1 Wat in di kaban kpa ijɛk ni bɔk iyak aYɔng fɛ́ a sonong ni kuta igwɔm e. Kukpa ijɛk e bi ijɛk ni ko nabak e nafaa, ba di bas na nagang-ace-igwɔm kanakataat. 2 In di agbat atomaza na tsin cɛɛt ni kutɔ gbɛrɛy, <<Angan wu a da kyem a ngamang nagang-ace-igwɔm e, na di tarak kaban kpa ijɛk e yɛ?>> 3 Awɛt vit akak azanɛn, ke azatse, ke aben na kazatse, fɛ́ a kyem a ngamang ke na a tarak kaban kpa ijɛk e ke na a yɛrɛk kayɛt e ayi. 4 In ya ának nek vit ayɔng fɛ́ ba kyem ba sɛ fɛ́ a kyem a tarak kaban kpa ijɛk e na di kayɛt e awo. 5 Awɛt azining ayɛt bashɔn e fɛ́ ni mi, <<I bi tos awo! Di, akukum afi icɛn aYahuda, afi izɔrɔk aDauda, mi ya imara. Iwu da kyem a ngamang nagang-ace-igwɔm kanakataat e, na a tarak kaban kpa ijɛk e.>>

6 In wat in di Itsamang, i se tɛ ba mi tsɛt iye, ni inyeseng nate kuta igwɔm e, nkyɔrɔk ntset nnas nɛ bashɔn e te iye nate. I bɛ́ atom kanakataat nɛ ayisi kanakataat, fɛ́ a yet nabik Adakunom kanakataat fɛ́ ba tom ina sak azatse ngma kusum. 7 I bɛ́, a sok kaban kpa ijɛk e ni bɔk iyak ayɔng fɛ́ a sonong ni kuta igwɔm e. 8 Ama fɛ́ a mi sok kaban kpa ijɛk e, nkyɔrɔk ntset nnaas e nɛ bashɔn nsɔk nfaa kpa aben ashon Itsamang e. Kaangan ba berese izom ni ítsɛ́n fɛ́ ba nye na atsɔm asɛng, ba di shining nkyɔrɔk nkɔn ntek fi in yet awon banet Adakunom. 9 Ba ra abom afas,

<<Ngɔn wu fi i kyem isok

kaban kpa ijɛk e, ni ngamang

nagang-ace-igwɔm e,

nek ba kin da fɛt,

ne nasok ngɔn.

Ngɔn mi shan kutset banet

sak na Adakunom, fɛ́ ba nes

ni nri zizɛɛt, ni icɛ́n zizɛɛt,

ne ni mben azatse zizɛɛt.

10 Ngɔn mi ka ba sak ba sot

igwɔm ne áware, nek ba di

ra Adakunom kutomong,

ba da ya igwɔm naton azatse.>>

11 Ama anɔng, in yɛrɛk in fok kutɔ batomaza hwyɛt, kudot ba, agup naton agup, agup kusɔk ite agup kusɔk. Ba te kuta igwɔm e nate ni nkyɔrɔk ntset nɛ bashɔn e. 12 Ba ra abom ni ntɔ nratek,

<<Itsamang fɛ́ ba fɛt e, a kyem

na a sɛ iratek, ni kurúm,

ni kutsitsɛng, ni kukyem,

ni ízɔk, ni iratek, ni itere!>>

13 Wat in fok kaakyi ikyɛng fɛ́ ba nye azanɛn, nɛ azatse, nɛ aben na kazatse, nɛ ayɛt ashi, ni nkyɔrɔk fi in se ayɛt na, ba ra abom, <<Won itere, ni iratek, ni ízɔk, ni kukyem, ni ku sot kufɛ́ aYɔng fɛ́ a sosok nita igwɔm ni Itsamang e, ayɛ nɛ ayɛ!>> 14 Nkyɔrɔk ntset nnas fɛ̀, <<Anɔng!>> Bashɔn e kpa aben ba ya ntong bà.