Milagres de Jesus

Jisasima zanavu asu hu’nea ne’trene, agefu’na atupa hu’nea ne' zamazeri so’e hu’nea naneke

27 Ananteti Jisasi’ma nevigeno’a, zanavu asu hu’nea netremoke avariri’ne nevuke kezati’ne, Deviti mofavre’moka kasuragiranto huke hu’na’e. 28 Hagi ana nompima Jisasi’ma ufregeke, ana zanavu asuhu ne’tremokea Agrite e’na’e. Hagi Jisasi’a amanage huno zanagrikura hu’ne, Amana zana Nagrikura eriamane hugahie hutna, tanamentintia neha’o? Higene zanagra Agriku anage hu’na’e, ozo Ramoka, 29 anante Jisasi’a zanavuragare avako nehuno, anage hu’ne, Tanamentinti’ma haku anazamo’a tanavufare fore hugahie. 30 Higeno zanavurgamo’a hari hu’ne. Jisasi’a hanave zanavumro zananteno, Mago vahe’mo’a atrekeno ama’na nanekea ontahitfa hino. 31 Hianagi zanagra atreke nevuke, ana nanekea ome hugantugama ana kaziga hu’na’e.

Jisasi zanavurga asu hu’nea netre zanazeri hari hu’nea naneke

29 Zamagrama atre’za Jerikoma nevzage’za, tusi vahe kevu krerfamo’za avariri’za vu’naze. 30 Tare znavu asuhu netre’moke kamofo ankenare mopafi mani’neke, Jisasi evie kema nentahikea, zanagra kezatike, Ramoke, Deviti nemofoga kasunku huranto. 31 Hakeno vahe kevumo’za kne hu’za taganetna mani’o hu’nazanagi, tusi kezatike mago’ane vivi huke, Ramoke, Deviti nemofoga kasunku huranto huke hu’na’e. 32 Jisasi’a anante eme otino, znagi hiazamo anage hu’ne, Na’a Nagra hurnantenuegu neha’e? hige’ne, 33 anage zanagra hu’na’e, Ramoka tavurga eri hari huranto hakeno, 34 Jisasi’a asuntgi znanteno zanavurgare znavako higeno, ame huno zanavurga ruhari higeke nege’ne Jisasi avaririke vu’na’e.

Jisasi’a avusu hu’nea ne' azeri hari hunte’nea naneke

22 Ana hige’za zamagra Bedsaita kumate azageno, mago’a vahe’mo’za avusu hu’nea ne' avare’za Jisasinte e’naze. Avurgare avako hinkeno so’e huntenogu hanaveti’za Jisasina antahige’naze. 23 Ana hazageno, Jisasi’a avusu hu’nea ne’mofo azante avazu huno kumara atreno megi’a vuteno, Jisasi’a avufi avetu ahenenteno, azanu avako nehuno, Mago’azana negano? Huno antahigene. 24 Higeno kesga huno avua negeno, Vahera vano nehazage’na zamagoanagi, zafamo vano nehiaza nehige’na nezmagoe huno hu’ne. 25 Anante Jisasi’a mago’ene azanu avurgare avako higeno, ana ne’mofo avurgamo’a hari higeno, ke ankereno negeno maka’zana keama huno ke’ne. 26 Anante Jisasi’a hunenteno, Kumapina ufrege efrege osunka, fatgo hunka nonkarega vuo huno asami’ne.

Agesa anari renegeno ageru noria ne' Jisasi’a azeri knamare’nea naneke

31 Anante Jisasi’a Tairi kumara atreno, Saido kumapinti rugitagino Dekapolisi kaziga, Galili tirutega uhanatige’za, 32 mago agesa ankaniregeno kea nosia ne' avare’za e’za, Jisasinku muse hugantonanki kazana agofetu anto hu’naze. 33 Jisasi’a veara nezmatreno ana ne' avareno znagrake umanine’ne, agesa gampi azana nevazino, avetu aheno azankonu aganefunare avako nehuno, 34 kesga huno monafi negeno ra asimu nenteno, Efata huno hu’ne, (ana kemofo agafa’a ruhagro huo hu’ne.) 35 Higeno ame huno ana ne’mofo agesamo’a ru hagro higeno, agefunamo’a oza higeno, knare huno kea hu’ne. 36 Jisasi’a amazama huazana vahera ozmasamiho huno nezmasamiana netre’za, ete mago’ane vahera huama hu’za zamasami’naze. 37 Hagi tusi zamagogo fege’za, Agra mika' zana knare’za nehie hu’za nehu’za, zamagesa ankanire’naza vahe erinkro huzmantege’za, knare hu’za kea nentahize. Hagi zamagnefu’na kna hu’nea vahe zamazeri so’e hige’za knare hu’za kea nehaze hu’za hu’naze.

Avusu hu’nea ne' Batamiasi naneke

46 Hagi zamagrama Jeriko kumate ehanatite’za, Jisasi’ene amage’ma nentaza disaipol naga’ene tusi’a veamo’za ana kuma atre’za nevazageno, Timeasi nemofo Batamiasi’a avusuhu ne’mo, kamofo ankenarega mani’neno, azama hanagu meme hu’ne. 47 Hagi ana ne’mo’a antahiama Nazareti Jisasi ne-e hiankema nentahino’a, agafa huno kezatino, Jisasiga Deviti nemofoga nagrira kasunku hunantenka nazahuo! 48 Hage’za rama’a vahe’mo’za kesu’za, kagra tagano hu’naze. Hianagi mago’ene kezatino, Jisasiga Deviti nemofoga nagrira kasunku hunantenka nazahuo! 49 Higeno Jisasi’a nevifinti uotino, Ke hinkeno eno hige’za, zamagra ana avusuhu neku, kagriku ke nehianki krimpamo’a so’e nehinkenka otinka eno hu’za hu’naze. 50 Ana ne’mo zanra anakreku’a netreno ame huno otino Jisasinte e’ne. 51 Higeno anante Jisasi’a anage hu’ne, Na’a hugante’nuegu kave’nesie? Hurami ne’moka, ete navu kenaku nehue. 52 Higeno, Jisasi’a anage huno asami’ne, Kamentintimo kazeri so’e hianki vuo higeno, ame huno avurgamo’a ete hari higeno amage' avaririno kantega vu’ne.

