Milagres de Jesus

AYeso te bakpatɔn nɛ akpey akak kyang

27 Na aYeso tsin won azɔng, bakpatɔn bafaa ku kuus mo, ba ta kutɔ, ba fɛ̀ ni iwu, <<Arim agwɔm aDauda, fok angmishish yit!>>

28 Ama fɛ́ nɔ ari kakak, bakpatɔn e, tsɛ ba ku sɛ azɔng, a fɛ̀ ni iba, <<Iyin nɔɔk yin atsak fok imi da kyem in ki te yin kyang ɛ?>>

Ba fɛ̀ ni iwu, <<Ey, aTisa!>>

29 A ma ka ba ra ayisi, a fɛ̀ ni iba, <<Won ni i ki sot yin kpaf ti inɔɔk atsak yin,>> 30 ayisi ba wat a tarak. Ama anɔng, aYeso ka ba kɔrɔk kuto yɛ, <<Da i bi tak yin akak ikyɛng fi ite awo.>> 31 Ngma na anɔng, iba ya kashon ni ishara ifɛ̀ naton wu kaakyɛ ni mben e.

Bakpatɔn bafaa fɛ́ ba ka ba te kyang

29 Ni izen fɛ́ aYeso nɛ bafi imɛɛs wu tsin won aJeriko, kudyɛng banet ku kuus mo. 30 Bakpatɔn bafaa kin se ni ifam irèn. Fɛ́ ba fok yɛ aYeso se ni igot, ba ta kutɔ na agap yɛ, <<ATisa*, Arim agwɔm aDauda! Fok angmishish yit!>>

31 Kudyɛng banet e ka ba kɔn, ba fɛ̀ ni iba, na ba te yuu. Wat iba bang fɛrɛng nya-nyat, yɛ, <<ATisa, Arim agwɔm aDauda, fok angmishish yit!>>

32 AYeso nyeseng, a ka ba yes, a ka ba rip yɛ, <<Akyɛ fi iyin shim yin, in ki nye yin ne yɛ?>>

33 Iba fɛ̀ ni wu, <<ATisa, iyit shim yit, ayisi yit na a tɛ a yɛrɛ.>>

34 AYeso fok angmishish ba, wɛt a ra ayisi bá. Ni izen izining, ba kpa yɛrɛ, ba wat ba kpa ku kuus mo.

AYeso te akpatɔn kyang

1 Izen fɛ́ aYeso se ni igot, a di akpatɔn fɛ́ ba ku tes anɔng. 2 Bafi imɛɛs wu ku rip yɛ, <<Anet Itees, angan wu a nye inɛn, anet yo kɛ batek fi i sak ba ku tes akpatɔn ɛ?>>

3 AYeso fɛ̀ ni iba, <<Ayet nek inɛn wu, kɛ i fɛ́ batek awo, i te anɔng mok ba di tonong kutomong Adakunom ni kutset wu. 4 Nɛ karɔ ren resek mo gbɛy, i se gbing-gbing ni in ra yit kutomong ayɔng fɛ́ a di tom. Katuk kang ka wuruk, fɛ́ vit anet fɛ́ a da kyem a ra kutomong. 5 Ni imi mo azeng azatse, Imi wu in yet mgbɛy azatse me.>>

6 Ama fɛ́ a fɛ̀ anɔng, a cik ncicɛ aben, a di gyɔrɔp irɔp, a di bas ide na ayisi anet e. 7 A da ma fɛ̀ ni iwu, <<Tseng tsi so ni kudung aSilom.>> (ASilom yet Atom.) Nek anɔng, anet e tsɛ a so, a bun ari na yɛrɛ gyat.

2 Akparong akak tsɛ, a te gururuk ashon aYeso, a fɛ̀ ni iwu, <<ATisa, ki ngɔn shim, i da kyem i di te jɛrɛ.>>

3 AYeso nabak kubɔk wu, a di ra anet e. A fɛ̀ ni wu, <<Ey, imi shim, te kyang!>> Ni izen izining, ikparong wat iku won. 4 AYeso ma fɛ̀ ni iwu, <<Fok, i bi tak akak ikikak awo. Di berem tsi tonong àware ice ngɔn, nabak kunang fɛ́ aMusa fɛ̀, nɔng i da tonong fok a mi da te kyang.>>

2 Azɔng wu, fɛ́ banet bakak ku bɛ́ na anet akak fi kurɔm se mɛrɛk, ni men na meneng. Fɛ́ aYeso di inɔɔk atsak ba, a fɛ̀ na anet irɔk e, <<Nggon in, ngɔn bi daam awo, ba mi da fuut anɛn ngɔn.>>

