isu nane ai samoythek ne Bethany è wuiiramuii shii Isu ne bajo chi-iy-iy dun. Ithek ne ìujia ruang ba shii Isu è irab bajo um pha Iphem hingmuii jia doh mage, ji-è, Isu ne ji pha Iphem hingmuii shii iwoi sow pha wuii dun. Ji-è rek magunde, ji pha Iphem ne iwoi awoi ro, nyieliieshii, ji pha hingmuii ne iwoi woi pha ishak are ba ro. Ji-è, Isu ne ji pha Iphem hingmuii shii thamiie, "Sudoh è thiwing ne na iwoi ne hanyie è de achie mua phro!"
Ji è yao phane samoythek de yoi.
Din pha thimiang riang, Isu nane ai samoythek ne ji pha lumuii è lua din mage shii, ji pha iphem hingmuii ne iriing è yi dang ne zab goh ne um iang pha doh phro. Diyu nyie re pha ji Phithar ne nowluii srane Isu shii yao, "Masdo, riig mage bo, hì pha iphem hingmuii ne na è thamiie marui pha ji è iy dun ro."
Isu è ithek shii yao, Hamangkhung-aphuii shii migi rek mage bo. Gu nathek shii izai yao dang phro, hanyie è lubu è migi now srane hì pha phiing shii hùg srane khamuii hà fen bo ne yao na de, jine re dun phro. Jishii, ithek è nyie yao pha ji shii migi now chid phro, chiihphado, re ruii phro, chiih-è ji re pha rek phi phro. Jiphachiang è gu nathek shii izai yao dang phro, "khuchung magunde, nathek migi è Hamangkhung-aphuii shii sia srane nyie lia magunde, nathek jine mua jong rone migi rek bo, chiihphado, nathek è nyie lia pha ji ne phi ruii phro." Nathek jai srane Hamangkhung-aphuii shii sia pha saro arone, misia sia pha ishak shii nathek shii hanyie magunde gidieg rek ne de aishii khung phi bi bo, chiihphado nathek ro asi pha blia rek pha ji de Hamangkhung-aphuii è khung phi phro.
Nai jia Isu yi Genesareth pha khabang ring shii riu ramuii shii branthek è Hamangkhung-aphuii ro miyaogam nuii pha ai moe shii zab reng ne wuii thog. Ai è run nyi yi kho ring pha lakhung shii yie ne ruii pha doh; jishii ù ua pho è jithek thoh marui ne chiugthek bsang ramuii shii, Isu è Simon ro run lakhung shii khurog srane, aishii yao, run jishii kho ring ji è thithe hà nyong yi pha yao. Isu è run iliing shii dug srane bran ibrogthek shii yua.
Ai è yao ched mage shii, ai è Simon shii yao, "Naro run thithe khajam hà yie srane, chiih-è na nane naro ijak yi naro chiug è ù zum pha mua mage bo."
Simon è chang, "Masdo, gathek è zab habiu chiug mua shii, jia de azum mua ro. Ji shii na è yao muii arone, gu è chiug nyamuii riig." Ithek è chiug mua mage shii, ù yi bajo phieng srane chiug de ji pha rek dun. Ji è ithek gai pha run hà awaithek ijakthek shii wuii ne ithek shii nong gieng bo è leb ne ho. Ithek è wuii srane run nyi shii ù ley chab ched shii run yi kho iliing hà zem pha rek. Simon Phithar è nyie rey pha ji riig srane, Isu lagiung moe shii bam srane yao, "Ithong, Na gu moe è dun bo! Gu ne bajo layog bran ro!"
Awaithek muzum pha ù ji è ai nane ai rog pha branthek ne zab wiengphleg dun. Ji duiine Simon ro ijak Jems nane Zebedi pha dufuii Jon de wiengphleg dun. Isu è Simon shii yao, "Arum chid rabo; sudoh è thiwing nane branthek shii zum ruii phro."
Ithek è run shii kho ring lakhung hà yie ne, zab manathek thoh marui ne, Isu rog shii luagieng.
