1 Ama ideng, in di batomaza banaas ni nyeseng na atsok azatse anaas, ba tɛnɛng nwun na atsok azatse anaas, kɔng in bi fɛsɛm ke na a beseng mben, ke izek, ke nakon awo. 2 Ama anɔng, in ti in di atomaza akak na tsin ngarak abace, a bereng nagang-ice-igwɔm Adakunom fɛ́ ayet atset. Ni kutɔ kuratek, a yes batomaza banaas e, fɛ́ ba mi ka ba nɔk agap ibeseng mben ni izek. 3 A fɛ̀ yɛ, <<I bi beseng yin mben, ke izek, ke nakon ninyen awo, ma in di te nagang-ice-igwɔm Adakunom na natii basam Adakunom yit ninyen.>> 4 Wat in fok kudot bayɔng fɛ́ ba mi ka ba te nagang-ice-igwɔm Adakunom: agup anakat azining ni nsɔk nnaas nɛ anaas (144,000) fɛ́ ba nes ni icɛn aIsrela.

5 Bayɔng fɛ́ ba ne ni izɔrɔk

aYahuda fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aRuben fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aGad fɛ́ ba di te

nagang-ice-igwɔm ba se banet

agup kusɔk abe afaa (12,000).

6 Bayɔng fɛ́ ba ne ni izɔrɔk

Asha fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aNaftali fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aManase fɛ́ ba di te

nagang-ice-igwɔm ba se banet

agup kusɔk abe afaa (12,000).

7 Bayɔng fɛ́ ba ne ni izɔrɔk

aSimiyɔn fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aLawi fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aIsaka fɛ́ ba di te

nagang-ice-igwɔm ba se banet

agup kusɔk abe afaa (12,000).

8 Bayɔng fɛ́ ba ne ni izɔrɔk

aZebulum fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aYusufu fɛ́ ba di te

nagang-ice-igwɔm ba se banet

agup kusɔk abe afaa (12,000).

Bayɔng fɛ́ ba ne ni izɔrɔk

aBanyami fɛ́ ba di te

nagang-ice-igwɔm ba se banet

agup kusɔk abe afaa (12,000).

9 Ama anɔng, in yɛrɛk, in di kugbat kudyɛng banet fɛ́ vit ayɔng fɛ́ a da kyem a fa ashon hom, ba nes ni mben zizɛɛt, ni icɛn zizɛɛt, ni izɔrɔk zizɛɛt nɛ alem zizɛɛt, ni nyeseng ashon kuta igwɔm e, nɛ ashon Kitsamang Adakunom. Ba tes agboo akpin akan, ba berese ahwyang izizerek ni mbɔk bá. 10 Ba tang ntɔ gbɛrɛy na ba nye,

<<Isheshek yit nes

na Adakunom,

iwu fɛ́ a sosok naton

kuta igwɔm, ni kitsamang e.>>

11 Ngma batomaza me, nɛ bashɔn e, ni nkyɔrɔk ntset nnaas e te kuta igwɔm e nate. Ba kpas pak aben ashon kuta igwɔm e, na ba ya Adakunom ntong, 12 na ba nye,

<<Anɔng! Itere ni ízɔk,

ni kutsitsɛng, ni ifeng,

ni iratek, ni kukyem, ne agap

ni in sot nfɛ́ Adakunom

ayɛ nɛ ayɛ.

Anɔng!>>

13 Awɛt azining ayɛt bashɔn e di rip fok, <<Ba bá fɛ́ ba tes agboo ákpin akan nà, ba yet bangan ɛ? Ba ne akɛ?>>

14 Awɛt imi fɛ̀ ni wu, <<Akɔk-ashon, ngɔn wu i rēn.>>

Iwu ma fɛ̀, <<Ba bang yet banet fɛ́ ba wuruk ayɛt aduk izot; ba mi kusu nkpin bá, na nasok Kitsamang e in sot nkan. 15 Nek anɔng wu,

<Fɛ́ ba di nyeseng ashon

kuta igwɔm Adakunom

ba ku ya ntong

katuk ni kunom

nitu iya ntong wu.

Iwu fɛ́ a sosok naton

kuta igwɔm e, bi ka ba fam

ni kubut wu.

16 Vit i ti ifok nzong ni ba;

vit i ti ifok iyɛ ngash ni ba.

Kunom bi ti ku

ka ba shosh awo,

ke ikikak i ti ka

ba ta vɛt awo.

17 Nek Kitsamang fɛ ka se

nate kuta igwɔm e,

bi sot anek bá.

Iwu bi tsees ni iba ni ikang

fi i nesek ashi kutset.

Adakunom bi ka ba rɛng ngma

nayisi fɛ́ na se na yisi bá.> >>