3 Awɛt ni izen fɛ́ bakak ayɛt bafi itees ntsi aMusa fok anɔng, ba kpa tɔ wɔɔn ba yɛ, <<Anet yong beseng iyerek Adakunom!>>

4 AYeso rēn kuyiring bá, nek anɔng, a fɛ̀ ni iba, <<Akyɛ sak fi i bɛ̀ yin kuyiring kuduk e anɔng ɛ? 5 Ingan de fi iwat se byɛrɛ yɛ? Na ba fɛ̀, <Ba mi da fuut anɛn ngɔn a,> ke na ba fɛ̀, <Dorok tsik, da tseng,> ɛ? 6 Awɛt nɔng i da rēn yin fok Arim Anet bi ice azeng azatse na a fuut anɛn.>> A da nɛ tirik, a fɛ̀ nɛ anet fi kurɔm se mɛrɛk e, <<Dorok tsik, sok kameneng ngɔn, tseng sak ari.>> 7 Wat anet e, dorok, a yit irén.

10 Anet akak se azɔng fi kubɔk wu mi sɔrɔk. Banet bakak azɔng tsɛt irèn fɛ́ ba di ki sɛ aYeso ni inɛn, ba ku rip, <<Ntsi yit fɛ̀ na ba te anet kyang atuk aSabat ɛ?>>

11 AYeso fɛ̀ ni iba, <<Won in fɛ̀ yit, akak ayɛt yin itsamang wu azining kpa ni ibong atuk aSabat. Anet e, da nabak kubɔk, a di tun iye awɛ? 12 Anet wat itsamang ni iratek! Nek anɔng, ntsi fɛ̀ na ba nye ikyɛng itek atuk aSabat.>>

13 A fɛ̀ na anet e, <<Nabak kubɔk ngɔn.>> Wat anet e, nabak iko, kubɔk e wat ku te kyang kpaf ti kuzining e.

AYeso te akun akak kyang

1 Ama anɔng, aYeso tseng sak nɛ aRushelima nek amok akak afɛ́ baYahuda. 2 Azɔng ayɛt iwɔp aRushelima, bakat ne katisi ibón, kudúng ashi kukak, se azɔng fɛ́ ba yes iko ni ilem Aram ye, aBetesda, kudúng e bɛ̀ narɔ inɔs natoon. 3 Azɔng fɛ́ banet nrɔk zizɛɛt di sosok; bakpatong, nɛ bakun, nɛ bayɔng fi nrɔm man sɔrɔk.* 5 Anet akak azining azɔng, mi sok ayɛ nsɔk ntaat ina nkara (38) ne bɔrɔng ni kurɔm. 6 Izen fɛ́ aYeso ku di nɛ meneng azɔng, ni iwu mi rēn kudot izen fɛ́ anet e mi sok nɛ bɔrɔng ni kurɔm e, aYeso fɛ̀ ni wu, <<Ngɔn shim a da te kyang ɛ?>>

7 Anet irɔk e fɛ̀ ni wu, <<Akɔk-ashon, vit imi nɛ anet fɛ́ a di ki sɛ mo, a di sɔɔn sak ayɛt ashi me. Izen fi in da fi in te nyɛk in tsin nɔ, nɛ kak tin nɔ ashon yin.>> 8 AYeso fɛ̀ ni wu, <<Dorok tsik, sok kushit ngɔn, da yit irèn!>>

9 Ni izen izining, anet e wat a sɛ kukyang; a sok kushit wu, a tseng.

Kunom e yɔng, fi ikyɛng deng kin te, kin yet kunom aSabat (kunom ifɔɔn baYahuda).

46 AYeso tɛ tsɛ nɛ aKana afɛ́ aGalili, narɔ fɛ́ a kin di tirik ashi sak ashi anap. Azɔng, anet itomong igwɔm akak kin di se fi nggon wu kin se na meneng ni rɔk nɛ aKafarnahum. 47 Ni izen fɛ́ anet e fok yɛ, aYeso mi won mben aJudiya, a mi bɛ́ ta ni mben aGalili, a tsɛ narɔ aYeso, a ku tsot akabɔk fok yɛ, na ku a ku kuus mo sak nɛ aKafarnahum, a da bin tsɛ a te ari wu kyang.