Nai jia Isu è awai samoythek rog shii run lakhung hà in srane ithek shii yao, "Cho gethek khabang thrang pha ithua hà wuii sharai haro." Ji è ithek ne jao ne wuii dun, ithek run bucho hà ba shii, Isu ne men dun hamblo shii hasam gashau jia khed thog ruii, chiih-è run ne kho è jao ne ley ramuii, ji è ithek ne zab bajo diig rey dun. Samoythek è wuii srane Isu shii chun ne yao, "Masdo, Masdo, gathek ne iy sha pha rek ro!"
Isu è sieng srane hasam gashau shii giung mage shii, ithek de chiih them dang dun, chiih-è thiichiih shii liijiing rey dun. Chiihphado ai è awai samoythek shii yao, "Nathek ro migi ne khiisa lei?"
Jishii ithek ne wiengphleg ne rum dun, chiih-è awaithek chung yao rai, "Hì pha bran ne hanyie ga? Ai è hasamkhanoi shii de giung mage ne ithek de aishii nuii dang dun!"
Nai jia Isu è awai samoythek rog shii run lakhung hà in srane ithek shii yao, "Cho gethek khabang thrang pha ithua hà wuii sharai haro." Ji è ithek ne jao ne wuii dun, ithek run bucho hà ba shii, Isu ne men dun hamblo shii hasam gashau jia khed thog ruii, chiih-è run ne kho è jao ne ley ramuii, ji è ithek ne zab bajo diig rey dun. Samoythek è wuii srane Isu shii chun ne yao, "Masdo, Masdo, gathek ne iy sha pha rek ro!"
Isu è sieng srane hasam gashau shii giung mage shii, ithek de chiih them dang dun, chiih-è thiichiih shii liijiing rey dun. Chiihphado ai è awai samoythek shii yao, "Nathek ro migi ne khiisa lei?"
Jishii ithek ne wiengphleg ne rum dun, chiih-è awaithek chung yao rai, "Hì pha bran ne hanyie ga? Ai è hasamkhanoi shii de giung mage ne ithek de aishii nuii dang dun!"
Isu nane ai samoythek run è in srane khabang thrang Galili pha soh Gerasa hà wuii thog.
Hasieng yi jao ne yem sha pha rek shii, airo snanyi Samoythek è aishii wuii srane yao, "Branthek shii thoh ge bo, nyieliieshii ithek ne nyawuii mua ne thiigthek nane raigthek shii shan ne michie nane men pha ithua nya doh mua phro, nyieliieshii hì pha ithua ne hanyie de oi ro."
Jishii Isu è ithek shii yao, "Nawaithek è ithek shii chie pha phi bo." Ithek è chang, "Gathek zab shii ne iweb guii nane ù nyi um bie ro, na è gathek shii hì pha ibrogthek zab pha michie pheg wuii bo è now bey?"
(Thiichiih shii ne itham guii thog pha bran um.) Isu è awai samoythek shii yao, "ithek shii ibrog jia jia shii saguii rek ne dug yi bo."
Chiihphado shii samoythek è ji è rek phi, Isu è iweb guii nane ù nyi shii yi srane, Hamangkhung hà riig ne Hamangkhung-aphuii shii laso phi srane phed, chiih-è awai samoythek shii phi ne branthek shii thang ba yi. Ithek zab cho pha chie ched mage shii, chiih-è nyie khe pha ji ne samoythek è sirid snanyi chiing.
Nai danyi pha iidoh shii Galili pha Khana thawun pha shii phiyiy rey ramuii. Thiisa hà Isu ro amuii de um, chiih-è Isu nane airo samoythek shii de phiyiy hà ho. Chiih-è phuii phi ched srane, Isu ro amuii è yao, ithek shii ne phuii aled sha ro. Isu è chang, "Nathek ne gu shii ayao chid rabo gune nyie rek chid," "Guro ishak ne thuh de athog ba ro."
