Nabos Abik AYohana 8

Kitsamang e ngamang nagang-ice-igwɔm Adakunom kanakataat

1 Ama fɛ́ Kitsamang e ngamang nagang-ice-igwɔm ifɛ́ kanakataat e, karɔ te yuu azanɛn nfi ibit agyip azining.

2 Wat in di batomaza kanakataat e ni nyeseng ashon Adakunom, ba ka ba nɔk ágbá kanakataat.

3 Atomaza akak fɛ́ a bereng kitsɛ̀n ifung atseng nkɔn ntek, a bɛ́ a nyeseng ashon kuta ashosh e. Ba ku nɔk nkyɔrɔk atseng nkɔn ntek dot, nɛ áwon banet Adakunom, naton kuta ashosh e, ashon kuta igwɔm e. 4 Ntseng nkɔn ntek e, na awon banet Adakunom e, ne ni bɔk atomaza me, a ngarak sak ashon Adakunom. 5 Ama anɔng, atomaza me, sok kitsɛ̀n ifung atseng nkɔn ntek e, a bɔ itsɛn irong ni kuta ashosh e a di shining ni itsɛn e, a ziming iko sak azatse; wat karɔ rumung, na ka nye dɛbɛt ni izá tasak, ni mben zuut.

Ifɛsɛm ágbá kanakataat e

6 Ama anɔng, batomaza kanakataat fɛ́ ba berese ágbá kanakataat e, kana nye nek ifɛsɛm e.

7 Atomaza imɛsɛng e, fɛɛp kugba wu, wat itarang kpa nes, ni kurong fɛ́ ba di kyere nɛ nasok, ba ziming iko sak azatse. Kurong e ya asa azining ayɛt ataat afɛ́ azatse, nɛ azining ayɛt asa ataat afɛ́ nakon, kurong ya, ngma agam kurong ya.

8 Atomaza afɛ́ afaa me, fɛɛp kugba ku fuu, ikyɛng kak ti kunyin kuhwyanang fi kurong se ni iya me, ba barak ide ayɛt izek. Asa azining ayɛt ataat afi izek tirik sak na nasok, 9 asa azining ayɛt ataat afi nkyɔrɔk ntset fi in se ayɛt izek kus, nasa azining ayɛt ataat afɛ́ akye-ashi beseng.

10 Atomaza afɛ́ ataat e, fɛɛp kugba ku fuu, agbat àdat akak, fɛ́ aron gbey tɛ agaramun, ne azanɛn a kpa naton asa azining ayɛt ataat afɛ́ ákyɛk nɛ ákang ashi. 11 Ba yes àdat e yɔng, <<Kpashak.>> Asa azining ayɛt ataat afɛ́ ashi, tirik a te kpashak, banet dot kus nek ashi fɛ́ a te kpashak e.

12 Atomaza afɛ́ naas e, fɛɛp kugba ku fuu, ba hwyerek asa azining ayɛt ataat afi kunom, ni asa azining ayɛt ataat afi kufɛn, nɛ asa azining ayɛt ataat afi ádat, te kurin, ni mgbey inom, ni nfɛ́ atuk, nɔ ni rin bá.

13 In se ni iyɛrɛ, in fok nawoot i tsi kukim kukak naton aza, ku fɛ́rɛ́ng ni kutɔ gbɛrɛy fok: <<Ye kukuu! Ye kukuu! Banet fɛ́ ba se ni kusot azatse da nɔ ni izot, nek ágba fɛ́ batomaza bataat da fɛsɛm!>>