1 Kufumung kang, kunung nkyɔrɔk fɛ́ aYeso Kristi kin tarak ina. Adakunom kin ku nɔk ina na a tonong basam Adakunom e nkyɔrɔk fɛ́ gbing-gbing ngmash ni in te. AYeso nye anɔng ni irèn itom fɛ́ a nɔɔk atomaza sak na asam wu aYohana. 2 AYohana taas ngma nkyɔrɔk fɛ́ a kin di fin in yet ifɛ̀ Adakunom nɛ atsak fɛ́ aYeso Kristi taas. 3 Awɛng Adakunom se na anet fɛ́ a fá ifɛ̀ Adakunom ni ikyɛng fi i bi te, awɛng Adakunom se na banet fɛ́ ba foos ide, na ba saas na ayɛ bá ikyɛng fɛ́ ba jɛk ni de, nek izeng e bɛ́ bakat.

4 Imi aYohana, in tsin jɛk sak na bafi ikuus aYeso fɛ́ ba se na narɔ inyis bafi ikuus kanakataat ni mben Asiya.

Won itek ni kusot kukyang fi ku nes na aYɔng fɛ́ a se yɔkɔnɔng, fɛ́ a kin se neme, fɛ́ a bi bɛ́, nɛ nabik kanakataat fɛ́ na se ashon kuta igwɔm wu, 5 ngma nɛ aYeso Kristi, fɛ́ a yet afi kucɛɛt atsak, iwu fɛ́ a yet imɛsɛng ayɛt bayɔng fɛ́ ba man donong ni irɛk, fɛ́ a yet agwɔm ngma bágwɔm azatse.

Iwu fɛ́ a ki tonong yit ishim, a ki tun yit ayɛt anɛn yit nek inosong nasok wu, 6 a mi sak in sot yit nnon igwɔm, nɛ áware fɛ́ ba ras Ada wu Adakunom kutomong, won iratek ni kukyem ni ku sot ku fuu ayɛ nɛ ayɛ! Anɔng.

7 Di yin, a bi bɛ́ ayɛt anɔk,

kaakyɛ ayisi bi ku di,

ngma na bayɔng

fɛ́ ba kin ku tusup.

Ngma banet azatse,

bi nye kafa kawe nek iwu.

Idɔng i bi te anɔng! Anɔng.

8 ATisa Adakunom fɛ̀ yɛ, <<Imi wu in yet Alfa nɛ aOmega*, aYɔng fɛ́ a se yɔkɔnɔng, aYɔng fɛ́ a kin se neme, aYɔng fɛ́ a bi bɛ́, aYɔng fɛ́ a wat akaangan.>>

9 Imi aruneng yin aYohana, afi ifiri ni iyin ayɛt izot ni igwɔm nɛ akabɔk itosok fi i yet ifɛ́ bayɔng fɛ́ ba se gung na aYeso. Imi wu fɛ́ ba kin tse ba di sak ni itsik izek aPatmos nek ishara ifɛ̀ Adakunom, ni kucɛɛt fi in raas naton aYeso. 10 Ni kunom iya aTisa ntong kukak, Kabik Adakunom kin di sok, in da nin fok kutɔ gbɛrɛy ama hom ti kufi kugba, 11 kutɔ me fɛ̀ ni imi, <<Jɛk ikyɛng fi i di na kaban kpa ijɛk, tom ide sak na bafi ikuus fɛ́ ba nyis na narɔ kanakataat: sak na Afisa, nɛ aSimirna, nɛ aPagamum, nɛ aTayatira, nɛ aSardis, nɛ aFiladelfiya, nɛ aLaudikiya.>>

12 In tirik nɔng in da di kutɔ fi ku tsin cɛɛt ni imi. Ama fi in mi tirik, in di atsɔm ata asɛng kanakataat fɛ́ ba di saas agaramun, 13 wat nate atsɔm ata asɛng e, in di akak fɛ́ a se <<Tɛ Arim Anet,>> a mi te kugboo ikpin kukan fi ku tik sak na atas atak wu, a mi rosom kugwɔm wu ni kudun fɛ́ ba nye ne ata asɛng. 14 Ice wu nɛ akwey ice me tɛrɛk tɛ ulu, na natandɔrɔng*, nɛ aca-yisi wu ron ti ilem irong. 15 Atak wu gyɛs tɛ ata agigɛl fɛ́ aron ayɛt árong, kutɔ wu se ti iwɔng ashi fɛ́ a tsin gosok. 16 A bereng ádat kanakataat ni bɔk iyak wu, wat na awal fɛ́ a ya nabak nafaa wuru na nu wu. Ayisi wu ron ti kunom di ron makiyi.

17 Izen fi in ku di, in kpa aben natak wu ti in mi ku. A ma di sak kubɔk iyak wu naton in, a fɛ̀ ni mi: <<I bi fok nnyim awo. Imi yet afi imɛsɛng e, nɛ afi igang e. 18 Imi wu in yet Atset e; Imi kin ku, di yɔkɔnɔng in se ni kutset ayɛ nɛ ayɛ! Imi wu in bereng ícarak itarak katitu ikuu nɛ ari-irong.

19 <<Nek anɔng, jɛk ikyɛng fi i mi di, ikyɛng fi i se yɔkɔnɔng ni idɔng fi i resek dang te. 20 Ikyɛng fɛ́ ádat kanakataat fi ngɔn mi di ni bɔk iyak hom me ni ishɛn agaramun atsɔm asɛng kanakataat nyeseng naton nkyɔrɔk nà: Ádat kanakataat e yet batomaza fɛ́ ba se na narɔ inyis bafi ikuus aYeso kanakataat e, nɛ ishɛn agaramun atsɔm asɛng e yet bafi ikuus aYeso na narɔ kanakataat e.