Chiihphado Isu ro amuii è airo khiaothek shii yao, "Ai è nyie yung pha ji ne rek phi bo." Thiisa hà Jew so shud pha jariie ruii pha duiine, thiichiih shii lubao pha kho jariie riig um ro, ji pha jariie ji jia shii ne wieng jia jog nya zan mua pha um. Isu è awai samoythek shii yao, "Hì pha jariie shii kho ley zan mage bo" Ai è zab pha jariie shii kho ley phrid dang pha zan, chiih-è aishii yao, kho giak yi fuang hà thoi srane michie pha ilkhi bran shii phi mage bo. Ai è kho ji yi, Ji-è rek ne yie shii michie rek pha ilkhi jiè chai ne riig shii, kho jine phuii rey dun. Jimagungde ai hì pha phuii khi è khia thog phaji ne athieg (jishii ji pha phuii khi è khia pha ji ne kho chau pha khiao ne thieg); jiè ai è phiyiy bufuii shii noh srane yao, igobi shii zab ne phuii wie phi ne niing, chiih-è biwen è lumuii niing ched pha iidoh shii phuii bsieng ji phi, jishii na ne phuii wie ne thuh de ruii bamuii ro! Isu è hì pha igobi buang ne Galili pha gaithek shii rek srane, airo biisiie doh yi, chiih-è airo samoy de aishii migi now.
(Nyieliieshii ai è ji sai pha ji ne Philiph shii chai pha sai). Awai ne thieg jong ai ne nyie reg chid.
Ji pha iidoh Philiph è yao, nathek shii Ìujia chie pha iweb zab shii cho phane liiman sikhi wem nyi è huak ne pheg chid phro. Chiih-è airo yoh samoy jia, Simon Phithar beng mua pha ai khuii Andrew è yao, "Ichiih bufuii jia shii iweb guii nane ù nyi um ro. Jishii ji pha iweb nane ù è zab shii achie cho phro." Ji pha iidoh Isu è ithek shii yao, ithek shii dug yi mage bo. (Chiih-è thiichiih shii saing ire de bajo um.) Ji-è aishii ji pha lakhung shii dug, thiichiih shii bran itham guii um ro. Chiihphado shii Isu è iweb ji yi srane Hamangkhung-aphuii shii laso phi srane aishii thang, ji duiine uà jide yi srane ithek shii thang, Chiih-è ithek khama chie mua pha ji chie, chiih-è zab pha bran lumuii chie ched. Ai è awai samoy shii yao, "Ikhe pha iweb ji khrab bo; nyieliieshii iweb amua yi rabo. Chiihphado nathek è branthek chie ched pha iidoh shii iweb guii è ikhe pha idum-iriim yi sirid snanyi ley pha chiing.
Chiih-è samoy run shii in srane guii riig labiang thog pha ran shii, Isu yi kho lakhung è lua srane ithek hà rai ne wuii ruii, ithek ji riig srane rum dun. Isu è aishii yao, "Arum chid rabo, hì ne gu ro!" Chiihphado ai è Isu shii sang ne run lakhung hà dug noh, chiih-è run yi khthiie ai khi hà wuiiramuii pha soh hà thogdun.
Ji-è rek pha iidoh shii, Thiberias pha khabang shii Isu awai samoythek shii dong thog. Ji hi è rey phro. Simon Phithar, Thomas (iwen ro è ho muii pha ji), Nathanael (jia yi Galili Khana pha ro), Zebedi ro dufuiithek, chiih-è Isu ro gai samoy nyi ò shii um. Simon Phithar è gai shii yao, "Gu ne ù ua sha wuii pha ro." "Ithek è aishii yao," Gathek de nathek rog shii wuii gieng pha ro. Ji-è yao rai srane ai run shii in ne wuii dun, jimagungde ai ji pha habiu shii nyie jia rang de azum mua. Hasieng siang mage shii, Isu yi kho ring shii wuii ne riu, jishii samoy è ai ne Isu ro è athieg mua ro. Chiihphado è ai è ithek shii sai, "filiaothek bran nathek nyie magungde zum mua bey?" Ai è chang, "Nyie de amua ro." "Ai è ithek shii yao," Nathek ro chiug run pha phazoi hà moa mage bo, ji arone ù mua ruii phro. Ji-è ai è chiug moa mage shii thado ari mua din, nyieliieshii chiug shii ne ù bajo um dun. Chiih-è Isu è miie rek muii pha samoy è Phithar shii yao, "Hì ne Ithong chak ro!" Phithar è Ithong chak ro è yoi mage ne, ai awai yung fiie srane (awai yung than muii) chiih-è kho iliing hà lung dun. Chiihphado è gai samoy de run è iring hà wuii srane chiug ley ù ji ri gieng, nyieliieshii ai yi ji pha soh è giia wieng jia nyama pha de asi pha ji um iang. Ai è kho ring hà yie thog mage shii ai è bai fu ne ù chiih-è iweb ziao ne ruii pha doh. Chiihphado he Isu aishii yao, "Bsa hà nathek muzum pha giak ù thayi mage bo." Simon è wuii srane chiug ley ù ji khia wuii, jimagungde ù yi wieng jia è saguii è uom um, jimagungde bajo ù tho magunde chiug ne ìujia rang de aji dang.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
Isu è Khaphernaum hà khud mage shii, Roman pha dumuii jia è aishii si srane nong phi pha khung ne yao: "Masdo, guro khiao rad ne hò hà biang shii thieng ne, asid mua dang pha bajo diig muii ro."
