Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
Ya pagguliꞌ ni Jisus sa duwa ya utaw na buta
Sa pag-indeg da ni Jisus adti balay yan, awun duwa ya eseg na buta na gayed dyumalug kanan. Aw pigtatawag nilan si Jisus, "We…Buwadbuwad ni Dabid, kallati beg kami!" Sa pagdateng ni Jisus adti pigbantukan nan, dyumulud kanan ya duwa ya buta. Aw nyusip si Jisus kanilan, "Unu, nyangintu-u kamu na mabatug ta kamu guli-en?" Aw tyumubag silan kanan, "E-e kay Sir. Nyangintu-u kami." Aw pig-awidan ni Jisus ya manga mata na tagsambuksambuk kanilan, aw piglongan nan silan, "Asuntu sa pagpangintu-u mayu kanak, kaguli-an da kamu!" Aw dayaw silan kyumitaꞌ. Aw miglong si Jisus kanilan, "Diliꞌ mayu yeiy pag-ubat-ubat adti pangkay singalan." Manang sa pagpanaw da nilan, pig-ubat-ubat baling nilan ya pagpaguliꞌ ni Jisus kanilan. Aw nyabekkal ya ubat-ubat yeiy adti manga banwa na nyakapalibed dun.
Ya pagpaguliꞌ ni Jisus sa duwa ya eseg na buta
Na, sa pag-indeg ni Jisus aw manga umagakan nan lekat adti syudad na Jériko, dyumalug kanan uman ya to-o madég na utaw. Aw awun uman duwa ya eseg na buta na nyingkud dun ni kilid na dalan. Aw sa pagdengeg nilan na un da lumabay si Jisus, migtatawag silan kanan, "We… Buwadbuwad ni Dabid, kallati beg kami!" Madég ya utaw na migsagda kanilan na maglong, "Katinep kamu!" Manang to-o pa baling nilan pigpakadakulaꞌ ya kanilan tingeg, law nilan, "We… Matas na Pangulu na buwadbuwad ni Dabid, kallati beg kami!" Yanagaw tyumeneng si Jisus aw pigtawag nan silan aw nyusip kanilan, "Unu ya kaliman mayu na imo-un ku kamayu?" Aw tyumubag silan kanan, "Kay Sir, kaliman beg nami kumitaꞌ!" Aw nyallat si Jisus kanilan, aw pig-awidan nan ya mata na tagsambuksambuk kanilan, aw dayaw silan kyumitaꞌ. Aw dyumalug da silan kanan.
Ya pagpaguliꞌ ni Jisus sa eseg na buta
Pagdateng ni Jisus aw manga umagakan nan adti Bétsayda, awun manga utaw na mig-agak sa eseg na buta pasinan adti kan Jisus, aw nyanginayuꞌ silan kanan na awidan nan ya eseg yan. Pig-agak ni Jisus ya eseg na buta aw pigpa-agad nan adti luwaꞌ na baranggay. Aw tigkas yan, pigdamus ni Jisus ya kanan laway adti mata na utaw yan aw betangi nan na kanan manga palad, aw nyusip si Jisus kanan, "Unu, awun da kyinitaꞌ mu?" Pagtandaw na eseg yan, miglong sakanan, "E-e, kyinitaꞌ da ku ya manga utaw manang kasiling silan na manga kawuy na migpanawpanaw." Aw pigbetang pa uman ni Jisus ya manga palad nan adti manga mata na eseg. Aw sa pagtandaw nan salut, dayaw da kyumitaꞌ aw mabangal da ya pag-inunu nan. Aw pagkatigkas yan, pigpa-uliꞌ sakanan ni Jisus aw piglongan nan, "Sa pag-uliꞌ mu, diliꞌ kaw mag-agi adti baranggay."
Ya pagguliꞌ ni Jisus sa sambuk na utaw na bengel aw umal
Na, pig-indegan ni Jisus ya Tiro aw nyadtu ni syudad na Sidon. Aw pagkatigkas yan, syuminan da uman sakanan adti manga banwa na awun ni palibed na Danaw na Galiliya aw adti manga lunsud na sakup na Dékapolis. Talana nan dun, pigpa-agad na manga utaw adti kan Jisus ya sambuk na eseg na bengel aw umal, aw nyanginayuꞌ silan na pandungan nan na kanan palad. Yanagaw pigtani ni Jisus ya eseg yan lekat adti manga utaw, aw pigseled nan ya duwa ya tulli-ay nan adti manga talinga na utaw yan, aw pigbetangan nan na laway ya dilaꞌ na umal. Aw lyumangad si Jisus adti langit aw gyuminawa na malalem, aw miglong sakanan, "Épata!" Ya kakawasan nan: "Ka-uwangan kaw!" Aw dayaw dyumengeg aw nyakapaglong ya eseg yan, aw mabangal da ya paglong nan. Pagkatigkas yan, piglongan ni Jisus ya manga utaw, "Diliꞌ mayu pag-ubat-ubat adti pangkay singalan ya nya-imoꞌ adun." Manang to-o pa baling nilan pigbekkal adti madég na utaw ya nya-imoꞌ. Aw to-o nya-enneng-enneng ya manga utaw aw miglong silan, "Alag mangkadyaw ya pigpan-imoꞌ nan. Pigpadengeg nan ya manga bengel aw pigpapaglong nan ya manga umal."