Batimiasi avurga azeri hari hunte’nea naneke

35 Jisasi’ma Jeriko kumate vugofa nehigeno, mago avusuhu ne’mo kamofo ankenarega meme nehuno mani’neno, 36 antahigeno rama’a vahe enevazageno, naza fore nehie? huno zmantahigege’za, 37 zamagra asami’za, Nazareti kumateti ne' Jisasi enevie nehazageno, 38 Ranke huno kezatino, Jisasio Deviti Nemofoga kasuntginanto! Higeno, 39 kotama vaza vahe’mo’za ana ke nentahi’za kesu’za, kea osunka kagira hamunkinka manio hu’naze. Hianagi mago’ane kezatino, Deviti Nemofoga kasuntginanto! 40 Jisasi’a neviretira anante uotino, kehinkeno eno hige’za, ana nera ome avare’za erava’o hazageno, anage huno antahige’ne. 41 Na’a huganteku hugenka nehane? Higeno, Ramoka ete navua keso’e hanuegu nehue! 42 Higeno Jisasi’a anage huno asmi’ne. Kamentintimo kazeri hari hianki kavua ko higeno, 43 avurgamo’a ame huno anante hari higeno, ete knare huno negeno, Jisasina amage’anteno nevuno, Anumzamofo agi erisaga nehige’za, miko vahe’mo’za nege’za zamagranena Anumzamofo agi erisaga hu’naze.

Avurga asu' hu’nea ne’mofo naneke

1 Hagi anama Jisasi’a vugatereno nevuno, mago nera reranku’afinti avu asuhu’nea ne' kasente’nea omege’ne. 2 Agri’ma amage nentaza disaipol naga’mo’za antahige’za, Rempi hurami ne’moka (Rabbai) aza kumira hu’negeno ama avu asuhu nera kasente’ne, agra’afi nererapi nefa’e? 3 Hazageno Jisasi’a amanage huno kenona hu’ne, Ama ne’mo kumira osigeno, nerera nefa’a kumira osu’ne. Hu’neanagi e’i zama fore hu’neana Anumzamofo eri’zamo agripinti eriama hanigu e’inahu hu’ne. 4 Hunantege’na e’noa ne’mofo eri’zana, tagra zagema me’nesire Agri eri’zana erisune. Hanima esigeno’a mago vahe’mo’a erizana e’origahie. 5 Nagrama ama mopafima emani’noa kna’afina, Nagra ama mopafi vahe’mofo Tavire. 6 Anage Agra huteno, mopare avetu heno eri igri huno, higogna huteno, ana mopa tarega avure frenenteno, 7 amanage huno asami’ne, Vunka Siloamu tirupi ti omefro. (Siloamue hu’nea kemofo agafa’a, huntegeno vu’ne hu’ne.) Ana hutegeno vuno ti ome freteno, avurga hari higeno mika’zana negeno e’ne.

2 Mago fugo namure’nea ne’mo’a, avuga rena emereno amanage hu’ne, Ramoka Kagrama naza huku’ma nehanunka, Kagra amane nazeri avusese hugahane. 3 Higeno Jisasi’a azana antegantuteno ana ne’mofo avufare avako nehuno, anage hu’ne, Nagrima navesiana, fugo namunka’amo’a amane hugahie. Higeno ame huno ana fugo namumo’a afe higeno, avusese hu’ne. 4 Jisasi’a ana nera asami’ne, Kagra kva hunka, ama zankura mago’mofona osamitfa huo. Hagi pristi nete vunka, kavufa ome averinka ofa erinka vunka, Mosesema hu’nea kante antenka zamagrite eri ama huo.

2 Anama hutege’za vahe zagamo’za agamo fri’nea nera sesenku hu’za erizafa hu’za Agrite e’naze. Jisasi’ma zamagri zamentintima negeno agama fri’nea nekura huno, Korera osuo mofavre’nimoka, kagri kumira hago eri atroe. 3 Higeno mago’a kasegere ugagota hu’naza vahe’mo’za, zamagra zamagra anage hu’naze, ama’na ne’mo’a Anumzamofo huhaviza hunente. 4 Hazageno Jisasi’a zamagri antahintahizmia negeno, anage hu’ne, Nahigetma kefo antahintahia tamagu’afina nentahize? 5 Inanke’mo oza hugahie, kefo zanka’a eri ataroe hanua kemopi, otinka vuo hanua kemo’e? 6 Hianagi Nagrama tamaverima hanuana, Vahe’mofo mofavremo’a ama mopafina hanave’a me’neankino kefozana eri fanane huga vahe mani’ne. Hankina tameri ha’nena kegahaze, huno nehuno rukrahe huno, ana agaza sti’nea ne’mofonku, Otinka sesenkuka’a erinka nonka’arega vuo huno higeno, 7 anante otino noma’arega vu’ne.

10 Anampina Mago aza sti’nea ne' mani’negeno, zamagra Jisasina keaga hunte kanku nehake’za, Jisasina antahige’za, Kasegemo’a vahera mani fruhu knazupa azeri knare huo hunefi? hazageno, 11 Jisasi’a zamagriku huno, Amu’no tamifintira ina ne’moka sipisipi afukamo mani fruhu knare’ma kerifi uramisigenka avazuhu anaga otregahano? 12 Vahe’mofo kna’amo’a inankna higeno, sipisipimofo kna’amo’a inankna hu’ne, e’ina hu’negu manifruhu (sabat) knarera vahera amne aza hugahane. 13 Anante aza sti’nea nera anage huno asmi’ne, Kazana ru fatgo huo! Higeno azana ru fatgo higeno, mago kaziga azamo hu’neaza huno fatgo hu’ne.

30 Hagi Saimoni nenaro nerera’a avufa amuhohu kri erino maseno maninegeno, Jisasina krima eri’nea kea ame hu’za ome asami’naze. 31 Anama hige’za ana a’te vuno azante ome azeriotigeno, avufgama tevehama nehiazamo’a atrentegeno, otino ne’za krezamante’ne.

Jisasi’a fugo namune ne' azeri so’e hu’nea naneke

40 Hagi mago fugo namurenea ne’mo Jisasinte eno kepri huno agiafi traka humaseno, Muse hugantoanki Kagrama nazeri knamrenaku hanunka, amne nazeri agru huo, huno antahigene. 41 Higeno Jisasi’a asunku hunenteno, azana asuteno avako nehuno anage hu’ne, Nagri’ma navesiana knare huo! Higeno, 42 ana fugo namumo’a ame huno vagarentegeno agru hu’ne.

3 Hagi mago’a vahe’mo’za aga sti’nea ne' avare’za e’naze. Hagi 4'a vahe’mo’za sesenku hu’za erizafa hu’za e’naze. 4 Zamagra zafahu’za ufrega osu’naze, na’ankure rama’a vahe krefamo’za manihiza hazageno, Jisasi’ma mani’nea avamenteti nomuza eri anasege’za, ana nera sesenkufi mase’nege’za nofite azerineza atrageno akoheno urami’ne. 5 Anama hazageno’a Jisasi’a avare’za e’namokizmi zamentinti negeno, agama sti’nea nera amanage huno asami’ne, Ne’nimoka kumika’a apasegantoe. 6 Hianagi anampina mago’a kasegere ugagota hu’naza vahe’mo’za mani’ne’za, anage hu’za zamagu’afina antahi’naze. 7 Na’a higeno ama ne’mo’a kumira atregantoe nehie? Anumzamofo huhaviza hunente! Iza Agra kumira atregantoe nehie, Anumzamoke kumira atrentegahie hu’za antahinaze? 8 E’i anage hu’za zamagesa nentahizageno, Jisasi’a zamagu’afi negeno, ame huno zamasami’ne, Na’a higetma tamaguafina e’inahu antahintahia nehaze? 9 Agama sti’nea nera ina’i kema hanua kemo fru huntegahie. Kumi ka’a atregantoe hanua kemopi, ontinka sesenku ka’a erinka vuo hanua kemo fru huntegahio? 10 Hianagi tamagra antahitama ketma hugahaze. Vahe’mofo Mofavremo’a, ama mopafi vahe’ma kumi’ma atrente hihamua erineankino, kumira atrentegahie. 11 Nagra hugantoanki otinka sesenkuka’a erinka nonka’arega vuo. 12 Higeno ame huno otino sesenku’a eri kofino mika vahe zamure atiramino vu’ne. Nevige’za mika vahe’mo’za zamagogo fege’za, Anumzamofo agi erisaga nehu’za, e’inahu ruzahu ruzahu avu’ava zana nonkonaza erifore nehie, hu’naze.