48 AYeso fɛ̀ ni wu, <<Ki da iyin di yin ikyɛng ayɔɔt, ni ntomong abes ninyɛn awo, i da nɔɔk yin atsak awo.>>

49 Anet itomong igwɔm e, fɛ̀ ni wu, <<Kabɔk atekari, bit ziri kɔn nggon yin bi ku.>>

50 AYeso fɛ̀ ni wu, <<Tseng sak ari. Nggon ngɔn da te kyang.>>

Anet e nɔɔk atsak ni ifɛ̀ aYeso, a yit irèn sak ari. 51 Ni wu resek mo dan ta ari, a wat a nyim nɛ basam wu ni irèn, ba ku tak fok ari wu mi te kyang. 52 A ka ba rip izen fi nggon e kpa sɛs kukyang, ba fɛ̀ ni wu, <<Ifes e ku won ni ire, bakat itsɔm izining ifi inom.>>

53 Ada me wat a rēn, fok kpaf izen e yɔng fɛ́ aYeso fɛ̀ ni wu, <<Nggon ngɔn da te kyang.>> Nek anɔng, ngma banet ari wu nɔɔk atsak nɛ aYeso.

54 Kutomong abes kang kin yet kufe afaa, fɛ́ aYeso kin ra nɛ aGalili, ama fɛ́ a ne na aJudiya.

20 Ba se na anɔng, abining akak fɛ́ a bɔrɔng ni iteng nasok ayɛ kusɔk abe afaa, ne ama wu, a ra kanu ikpin aYeso, 21 abining e fɛ̀ ayɛt iyɛ wu, <<Ki in kyem in ra kanu ikpin wu kyɛk, in da sɛ kukyang.>>

22 AYeso tirik, a ku di, a fɛ̀ ni iwu, <<Angas yin, sak iyɛ ngɔn ting! Inɔɔk atsak ngɔn mi da te kyang*.>> Ni izen izining, abining e wat a sɛ kukyang.

AYeso donong Kanamang kakak nɛ Abining fɛ́ a teng Asok

18 Na aYeso tsin ren cɛɛt, akɔk-ashon akak, tsɛ a te nyɔk ashon wu, a fɛ̀ ni iwu, <<Kangas hom tsin mɛsɛng ku. Awɛt ngɔn bɛ́ tsi di sak kubɔk naton ka, ka da tɛ ka dorok.>> 19 AYeso dorok, a ku kuus mo gung na bafi imɛɛs wu.

23 Izen fɛ́ aYeso tsɛ a ta ari akɔk-ashon e, a sɛ bafi ihwyɛrɛ iyɔm, ni kudyɛng banet nkum awɔng kaakyɛ. 24 A fɛ̀ ni iba, <<Di nang yin irèn! Kanamang e mi ku awo, ka se ni nda.>> Banet e ku mas. 25 Ama fɛ́ ba mi tun kudyɛng banet e amatse, aYeso nɔ ayɛt e, a sok kubɔk anamang e, kanamang e dorok.

Iku aLazarus

1 Anet akak fɛ́ ba ku yes aLazarus kin se ni irɔk. Ayɛt aBetani, kaban wɔp fɛ́ aMarya nɛ anganyining aMata di se. 2 AMarya me wu fɛ́ arunyining wu aLazarus kin ku rɔ, iwu me wu fɛ́ a kin korok aYeso name nkɔn ntek nɛ atak, a kin ku yɛs atak e nɛ akwoy ice wu. 3 Nek anɔng, banganyining te itom sak narɔ aYeso, <<ATisa, icɛk iyɛ ngɔn se ni irɔk.>>

4 Ni izen fɛ́ aYeso fok anɔng, a fɛ̀, <<Kurɔk e kang yet kufi iku awo. Awɛy, ku yet kuyɔng fɛ́ Adakunom di ki sɛ iratek, nɔng Arim Adakunom di ki sɛ iratek ayɛt e.>> 5 AYeso shim aMata nɛ anganyining nɛ aLazarus. 6 Ngma nɛ anɔng, izen fɛ́ a fok, yɛ aLazarus ku rɔ, a ban nye nkɔs nfaa azɔng narɔ fɛ́ a di se.