Ya pagpaguliꞌ ni Jisus sa mata ni Bartimyo
Na, dyumateng si Jisus aw manga umagakan nan adti syudad na Jériko. Aw sa pag-indeg nilan lekat dun ni syudad yan, madég ya manga utaw na nyagad kanilan. Aw adti kilid na dalan awun eseg na buta na nyingkud aw nyangilalat sa manga utaw na lyumabay. Ya ngalan nan si Bartimyo na iseꞌ ni Timyo. Pagdengeg nan na si Jisus na taga Nazarit ya un lumabay, migtatawag sakanan, "We… Jisus na buwadbuwad ni Dabid! Kallati beg aku!" Manang pigsagda sakanan na madég na utaw, law nilan, "Katinep kaw!" Manang to-o pa nan baling pigpakadakulaꞌ ya kanan tingeg, "We… Buwadbuwad ni Dabid, kallati beg aku!" Yanagaw tyumeneng si Jisus aw law nan, "Tawaga mayu sakanan aw pa-agadan mayu adi." Aw pigtawag nilan ya buta aw law nilan, "Pakabagsega ya ginawa mu! Indeg kaw kay pigtawag kaw ni Jisus!" Aw maksay nan pigsalabel ya kayab nan aw nyindeg aw migpalapit kan Jisus. Aw nyusip si Jisus kanan, "Unu ya kaliman mu na imo-un ku kanmu?" Aw tyumubag ya eseg yan, "Kay Magpalna-uway, kaliman ku beg kumitaꞌ salut." Aw piglongan sakanan ni Jisus, "Panaw da kaw. Asuntu sa pagpangintu-u mu kanak, kyaguli-an da kaw." Aw dayaw sakanan kyumitaꞌ aw dyumalug da kan Jisus sa panaw nan.
Ya pagpaguliꞌ ni Jisus sa utaw na buta
Na, sa malapit da si Jisus adti syudad na Jériko, awun eseg na buta na nyingkud dun ni kilid na dalan aw gayed migsekat sa kuwalta. Aw sa pagdengeg nan sa madég na manga utaw na lyumabay dun, nyusip sakanan, "Unu yangadi?" Aw miglong ya manga utaw kanan, "Lyumabay si Jisus na taga Nazarit!" Yanagaw to-o sakanan migtatawag, "We… Jisus na buwadbuwad ni Dabid, kallati beg aku!" Aw pigsagda sakanan na manga utaw na nyaka-una kan Jisus, law nilan, "Katinep kaw!" Manang to-o pa nan baling pigpakadakulaꞌ ya kanan tingeg, "We… Buwadbuwad ni Dabid, kallati beg aku!" Yanagaw tyumeneng si Jisus, aw syumuguꞌ na pa-agad ya eseg na buta adti kanan. Aw sa malapit da sakanan, nyusip kanan si Jisus, "Unu ya kaliman mu na imo-un ku kanmu?" Aw tyumubag ya eseg yan, "Kay Sir, kaliman ku beg na kumitaꞌ salut." Aw miglong pa si Jisus kanan, "Kumitaꞌ da kaw. Asuntu sa pagpangintu-u mu kanak, kyaguli-an da kaw." Aw dayaw sakanan kyumitaꞌ aw dyumalug kan Jisus na to-o migdeyen sa Tyumanem. Aw sa pagkitaꞌ na manga utaw sa nya-imoꞌ yeiy, pigdeyen nilan uman ya Tyumanem.
Ya pagpaguliꞌ ni Jisus sa utaw na buta
Sa pagpanaw ni Jisus, pigkitaꞌ nan ya sambuk na utaw na buta lekat pa na pagka͡utaw nan. Yanagaw nyusip ya manga umagakan nan, "Kay Magpalna-uway, anangaꞌ yan mabuta? Kanyan salaꞌ ya pagkabuta nan, kanan aw kana mangkatikadeng nan?" Aw tyumubag si Jisus kanilan, "Ya kanan pagkabuta bekeꞌ na asuntu na nyakasalaꞌ sakanan aw mangkatikadeng nan. Manang magi dun ni pagkabuta nan, kita-en ya katulus na Tyumanem adti kanan. Talana na allaw pa, ka-ilangan imo-un tadun ya imo-unun na Tyumanem na migpadala kanak. Kay diliꞌ madugay, dumateng ya kangitngitan kasiling na gabi aw diliꞌ da makatalabahu ya pangkay singalan. Talana ini pa aku ni tas na lupaꞌ, aku saba ya kalalamdag na maka-ilaw sa anenganeng na manga utaw." Tigkas ni Jisus maglong, pig-eleban nan ya kutu na lupaꞌ aw pig-imoꞌ nan pasak. Aw pigdamus nan adti manga mata na buta, aw piglongan nan, "Kadtu kaw adti linaw na Silo-am aw pagkulamus kaw dun." Na, ya kakawasan na Silo-am: pigpadala. Yanagaw nyadtu ya utaw yan aw lyumikuꞌ sakanan na dayaw da kyumitaꞌ.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Aw awun dyumulud kanan na sambuk na eseg na ibungun. Lyumuhud sakanan aw to-o nyanginayuꞌ, aw miglong sakanan, "Kay Sir, kun malim kaw beg, guli-a ya ibung ku, pada kaguli-an da ya lawas ku." Aw pig-awidan ni Jisus ya eseg yan, aw piglongan nan, "Kaliman ku saba. Na, kaguli-an da kaw!" Aw dayaw nyalanas ya ibung nan. Pagkatigkas yan, miglong si Jisus kanan, "Ya-i pag-ubatan adti pangkay singalan utawa ya nya-imoꞌ adun! Manang kadtu kaw baling ni Témplo aw patanawan ya lawas mu adti magdadugsu-ay, aw yan ya magmatinaw na kyaguli-an da kaw sa kanmu ibung. Aw dala͡en mu kanan ya umbaꞌ na pagdugsuꞌ na pigsuguꞌ ni Moysis, pada ka-ede-an na manga utaw na kyalinisan da kaw."