"Gu ne aishii wuii srane gang phi ruii phro," Isu è yao.
Oh asi masdo! Jipha dumuii è Isu shii chang, yung bie bo, gu nashii gu hò hà wuii yi sbo de asi ro, chiih-è gu khiao ne wie rey ruii phro. "Gu è lakhung shii de boh dumuii riichai um ro, chiih-è gu bucho shii siphahithek um ro. Gu è hanyie shii yung wuii bo! Chiih-è wuii; chiih-è, hanyie jia shii thawuii! Bo è yung chiih-è ai thawuii, chiih-è gu è gui khiao shii yung, hì rek bo! Chiih-è ai rek phi."
Isu è ji yoi mage shii, ai ne anomuluii pha rey ne ai rog shii luagieng pha branthek shii yao. Gu è nathek shii yao, gu è Israel hà hì duii pha migi adoh ba ro. Gu è izai yao, bajo thek ne bichiu nane hakhoi è wuii srane Abraham, Isakh nane Jackhob rog shii hamangkhung pha Sajathua pha michie shii dug ruii phro. Jishii, hanyie nathek ne Sajathua hà um pho shii ne igiia hà fen ruii phro, thiisa hà ithek ne shiinyinthek khriieg ne cho ruii phro. Chiihphado Isu è dumuii shii yao. "Hò dun sha bo, chiih-è na è nyie migi rek pha ji ne nashii rek ruii phro."
Chiih-è ji pha ishak shii dumuii ro khiao ne gang dun.
Isu è khabang khlei pha ithua Gadara soh hà wuii thog mage shii, bran nyi ne wiengmuang è wuii ruii pha ai è si iang. Jipha branthek ne ibuiithek um srane bajo buii ro jiè hanyie de ji pha lumuii hà lua pha chua oi. Khthiie ithek è ziak, "Gathek rog shii na nyie yang lei? Hamangkhung-aphuii pha Dufuii! Na ne gathek shii khriig pha ishak ibi hà lago phi pha wuii ne bey?"
Thiichiih è muna ruang asi pha ji shii wak brog ram ne um. Ji-è, ji pha ibuiithek Isu shii khung ne yao, "Na è gathek shii khia pha rek arone, gathek shii ji pha wak brog hà thoh ge bo!"
"Dun bo" Isu è ithek shii yao; jiè ithek thoh srane wakthek hà dun dun. Zab ibrog ne sak miang hà ran srane khabang shii wo ne zem dun.
Wakthek gayiig pha bran ji è ran srane thawun hà wuii dun, ibuiithek rog pha branthek shii nyie rek phi zab phaluii yao mage. Ji-è, ji pha thawun pha branthek Isu shii si pha wuii dun; chiih-è ithek è aishii doh mage shii, ithek soh shii thoh ne dun bo ne khung ne yao.
Branthek dun dun shii, giak bran è Isu hà hanyie miyao ayao mua pha bran noh thog ruii, nyieliieshii aishii ibuii um. Jishii, khthiie dang shii ibuii fuang khia mage ne, bran ji ne jao ne yao, zab pha branthek ne wieng dun, "Gathek è hì duiine rek pha blia ne Israel hà de khuchung de adoh ba ro!" ziak ne yao.
Chiihphado shii giak branthek è Isu hà ibuii um ne miegthi nane miyao ayao mua pha bran jia noh ne wuii thog ruii. Isu è ji pha bran shii gang phi, Ji-è ai ne miyao yao muadun chiih-è, mieg de doh muadun.