7 Ama anɔng, a nɛ a fɛ̀ nɛ bafi mɛɛs wu, <<Won in bun yit sak na aJudiya.>>

8 Wɛt bafi imɛɛs wu fɛ̀ ni wu, <<Ka! Anet Itees, ni nkɔs nang, fɛ́ bakɔk-ashon baYahuda tsɛt ba da bara nɛ ata, ngma nɛ anɔng i shim in bun yit azɔng ɛ?>>

9 AYeso fɛ̀ ni ba, <<Kaakyɛ kunom bɛ́ mgbɛy nfɛ́ agyip kusɔk abe afaa awɛ? Ngma ayɔng fɛ́ a tsees ni mgbɛy, a turuk kutak awo, nek a yɛrɛ mgbɛy azatse nang. 10 Ngma ayɔng fɛ́ a tsees ni irèn, vit mgbang nɛ a turuk kutak nek vit iwu ni mgbɛy.>>

11 Ama fɛ́ a mi gang ifɛ̀ me dɔng, a fɛ̀ ni ba, <<Afidang yit aLazarus mi men nda; Imi shim in tsin ku shemeng.>>

12 Bafi imɛɛs wu fɛ̀ ni wu, <<ATisa, kɛ a se ni nda, a da te kyang kɔ.>> 13 AYeso se ni cɛɛt naton iku aLazarus, nɛ bafi mɛɛs wu sok fok a se ni nda.

14 Nek anɔng aYeso kaba tak wɛshɛk fok, <<aLazarus mi ku,

AYeso men ni itsombos

23 AYeso ma nɔ ni kukyɛ ashi, bafi imɛɛs wu ku kuus mo. 24 Ni izen izining, itsombos ikak tsi i ne makiyi ni izek e, nkum ashi fɛ́ a nɔɔs ayɛt kukyɛ ashi makiyi. Awɛt aYeso se ni nda. 25 Bafi imɛɛs e tsɛ ba ku shemeng, ba fɛ̀ ni wu, <<ATisa, ki sheshek yit! Ashi da ki ya yit!>>

26 AYeso fɛ̀ ni iba, <<Iyin fi bɛ̀ yin inɔɔk atsak igyebet, akyɛ sak fi iyin bɛ̀ yin nnyim anɔng ɛ?>> A dorok, a gyɔng itsombos ni idoro ashi me, karɔ wat ka te yuu.

27 Ikyɛng e te banet yɔɔt, ba fɛ̀, <<Akyɛ kuri anet yong ɛ? Fɛ́ awun ni kuren ashi ku foos ifɛ̀ yɛ?>>

15 Fɛ́ kahwyɛ bɛ́ bakat, bafi imɛɛs wu, bɛ́ ba ku sɛ, ba fɛ̀ ni wu, <<Di kunom mi tse, karɔ kang se wiin. Te banet e ni irèn, nɛ ba nɔ na naban wɔp, na ba tsɛ ba tsɛt ice bá ikyɛng iya.>>

16 Wat aYeso fɛ̀ ni iba yɛ, <<I se gbing-gbing na ba tseng awo, iyin ka ba nɔɔk yin ikyɛng iya.>>

17 Ba fɛ̀ ni iwu, <<Vit iyit ni ikikak azeng, nkum ágbang akpam atoon, ni ìzos ifaa kyɛk.>>

18 A fɛ̀ ni iba, <<Bɛ́ yin ni ide aze.>> 19 Wat a fɛ̀ na ba ka ba sas na ba sosok naton agam. A sok ágbang akpam atoon e, ni ìzos ifaa me, a ta ayisi sak azanɛn, a nɔɔk ifeng sak narɔ Adakunom nek ide, a bushung, a nɔɔk bafi imɛɛs wu, na ba kabasa banet e. 20 Banet ngma kusum, ba yas ba hwyas. Ishɛrɛp e tuk, wɛt bafi imɛɛs wu, shining nakɔmɔng kusɔk abe afaa, na fi icɛk e fi i tuk. 21 Kudot banet fɛ́ ba kin yas e, kin se batek wɔɔn ba agup atoon, dang nnon nɛ banyining.

25 Bakat itsɔm itaat ifɛ́ adiding, aYeso tsin tseng naton ashi sak itse narɔ bá.

AYeso ya na banet fɛ́ ba wat agup anaas

32 AYeso yes bafi imɛɛs wu sak narɔ wu, a fɛ̀ ni iba, <<In foos angmishish banet bang, nek nkɔs ba ntaat atut azeng ni imi, wɛt vit iba ni ikyɛng iya. Imi shim in ka ba te ni irèn ni nzong awo, nek nsong bá da rasak ni irèn.>>

33 Bafi imɛɛs wu ku rip yɛ, <<In da se yit ikyɛng iya akɛ nate ayit kang, fi in da nɔɔk yit kudyɛng banet tɛ ba bang ɛ?>>

34 AYeso ka ba rip yɛ, <<Ágbang akpam amang fi i bɛ́ yin ɛ?>>

Iba fɛ̀ ni iwu, <<A se kanakataat nɛ nabin ìzos gyet kyɛk.>>

35 AYeso te banet ngma na ba sosok aben. 36 Wat iwu sok ágbang akpam kanakataat nɛ nabin ìzos e, a nɔɔk ifeng sak na Adakunom, a kpa bushung e, na nesek bafi imɛɛs, ni iba kabasa banet e. 37 Ngma ba, ba yas ba hwyas. Ama anɔng, bafi imɛɛs wu tusung icɛk e fi i kyɛk, ba sɛ nakɔmɔng kanakataat. 38 Kudot banet fɛ́ ba ya, kin se bamatek kyɛk agup anaas, dang ba di moon nɛ banyining ni nnon.