Sa pagdateng da nan, piglagbet sakanan na manga utaw na migtingga sa pulid. Sa pagkitaꞌ ni Jisus sa pagpangintu-u nilan na mabatug nan guli-en ya utaw yan, piglongan nan ya pulid, "Kay Lew, pakabagsega ya kanmu ginawa, kay ya manga salaꞌ mu adti Tyumanem piglanas da." Aw dun uman ya manga eped na magpalna-uway sa Uldin, aw dyengeg nilan ya piglong ni Jisus. Yanagaw mig-anenganeng silan, "Ya utaw yeiy, migpa-unawa sakanan sa Tyumanem!" Manang kya-ede-an ni Jisus ya kanilan anenganeng, yanagaw piglongan nan silan, "Anangaꞌ kamu mag-anenganeng sa malatay? Ayin kaꞌ ya molas paglongun adti eseg na pulid, ‘Ya manga salaꞌ mu nyalanas da,’ aw kun paglongun sakanan, ‘Pagbangun kaw aw panaw da kaw’? Manang matinawun ku adti kamayu na aku na Iseꞌ na Utaw awun katundanan ku asini tas na lupaꞌ maglanas sa manga salaꞌ na manga utaw." Tigkas yan, miglong si Jisus adti eseg na pulid, "Pagbangun kaw! Dala͡a ya pigtingga͡an nilan kanmu aw uliꞌ da kaw!" Aw maksay nyindeg ya pulid aw nyuliꞌ sakanan adti balay.
Aw dun uman ni seled na sinagoga awun sambuk na eseg na kimay ya sangkilid na bekten nan. Aw nyusip ya manga Parisiyo kan Jisus, "Unu kaꞌ, pigtumbay na Uldin tadun ya pagpaguliꞌ dun ni Allaw na Paglagdeng?" Kay kaliman nilan na awun puliba nilan maglimanda kanan adti usayanan. Manang tyumubag si Jisus kanilan, "Alimbawaꞌ, kun awun karniro mu na molug adti malalem na gawang dun ni Allaw na Paglagdeng, na, unu ya imo-un mayu? Maksay mayu saba tabangan aw engaten lekat adti gawang. Yanagaw ayin ya dakulaꞌ ya alagaꞌ, ya utaw aw ya karniro? Ya utaw saba! Yeiy ya du-an na pigtumbay na Tyumanem ya madyaw na imo-unun pangkay Allaw na Paglagdeng." Aw tigkas yan, piglongan ni Jisus ya eseg na kimay, "Ulada ya bekten mu." Aw pig-ulad nan ya bekten nan, aw dayaw kyaguli-an. Aw migkadyaw da kasiling na sangkilid na bekten nan.
Pagdateng nilan dun, maksay nilan pig-ubatan si Jisus na kyedelan ya ugangan ni Simon na ka͡ubayan, aw gayed sakanan kyumulang asuntu na to-o migkapasuꞌ. Yanagaw, migpalapit si Jisus adti kanan aw pig-awidan nan ya bekten aw pigbangun nan. Aw dayaw pig-uwasan sa kapasuꞌ nan, aw pagkatigkas yan, pigsanggilaꞌ nan silan.
Ya pagpaguliꞌ ni Jisus sa utaw na ibungun
Na, awun eseg na ibungun na dyumulud kan Jisus. Lyumuhud sakanan aw to-o nyanginayuꞌ, law nan, "Kay Sir, kun malim kaw, guli-a beg ya ibung ku, pada kalinisan da ya lawas ku." Aw to-o si Jisus nyallat kanan. Yanagaw, pig-awidan nan ya eseg yan aw miglong, "Kaliman ku saba. Na, kaguli-an da kaw!" Aw dayaw nyalanas ya kanan ibung, aw kyalinisan da ya lawas nan.
Talana nan mig-ubat-ubat, awun upat ya eseg na dyumateng na migtingga sa pulid pada dala͡en adti kan Jisus. Manang asuntu sa kadég na utaw, walaꞌ silan pakapalapit adti kan Jisus. Yanagaw piggawangan nilan ya atep dun ni tas ni Jisus, aw pigtonton nilan adti dalem ya pigpakulangan sa pulid. Kyinitaꞌ ni Jisus ya kadakulaꞌ na pagpangintu-u nilan, yanagaw piglongan nan ya pulid, "Kay Lew, ya manga salaꞌ mu adti Tyumanem, piglanas da." Na, awun uman manga magpalna-uway sa Uldin na nyingkud dun. Pagdengeg nilan sa piglong ni Jisus, mig-anenganeng silan, "Anangaꞌ maglong sa maynan ya utaw yeiy? Migpa-unawa sakanan sa Tyumanem! Ya Tyumanem saba oloꞌ ya makalanas sa manga salaꞌ!" Manang maksay ni Jisus kya-ede-an ya pig-anenganeng nilan, yanagaw piglongan nan silan, "Anangaꞌ kamu mag-anenganeng sa maynan? Ayin kaꞌ ya molas paglongun adti eseg na pulid, ‘Ya manga salaꞌ mu nyalanas da,’ aw kun paglongun sakanan, ‘Pagbangun kaw. Dala͡a ya pigtingga͡an nilan kanmu aw panaw da kaw’? Manang matinawun ku adti kamayu na aku na Iseꞌ na Utaw awun katundanan ku asini tas na lupaꞌ maglanas sa manga salaꞌ na manga utaw." Tigkas yan, miglong si Jisus adti eseg na pulid, "Pagbangun kaw. Dala͡a ya pigtingga͡an nilan kanmu aw uliꞌ da kaw!" Aw dun ni asdangan na manga utaw, migbangun ya eseg aw maksay nan pigdala ya pigtingga͡an kanan aw nyanaw da sakanan. Aw to-o nya-enneng-enneng ya manga utaw, aw pigdeyen nilan ya Tyumanem, aw law nilan, "Walaꞌ pa tadun kita-a ya kasiling na maynini!"
