Nabos Abik AYohana 17

Abining e ni Kunyam-ayit e

1 Azining ayɛt batomaza kanakataat e fɛ́ ba bereng ítsɛ́n kanakataat e, bɛ a fɛ́ ni mi: <<Bɛ, in da ka tonong izot fi kugbat kunyak-agwɔm e da sɔ, kuyɔng fi kusosok naton ashi dot. 2 Ni iko wu bágwɔm azatse di ras kujang, banet fɛ́ ba se azatse di feng na ashi anap afi kujang ko.>>

3 Wat atomaza me di sok ayɛt abik sak na tse. Azɔng wu in tsin in di abining ni sonong naton inyam ikak isɛng kyiu, ba jirim iye na ayerek itok Adakunom. Inyam e bɛ́ àce kanakataat nɛ átom kusɔk. 4 Abining e kana zem na ares fi nse na se tɛ nasok, asɛng kyiu, a gyɛs nek atsɔm-aseng, nɛ ata itsɔm, ni nkyɔrɔk kurúm aben. A bereng itsɛn atsɔm-aseng ni bɔk wu fɛ́ ba di shining ni in gbɛk-gbɛk nkyɔrɔk nɛ amadɔm kujang wu. 5 Ikyɛng fɛ́ ba kin jɛk natii wu de:

<<AGBAT ABABILA, NGGƆ

INYAK AGWƆM KUSUM,

NGGƆ NGBƐK-GBƐK

NKYƆRƆK AZATSE.>>

6 In di abining e mi feng ne nasok banet Adakunom, nasok bayɔng fɛ́ ba bereng kucɛɛt aYeso.

Izen fi in di abining e, a di te yɔɔt. 7 Wat atomaza me fɛ́ ni mi: <<A da te yɔɔt akyɛ? Won in da ka tarak ikyɛng inɛt abining e ni inyam fɛ́ a ngarak iye, fi ibɛ àce kanakataat nɛ átom kusok e. 8 Kunyam-ayit fi ngɔn di yɔng, ku kin se neme, ku se vit kyɔrɔng, ku bi ti ku wuruk ni bong fi ku se vit nkum awo, ni ku ma tsɛng sak iwey ko. Banet azatse fɛ́ da bamang jɛk ayerek bà ni kufumung kutset neme ni itumung kazatse awo, ayɔɔt bi ka ba yit ni izen fɛ́ ba di kunyam-ayit e, nek ku kin se neme, ku se vit yɔkɔnɔng, ku bi ti ku bɛ.

9 <<Ikyɛng e deng tsɛt kutsitsɛng. Ace kanakataat e, yet ahwyanang kanakataat fɛ́ abining e di sosok ni na. 10 A tɛ a yet bágwɔm kanakataat. Batoon ayɛt ba man kus, azining di se mo, azining resek dang bɛ. Izen fɛ́ a bɛ́, i se gbing-gbing na a ya igwɔm nfi kizen gyet. 11 Kunyam-ayit fi ku kin se yaame, ku se vit yɔkɔnɔng, ku yet agwɔm afi nkara. Iwu yet azining ayɛt kanakataat e, a yɔng a tseng sak iwey yuu.

12 <<Átom kusok fi ngɔn di me, a yet bágwɔm kusok fɛ́ ba resek dang shan igwɔm bà, awɛt fi ni igyip izining ba bi se kukyem tɛ bágwɔm ni kunyam-ayit e. 13 Ngma ba bi ite iyɛ izining, ba bi nɔɔk agap bà ni kukyem bà sak ni kunyam-ayit e. 14 Ba bi tang itsom ni Kitsamang e, awɛt Kitsamang e bi ya awɛng naton ba, nek iwu yet aTisa bátisa nɛ agwɔm bágwɔm, a bi se gung nɛ bayɔng fi iwu ki mang yes, nɛ bayɔng fi iwu ki mang myak, nɛ bayɔng fɛ́ ba ku kuus mo ayɛt atsak.>>

15 Wat, atomaza me fɛ́ ni mi, <<Kudot ashi fi ngɔn di yɔng, fi inyak agwɔm e di sosok, a yet banet, kudyɛng banet, mben azatse, ni ìcɛn. 16 Kunyam-ayit nɛ átom kusɔk yɔng e fi ngɔn di, da raba inyak agwɔm e. Ba da ku won gbindis, na ba ku won kpiip; ba da ya inam wu, na ba ku shosh ni kurong. 17 Nek Adakunom mi sak na ayɛ bà, na ba shining kushim wu, ni irèn inyim ice bà ayɛt inɔɔk kunyam-ayit e agap iya igwɔm naton ba, sak izen ishining ifɛ́ Adakunom. 18 Abining fi ngɔn di yɔng, yet agbat iwɔp e yɔng fi ku ya igwɔm azaton bágwɔm azatse.>>