Itarasa itsɔm mben

24 Ama fɛ́ aYeso nɛ bafi imɛɛs wu tsɛ ba ta na aKafarnahum, bafi ishashang itsɔm mben nek inok kutu iya Adakunom ntong, tsɛ ba sɛ aBitrus ba fɛ̀ ni wu, <<Anet itees yin tarasa itsɔm mben awɛ?>>

25 A fɛ̀ ni iba, <<Ey, a tarasa.>>

Ni izen fɛ́ aBitrus tsɛ a nɔ ari, aYeso wu a tung fɛrɛng, <<ASiman, ngɔn di anɛ? Bangan bá ba tarasa bágwɔm itsɔm inɔɔs ni itsɔm mben ɛ? Ayet nnon mben e ya? Ke banet baduk ɛ?>>

26 ABitrus fɛ̀ ni wu, <<Na baduk.>>

AYeso fɛ̀ ni wu, <<A sot nnon mben e tarasa awo.>> 27 Kɔn in bi ka ba beseng yit iyɛ, tse ni ikang, i da tsi barak iguk ngɔn. Ìzos yɔng fi i da tun yit, tarak kanu yɛ, i da sɛ kuta itsɔm kukan, tun iko, tsi ki tarang yit mo itsɔm inok kutu iya Adakunom ntong e, ifɔɔn ni inaan.

AYeso te kakon atafo kawɛy

18 Nadiding bop akatson, na tsin bun sak ayɛt iwɔp, nzong daam aYeso. 19 Fɛ́ a di kakon atafo kakak ni fam irèn, a tse bakat azɔng, a tsɛ a sɛ vit ica ni ka, wɔn afumung kyɛk. Wat a fɛ̀ ni ika, <<Ngɔn bi ti ites ica awo, ayɛ na ayɛ!>> Ni izen izining, kakon e wat kakoot.

20 Ni izen fɛ́ bafi imɛɛs wu di ikyɛng fi ite, ayɔɔt ka ba yit. Wat ba ku rip fok, <<Akyɛ sak kakon atafo me wat ka koot ziri anɔng ɛ?>>

21 AYeso fɛ̀ ni iba, <<Won in ki tak yin atsak, ki i bɛ́ yin inɔɔk atsak, vit ite digit, da nkum ikyɛng fɛ́ ba nye na kakon atafo me kyɛk fi i da kyem inye yin awo, i da kyem ni fɛ̀ yin ni ihwyanang ye, <Tun ice ngɔn aze, tsi kpa ayɛt izek,> i da te kpaf anɔng. 22 Ki i bɛ́ yin inɔɔk atsak, i da sɛs yin ngma nkyɔrɔk fi irisim yin ina ayɛt awon.>>

Kuweneng nɛ aKana

1 Ni kunom kufɛ́ ataat, ba kin ra kuweneng ne kaban wɔp aKana nɛ aGalili, nggɔ aYeso kin se azɔng. 2 Ba kin rini aYeso nɛ bafi imɛɛs wu, sak narɔ iweneng e bà. 3 Ni izen fɛ́ ashi anap bɛ́ a gang, nggɔ aYeso tsɛ fɛ̀ ni wu, <<Ashi anap ba mi gang.>>

4 AYeso fɛ̀ ni wu, <<Aneng, inaan yet akyɛ ayet e yɛ, Izen hom resek.>>

5 Nggɔ wu fɛ̀ nɛ banet itomong e, <<Nye yin ngma ikyɛng fɛ́ a fɛ̀ ni yin.>>

6 Ányin ábush karataat afɛ ata kin se bakat azɔng; fɛ́ baYahuda di kus nkap kpaf ti nggɔn ba di se, kaakyi kubush kuzining ya ítsɛ́n-imaas nsɔk nfaa sak ntaat. 7 AYeso fɛ̀ ne bafi itomong e, <<Shining yin ábush e nɛ ashi.>> Ama fɛ́ ba shining ábush e nɛ ashi me nyif, 8 a fɛ̀ ni ba, <<Bɔ yin gyeet, tsi nɔɔk yin akɔk-ashon kuro iweneng e.>> Ba nye kpaf anɔng.