Ya pagpaguliꞌ ni Jisus sa utaw na kimay dun ni Allaw na Paglagdeng
Na, lyumikuꞌ si Jisus syumeled adti sinagoga, aw dun ya sambuk na eseg na kimay ya sangkilid na bekten nan. Aw awun manga Parisiyo na gayed nyakatanaw sa un imo-un ni Jisus, kun guli-en nan ya bekten na utaw dun ni Allaw na Paglagdeng, pada awun puliba nilan maglimanda kanan. Aw pigtawag ni Jisus ya eseg na kimay, law nan, "Adi kaw aw indeg kaw asini asdangan na kadég na utaw." Tigkas yan, pig-usip nan ya manga Parisiyo, "Adti Uldin tadun na pig-atag na Tyumanem, unu ya pigtumbay na imo-un dun ni Allaw na Paglagdeng, ya pag-imoꞌ sa madyaw aw ya pag-imoꞌ sa malatay? Aw ya pagpaluwaꞌ sa utaw lekat adti pagti-is, aw kun kalaten baling sakanan?" Manang walaꞌ silan tubag kanan. Pig-inunu ni Jisus ya kadég nilan aw nyadaman sakanan. Aw migkalat uman ya ginawa nan asuntu sa kategelan nilan. Tigkas yan, piglongan nan ya eseg na kimay, "Ulada ya bekten mu." Aw sa pag-ulad nan sa kanan bekten, dayaw migkadyaw.
Ya pagpaguliꞌ ni Jisus sa utaw na ibungun
Talana ni Jisus adti sambuk na lunsud, awun dyumulud kanan na eseg na ibungun. Pagkitaꞌ nan kan Jisus, lyumuhud sakanan aw nyanginayuꞌ, law nan, "Kay Sir, kun malim kaw beg, guli-a ya ibung ku, pada kalinisan da ya lawas ku." Aw pig-awidan ni Jisus ya eseg aw piglongan nan, "Kaliman ku saba. Na, kaguli-an da kaw!" Aw dayaw nyalanas ya ibung nan.
Na, awun manga eseg na dyumateng dun na migtingga sa pulid. Pigtibagsegan nilan na makaseled adti balay pada dala͡en ya pulid adti asdangan ni Jisus. Manang walaꞌ silan pakaseled asuntu sa kadég na utaw. Yanagaw nyanik silan dun ni agdan na awun ni luwaꞌ pasinan adti atep na balay aw mig-imoꞌ silan sa gawang dun ni atep, aw pigtonton nilan adti dalem ya pigpakulangan sa pulid dun ni asdangan ni Jisus. Sa pagkitaꞌ ni Jisus sa kadakulaꞌ na pagpangintu-u nilan, miglong sakanan adti pulid, "Kay Lew, ya manga salaꞌ mu adti Tyumanem, piglanas da."
Aw sa pagpakadengeg na manga Parisiyo aw manga magpalna-uway sa Uldin sa piglong ni Jisus, mig-anenganeng silan, "Anangaꞌ maglong sa maynan ya utaw yeiy? Migpa-unawa sakanan sa Tyumanem! Ya Tyumanem saba oloꞌ ya makalanas sa manga salaꞌ!" Manang kya-ede-an ni Jisus ya anenganeng nilan, yanagaw piglongan nan silan, "Anangaꞌ kamu mag-anenganeng sa maynan? Ayin kaꞌ ya molas paglongun adti eseg na pulid, ‘Ya manga salaꞌ mu nyalanas da,’ aw kun paglongun sakanan, ‘Pagbangun kaw aw panaw da kaw’? Manang matinawun ku adti kamayu na aku na Iseꞌ na Utaw, awun katundanan ku asini tas na lupaꞌ maglanas sa salaꞌ na manga utaw." Tigkas yan, miglong si Jisus adti eseg na pulid, "Pagbangun kaw! Dala͡a ya pigtingga͡an nilan kanmu aw uliꞌ da kaw!" Aw maksay migbangun ya eseg na pulid dun ni asdangan na manga utaw aw dyala nan ya pigtingga͡an kanan aw nyuliꞌ adti balay nan na to-o migdeyen sa Tyumanem.
