1 In di ikyɛng ayɔɔt ikak azanɛn, i yet iratek, ikyɛng ayɔɔt. Batomaza kanakataat da bɛ ni izot kanakataat ifi igang e, nek ni bɔk bá wu fɛ́ Adakunom di ki shining namaan wu na fi igang e. 2 In ti di ikyɛng ikak ti izek fɛ́ ba di moon e fi i gyɛs tɛ agyilas, ni kurong. Bayɔng fɛ́ ba nyeseng bakat ni izek e, yet bayɔng fɛ́ ba ya awɛng naton kukyɛng ashi e, nɛ kubannom e, nɛ naton iyerek ko. Ba berese izóm fɛ́ Adakunom ka ba nesek, 3 ba di ras abom aMusa asam Adakunom, nɛ afi Kitsamang e. Ba nye,

<<ATisa, Ada, Adakunom,

agbat ntomong ngɔn,

yet ikyɛng ayɔɔt makiyi.

AGwɔm mben azatse ngma!

Irén ngɔn se tabat,

i yet ifɛ́ atsak.

4 <<Wo aTisa, angan fɛ́ a da fok nnyim ngɔn awɛ?

Angan fɛ́ a da nɔɔk iyerek

ngɔn iratek awɛ?

Ngɔn azingɔn wu fi i se jɛrɛ.

Ngma icɛ́n banet azatse

da bɛ́ ashon ngɔn

na ba da ya ntong,

nek ngma banet mi di

ntomong ngɔn

fi in se tabat.>>

5 Ama nnang, in di ba mi tarak kubut inɔɔk kanu ifɛ̀ fi iyet karɔ iya Adakunom ntong nazanɛn. 6 Batomaza kanakataat e fɛ́ ba bɛ́ ni izoot kanakataat e wuruk ayɛt Kutu Iya Adakunom Ntong. Ba tes nkpin alinen akan fin nɛp, ba rosom agwɔm bá na atoro atsɔm-aseng. 7 Wat akak ayɛt nkyɔrɔk ntset nnaas yaame, nɔɔk batomaza kanakataat e ítsɛ́n atsɔm-aseng na fi izoot kanakataat fɛ́ na da ba shining ina ne naman Adakunom, fɛ́ a se ayɛ na ayɛ. 8 Kutu Iya Adakunom Ntong e wat ku shining nɛ atseng fɛ́ a ni ízɔk Adakunom, ni kukyem wu. Vit akak fɛ́ a kyɛm a nɔ ni Kutu Iya Adakunom Ntong e, ma ama fi izoot kanakataat ka fɛ́ batomaza kanakataat e mi gang.