9 Izen fɛ́ akɔk-ashon kuro iweneng e fubuk ashi fɛ́ a mi sot ashi anap e, ni wu dan rēn karɔ fɛ́ ba di ne ni ina. Nkum basam e kyɛk fɛ́ ba irēn, nek anɔng, a yes amatek agwol e.

10 A fɛ̀ ni wu, <<Amatek agwol tin nesek ashi anap atek ni imɛsɛng e, ama fɛ́ kaangan mi sɔ a ku kyem, na nɛ na bene nɛ ayɔng fɛ́ da amak ta awo ni gang e anɛ, wɛt ngɔn tsi sak atek e, ni turung ina yɔkɔnɔng ɛ!>>

11 Kutomong abes kang fɛ́ aYeso kin ra nɛ aKana afɛ́ aGalili, iko ko ku yet kutomong abes imɛsɛng wu, bafi imɛɛs wu nɔɔk atsak ni iwu.

6 A fɛrɛng anɔng nek a di mara aFilibus, nek iwu rēn ikyɛng inye gyam.

7 AFilibus fɛ̀ ni wu, <<Kɛ itsɔm itarang anet itomong nfi nfɛn nkara da kyem ba di shan akpam fɛ́ kaakyɛ anet fɛ́ a se azeng, di sɛ kicek e awo!>>

8 Azining ayɛt bafi imɛɛs wu, fɛ́ ba ku yes Andarawus, arunyining aSiman Bitrus wat a fɛrɛng yɛ, 9 <<Kabacam kakak kang azeng fɛ́ ka bereng ágbang akpam atoon, ni ìzos ifaa akabɛs, awɛt idɔng da kyem akyɛ ni ngane ni kudyɛng banet tɛ ba bang ɛ?>>

10 AYeso fɛ̀ ni ba, <<Fɛ̀ yin nɛ akaangan ne a sonong.>> Karɔ me kin bɛ̀ agam makiyi, batek fɛ́ ba kin se ni sosok, kin se agup atoon. 11 AYeso ma sok akpam e, a ra awon natoon e, a kabasa banet fɛ́ ba se ni sosok e, a tɛ a ka ba kaba ìzos e anɔng ba, kaangan ya ma na ku kyem. 12 Ama fɛ́ kaangan mi ya ba hwyas, aYeso ma fɛ̀ ne bafi imɛɛs wu, <<Tsi tusung yin ngma ikyɛng fi ikyɛk. Da i bi won yin ikikak bi beseng awo.>> 13 Nek anɔng, ba tsɛ ba tusung ina, ba shining nakɔmɔng kusɔk abe afaa, ni icek akpam atoon afɛ́ alikama yɔng fɛ́ a tuk, ama fɛ́ banet yas ba hwyas.

19 Ama fɛ́ ba mi tsɛ bakat amil ataat sak ataat ni ibit,* ba fɛ̀ ba di aYeso na tsin tseng naton ashi, sak ibɛ narɔ kukyɛ ashi me, inyim ka ba yit makiyi. 20 Wɛt iwu fɛ̀ ni iba, <<I bi fok yin nnyim awo, imi yɔng.>> 21 Nek anɔng wu, ba da ne ba shim ba ku nabak kubɔk, a sɛ a di nɔ ayɛt kukyɛ ashi me, ni izen izining, bafɛ́ ba di ba mi tse ba ta ni ice ibanang, sak narɔ fɛ́ ba tsin di tseng.

AYeso nɛ ízos abes fɛ́ ba yisik

1 Ama anɔng, aYeso bang tɛ tonong ice wu, sak ne bafi imɛɛs wu, ni ice ibanang izek aTibariyas. Ikyɛng e kin se ane: 2 ASiman aBitrus, nɛ aToma (fɛ́ ba ku yes aDidimus), nɛ aNataniyel fɛ́ a ne na aKana afi mben aGalili, ni nnon aZebedi nafaa, nɛ bafi imɛɛs aYeso bakak bafaa, ba kin se gung azɔng. 3 ASiman aBitrus fɛ̀ ni iba, <<Imi yɔng in tsin yisik ízos,>> Wat ishɛrɛp bafi imɛɛs e fɛ̀ ni iwu, <<Iyit da tse yit ngma ni ngɔn.>> Ba wuruk, ba tse ba nɔ ayɛt kukyɛ ashi, wat katuk e yɔng kusum, ba yit ikikak awo.