Jisasi’a aza sti’nea ne’ma mani fruhu knazupa eri so’e hunte’nea naneke

1 Mago’ane Jisasi’a osi mono nompi ufregeno, aza stinea nera anampinka mani’ne. 2 Hagi vahe’mo’za Jisasi’ma aza stinea ne’ma azeri so’e mani fruhu knazupa hanige’za, keagama Agrira huntesagu zamua antete’za mani’naze. 3 Hagi Jisasi’a azama sti’nea ne’mofonku anage hu’ne, Ama vahe’zagamofo zamavuga eme otio! 4 Anante Jisasi’a anage huno zamasami’ne, Mani fruhu knazupa vahe aza hanuna zamo’a kasegefina knare tavutava hugahumpi, havi tavutva hugahune, hifi vahe aza hugahumpi, vahe ahe frigahune? Higeno ke’zamia omane’ne. 5 Hagi zamarimpamo hanavetia zanku, arimpa henezmanteno keganti kegama huno nezmageno, asunku huno aza sti’nea nera Kazana rusuto higeno azana rusutegeno, azamo’a so’e hunte’ne.

Jisasi’a fugo namu re’nea ne' azeri knamare’nea naneke

12 Jisasi’ma mago rankumapima umani’negeno’a, mago nera fugo namumo miko avufga azeri anovazi’nea ne’mo, Agrite e’ne. Jisasima eme negeno’a, avugosaregati mopafi prihuno unemaseno anage hu’ne, Ramoka nazeri so’e hunaku’ma kavemasisigenka, kagra amane nazeri so’e huo. 13 Higeno Jisasi’a azana avufare avako nehuno anage hu’ne, Nagri’ma navesiana, kagra so’e huo higeno, ana fugo namumo’a ame huno ana zupage atrente’ne.

18 Anama hutegeno’a anante mago’a vahe’mo’za sesenku hu’za avufa fri’nea nera zafa hu’za e’naze. Zamagara ana krima eri’nea nera Jisasi avuga eri’za ufre’za ome antenaku ana’ana hu’naze. 19 Hianagi eri’za ufre kankamuna hakare’za erifore osu’naze. Na’ankure tusi’a vahekrerfamo’za hiza hazage’za, ana nera avre’za nomote mareri’za, no amumpa eri akasine’za ana sesenku’aga atrageno vahe amu’nompinti Jisasina avuga fatgo huno urami’ne. 20 Jisasi’ma ana nagamokizmi zamentintima negeno’a, Agra anage hu’ne, Ronenimoke, miko kumika’a ama apase kantoe. 21 Anante kasegere ugagota hunaza vahe’ene, Farisi vahe’mo’za agafa hu’za ke hakare hu’za, ama nera iza Anumzamofona huhaviza nehie? Iza Agra huno kumira apasenegantoe nehie. Anumzamoke kumira apasegahianki? 22 Hianagi Jisasi’a ha’arente antahintahima antahi’zana nezmageno, Agra anage hu’ne, Nahigetma tamagra e’inahu antahintahia tamagu’afina nentahize? 23 Inana kemo oza hanigena hugahue, Kumika’a apasegantoe kemopi, Otinka vuo hanua kemo’e? 24 Hu’neanagi e’inahu hanigeta, tamagra keta antahita nehuta, Vahe’mofo Mofavremo’a ama’na mopafina, hanavea eri’neankino kumira amane apase zamantegahie huta hugahaze. Nehuno ana avufga fri’nea nera asami’ne, Nagra negasamue, otinka sesenkuka’a enerinka nonkarega vuo huno hunte’ne. 25 Hagi zamagri zamufi ame' huno otino, mase’nea tafe’a enerino Anumzamofo agi erisaga hume noma’arega vu’ne.

Jisasi’a mani fruhukna zupa aza sti’nea ne’mofo azeri so’e hu’nea naneke

6 Hagi ru mani fruhu kna zupa (sabat) Jisasi’a osi mono nompi (sinagok) marerino mono naneke rempi hu’nezamigeno, mago nera tamaga kaziga azamo’a sti’nea ne' mani’ne. 7 Kasegere ugagota hu’naza vahe’ene, Farisi vahe’mo’zanena, zamua ante’soe hu’za kete’za mani’naze. Jisasima mani fru knarema ana nera azeri’soe hanige’za, hagi zamagra kegafa erifore hu’za Agrira azerinaku, kete’za mani’naze. 8 Hianagi inankna antahintahima hu’nazana, Agra ko antahino keno nehuno, azama haviza hu’nea neku huno, Ama maka vahe zamavure otinka eno! Higeno ana ne’mo’a otino e’ne. 9 Jisasi’a zamagriku anage hu’ne, Nagra tmantahinegoe, mani fruhukna (Sabat) zupa knare zama hanuna zamo kasegefina knarera hunefi, havi tavutavama hanuna zamo knarera hu’ne? Vahera zamaza hugahumpi, vahera zamazeri haviza hugahune? 10 Arukrahe huno ome zamagege, eme zamagema huteno Jisasi’a azamo’ma stinea ne’ku anage huno asami’ne, Kazana arusuto! Higeno agra ana hu’ne. Anama higeno’a, azamo’a eteno so’e hu’ne.