Ya pagpaguliꞌ ni Jisus sa utaw na kimay
Na, sambuk uman na Allaw na Paglagdeng, syumeled si Jisus adti sinagoga aw migpalna-u, aw dun ya sambuk na eseg na kimay ya kalintu na bekten nan. Aw dun uman ya manga Parisiyo aw manga magpalna-uway sa Uldin na manga Judiyu na migbantay sa un imo-un ni Jisus, kun guli-en nan ya bekten na utaw dun ni Allaw na Paglagdeng. Kay kaliman nilan na awun puliba maglimanda kanan. Manang kya-ede-an ni Jisus ya adti anenganeng nilan. Yanagaw pigtawag nan ya eseg na kimay, law nan, "Adi kaw aw indeg kaw asini asdangan na kadég na utaw." Aw nyindeg ya utaw yan dun ni asdangan nilan. Aw miglong si Jisus adti manga Parisiyo aw manga magpalna-uway, "Awun usip ku kamayu: Adti Uldin, unu ya pigtumbay na imo-un dun ni Allaw na Paglagdeng, ya pag-imoꞌ sa madyaw aw ya pag-imoꞌ sa malatay? Aw kun paluwa-en ya utaw lekat adti pagti-is aw kalaten baling sakanan?" Pig-inunu ni Jisus ya kadég nilan, aw tigkas yan piglongan nan ya eseg na kimay, "Ulada ya bekten mu." Aw pig-ulad nan ya kanan bekten, aw dayaw migkadyaw.
Ya pagguliꞌ ni Jisus sa sugu-anen na kapitan na manga sundalu
Pagkatigkas ni Jisus magpalna-u adti manga utaw, nyadtu sakanan adti lunsud na Kapirna-um. Na, dun ni Kapirna-um pag-eyaꞌ ya sambuk na kapitan sa manga sundalu aw awun kanan sugu-anen na to-o nan pigginawa͡an, manang kyedelan ya sugu-anen nan aw kamatayenen da. Pagdengeg na kapitan sa manga pigpan-imoꞌ ni Jisus, pyakadtu nan ya manga magdadumala͡ay sa manga Judiyu na nyeyaꞌ dun ni lunsud, aw piglongan nan silan na manginayuꞌ kan Jisus na madtu ni balay pada guli-en ya sugu-anen nan. Pagdateng nilan adti kan Jisus, nyanginayuꞌ silan to-o kanan, law nilan, "Ya utaw yeiy umbaꞌ mu sakanan tabangan, kay pigginawa͡an nan ya kadég tadun na manga Judiyu aw migpatulluk sakanan kanaten sa sinagoga!"
Yanagaw nyagad si Jisus kanilan. Sa malapit da silan adti balay, pigsuguꞌ na kapitan ya manga ubaybay nan na sungunun nilan si Jisus aw paglongun sakanan, "Kay Sir, yeiy ya piglong kanmu na kapitan: ‘Diliꞌ da kaw maglos, kay diliꞌ aku saba makatumbuk magpapanik kanmu adti kanak balay. Yeiy ya du-an na bekeꞌ ku ya nyangay kanmu. Manang pangkay oloꞌ da mu paglongun na kaguli-an sakanan, kaguli-an saba ya sugu-anen ku. Kay sambuk aku uman na magka͡agad sa matas pa kanak ya katundanan, aw awun uman katundanan ku sa manga sundalu na madalem pa kanak. Kun sugu-un ku ya sambuk na "Kadtu kaw!" maksay sakanan madtu. Aw kun paglongun ku uman ya sambuk na "Kadi kaw!" madi sakanan. Aw pangkay unu ya suguꞌ ku sa kanak sugu-anen, ka͡agadan nan saba.’ " Sa pagdengeg ni Jisus sa piglong na kapitan, nya-enneng-enneng sakanan, aw piglongan nan ya manga utaw na dyumalug kanan, "Paglongun ta kamu: Ya eseg ini pangkay Héntil sakanan, manang walaꞌ pa ku kita-a asini manga utaw na Isra-él ya maynini na pagpangintu-u." Aw sa paglikuꞌ da na manga pigsuguꞌ na kapitan adti balay, kyinitaꞌ nilan na kyaguli-an da ya sugu-anen.
Aw awun ka͡ubayan dun na nyasakung asuntu na pigpamulayaman na busaw seled da na sampuluꞌ tag walu (18) ya umay aw diliꞌ nan mabatug tuliden ya bagakwang nan. Sa pagkitaꞌ ni Jisus kanan, pigtawag nan sakanan aw piglongan nan, "Kaguli-an da kaw." Aw pigpandungan ni Jisus na kanan palad ya ka͡ubayan, aw dayaw nyatulid ya bagakwang nan aw to-o nan pigdeyen ya Tyumanem.
Ya pagpaguliꞌ ni Jisus sa utaw na nyabagaꞌ ya lawas
Na, sambuk na Allaw na Paglagdeng, pigpilit si Jisus na kuman adti balay na sambuk na magdadumala͡ay sa manga Parisiyo. Aw sa talana nilan kyuman, to-o nilan pyakatanawan si Jisus kun unu ya un nan imo-un. Aw dun ni kanilan ya sambuk na utaw na nyangkabagaꞌ ya kadakulaꞌ na lawas nan. Aw nyusip si Jisus sa manga Parisiyo aw manga magpalna-uway sa Uldin na manga Judiyu, law nan, "Unu, pigtumbay na Uldin tadun ya pagguliꞌ sa utaw dun ni Allaw na Paglagdeng?" Manang walaꞌ silan tubag. Yanagaw pig-awidan ni Jisus ya utaw aw dayaw nan guli-a, aw pigpapanaw nan.