Isu ne ji pha ithua thoh marui ne Thaire nane Sidon pha rajan pha soh hà wuii dun. Thiichiih rai pha Gananithek hò-amuii jia è aishii wuii thog ruii, "Dawid pha Dufuii!" Ai è choh ne yao. "Gu shii bushun now phi bo! Masdo gu dimi ne ibuii um chiih-è awie dang pha rai muii ro."
Jishii Isu ne ji pha hò-amuii shii nyie miyaogam ayao, airo samoythek è aishii wuii srane khung ne yao, "Jipha hò-amuii shii dun gey bo! Ai ne gethek idoh lua ne bajo roh ruii phro!"
Isu è ithek shii chang ne yao, "gu shii ne Israel pha shiishai san dun pha ji so pha thoh bie ro."
Ji è yao mage shii ji pha hò-amuii è Isu lai moe shii bam srane yao, "Masdo gusa shii nong phi bo!"
Isu è chang, "Aniphiing ro michie ne yie srane choi shii fen ne phi mua pha ji adunmey phro."
"Jine izai ro, masdo," ai è chang! "Jishii, choi de Ithong chie ne thiibliie è chiih dun pha ji è nya chie mua phro."
Ji-è, Isu ne aishii chang ne yao, "Na ne migi bajo um pha hò-amuii ro! Na è nyie yang pha ji ne na shii rek ruii phi phro." Ji è yao dang shii bimi ji ne gang dun.
Ithek è bran ibrog um pha ji shii thog din shii, bran jia è Isu shii wuii srane lagiungniing, ne yao, "Masdo! Gu dufuii shii bushun now phi bo! Aishii ne siug pha miiriie um ro. Jipha miiriie è bajo sam srane aishii bai kho hà blebbleb chiih yi ro. Gu è na samoythek shii noh ne wuii shii, ithek è aishii gang arek mua phi ro."
Isu è chang, "Nathek ne migi oì pho nane adunmey pha bran ara! Gu ne nathek rog shii khama chia ne rai gieng phlei? Gu ne nathek rog shii khama khan dam? Jipha bufuii ne ichiih gu moe shii noh mage bo!" Isu è ibuii ragung shii giung mage, ibuii ragung de bufuii ji è fuang khiadun. Chiih-è ji pha ishak dang shii bufuii ji de gangdun.
Hamblo shii awie pha ragung è jiang pha jia è Hamangkhung-aphuii ro Misiahò shii wuii thog srane ziak ne yao, "Na ne gu rog shii nyie blia um lei? Nazareth pha Isu, na ne gu shii diig phi pha wuii ne bey? Na ne hanyie lei? Ji gune thieg muii ro, nane Hamangkhung-aphuii pha So muapho ro."
Ji-è rek mage shii, Isu è giung ne yao, "Airo pha bucho è fuang khia mage bo!"
Ji è yao mage shii, ibuii ragung ne sham ne khrif srane ziak ne ji pha bucho è fuang khia dun ro.
Isu nane ai samoythek ne dinne Gerasa pha soh thug um pha Galili khabang iring pha ithua shii thog dun. Thiichiih thog ne Isu run è fuang nya lung dang shii, thiichiih pha wieng muang hà rai pha bran jia si iang. Jipha bran shii ne awie ragung è jiang ne um. Ai ne idang wieng muang hà rai, hanyie de aishii zum ne chiih-è ajoi mua ro, aishii shiirnai thang è lai wad joi magunde, shiirnai ne biethiak ne lai è dia srane dumrim rek muii. Ai ne bajo gang pha ji è hanyie de aishii azum mua ro. Inai de, habiu de, ai ne wieng pha duchoi shii lua ne rai, chiih-è phiingthek hà shan ne lua srane ziak ne awai shii lubao è giao.
Ai è Isu wuii ruii pha doh mage ne, Isu moe shii ran srane bam ne khung srane gang goh è yao, "Zab è giu pha Hamangkhung-aphuii ro Dufuii, Isu! Na ne gu shii nyie blia um ga? Hamangkhung-aphuii chiang è na gu shii diig aphi rabo!" Ai è ji yao ruii pha ji ne nyieliieshii Isu è ji pha awie ragung shii fuang khia mage bo è yao.
Ji-è, Isu de aishii sai, "Na beng nyie beng phlei!"
Jipha bran è Isu shii chang, "Gu beng ne ibrog ro, nyieliieshii, gu iliing shii awie ragung ne bajo um ro." Ji è chang srane ai è Isu shii khung ne yao, awie ragung shii ji pha thiig è ruang athoh ge rabo.
