1 Ama anɔng, in di te ayisi ni Kitsamang e tsin ngamang nagang-ice-igwɔm ifi imɛsɛng ayɛt kanakataat e. Wat in fok azining ayɛt nkyɔrɔk ntset nnas e fɛ́rɛ́ng ni kutɔ ti íza, <<Bɛ́!>> 2 In yɛrɛk, in di itsaap ikan ashon hom! AYɔng fɛ́ a ngarak iye bereng kata, wat ba ku nɔk abong igwɔm, asɔkɔ ni iye tɛ agwɔm itsom fɛ́ a tse a ya itsom.

3 Ama anɔng, Kitsamang e tɛ a ngamang nagang-ice-igwɔm e ifɛ́ faa, in fok ikyɛng itsɛt ifɛ́ afaa fɛ̀, <<Bɛ́!>> 4 Ama anɔng, itsaap ikak wuruk, isɛng kyiu. Ayɔng fɛ́ a ngarak iye, ba ku nɔɔk agap itun kukyang azatse, na a sak banet na ba fɛɛs ice bá. Ba ku nɔk iwu kunyin kutsot.

5 Ama anɔng, Kitsamang e ngamang nagang-ice-igwɔm e ifɛ́ ataat, in fok ikyɛng itsɛt ifɛ́ taat e fɛ́rɛ́ng, <<Bɛ́!>> In yɛrɛk, in di itsaap iwe ashon yin! Ayɔng fɛ́ a ngarak e, a bereng ikyɛng imaas kunanang ni bɔk wu. 6 Ama anɔng, in fok ikikak shim ti kutɔ nate nkyɔrɔk ntset nnas e. Ku fɛ́ fok, <<Itsɛn imaas alikama izining kyɛk naton itsɔm iwoso kutomong anet. Ni itsɛn imaas abale itaat kyɛk naton itsɔm iwoso kutomong anet. Awɛt i bi beseng yin name nɛ ashi anap e awo!>>

7 Ama anɔng, Kitsamang e ngamang nagang-ice-igwɔm e ifɛ́ anaas, in fok kutɔ ikyɛng itsɛt naas fɛ̀, <<Bɛ́!>> 8 In yerek, in di itsap fi i se kpɛlɛk ashon yin! Ayɔng fɛ́ a ngarak iye ba ku yes Iku. Karɔ isosok bafaben ku kuus mo ama. Ba ka ba nɔk agap ifɛɛs asa anaas afɛ́ banet azatse ni kutsot, ni nzong, ni izot, ni inyam ayit azatse.

9 Ama anɔng, a ngamang nagang-ice-igwɔm ifɛ́ atoon, In di kaben ni kuta ashosh e, ni ntset bayɔng fɛ́ ba kin ka ba fɛɛs nek ifɛ̀ Adakunom, ni inyeseng naton itaas ifɛ̀ Adakunom. 10 Ba yes ni kutɔ kuratek, <<Wo aTisa fi i bi ízɔk, nɛ ajɛrɛ nɛ atsak, sak akyi izen, fi i bi ni ra banet kazatse ishɔt, ni ka ba zoot nek inos nasok yit ɛ?>> 11 Ba nesek kaangan ba kugboo kukpin kukan, ba fɛ̀ ni iba na ba bang tot ninyɛn nfi kizen gyet, ma ba shining kudot bafidang itomong nɛ baruneng bá fɛ́ ba da fɛs kyɔn tɛ ba kin ka ba fɛs iba.

12 Kitsamang e ngamang nagang-ice-igwɔm ifɛ́ karataat, wat in di, ba nye agbat izuut mben ikak. Kunom wat ku bun kuwe tɛ agbidik áres fɛ ba nye na akwey ibon iwe, kufɛn wat ku sot kuseng tɛ nasok. 13 Ádat aton aza kpas sak azatse, tɛ ica atafo di kpas ki kuwun agap zuut kakon e. 14 Kaza wat ka te bit tɛ ba kunung kushit, ba tun kaakyi ihwyanang ni izek narɔ ye.

15 Ama anɔng, bágwɔm azatse, ni nnon ari igwɔm, nɛ agbat batsom, nɛ barum, nɛ agbat banet, nɛ basam, nɛ bawashak, nesɛk ice bá ayɛt asɔs, ne ayɛt ahwyanang. 16 Ba nye na ahwyanang nɛ ata, <<Di kpas yin naton yit, ki fam yit ni idi ayisi aYɔng fɛ́ a sosok naton kuta igwɔm, nɛ iyɛ-ifɛ Kitsamang e! 17 Nek agbat kunom iyɛ-ifɛ Adakunom ni Kitsamang e mi nye, angan da kyem a nyeseng ɛ?>>