Ya pagpaguliꞌ ni Jisus sa sampuluꞌ ya ibungun
Talana ni Jisus migpasinan adti Jérusalim, nyagi sakanan dun ni eletanan na Samariya aw Galiliya. Aw sa pagseled da nan adti sambuk na baranggay, syumungun kanan ya sampuluꞌ ya ibungun, aw tyumeneng silan adti mawatawat aw migtatawag silan, "Kay Jisus na Magpalna-uway! Kallati beg kami." Sa pagkitaꞌ ni Jisus kanilan, piglongan nan silan, "Kadtu kamu ni Témplo aw patanawan ya kamayu lawas adti manga magdadugsu-ay." Aw sa pagpasinan nilan adti Jérusalim, pyangkaguli-an da ya kanilan lawas. Aw ya sambuk kanilan, sa pagkitaꞌ nan na kyaguli-an da sa ibung nan, lyumikuꞌ sakanan adti kan Jisus na migdeyen sa Tyumanem sa mabagseg na tingeg. Aw lyumuhud sakanan aw dyumukduk adti siki ni Jisus, aw to-o migpasalamat kanan. Na, ya utaw yeiy, Samariyanen sakanan. Pagkatigkas yan, miglong si Jisus, "Endaꞌ, sampuluꞌ kamu ya kyaguli-an? Ayin da saba ya siyam? Anangaꞌ walaꞌ likuꞌ ya manga eped na un magdeyen sa Tyumanem, oloꞌ baling utaw ini na bekeꞌ na Judiyu?" Aw miglong si Jisus kanan, "Indeg kaw aw panaw da kaw. Ya kanmu pagpangintu-u, yan ya du-an na kyaguli-an kaw."
Ya pagguliꞌ ni Jisus sa utaw adti linaw na Bétésda
Pagkatigkas yan, nyadtu si Jisus adti Jérusalim na un tumambung sa Pista na manga Judiyu. Na, adti syudad na Jérusalim, awun linaw na pigngalanan adti tingeg na Hibriyu, Bétésda. Ya linaw yeiy malapit adti suwangan na pag-agiyan na manga karniro, aw kyapalibedan na lima ya silunganan. Aw dun ni manga silunganan yeiy, kyumulang ya madég na manga utaw na awun magkedel, kasiling na manga buta, aw manga pulid aw manga kimay. [Migtagad silan na mag-inang ya tubig. Kay awun kunu udas na magpanog ya anghil na Tyumanem na un magpa-inang sa tubig. Aw kun singalan ya maka-una magtingelem adti tubig na pigpa-inang na anghil, kaguli-an pangkay unu ya magkedel nan.] Na, awun sambuk na eseg dun na awun magkedel nan na seled da na katluwan tag walu (38) ka umay. Aw pigkitaꞌ ni Jisus na kyumulang sakanan dun, aw kya-ede-an nan uman na to-o la madugay ya magkedel nan. Yanagaw nyusip si Jisus kanan, "Unu, kaliman mu kaguli-an?" Tyumubag ya eseg, "Kay Sir, walaꞌ beg ya utaw na malim dumala kanak adti linaw kun mag-inang da ya tubig. Talana pa ku migpasinan adtu, awun da nyaka-una kanak na eped na utaw." Aw miglong si Jisus kanan, "Pagbangun kaw! Dala͡a ya kamen mu aw panaw da kaw!" Aw dayaw kyaguli-an ya eseg yan. Aw dyala nan ya kanan kamen aw panaw da.
Na, nya-imoꞌ yeiy dun ni Allaw na Paglagdeng.
Aw lyumikuꞌ uman si Jisus adti Cana sakup na Galiliya na yan ya banwa na pig-imo-an nan sa milagru na ya tubig migbaluy bino. Na, adti Kapirna-um pag-eyaꞌ ya sambuk na pagsaligan na gubirnu, aw to-o kyatigda-an ya iseꞌ nan na eseg. Pagdengeg nan na dyumateng si Jisus adti Galiliya lekat adti Judiya, nyadtu sakanan adti Cana aw nyanginayuꞌ na magad kanan si Jisus adti Kapirna-um aw guli-en nan ya iseꞌ na kamatayenen da. Miglong si Jisus kanan, "Kun walaꞌ pa kamu kitaꞌ sa manga pangilala aw milagru na pig-imoꞌ ku, diliꞌ kamu mangintu-u kanak." Manang miglong ya pagsaligan, "Kay Sir, agad kaw beg kanakeꞌ talana walaꞌ pa kamatay ya iseꞌ ku!" Miglong si Jisus kanan, "Uliꞌ da kaw, kay kyaguli-an da ya iseꞌ mu!" Aw pigpangintu-uwan na pagsaligan ya piglong ni Jisus, aw nyaksay sakanan nyuliꞌ adti Kapirna-um. Aw sa talana pa nan dun ni dalan, pigsungun da sakanan na manga sugu-anen nan aw piglongan nilan na kyaguli-an da ya iseꞌ nan. Yanagaw pig-usip nan silan kun unu udasa ya pagpakaguliꞌ kanan. Aw tyumubag silan, "Kagabi ambung na manga ala una ya pag-uwas sa kapasu-an nan." Aw kya-anenganengan na ama na iseꞌ na yan ya udas na miglong si Jisus kanan na "Kyaguli-an da ya iseꞌ mu!" Yanagaw ya pagsaligan aw ya kadég na ka-epedanan nan dun ni balay alag silan nyangintu-u kan Jisus. Na, yeiy ya kadwa na milagru na pig-imoꞌ ni Jisus adti Galiliya pagkatigkas nan adti Judiya.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Talana nilan nyanaw, awun ka͡ubayan na dyumulud kan Jisus apit adti bagakwang nan. Na, ya ka͡ubayan yeiy, gayed pigdugu-duguꞌ seled na sampuluꞌ tag duwa (12) ya umay. Aw yanagaw pig-awidan nan ya pangaway na pigsut ni Jisus, kay mig-anenganeng sakanan, "Kun ka-awidan ku oloꞌ ya pangaway na pigsut nan, kaguli-an da aku." Aw maksay nyatubang si Jisus aw kyinitaꞌ nan ya ka͡ubayan, aw piglongan nan, "Kay Déꞌ, pakabagsega ya kanmu ginawa. Asuntu sa pagpangintu-u mu kanak, yan ya nyakaguliꞌ kanmu." Aw dayaw kyaguli-an ya ka͡ubayan.
