Nabos Abik AYohana 10

Atomaza nɛ kaban kpa ijɛk

1 Wat in di agbat atomaza a tisik azanɛn. Anɔk ku kunung, ne kata-iza naton ice wu; ayisi wu ron ti kunom, atak wu se tɛ atsik kurong. 2 A bereng kaban kpa ijɛk, fɛ́ ka se ni itarak ni bɔk wu. A sak kutak iyak wu ayɛt izek, ni kufi imen wu naton mben. 3 A ta kukun ti kufɛ́ akukum. Ni izen fɛ́ a ta kukun e, ntɔ izá kanakataat e wat in shan. 4 Ama fi izá kanakataat e fɛ́rɛ́ng, in shim ki in kpa ijɛk; awɛt in fok kutɔ fi ku ne azanɛn, fi ku fɛ́, <<Nɛt ikyɛng fi izá me fɛ̀, i bi jɛk ide awo.>>

5 Wat atomaza fi in mi tsang di ni nyeseng naton izek nɛ naton mben e, nabak kubɔk iyak wu sak azanɛn. 6 Ashiwu ni iyerek ayɔng fɛ́ a bi kutset ayɛ ne ayɛ, fɛ́ a nye kazanɛn ngma ni nkyɔrɔk fi in se ayɛt ka, a nye kazatse ngma ni nkyɔrɔk fi in se ayɛt e, a nye izek ngma ni nkyɔrɔk fi in se ayɛt e, a fɛ̀, <<Vit ishɛrɛp ibeseng izen! 7 Awɛt ni nnom fɛ́ atomaza afi kanakataat shim a fɛɛp kugba wu, ba bi shining nkyɔrɔk fɛ́ Adakunom kin sak ni nɛt, kpaf tɛ fɛ́ a kin tak basam wu batan.>>

8 Wat kutɔ fi ku ne azanɛn e ban ti ku fɛ̀ ni mi: <<Tsi shan kukpa ijɛk fi ku se ni itarak ni bɔk atomaza fɛ́ a nyeseng kutak kukak na izek kukak ni mben e.>>

9 Nek anɔng, in tse na atomaza me, in fɛ̀ ni wu na di nɔk kaban kpa ijɛk e. A fɛ̀ ni imi, <<Shan iko, ya iko. Ku da sak kafa ngɔn kpashak, ngma na anɔng, i da fok rɔrɔtɔt nanu ngɔn ti itong.>> 10 In shan kaban kpa ijɛk e ni bɔk atomaza me, in ya ika. In fok rɔrɔtɔt nanu hom, awɛt fi in mi ya ika, kafa hom te kpashak. 11 Ama anɔng, ba fɛ̀ ni mi, <<Ise gbingbing ni ti itaas ifɛ́ Adakunom sak ni mben zizɛɛt, nɛ alem dot, ni ícɛ́n zizɛɛt, nɛ bágwɔm.>>