Thiichiih inui pha phiing shii wak brogpho è wak ibrog jia ram ne rai iang pha doh. Awie ragung è Isu shii khung srane yao, "Gathek shii ne ji pha wak ibrogthek bucho shii thoh mage bo." Ji è yao mage ne, Isu è jithek pha awie ragung shii ji pha wak ibrog shii thoh ge. Jipha itham nyi um pha wak ibrog ne khabang hà rei ne ran srane khabang hà biung ne zem dun ro.
Wak brogpho è jithek re pha doh mage ne ran srane thiigpho chiih-è raigpho shii de zab yao mage, ji è yao mage ne ithek de nyie re dun pha ji riig pha thiichiih shii wuii thog.
Jishii, ithek ne, nawaithek pha aphuii-amuii shii anong phi pha ithek ne jine Hamangkhung-aphuii rone yao phro, Ji-è thuh shii ne nathek è awaithek aphuii-amuii shii anong yi ara ro. Hì duiine, ithek muyua hì dun thog pha hìne Hamangkhung-aphuii pha miyaogam shii snai yi phro. Ji asi bie pha ji duiine ithek è gai bliathek de bajo rek ne rai.
Din ne Isu è ibrogthek shii ho din srane yao, nathek de gu miyao nuii ne ìd mage bo. Nyie magunde, fuang è bucho dun phane Iphey shii zea azen ro. Zia rab phane bucho è fuang khia ruii pha ji è zea rab ruii phro. [
Ji è yao ched ne Isu è ithek shii thoh marui srane Thaire beng pha rajan moe hà wuii dun. Ji hà wuii thog mage shii ai ne hò jia shii khud srane ithek è athieg yi pha ug ne rai dun. Ji è rai dun magunde, ai ne thiichiih shii ug ne arai mua. Ibuii ragung jiang pha bimi jia pha amuii è Isu wuii thog pha ji yoi mage ne khthiie wuii srane Isu lai luii shii bam ne yao. Jipha hò-amuii ne Jew asi ro, ai ne Phoenikhia du-ùa Syria pha thiig hà giak pha bimi ro. Ai è Isu shii wad khung ne yao, "Gu dimi shii ibuii ragung è jiang pha ji ne na ne khia maphi bo." Isu è chang, "Igo bi ani phiing shii yem ne chie yi bo. Aniphiing pha michie yi srane choi shii yem muii pha ji dunmey ne bey?"
Ai è Isu shii chang, "Masdo" "Na miyao jine izai chak ro, jishii aniphiing pha michie thiibliie è nyiak hà chiih dun pha ji ne choi de nyachie mua phro."
Ji-è, Isu è aishii yao, "Na ne khthiie hò dun din mage bo, hì pha miyao chiang è, na dimi pha ibuii ragung jine khia jong ne rai iang pha doh ruii phro."
Ji è yao mage ne ji pha hò-amuii ne hò dun ne riig shii, ibuii ragung ne izai ai dimi è khia jong dun pha doh ruii phro.
Bran jia yi ibrog re-è chang, "Masdo, gune guro dufuii na shii noh phro, nyieliieshii aishii ne ibuii ragung um ne ayao mua ro. Ibuii ragung, aishii bangchiie rek mage shii ai ne nyiak hà thud ne, chiih-è ai sem è imamiung khia ne, chiih-è shiinyin de khreig srane, zab gangwieng ne rai dun phro, gu è na samoythek shii ibuii ragung khia phi bo è yao shii ithek ne akhia mua phi ro."
Isu è ithek shii yao, "Nathek ne migi anow pho bey? Gune nathek rog shii khama phiang rai mua gieng phlei? Gune nathek rog shii khama phiang zud mua phlei? Jipha bufuii shii gu moe hà noh mage bo!" Ithek è aishii Isu moe hà noh.
Ragung è khthiie Isu shii doh mage ne ai è bufuii shii ne sham ba yi, chiihphado nyiak shii fen srane shan ne sem è imamiung khia phro. Isu è ai aphuii shii sai. "Ai è rek pha ji ne khama re lei?"