4 Ne bop adiding, aYeso bɛ́ a nyeseng ni ibanang. Bafi imɛɛs wu vit irēn fok iwu yɔng.

5 AYeso ka ba rip ye, <<Bacam, i mi kyem iyit yin ízos ikak ɛ?>>

Ba fɛ̀ ni iwu, <<Awey yo!>>

6 AYeso fɛ̀ ni ba, <<Ta yin agunung yin abak kubɔk iyak kukyɛ ashi me, i da yit yin ide.>> Nek anɔng, ba ta agunung ba kpaf te aYeso di fɛ̀, ba bɔ ízos dot makiyi, ba kyem ba kɔrɔk agunung e awo, nek kunanang.

7 Wat afi-imɛɛs e yɔng, fɛ́ aYeso di te iyɛ ni wu, a fɛ̀ ne aBitrus, <<Ye aTisa yit yɔng!>> Izen fɛ́ aSiman Bitrus fok fɛ́ a fɛ̀ ni wu, <<Ye aTisa yit yɔng,>> a sok kukpin wu a te iko, nek a kin tsang tun iko, a wat a furuk sak ayɛt ashi. 8 Ishɛrɛp bafi imɛɛs e, ku kuus mo sak ayɛt kukyɛ ashi me, nɛ ba kɔk agunung e, ni ízos ngmef. Nek kuyikyik ba kin se bakat atak anakat ataat sak ni ice ibanang. 9 Izen fɛ́ ba mi wuruk sak ni ice ibanang, ba di ica irong, ni ízos naton e, nɛ akpam.

10 AYeso fɛ̀ ni ba, <<Bɛ́ yin ni ízos ikak, ayɛt idɔng fi i tsin meseng yit yin.>>

11 Wat aSiman Bitrus tse a ngarak kukyɛ ashi me, a ka ba se mo ikɔrɔk agunung ízos e sak amatse. Agbat azós fɛ́ a se ayɛt agunung e, se anakat azining ni nsɔk ntoon, ni ide itaat (153). Ngma ni kudot de, agunung e sarak awo.

Inɔɔk atsak agbat atsom

5 Ni izen fɛ́ aYeso nɔ na aKafarnahum, agbat atsom akak tsɛ a ku sɛ, a tsot akabɔk ni iwu. 6 A fɛ́ ni iwu yɛ, <<ATisa, asam hom se gbɛrɛk ari, a bɔrɔng makiyi.>>

7 AYeso fɛ̀ ni wu, <<In da tsin in ku te kyang.>>

8 Agbat atsom e fɛ̀ ni iwu, <<ATisa, imi kyem fi ngɔn da tse ari hom awo. Ngɔn fɛrɛng kyɛk, asam hom da te kyang. 9 Nek imi ice min, in se aben igwɔm, in bɛ̀ batsom aben ni imi. In fɛ̀ na a yo, <Tseng,> na tseng. Ni in fɛ̀ na a ya, <Bɛ́,> na bɛ́. In fɛ̀ na asam hom, <Nye ide,> na nye anɔng.>>

10 Ni izen fɛ́ aYeso fok anɔng, a ku te yɔɔt, a fɛ̀ na bayɔng fɛ́ ba se ni iku kuus mo, <<Won in ki tak yin atsak, in mi kyem in sɛ akak ni aIsrela kusum fɛ́ a bɛ̀ kuri inɔɔk atsak anɔng awo. 11 Imi fɛ̀ ni iyin banet dot bi nes abatin, nɛ abace, na ba sosok na ba ya amok gung nɛ aIbrahim, nɛ aIshaku, nɛ aYakub* ni igwɔm azanɛn. 12 Awɛt ba bi woro nnon ari igwɔm amatse, ni rin, azɔng wu ba bi ya ának na ba ros anyi.>>

13 Awɛt aYeso fɛ̀ na agbat atsom e, <<Tseng! Kpaf ni inɔɔk atsak ngɔn, ba mi da nye ne.>> Ba te asam wu kyang kpaf ni izen e yɔng.