Jisasi’a sondia vahe’mokizmi kva ne’mofo eri’za ne' azeri knamare’nea naneke

1 Jisasi’ma ana miko veama rempima huzami vagareteno zamatreno Kapaneamu kumate vu’ne. 2 Mago 100'a sondia vahete kva nera, vahe’mo’za antahi nemiza ne’mofo, kazokzo eri’za ne’amo’a, kri erino fri’za nehigeno, 3 ana sondia vahete kva ne’mo’a Jisasinkema nentahino, Jiu ranra vahe’mokizmi huzmantege’za kazokzo eri’za vahe’a eme azeri so’e hunteniegu ome antahigenaku Jisasintega vu’naze. 4 Zamagrama Jisasinte enehanati’za amanage hu’za hanaveti’za antahige’naze. Ana sondia kva nera knare’za nehia nekinka, Kagra amne aza hugahane. 5 Na’ankure agra tagrikura avesineranteno, osi mono nontinena ki’ne. 6 Jisasi’a magoka zamagrane vuno, nontava’onte uravao nehigeno, ana sondia kva ne’mo’a rone’amokizimi huzmantege’za Jisasinte vu’za, huzmante’nea kea ome asami’naze. Ramoka nagri nontegama ezankura amuho osuo. Na’ankure nagri nontega kagrama e’arera knarera osu’noe. E’ina hu’nogu, Kagrite’ma esuana knare osu’noe. 7 E’ina hu’nogu, Kagrite’ma esuana knare osu’noe. Hianagi eri’za vahe’nimofo magoke ke hugeno kri’amo’a amne hunteno. 8 Na’ankure nagranena rankva ne’mofo agoraga’a mani’noge’za, ete sondia vahe’mo’za nagri nagorga mani’nage’na, nagrama anamofonku hu’na, vuo hugeno’a agra nevie. Hagi magomofonku eno hugeno’a, agra ne-e. Kazokzo eri’za vahenigu hu’na, e’ina huo hugeno anaza nehie. 9 Higeno Jisasi’ma ana ne’mofo kema nentahino’a tusi’a antri nehuno, rukrahe huno avariri’za vu’naza vahekura anage huno zamasami’ne. Magore hu’na Israeli vahepina amanahu amentintine vahera onketfa hu’noe. 10 Huzmantege’za e’naza vahe’mo’za rukrahe hu’za nontega ome kazana, ana kazokzo eri’za ne’mo knamreno mani’nege’za ome ke’naze.

11 mago ara 18ni’a kafu zagefi havi avamumo amagena azeri fagagigeno, pripri huno vano nehuno, oti fatgo huno vano nosia ara, 12 Jisasi’a negeno ke higeno egeno, Ama a’moka, krimofo kinafintira katufegantoe. 13 Nehuno ana a’mofo agofetu azana antegeno, ame huno ana kri’amo’a vagaregeno oti fatgo nehuno, agafa huno Anumzamofo agi erisaga hu’ne.

Jisasi’a kri eri’nea ne' mani fruhu kna zupa eri so’e hunte’nea naneke

1 Mago mani fruhu knazupa (Sabati) Jisasi’a Farisi kva ne’mofo nompi ne’za nenaku vuno umani’nege’za, nankna hugahie hu’za zamagra kete’za mani’naze. 2 Ana higeno avuga mago nera avufga zore krimo azeri haviza hu’nea ne' mani’ne. 3 Kasegere ugota hu’naza vahe ene, Farisi vahera Jisasi’a anage huno zmantahigene. Mani fruhu knazupa (Sabat) knare vahera zamazeri so’e hugahumpi osugahune? 4 Hianagi zamagra ke osu manizageno, ana nera avufare azerino kri’a azeri so’e huteno huntegeno vu’ne.

Jisasi’a 10ni’a fugo namune vahe zamazeri so’e hu’nea naneke

11 Jisasi’a Jerusalemi vunaku nevuno, Sameria kuma’ene Galili kumamofo amunompi rugitagino vu’ne. 12 Nevuno mago kumapi ufregeno, 10ni’a fugo namune vahe’mo’za ogamnu otiza mani’ne’za ome tutagiha hunte’naze. 13 Hagi zamagra amanage hu’za kezati’naze, Jisasiga kva ne’moke, kasuntagiranto! hu’za nehazageno, 14 Jisasi’a nezmageno amanage huno zamasmi’ne, Tamagra vuta pristi vahete tamavufga ome zamaveri hiho, hige’za nevazageno fugo namuzmimo’a amne higeza agru hu’naze. 15 Hagi mago’zmimo’a keana avufgamo so’e higeno, rukrahe huno ranke huno Anumzamofo agi erisaga nehuno, 16 Jisasi agafi avugosaregati epri huno, susu huno musenke huntene. Ana nera Sameria nere. 17 Anante Jisasi’a anage hu’ne, 10ni’a vahe’mokizmi fugo namumo’a so’e hige’za agru hu’naze. Hianagi 9ni’a vahe zaga iga mani’naze? 18 Mago vahe’mo’a eama huno Anumzamofona ra agi omigeno, ama megi’a ne’mokepi? 19 Jisasi’a anage huno ana ne’mofonku hu’ne, Kamentintimo kazeri so’e hianka otinka vuo.

Mani fruhu kna zupa (Sabat) Betsaida tirute Jisasi’a mago ne’ma azeri so’e hu’nea naneke

1 Ana maka’zama higeno agateretegeno, Jiu vahe’mo’za mono nehaza kna fore higeno, Jisasi’a Jerusalemi kumate mareri’ne.

2 Jerusalemi kuma’mofo kaha hagente’za, Sipisipi Kafane hu’naza tavaonte mago tiru me’nege’za, Hibru kefina Betsaida* hu’za nehaze. Anantera 5fu’a hanko no kinte’naze. 3,4 Ana hanko nontera hakare’a kri vahera mase’za mani’naze, zamusuhu vahe’ene zamagia krere hu’nea vahe’ene zamaga zamaza sti’nea vahe’ene mani’naze. * 5 Mago nera 38'a kafufi kri eri’nea ne', ana tirutera mani’ne. 6 Anante maseno mani’negeno Jisasi’a negeno, za’za kna ana krifina mase’ne huno antahi’ne. Jisasi’a anage huno asami’ne, Kagesama antahinana krika’a knare hugantesie hunka nentahino? 7 Ana kri ne’mo kenona’a asmino, Ra vahe’moka timoma kazama nehanigeno navareno ome nantesia vahera omani’nege’na, ana’ana hu’na nevuge’za rumo’za tirupina nagtere’za unermize. 8 Jisasi’a nentahino ana neku huno, Otinka, tafeka’a renamginka e’nerinka vuo. 9 Hantaka huno kri’amo atrentegeno, tafe’a erirenamgino e’nerino otino agafa huno kana vu’ne.

Ana kna mani fruhu kna (Sabat) zupa ana kaguvazana hu’ne.