Ai è chang, "Ai mirek hì ne ìu è rek ro. Idang aishii ne ibuii ragung è bai hà chiih-è kho hà fen ne ua muii pha rek phro. Na è rek mua arone! Gathek shii bushun rek ne chiih-è gathek nong phi bo."
Um, Isu è yao, "Nathek è nawaithek shii rek mua arone! Bran hanyie shii migi um pho ne zab nya re mua ruii phro."
Ai aphuii è khthiie ziak srane yao, "Gune migi um ro, jishii akhriig ba ro, muna um yi pha gu shii nung phi bo!"
Isu è riig shii bran ibrogthek ne ai moe shii nui wuiiramuii, jiè ai è awie pha ragung shii yung mage. Ai è yao, "Khohphang chiih-è sem ayao mua pha ragung wo! Gu nathek shii yung phro bufuii è fuang khia srane, chiih-è, dinne bufuii shii awuii dang sha rabo!"
Ragung è ziak mage, bufuii jine awie dang pha thud sra driiedriie sham ne chiih-è fuang khia dun. Bufuii jine bi-iy duiine doh dun ro, chiih-è zab è yao, "Hì pha bufuii ne iy dun ro!" Jishii Isu è bufuii shii sieng yi pha awai wad è khoh srane ne noh ne nong phi phro. Chiih-è ai ne riu mua dun.
Isu è Jewthek misiahò ji thoh marui srane Simon hò hà wuii dun. Simon ro khiing ne bajo hakhangzia ne rad ji è ithek è Isu shii ji pha hò-amuii chiang yao iang. Ai è wuii srane hò-amuii biang moe shii riu ne hakhang jishii khia bo è giung. Ji-è giung shii hakhangzia pha ji de hò-amuii è khia dun, chiih-è ai khthiie sieng srane ithek shii chie niing pha rab phi.
Isu run è khabang ring hà lung shii, ibuii ragung um pha thawun pha bran jia aishii si, nai bajo è ji pha bran ne yung de aguii pha chiih-è hò hà de arai phi, jimagunde ai ne idang wem muang hà rai. Ai è Isu shii doh mage shii, goh gang è choh srane ai lai shii awailum ne bam srane ziak ne yao, "Hamangkhung-aphuii pha Bajo Giu pha Dufuii Isu!" Na gu è nyie chid pha um lei? Gu na shii khung ne yao phro, gu shii lago aphi rabo Ai è hì yao pha ji ne nyieliieshii Isu è ibuii ragung shii ai bucho è fuang khia mage bo è giung. Aishii ne ibuii ragung è blebbleb thoh dun, chiih-è ai wad nane lai shii shiirnai rek ne joi srane phatheg hà chab ne ruii magunde ai è shiirnai ji biathiak srane ibuii è balimuang hà noh ne dun marui. Isu è aishii sai, "Na beng nyie ga?" Ai è chang, gu beng ne 'Mob' ", ro, nyieliieshii bajo ibuii yi aishii khuddun. Ibuiithek ji è Isu shii khung srane yao gathek shii jam nyahiung bucho hà athoh rabo. Thiisa phiingduii moe shii wak brog bajo um iang, ji è gathek shii ne Wakthek iliing shii thoh ge bo è yao ne ibuiithek è Isu shii khung ne yao, chiih ithek shii ai è ji hà thoh ge. Ithek ji pha bran è khia srane wak brogthek shii khud dun. Zab pha wak brogthek ne phiingduii è buzam ran srane khabang shii wo ne iy dun.
Wak brog shii gayiig rek ne rai pha bran ji è nyie rey pha ji doh srane, ji è ai ne bajarai nane raig shii ran srane jithek pha mua yao mage. Branthek è nyie rey pha ji riig wuii dun, chiih-è ithek Isu shii wuii thog mage shii, ibuii fuang khia dun pha bran ji yi khani wie rey srane yung guii ne Isu lai moe shii dug ne rai pha doh, chiih-è ithek ne zab rum dun.
Gu nathek shii izai yaodang phro, ichiih um pha giak branthek de Hamangkhung-aphuii pha Sajathua ji adoh sapho shii ne a-iy ba phro.
