Nabos Abik AYohana 18

Ikpa aBabila

1 Ama anɔng, in di atomaza akak a ne azanɛn na tsin tisik. A bi kukyem makiyi, kazatse wat ka shesheng nek ndɛp izɔk wu. 2 A ta kutɔ gbɛrɛy makiyi,

<<A mi kpa!

Agbat aBabila mi kpa!

A mi sot kari ítseng

nɛ kari akaakyɛ

kuri aduk abik,

nɛ kari ngma ngbɛk-gbɛk

nkyɔrɔk nɛ nanon

fɛ́ ba byɛn ina.

3 Nek ngma mben azatse

mi sɔ ashi anap iririm

kujang wu.

Bágwɔm azatse mi

ras irɔs ni iwu,

banet ijik azatse mi

tes kurúm ayɛt aduk

kusot nta wu.>>

4 In ti in fok fok kutɔ kukak fi ku ne azanɛn,

<<Banet in, wuruk yin

ayɛt wu,

kɔn inɛn wu bi ki tat yin,

kɔn izot wu ikak

bi kpa naton yin;

5 nek anɛn wu mi tse

shining sak azanɛn,

Adakunom mi yiring

anyas ko.

6 <<Ku nye yin kpaf ikyɛng fi iko kin ki nye yin e ba;

ku nye yin ne sok kafa

ikyɛng fi ko kin

ki nye yin ne.

Ku ku gyɔrɔp yin itsɛn

ifaa ikyɛng fi ko kin

ki nɔk yin.

7 Ku tang yin iyɔm,

ni mgbang makiyi

kpaf ni ízɔk ni nta

fi iko kin

nesek ice ko.

Ku tsosok kukaa

ni iyɛ ko fok,

<Imi sosok tɛ azɛnɛ;

imi yet akuma awo,

imi bi di

ibeseng iyɛ awo.>

8 Nek anɔng, atuk azining,

izot ko bi bɛ́ zɛngɛ,

iku, nɛ kafa kawe, ni nzong.

Kurong bi ku ko ya,

nek aTisa, Adakunom fɛ́ a

waat akaakyɛ,

bi ku tsɛɛt ishɔt.

9 <<Ni izen fɛ́ bágwɔm azatse fɛ́ ba mi ras kujang ni iwu, fɛ́ ba ya nta bà gung ni wu, bi di atseng kurong fi ku bi ku ya, ba bi tos na ba nye kafa kawe mok iwu. 10 Nek nnyim mgbang fɛ́ ba bi di na tsin sɔ, ba bi nyeseng yik-yik na ba tos,

<Kawɛy! Kawɛy!

Kaa agbat iwɔp,

Kaa aBabila, kuwɔp fɛ́

ba foos ni iko!

Ayɛt igyip izining,

igang ngɔn wat ibɛ́!>

11 <<Banet ijik azatse bi tos nɛ kafa kawe naton ko nek vit ayɔng fɛ́ a tɛ a ka ba ras ijik 12 nkyɔrɔk ijik bà yet: atsɔm-aseng, nɛ atsɔm akan, nɛ ata itsɔm, nkyɔrɔk kurúm aben, ni nkpiin alinen, ni nzwey e, nɛ asiliki, nɛ asɛng kyiu, ni nkyɔrɔk nkɔn ntek zizɛɛt-zizɛɛt, ni nkyɔrɔk anyi azɔkɔm zizɛɛt-zizɛɛt. Ni nkyɔrɔk fɛ́ ba sɛp na ákon aSitiron, ákon itsɔm, ngma nɛ́ ayɔng fɛ́ ba nye na atsɔm, na atsɔm awe, nɛ ata inok fɛ́ a nɛp. 13 Ni nkyɔrɔk asinamɔn, ni nkyɔrɔk nkɔn ntek e, na amir, nɛ afirankinsen; nɛ ashi anap, nɛ name, ni mkpe ntek, nɛ alikama; ni inyak, ni ibon, ni itsaap, ni itsaap atsɔm, nɛ banet fɛ́ ba yet basam, ntset banet awe yɔng.

14 <<Ba bi nye, <Ngma nkyɔrɔk ntek fi i di tsɛt ice, in mi tsees, in da won. Ngma kurúm ngɔn ni nkyɔrɔk mgbep ngɔn mi beseng. Vit ngɔn ni i ti isɛ na!> 15 Banet ijik fɛ́ ba ku rɛɛs nkyɔrɔk e nang, fɛ́ ba tees kurúm ni wu, ba bi nyeseng yik-yik, nek nnyim mgbang fɛ́ a di se. Ba bi tos na ba nye kafa kawe 16 na ba tang nkun,

<Kawɛy! Kawɛy!

Kaa agbat iwɔp!

Ngɔn fi ites alinen atek,

nɛ ares azwey e,

nɛ ares asɛng kyiu,

i gyɛs na atsɔm-aseng,

nɛ ata itsɔm,

nɛ nkyɔrɔk kurúm aben!

17 Ayɛt igyip izining,

ngma kurúm ngɔn e

mi beseng!>

<<Ngma bafɛ́ akyɛ-ashi, nɛ bafi inɔɔs e, nɛ bafi ikɔk akyɛ-ashi me, nɛ bayɔng fɛ́ ba ras ntomong ayɛt ashi, ba bi nyeseng yik-yik. 18 Izen fɛ́ ba bi di atseng kurong fɛ́ a bi ya kuwɔp e, ba bi nye, <Vit kuwɔp fɛ́ ba ki mang nye tɛ agbat kuwɔp kang!> 19 Ba bi tang ntong na ice bà, ne ba tos ni ibeseng iyɛ, na ba nye,

<Kawɛy! Kawɛy!

Kaa agbat iwɔp,

karɔ fɛ́ ngma batek

akyɛ-ashi, di tes kurúm bà!

Ni igyip izining,

kuwɔp e mi wey!

20 Nye yin iyɛ ikan nek ika,

ho kazanɛn!

Nye yin iyɛ ikan,

banet Adakunom

nɛ batom, ne batan!

Adakunom mi tsɛɛt ishɔt ni

ikyɛng fɛ́ iwu

kin ki ra yin e.> >>

21 Ama anɔng, atomaza akak

fɛ́ abanang,

a tehik kunyin kuta kukak

fi kunanang ko se

ti kuta-ikɔɔ,

a barak iko ni izek, a fɛ́,

<<Na agap anɔng,

fɛ́ ba da worok

agbat iwɔp aBabila sak aben,

ba bi tɛ ba ku sɛ awo.

22 Ba bi tɛ ba fok

abom banet-izom,

nɛ bafɛ́ abom, nɛ́ bafi ihwyɛrɛ

nɛ bafɛ́ ágba ni ngɔn awo.

Vit anet kutomong mbɔk

fɛ́ a bi tɛ a ne ayɛt ngɔn.

Ba bi tɛ ba fok iwɔng

kuta-ikɔɔ ayɛt ngɔn awo.

23 Mgbey agaramun

bi tɛ aron ayɛt ngɔn awo.

Ba bi tɛ ba fok kutɔ

amatek agwol

nɛ agwol e

ni ngɔn awo.

Banet ijik ngɔn, kin yet

agbat bafi ijik azatse.

I kin wɔrɔk icɛn azatse

ne nadɔm ira kubok ngɔn.

24 Ni iwɔp aBabila fɛ́ ba kin sɛ

nasok batan Adakunom

nɛ nasok banet Adakunom,

ne ngma banet Adakunom

fi i kin fɛɛs azatse.>>