Kamani ne’mofo mofavre krifinti azeri knamre’nea naneke

46 Ana hazageno Kana Galili kaziga, tinteti waini’ma trohu’nea kumate eteno e’ne. Anante mago kamani eri’za ne’mofo mofavre’mo Kapenium kumate kri erino mase’ne. 47 Jisasi’a Judia atreno Galili kaziga ehanatia kema nentahino’a, kri eri’nea mofavre’mofo nefa’a Agrite viazamo asuragi kefinti, Enka mofavre ni’a eme azeri so’e huo huno nemofo’a fri’kante mase’negeno antahige’ne. 48 Anage higeno Jisasi’a asmino, Avame’zane kaguvaza hanuazana ketetage’za, tamagra tamentintia hugahazo! 49 Ana kamani eri’za ne’mo’a Jisasinkura huno, Ramoke mofavreni’a frisanigi ko eramio. 50 Higeno Jisasi’a ana nera asmino, Nonkarega vuo, negamofo’a ofrino amne mani’ne. Ana ne’mo tamage Jisasi’a nehie huno amentinti nehuno atreno ete noma’arega vu’ne. 51 Atreno kantega uneramige’za, kazokzo eri’za vahe’amo’za eme asami’za, negamofona kri’a atrentegeno mani’ne hu’za eme asmi’naze. 52 Anagema hu’za asmizageno kri’ama atrente’nea knagu zamantahigege’za zamagra asami’za, Okina wan kiloki higeno avufa teve ha’zamo’a atrente’ne. 53 Anagema nehazageno nefa’a agesa antahi’ne, Jisasi’a ana knareku huno, Negamofo’a ofri amne mani’ne huno hu’ne, nehuno agrane noma’afi nemaniza naga’ane, maka’moza zamentinti hu’naze. 54 Jisasi’ma Judia kazigama atreno Galilima emanineno’a, ama’i nampa 2 avame’za eri fore hu’ne.

20 Higeno mago ara korankri erino 12fu’a zagegafu mani’nea a’mo, Jisasi amefi eno zaza kena’amofo atupa’are eme avako hu’ne. 21 Na’ankure agrama agesama antahiana, nagra magoke’zana Agri za’za kenarafante azeri sugeno’a, kri’nimo’a atrenantegahie huno agu’afina antahi’ne. 22 Hianagi Jisasi’a rukrahe huno negeno amanage hu’ne, Mofani’moka korera osuo, kagrika’a kamentintimo kazeri knare hie, nehigeno ana kna fatgo’are ame’ama huno ana ara kri’amo’a, so’e hunte’ne.

25 Hagi mago ara korankria 12fu’a zage kafufi eri’nea a’mo anampi mani’ne. 26 Zago afufenoma’a ana krimoma vagarentesigu atrevagareno rama’a tusa vahe’mofo ome miza hu’neanagi, atage’za amizageno ana kri’amo’a vagaore rura hu’ne. 27 Hagi ana a’mo’a Jisasi agenke antahiteno tusi vea kevufinti, Jisasina amefiti zaza kena’are eme avako hu’ne. 28 Na’ankure antahintahi afina kukena’are ome avako hanugenoke kri’nimo’a atrenantegahie huno nentahino, 29 ome avako higeno ame huno korankrima eri’neazamo’a atrentegeno keno antahino hu’ne.

43 Anampina mago ara 12'a kafu zagefi korankria eri’nea a' mani’ne. Hianagi mago vahe’mo’e huno ana ara azeri so’e osu’ne. 44 Ana a’mo Jisasina amefigati zaza kena’amofo atumpare eme avako higeno, ana korankrimo’a ame huno vagarente’ne. 45 Anante Jisasi’a zmantahigeno, Iza navako hu’ne? Hige’za zamagra onke’none hu’za hazegeno, Pita’a huno, Kva Nimoka, tusi’a vahekrefamo’za rugagagiza kavate rentrako hu’naze. 46 Hianagi Jisasi’a anage hu’ne, magomo navako hu’ne, na’ankure Nagripintira mago’a hanave’nimo’a natreno vu’negena nehue. 47 Ana a’mo’ma keno antahinoma hiana, frakigama nosuno’a ahirahi neregeno avuga eme traka humaseno, eme avako higeno, kri’amo’ma ame huno vagarente’nea kea maka vahe zamasami’ne. 48 Anante Jisasi’a anage huno ana ara asami’ne, Mofamoke, kamentintimo kazeri so’e hianki krimpa frune vuo.

Fri’nea mofa azeri o’netino korankri eri amane hu’nea naneke

18 Ana kema nehigeno, mago ugoteno keaga nehia ne’mo’a eno, Agrite eme kepri nehuno, anage hu’ne, Mofanimo’a mensi fri’neanki, enka kaza agrite eme antegeno, agra otino asimu erino mani’no. 19 Higeno Jisasi’ene Agri amage nentaza disaipol naga’mo’za otiza ana ne' avariri’za amage vu’naze.

23 Jisasi’ma vuno ana ugoteno keaga nehia kva ne’mofo nompima ufreno, uvire tafema neraza vahe’ene, zavisu krasu nehu’za zamasuzampi mani’naza vahe krerfa ome nezmageno, 24 amanage huno zamasmi’ne, Atretma eviho, na’ankure ama mofara ofri’neanki, amane avu mase’ne. Anagema hiazanku Agrira tusiza hu’za kiza zokago ke hunte’naze. 25 Hianagi ana vahe krerfa’ma huzmantege’za megi’a vazageno’a, ana nomofo agu’afi ufrea zamo akoheno ana mofa’mofo azante azerigeno ame huno ana mofa’mo’a oti’ne.

22 Anante osi mono nonte kva vahe zagafinti mago ne’mofo agi’a Jairusi’e nehaza ne’mo’a, eno Jisasima eme negeno’a, agafi emaseno, 23 muse hugantoanki, osi mofa’nimo’a fri’za higena neonki, enka kazana agofetu eme antegeno ofrino manino huno antahige’ne. 24 Higeno Jisasi’a ana ne’ene nevigeno tusi’a vahe krerfamo’za otufe atufe hu’za vu’naze.

38 Zamagrama ana mono kva ne’mofo nontema uhanatiza kazana, ranke hu’za tusi zavi krafa hu’za zavira netageno, Jisasi’a zamage’ne. 39 Ana nompima unefreno’a, Na’a higetma ranke hutma zavira netaze, mofavremo’a ofrineanki amane mase’ne. 40 Anagema hiankegura zamagra kiza re’naze. Hianagi miko megi’a huzmantege’za mani’zageno, ana mofa’mofo nererane, nefane nezanevareno amage’ma nentaza disaipol naga’a nezamavareno ana mofa’ma hunaragi antepinka ante’nazafinka ufre’naze. 41 Anante ana mofamofo azante akoheno aze’nerino Talita kum! Zamagri’a kefina osi mofa’moka Nagra kagriku huanki otio hu’ne. 42 Ana mofamo’a 12fu’a zagegafu hu’neakino ame huno otino kana vano hige’za tusi antri hu’naze.

31 Hagi na’ante huntena ama knafi vahe’mofo avu’avazankura avame kea hugahue. Zamagra nankna hu’naze hu’na hanue? 32 Zamagra mofavre’ramimo’za maketi kumapi mani’ne’za kehugantigama hiaza nehaze. Nehu’za roane’amokizmigura anage hu’naze, Tagra konke tafe ronanagi, tamagra avoa noraze. Zavite zagame hunanagi, zavira notaze. 33 Na’ankure mono tifrente Joni eno, bretine waini tine nonegetma, tamagra hutma havi avamu agripi mani’ne hu’naze. 34 Vahe’mofo Mofavremo eno ne’zane tine nenegetma, tamagra hutma, keho ne’za nevava nehuno, waini ti neneno, takesi zago eneriza vahe ene kumi vahe’ene raru huno nemanie nehaze! 35 Hianagi knare antahintahizana Agri’ma avaririza vahepi eriama nehie.