Na, dun ni tengaꞌ na madég na manga utaw, awun sambuk na ka͡ubayan na gayed pigdugu-duguꞌ seled da na sampuluꞌ tag duwa (12) ya umay. Madég to-o ya pagti-is na kya-agiyan nan lekat adti pagpabulung nan sa madég na doktor mendaꞌ na nyabus ya kuwalta nan, manang walaꞌ sakanan kaguli-i, aw to-o la baling ya bati-enen nan. Dyengeg nan ya pag-ubat-ubat sa manga pigpan-imoꞌ ni Jisus. Yanagaw dyumulud sakanan nyagi dun ni madég na utaw apit adti bagakwang ni Jisus. Aw pig-awidan nan ya kadégkadég ni Jisus, kay mig-anenganeng sakanan, "Kun ka-awidan ku oloꞌ ya pigsut nan, kaguli-an da aku." Aw sa pagpaka-awid nan, dayaw tyumeneng ya duguꞌ, aw pigbatiꞌ nan na kyaguli-an da sakanan.
Na, dun ni tengaꞌ na kadég na manga utaw, awun sambuk na ka͡ubayan na gayed pigdugu-duguꞌ seled da na sampuluꞌ tag duwa (12) ya umay. Nyabus da ya kuwalta nan migpabulung aw walaꞌ sakanan kaguli-i. Yanagaw dyumulud ya ka͡ubayan yan apit adti bagakwang ni Jisus aw pig-awidan nan ya pangaway na pigsut nan, aw dayaw tyumeneng ya kanan duguꞌ. Aw nyusip si Jisus kanilan, "Singalan ya nyawid kanak?" Aw ya kadég na manga utaw alag migmatinaw na walaꞌ silan awid kanan. Aw miglong si Pédro, "Kay Magpalna-uway, kyinitaꞌ da mu saba ya kadég na manga utaw na mig-insek kanmu." Manang miglong si Jisus, "Awun nyawid kanak kay pigbatiꞌ ku na awun katulus na lyumuwaꞌ lekat adi kanak." Pagka-edeꞌ na ka͡ubayan na diliꞌ da nan mataguꞌ, lyumikuꞌ sakanan adti kan Jisus na pigtakigan. Aw nyangillupung adti asdangan ni Jisus aw pig-ubat nan adti kadég na manga utaw kun unu ya du-an na pig-awidan nan ya pigsut ni Jisus aw ya pagpakaguliꞌ kanan. Aw miglong si Jisus kanan, "Kay Déꞌ, asuntu sa pagpangintu-u mu kanak, yan ya nyakaguliꞌ kanmu. Uliꞌ kaw na awun da kalinaw na kanmu anenganeng."
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
Ya pagguliꞌ ni Jisus sa magkedel na ka͡ubayan aw ya pagmataw nan sa iseꞌ na nyatay
Na, talana pa ni Jisus miglong adti manga umagakan ni Juan, dyumulud kanan ya sambuk na magdadumala͡ay sa sinagoga. Aw lyumuhud sakanan adti asdangan ni Jisus, aw to-o nyanginayuꞌ, law nan, "Ya iseꞌ ku na dalagita, bayaꞌ pa beg nyapalus ya ginawa nan. Manang kya-ede-an ku na kun magad kaw kanak adti balay aw pandungan mu sakanan na kanmu palad, mataw saba sakanan." Yanagaw nyagad si Jisus sa utaw yan, aw nyagad uman ya manga umagakan nan.
Na, pagdateng ni Jisus dun ni balay na utaw na magdadumala͡ay sa sinagoga, kyinitaꞌ nan ya madég na utaw adti luwaꞌ na migpanmatay aw ya manga utaw na migpansi-eyep sa sileli. Yanagaw piglongan nan silan, "Luwaꞌ pa kamu! Walaꞌ saba kamatay ya iseꞌ. Oloꞌ sakanan nyakatulug!" Manang nyaka-ikel baling silan sa piglong nan. Aw sa pagpakaluwaꞌ da na manga utaw, syumeled sakanan adti pigpakulangan sa iseꞌ aw pig-awidan nan ya bekten na iseꞌ, aw dayaw migbangun sakanan.
Aw dyumulud kanan ya sambuk na magdadumala͡ay sa sinagoga na pigngalanan na si Jairus. Aw lyumuhud adti asdangan ni Jisus aw nyanginayuꞌ sakanan, law nan, "Ya iseꞌ ku na dalagita, to-o kyatigda-an aw kamatayenen da! Manang kya-ede-an ku na kun magad kaw kanak adti balay aw pandungan mu na kanmu palad, kaguli-an aw kamatawan sakanan!" Yanagaw nyagad si Jisus kanan. Aw nyagad uman kanilan ya madég to-o na manga utaw, aw gayed da silan mig-insek malapit dun ni sayid ni Jisus.