Damiley pha idoh shii ai è jithek yao, Isu è Phithar, nane Jon, chiih-è Jems shii ai è noh srane phiingduii lakhung hà sia pha wuii dun. Ai yi siaramuii shii, ai mizia ne yoh lai khlei dun, chiih-è airo yung de khlieng mo chuang dun. Hamblo shii bran nyi yi ai rog shii mulo pha doh. Ai ne Moses nane Elija ro. Hamangkhung pha biisiie è doh yi srane ai ne Jerusalem hà iy ne Hamangkhung-aphuii ro munow ji zab rek pha Isu shii muloramuii.
Phithar nane ai ijakthek yi men dun jimagunde ithek siangfad srane Isu shii riig shii biisiie nane bran nyi yi ai rog shii riu ne um pha doh. Bran nyi ji è Isu shii thoh marui ne dun din dun shii, Phithar è aishii yao, "Masdo, Gethek ichiih shii um pha ji ne khama wie ro, gethek ne ichiih shii haliig thek uom rab pha ro, jia yi na shii, jia yi Moses shii, chiih-è jia yi Elija shii." (Ai è de ji yi izai athieg mua ai è nyie yao pha ji ne.)
Bran jia yi ibrog è ziak mage, "Masdo! Gu na shii khung dang phro, gu dufuii shii riig mage bo guro dufuii ji jia bie ro!" Ibuii ragung è aishii khud srane hamblo shii ziak ne awailum ne chiih srane chiihphado sem è imamiung khia; aishii ne bajo duhug phi ne ruii srane diig yi. Gu è na samoythek shii khia phi bo è khung ne yao shii, jishii ithek è ne akhia mua phi ro.
Isu è chang, "Nathek ne migi arek pho nane ichiig pha branthek ara! Gu nathek rog shii khama rai dam mage phlei?" Gu khama chiieng nathek shii zud dam phi phlei? Jishii ai è bran jishii yao, "Na dufuii shii tha hà yie mage bo."
Bufuii ji yi wuii mage shii, ibuii è aishii jog thoh srane aishii ne nyiak lakhung hà thud pha yi. Isu è ibuii ragung shii giung mage shii, ji pha bufuii ne gang rey dun, chiih-è ai aphuii shii idoh phi din muii. Zab pha branthek Hamangkhung-aphuii pha gang blu ji riig srane wiengphleg dun.
Awai samoythek shii yao, branthek è Isu mirek pha jithek zab riig srane wiengphleg bamuii ro.
Isu è miyao ayao mua pha ibuii shii gieng; Chiihphado è ibuii fuang hà khia mage shii, ji pha bran ne jao ne yao mua. Ji-è thiichiih pha bran ibrogthek de wiengphleg dun,
Chiih-è samoy jia è Kho Phabi pha khiao jia shii airo phazoi pha kho hab chie mage.
Jishii Isu è yao, "Ji khriig sha phro!" Ai è ji pha bran kho shii khoh srane gang phi.
Chiihphado Jon ro muaphothek è thoh marui srane dun din shii, Isu è bran ibrog shii ai chiang ji jao ne yao: "Nathek è balimuang shii Jon hà wuii shii, nyie shii luthong ne wuii phlei? Nathek yi hasam è saing rab yi thenia thania pha ji riig wuii ne bey? Nathek fuang hà nyie riig pha wuii phlei? Bran yi wie yung guii pha ji riig wuii ne bey? Bran hanyie è ji duiine guii ne sang ne rai pho ne saja hò hà doh ruii phro! Gu shii yao riig bo, nathek fuang hà wuii srane nyie riig wuii phlei? Chaigthek shii riig wuii ne bey? Ji ne izai chak ro, jimagunde ithek ne chaig è de bajo boh jia doh yi. Jigigam shii yao pha ji ne Jon ji chak ro, ‘Hamangkhung-aphuii è yao, gu ne gui mua pho shii naro lumuii hong yi pha na ibi thoh ge phro.’ Isu è yao," Gu è nathek shii zai yaodang phro, "Jishii idang rai pha bran è de Jon boh ba ro. Jishii Hamangkhung-aphuii pha Sajathua shii ìu um ne de ai ne Jon è de boh ba phro."
Zab pha branthek è aishii yoi, ithek nane mijin thanphothek dungdang ne Hamangkhung-aphuii ro giang nak ne, ithek de Jon ro khowo yie. Jishii Pharisithek nane Iphey yua pha masdothek è Hamangkhung-aphuii munow pha miyao ji snai srane Jon ro khowo de ayie.