Kumike a’mo avununu’ene masavenu’ene Jisasi agare frente’nea naneke

36 Mago Farisi ne’mo’a, Jisasina ne’za agrane ome nesniegu agi higeno vu’ne. Farisi ne’mofo noma’afi ne’zane trate aza tununte anteno mani’ne. 37 Anante ana kumateti mago kumi a’mo’a, Farisi ne’mofo nompi Jisasima nezama nene nehazankema nentahino, mago mananentake masave aravasta have tafempi me’negeno erino eno,

41 Anante Jairusi’e nehaza ne’mo osi mono nomofo kva nekino, Jisasi agiafi eme rena reno noma’afima esigu tutu huno antahige’ne. 42 Na’ankure 12fu’a kafunaza hu’nea magoke mofa’amo, fri’za nehigeno hu’ne.

Jisasi’ma kantegama nevigeno’a, hakare veamo’za oretufe aretufe hu’za vu’naze.

49 Jisasi’ma anagema nehigeno’a, mago ne’mo osi mono nomofo kava ne' Jairusi nontegati eno, anage huno eme asami’ne. Mofa kamo’a fri’neanki mago’anena, Rempima hurami nera kna omio. 50 Hianagi Jisasi’a ananke nentahino, anage huno kenona hu’ne. Kagra korora osuo, kamentinti hugeno ana mofamo’a knamareno manino. 51 Hanki nonte’ma eteno’a mago’a vahera zmatrege’za uofre’naze. Hanki Pitane, Jonine, Jemisine ana mofamofo nefane nererane ke hige’za zamagrake ufre’naze. 52 Anampina maka zamagra zavi nete’za tusi krafa ana mofaku nehazageno Jisasi’a anage hu’ne, Ofri amne mase’neanki zavira oteho. 53 Hige’za ana veamo’za agiza re’naze. Na’ankure ana mofamo’a frinege’za ke’nazagure. 54 Hianagi Jisasi’a akoheno azante azeri onetino anage hu’ne, Mofavre’moka otio. 55 Ana mofamofo agu amemo ete agu’afi efregeno, ame huno otigeno, ne’za aminkeno neno huno zamasami’ne. 56 Ana mofa’mofo nerera’ene nefakea antri nehakeno, amama huazana vahera ozmasamitfa hi’o huno znasami’ne.

Lasarusi fri’zamofo naneke

1 Hagi mago nera Lasarusi’e nehaza ne’mo’a kri eri’ne. Agra Betanitire, Maria’ene nenunkna Matake nemani’a kumate nere. 2 Maria’a mananentake masavenu Ramofo agare frenteteno, anu azokateti ana agama eri ho’mu hu’nea a’mofo nesaro kria eri’ne. 3 Ana nanunkna’moke Jisasintega kea atrenteke, anage hu’na’e, Ramoka antahio, Kagrama avesima nentamo’a kri eri’ne. 4 Higeno Jisasi’a ana ke nentahino, anage hu’ne, Ana krimo’a fri kantera avreno ovugahie, na’ankure Anumzamofo ra agi ami’nigeno, ana zantetira Anumzamofo Mofavremo ra agi erigahie.

5 Jisasi’a Matane nenunknane, Lasarusine avesizamante’ne. 6 Hianagi Lasarusi kri eri’ne nanekema hazageno nentahino’a, tare zage’gna anama mani’nea kumate mani’ne. 7 Ana huteno amage’nentaza disaipol nagaku huno, Judia kaziga ete vanune huno zamasmi’ne. 8 Hige’za amage nentaza disaipol naga’mo’za anage hu’za asmi’naze, Rempi hurami ne’moke (Rabbi), Jiu kva vahe’mo’za mensintfama have knonu kahenaku nehzarega, Kagra ete vu’za nehano? 9 Jisasi’a kenona zamire anage hu’ne, 12fu’a kna (aua) mago zagefina omane’nefi? Mago vahe’mo’ma zage ferupima vanuno’a agra traka osugahie, na’ankure ama mopafi masa agra nege. 10 Hu’neanagi mago’mo hanimpima vanuno’a ome traka hugahie, na’ankure masa agripina omne’ne. 11 Anagema huteno, mago’ene Jisasi’a anage hu’ne, Ronetimo Lasarusi’a avu mase’ne, hianagi menina Nagra ome azeri otigahue. 12 Hige’za amage’nentaza disaipol naga’mo’za anage hu’naze, Ramoka, agra avu’ma mase’nesuno’a, knare hugahie. 13 Hagi Jisasi’ma hu’neana, Lasarusi’a ko fri’nea zanku hu’neanagi, zamagrama antahi’zana amne avu mase’nea zanku nehie hu’za antahi’naze. 14 Jisasi’a anante huama huno zamasmi’ne, Lasarusi’a ko fri’ne,

Jisasima tusi’a zahoko azeri aravahe’nea naneke

23 Jisasi’ma votifima marenerige’za, Agri amage’ma nentaza disaipol naga’mo’za avaririza vu’naze. 24 Nevazageno tusi’a zaho komo ana tirupinti agafa huteno, ana timo’a eri kranto kranto huno votia refite’za hu’ne. Jisasi’a masenegeno anara hu’ne. 25 Hige’za amagema nentaza disaipoli naga’mo’za, Agrite eza eme azeri oneti’za anage hu’naze, taza huo Ramoka, Hago tagra friza nehune. 26 Hianagi zamagrikura anage hu’ne, Nahigetma korera nehaze, onensa tamentintine nagara? Nehuno Agra anante otino hanave ke huno ana zaho ene, tinena rurava huo higeno, kranto krantoma nehiretira, arane’ne. 27 Hige’za ana disaipol naga’mo’za tusi zamagogogu nehu’za, zahomo’ene, timo’ene ke’a erizafa nehianki, ama inankna vahere? hu’naze.

15 Kinaga sege’za, amage nentaza disaipol naga’mo’za Jisasinte e’za anage hu’naze, ama vahe omani ka’ma kopi mani’nonkeno, hago hani hu’za nehianki, ama vahe’zaga huzmantege’za kumatega vu’za, zamagra’a nesaza ne’zana ome miza seho. 16 Hianagi Jisasi’a anage huno zamasmi’ne, Zamagra ovugahazanki ne’zanku keta zaminke’za neho! 17 Hige’za, zamagra anage hu’za Jisasina asmi’naze, 5fu’a bretigi, tare nozaki huta ama eri’none hazageno, 18 Erita eme namiho, huno hige’za eri’za eme ami’naze. 19 Ana vahetmina apepate maniho huno nezmasmino, ana 5fu’a bretine, tare nozara erino, monafi ke’nagamuteno negeno, asomu ke huno susu huteno, bretia korino amage’ma nentaza disaipol naga zamige’za, ana vahetmina zami’ne. 20 Makamo’za ana ne’za nageno zamu hu’ne. Nege’za atrazama’a zogi’za 12fu’a ekaeka kupi zogiri avitente’naze. 21 5 tauseni’a vene’ne nazamo’za ne’naze, hagi a’nene mofavre’zaga ohampri’naze.