AYeso te banet irɔk itseng bafaa kyang

28 Ni izen fɛ́ a tsɛ a ta ni nyi ku ya kufi mben bafɛ́ aGadarin*, bafi kurɔk itsɛ́ng bafaa ne na arɛk bá, sak inyim nɛ aYeso. Nek kuren fɛ́ ba ras, vit anet fɛ́ a kyem a got irèn e yɔng. 29 Ba ta ntɔ yɛ, <<Arim Adakunom, akyɛ fi ngɔn tsɛt ni iyit ɛ? Ngɔn shim i bi i ki zoot yit ni izen yit resek dang nye yɛ?>>

30 Kukpara áza kuratek kin se ni iya kuyak sak ashon ba gyet. 31 Itsɛ́ng e tsot akabɔk na aYeso yɛ, <<Ki i da ki tun yit, ki won yit nin nɔ yit ayɛt áza na.>>

32 Wat iwu fɛ̀ ni ide, <<Tsɛng yin!>> Nek anɔng, i wuruk, i tsi i nɔ ayɛt áza me, kukpara áza me ngma kusum, wat ku di berem ni kuren sak ni ice ibanang, a kpas ayɛt ashi, a kus. 33 Banek áza me, ta itsi, sak ayɛt iwɔp, ba tsɛ ba taas banet ngma ikyɛng fi ite, ni ikyɛng fi ite na bafi kurɔk itseng e. 34 Banet iwɔp ngma kusum wuruk, ba tsɛ ba sɛ aYeso. Ni izen fɛ́ ba tsɛ ba ku sɛ, ba tsot akabɔk fok yɛ na ka ba won mben bá.

32 Ni iba tsin wuru, ba se ni inɔs na anet akak fi kurɔk itseng ku sak a kyem a cɛɛt awo narɔ aYeso. 33 Ama fɛ́ ba tun itseng e, anet fi kucɛɛt tsang ku gaat e, kpa cɛɛt. Ayɔɔt yit kudyɛng banet fɛ́ ba se azɔng, ba fɛ̀, <<Ba mang di ikyɛng ti ideng ni aIsrela awo.>>

Bakak di tɛmɛng aYeso fok a ras kutomong nɛ agap aBɛɛlzɛbul

22 Ama anɔng, banet bakak tse na akpey akpatɔn akak fɛ́ a bi itseng, ba tse ni wu narɔ aYeso. AYeso ku te kyang, a kpa cɛɛt, na yɛrɛ gyat.

Anya aKanan fɛ́ a nyeseng gak ni inɔɔk atsak

21 AYeso dorok a won azɔng, a tseng sak ni mben aTiya nɛ aSidon. 22 Abining akak, afi iwɔp aKanan, fɛ́ a se abak azɔng, a bɛ́ ni wu, a sok kutɔ a da fɛ̀, <<ATisa hom, Arim agwɔm aDauda, kabɔk fok angmishish hom! Angas yin sɔ iyɔm makiyi ni bɔk itseng.>>

23 AYeso fɛ̀ ni iwu ikikak awo. Nek anɔng wu, bafi imɛɛs wu, di ban ni wu fok, <<Ku ro, na a tseng! Nek a yɔng a teng a ki kuus yit mo, na a ki daam yit ni iwɔng.>>

24 A bun ni ifɛ̀ yɛ, <<Ba di tom sak ni itsamang fi i mi wɛs, banet aIsrela kyɛk.>>

25 Abining e, bɛ́ a tsɛ gururuk ashon wu, a fɛ̀ ni iwu, <<ATisa, di se mo!>>

26 Wat aYeso fɛ̀ ni iwu, <<I se gyat na ba sok kuyak nnon, na ba nɔɔk ákabu awo.>>

27 Abining e shim, a fɛ̀, <<Ey, aTisa i se anɔng, wɛt ngma na anɔng, ákabu ya icek nayak atekari ná, fɛ̀ a kpas aben.>>

28 AYeso shim, a fɛ̀, <<Nggɔ, inɔɔk atsak ngɔn bɛ̀ agap! Ba mi da tarang kudaam ngɔn.>> Ayɛt izen e yɔng, angas wu wat a sɛ kukyang.

AYeso te nggon fɛ́ ka bi itseng kyang

14 Fɛ́ ba tsɛ ba ta narɔ kudyɛng banet e, anet akak bɛ́ ne aYeso, a te gururuk ashon wu. 15 A fɛ̀ ni wu, <<ATisa, fok angmishish arim hom, a kus itsitsiring, a sɔ izot makiyi. A tɛn na kpa ni rong, ni izen ikak na kpas na ashi. 16 I mi bɛ́ ni wu na bafi imɛɛs ngɔn, awɛt ba kyem ba ku te kyang awo.>>

17 AYeso fɛ̀ ni iba, <<Iyin bafi kuzam kang, fi i se yin vit inɔɔk atsak, ni kana boroso yin, sak akyɛ kuri izen fi in da woso tsesek ni iyin ɛ? Bɛ́ yin ni nggon e aze.>> 18 AYeso gyɔng itseng e, i wuruk ayɛt nggon e, nkum izen e yɔng, nggon e wat ka te kyang.