25 Ana nehigeno kotu afa’za nentegeno, Jisasi’a ana ti avozare ne-egeno,

Jisasi’a 4 tauseni’a venene ne’za zami’nea naneke

32 Jisasi’a amage nentaza disaipol naga’a ke huno anage huno zamasmi’ne, Nagra ama vahetaminkura nasunku huzmantoe, na’ankure zamagra tagufa kna Nagranena mani’nageno nezama nesazazana omne’ne. Nagrama huzmantesuge’za zamaga ene vuzankura navenosie. Na’ankure kantega nevu’za zamavu evu evu hanige’za traka ome hugahaze. 33 Amage’ma nentaza disaipol naga’mo’za anage hu’za Agriku hu’naze, Inantegati rama’a bretia erita ama tusi vahe krerfa zmisunke’za, ama vahe omani kokampina erignare hugahaze? 34 Jisasi’a anage huno zamasmi’ne, Nama’a breti tamagra eri’naze? Hige’za zamagra anage hu’naze, 7ni’a bretigi, mago’a osi nozamerame. 35 Ana huteno vea kevua huzmantege’za mopafi mani’naze. 36 Manitageno ana 7ni’a bretine noza’ene erino Anumza’mofo susu hunteteno, tmanasino amage nentaza disaipol naga’a zamige’za eri’za ana vea kevu zami’naze. 37 Ana hige’za maka vahe’mo’za ana neza nazageno zamu hutege’za, atrazama’a eri atru hu’za 7ni’a ekaeka kupi eri avite’naze. 38 Hagi ana nezama ne’nazana 4tauseni’a vene’ne nazamo’za ne’naze. Anampina a’nene, mofavre’ramina ohampri’naze.

Mono no takesi zagogu hu’nea naneke

24 Kapeniumu etageno ra mono nompi zago e’neri’za vahe’mo’za, Pitante e’za anage hu’naze, Tamagri’ma rempi huneramia ne’mo’a, ra mono nompi tare takesi zagoa nentefi nonte? 25 Pita’a izo nehuno nompi umrerigeno, Jisasi’a ese antahigeno, Saimoniga na’ane kagesa nentahine? Ama mopafi kini vahe’mo’za izampinti takesi zagoa e’nerize? Zamagra vahepintipi ru vahepintire? 26 Higeno Pita’a ru vahepinti e’nerize hutegeno, Jisasi’a anage hu’ne, Hagino naga’amo’za miza osegahaze. 27 Hianagi tagra zamarimpa kna eri ozamisunanki, tirute vunka huku nofi ome atrenka ese’ma avazu hanana nozara agi eri aka hunka mago zago me’nena kegahane. Ana zago erinka Nagrite’ene kagra re’enena ome miza hugahane.

Jisasi’ma fik zafa kesigeno osapate’nea naneke

18 Jisasi’a nanterana otino ete Jerusalemi rankumatega vunaku nevuno aga’zanku hu’ne. 19 Keana kama vutega magoke fiki zafa oti’negeno, Agra ana zafa tava’onte eno eme keana magore huno nena’a omneno ani’namoke hu’negeno, Agra ana zafagu huno, 20 Mago’enena kagripina raga fore osugahie. Ana zafamo’a osapategeno amage nentaza disaipol naga’mo’za nege’za zmanogu nehu’za antahige’naze. Nankna huno ama fiki zafamo’a ame huno osaparare? 21 Hu’za hazageno, Jisasi’a anage huno kenona zamirera hu’ne, Tamage hu’na neramasmue, tamentinti nehutma tare tagufa tamagesa ontahisnutma, tamagra fiki zafa huntoa kna’zana ageteretma amne hazasine. Hianagi ama’na agonagu hutma, otinka hage rimpi tka’uro hanageno’a amne ana hugahie. 22 Hanki nazankuro kamentinti hunka, nunamu hunka antahigesanana, amne erigahane.

37 Nevazageno tusi’a ununko atuno, tina erikranto kranto nehuno, ana votifi timo’a marevite’za higeno, timpi votimo’a tami’za hu’ne. 38 Hagi Jisasi’a votimofona arigarega fita runo mase’negeza, azeri oti’za anage Agrikura hu’naze. Rempi hurami ne’moka, timo’ma tazeri nakri’za nehiana nonkano? 39 Anante otino zaho’mofona kesuno, Tami avazago huno timofona higeno, akoheno urami avazagene. 40 Ana higeno Jisasi’a anage huno zmantahige’ne, Nahigetma amanahu huta koro nehaze? Tamentintia nosazo? 41 Ana nehige’za zamagra tusi’a zamagogo fege’za, inankna ne’mo kea nehigeno zahomo’ene timokea ke’a antahinezmi’e hu’za hu’naze.

35 Hagi kinaga nesegeno’a amage’ma nentaza disaipol naga’mo’za Jisasinte e’za anage hu’naze, Vahe omani ka’ma kopi mani’nonkeno hago kinaga nesegu, 36 huzmantege’za hozafi kiza mani’naza kumapine, kuma tamimpi vu’za ne’zama nesazazana ome miza seho hu’naze. 37 Hianagi Jisasi’a anage huno zamasami’ne, Tamagratmi ne’zana zaminke’za neho, hige’za zamagra anage hu’naze, 8'a ikampi eri’za erino miza eriga mizanteti ne’zana mizaseta zamigara hu’ne hu’za asami’naze. 38 Agra anage huno zamasami’ne, Nama’a breti eri’nazafi ome keho? Huno hige’za ome kete’za e’za 5fu’a bretigi, tare nozame me’ne hu’za hu’naze. 39 Anante Jisasi’a amage’ma nentaza disaipol naga’a huzmanteno, zafa asinage hu’nea apepate huzmantenke’za omeri atru, eme eritru hu’za maniho huno huzmante’ne. 40 Maka vahe’mo’za refko hu’za mago’a kevufina 100'a vahe nemanizageno, mago’a kevufina 50'a nemanizageno hutere hu’naze. 41 Mani’nageno 5fu’a bretine, tare noza’ene erino kesga huno monafi negeno, Anumzamofontega susu huteno, eri korino amage’ma nentaza disaipol naga’a veva hanazegu nezamino, nozamea anazanke huno refko huno zami’ne. 42 Ana maka’mo’za nazageno zamu hu’ne. 43 Nene’zama atraza bretine, noza enena zogi’za, 12fu’a eka eka kupi eri avite’naze. 44 Bretima ne’nazana 5tauseni’a venenemo’za ne’naze.

48 Jisasi’a nezmagege’za, tusi maraguzati’za azotanu tina vakakiza vu’naze. Na’ankure zahomo tusiza huno eme zamaretunefege’za, maraguzati’za nevazageno ko’ma atu masa hu’za nehigeno, Jisasi’a timofo avozare eno zamagatere’za nehige’za, 49 zamagrama timofo agofetu nevigeza nege’za, zamagesama antahi’zana hankrore nehu’za zamagogo nehu’za krafa hu’naze. 50 Na’ankure makamo’za nege’za zmagogogu hu’naze. Hianagi hantaka huno anage huno zamasami’ne, Nagragi oti hanavenetita, korora osiho. 51 Anage huteno mani’naza ventefi marerigeno, zaho’mo amane nehige’za tusiza hu’za antri hu’naze.

Jisasima 4tauseni’a venenerami ne’za zami’nea naneke

1 Hagi ana knafina maka veamo’za mago’ene eritru hazageno, ne’zana omanegeno, Jisasi’a amage’ma nentaza disaipol naga ke hige’za ageno anage huno zamasmi’ne. 2 Nagra ama vea krerfagura nasunku huzmantoe. Na’ankure zamagra tagufa kna nagri’enena mani’zageno, ne’zama ne’zana omane’ne. 3 Nagrama huzmantesuge’za kuma zimirega zamaga’ma netesige’za vanu’za, mago’amo’za afeteti e’nazanki’za kantega utraka hugahaze. 4 Hige’za Agri amage’ma nentza disaipol naga’mo’za anankemofo nona’a anage hu’za asami’naze, vahe omani mopafi mani’nonanki inantegati ne’zana erizamisunke’za neganare hugahaze? 5 Hazageno Jisasi’a huno, Nama’a breti eri’naze? huno zamantahigege’za, 7ni’a breti eri’none, 6 hazageno, Jisasi’a ana maka veara mopafi maniho huno zamasamige’za manizageno, 7ni’a bretia erino Anumzamofo susu hunteteno, tamanasino amage’ma nentaza disaipol nagara zamige’za, ana veara refko hu’za zami’naze. 7 Ana nehazageno onensa nozamene mago’a me’negeno erino Anumzamofo susu hunteteno, amagema nentazana disaipol nagakura eritma zamiho huno zamasmi’ne. 8 Maka vahe’mo’za ana ne’za nenageno zamu hige’za ankra’ama atrazama’a, amagema nentaza disaipol naga’mo’za 7ni’a ra eka eka kupi zogiri avite’naze. 9 Ana vahera 4tauseni’a vahe nazamo’za netageno, huzmantege’za vu’za e’za hu’naze.

Fiki zafamo raga’a oreno huno sifna hente’nea naneke

12 Hagi masete’za nanterana Betani kumara atre’za neageno, Jisasina aga ate’ne. 13 Fiki zafa’mofo asina kuronkuro huno ogamanu me’negeno negeno, nezama rente’nenigu kenaku eme ke’ne. Hianagi eme keana asinage me’negeno ke’ne. Na’ankure fiki zafa raga rentekna omane’ne. 14 Ana higeno ana zafamofonkura anage huno hu’ne, Mago’ene raga oresnanke’za veamo’za tagi’za onegahaze. Anage hige’za amage’ma nentaza disaipol naga’mo’za ana naneke antahi’naze.

Sifnama ahente’nea fiki zafamo hagege hu’nea naneke

20 Nantera enevu’za kazana, sifnama Jisasi’ma ahente’nea fiki zafamo’ene arfu’na’amo’a, osapa re’nege’za ke’naze. 21 Pita’a Jisasi’ma hu’nea kegu age’sa nentahino anage hu’ne, Rempi hurami ne’moka ko! Okima sifna kema hunka raga renontenka osaparo hu’nana Fiki zafamo’a osapa re’ne. 22 Jisasi’a kenona anage huno zamagrira zamasami’ne, Anumzamofonte tamentinti hiho. 23 Tamage hu’na neramasamue, mago vahe’mo’ma ami agonagu’ma huno, otinka hagerimpi takauro huno tare agesa ontahi amentinti nehuno hanigeno’a, amane ke haniaza huno fore hugahie. 24 E’ina hu’negu anage hu’na neramasamue. Nazankuma nunamu hunka Anumzamofo antahima kesunka, hago eri’noe hunka kamentinti hanunka erigahne. 25 Hagi otinka nunamu hunakuma hanunka, mago’mo haviza hugante’nesnia zana atrento. Anama hanankeno’a, monafi nemania Nafakamo’a kagri’enena kumika’a atregantegahie.

Jisasi’a ese aposel naga zamavare’nea naneke

1 Mago knazupa Jisasi’a Genesareti tiru ankenare otino mani’nege’za, tusi’a vahe kevumo’za Anumzamofo naneke antahinaku ome eritruhu’za manititipa hu’naze. 2 Ana tiru ankenare tare onensa vente me’negeno ke’ne. Hianagi nozamema nehaza naga’mo’za anampintira urami’za, kukozimi umaniza sese hu’naze. 3 Mago votifi Agra umarerine, ana suzana Saimoni votifi marerino antahigegeno tinkenaretira osi’a aretufe ogantu’a atre’ne. Hagi Jisasi’a anampi marerino tamu mani’neno, mika vahe mono kea ana onensa ventefinti zamasmi’ne. 4 Ana nanekema huvama nereno’a Saimoninkura anage hu’ne, Antuma timo’ma avuhanihanima hu’neama’afi aretufe kantu antenka, kukonka’a nozamema avazu hananku atrenkago. 5 Hianagi Saimoni’a kenona’a anage hu’ne, Ramoke, tagra tusi amuho huta meni keragera noza azeri naku tusi’a amuho eri’za erinonanagi, magora aze’oritfaza hu’none. Hianagi Kagrama hana kere kukoni’a ataregahue. 6 Anama hute’za zamagra tusi nozamezaga azerizageno kukozamimoa agafa huno tagato hu’za hu’ne. 7 Anama hige’za, zamagra mago votifi mani’naza knampa zamirega eme zamaza hihogu kezanke hugantu atrage’za zamagra e’za tarega votirarena emeri avitageno, anantarega votiraremokea tirami’za hu’na’e. 8 Hianagi Saimon Pita’a ana zama negeno’a, Jisasi agafi renareno anage hu’ne, Ramoka nagri navatetira ogantua vuo. Na’ankure nagra kumimo avite’nea ne’tfa mani’noe! 9 Na’ankure Pita’ene, ruga’a nagama agrane mani’naza naga’mo’za nozamema zamagrama azeri’naza zankura, tusi’za hu’za antri hu’naze. 10 E’i anazanke huke Zebeti ne’mofo Jemisike, Jonikea znagogogu hu’na’e, Saimoni ene tragote’za erizana e’nerizane. Higeno Jisasi’a Saimoninku anage huno asami’ne, Korera osuo, amaretima agafa hunka vnanana, vahera zamavaregahane. 11 Onensa vente’zamia eri’za tinkenare’ma vute’za, mika zazmia anante netre’za, Jisasi amage ante’naze.