Pagdateng nilan adti balay, kyinitaꞌ ni Jisus ya madég na utaw na migpansimatay. Sa pagseled da nan, pig-usip nan silan, "Anangaꞌ kamu magsasugaway aw magpanmatay? Walaꞌ kamatay ya iseꞌ, oloꞌ saba nyakatulug!" Nyaka-ikel baling silan sa piglong nan. Manang pigpaluwaꞌ nan silan adti balay, aw pigpa-agad ni Jisus ya ama aw ina na iseꞌ aw ya tulu ya umagakan nan adti pigpakulangan sa iseꞌ. Tigkas yan, pig-awidan nan ya bekten na iseꞌ aw law nan dun ni kanilan tingeg, "Talita kumi!" Ya kakawasan nan: "Kay Déꞌ, pagbangun kaw!" Aw dayaw migbangun ya iseꞌ aw pagpanawpanaw. Aw to-o silan nya-enneng-enneng. Na, ya iseꞌ yeiy, sampuluꞌ pa tag duwa ya umay nan.
Migpadeleg si Jisus miglong, "Unu ya un ku kapa-unawa͡an sa manga utaw adun na gayed kyumele sa palna-u na dyengeg nilan? Kasiling silan na mangayseꞌ na nyan-ingkud adti pamanag na palingki. Diliꞌ silan malim magad magdanga pangkay pigtatawag silan na kanilan manga eped na maglong: ‘Naten magdanga! Migpasonata kami sa pangkasal, manang walaꞌ kamu sayaw! Aw migpansimatay kami manang walaꞌ kamu pagsugaw.’ Kamu uman na manga utaw, maynan saba kamu. Kay dyumateng si Juan aw malikit sakanan magpuwasa aw walaꞌ inem sa bino, aw miglong kamu, ‘Syeledan sakanan na busaw!’ Tigkas yan, dyumateng aku na Iseꞌ na Utaw. Kyinitaꞌ mayu aku kyuman aw nyinem eped ku ya madég na manga utaw. Manang miglong kamu baling, ‘Tanawa mayu ya utaw yeiy! To-o sakanan kyuman aw nyinem sa bino, aw mig-ubaybay sakanan sa manga mangungubla͡ay sa buwis aw eped pa na makasasalaꞌ!’ Pangkay maynan ya piglong mayu, manang ya palna-u ku aw palna-u ni Juan, alag saba pigmatinaw dun ni manga pigpan-imoꞌ na kadég na utaw na dyumalug sa palna-u nami."
Ya pag-asag na ka͡ubayan sa manimboꞌ adti siki ni Jisus
Na, awun sambuk na Parisiyo na pigngalanan na si Simon, aw piglongan nan si Jisus na kuman adti tampid nan. Yanagaw nyadtu si Jisus adti balay ni Simon aw kyuman dun ni lamisa. Na, dun uman ni lunsud yan, awun sambuk na ka͡ubayan na makasasalaꞌ. Pagdengeg nan na kyuman si Jisus adti balay na Parisiyo, nyadtu sakanan aw dyumala sa tagbiꞌ na sabuy na pig-imoꞌ lekat adti batu na alabastro aw awun seled na manimboꞌ.
Aw ya sambuk kanilan yan si Jairus na magdadumala͡ay sa sinagoga. Dyumulud sakanan adti kan Jisus aw lyumuhud adti asdangan nan, aw nyanginayuꞌ na madtu ni balay nan kay kamatayenen da ya iseꞌ nan na tamisa. Ya iseꞌ nan yeiy manga sampuluꞌ pa tag duwa ya umay nan. Yanagaw nyagad si Jisus kanan. Sa pagpanaw da nilan, migpan-insek ya madég na manga utaw na nyakapalibed kan Jisus.
Sa walaꞌ pa si Jisus katigkas paglong adti ka͡ubayan yan, awun utaw na dyumateng lekat adti balay ni Jairus, aw law nan, "Nyapalus da beg ya ginawa na iseꞌ mu kay Sir! Diliꞌ da mu pagpagudun ya Magpalna-uway." Pagdengeg ni Jisus sa piglong na utaw yan, miglong sakanan kan Jairus, "Diliꞌ kaw magkallek. Pangintu-u kaw oloꞌ aw kaguli-an ya iseꞌ mu." Sa pagdateng da ni Jisus adti balay ni Jairus, walaꞌ sakanan kalim agadi na manga utaw adti seled. Yan oloꞌ ya pigpa-agad nan si Pédro, si Juan, si Santiago, aw ya ama aw ina na iseꞌ. Ya manga utaw adti luwaꞌ, alag silan migpansugaw aw migpanmatay. Manang miglong si Jisus kanilan, "Diliꞌ kamu magsugaw kay walaꞌ saba kamatay ya iseꞌ. Nyakatulug oloꞌ sakanan!" Aw nyaka-ikel baling silan sa piglong nan kay kya-ede-an nilan na nyatay da ya iseꞌ. Manang pig-awidan ni Jisus ya bekten na iseꞌ aw law nan, "Kay Déꞌ, pagbangun kaw!" Aw lyumikuꞌ ya ginawa nan aw dayaw sakanan migbangun aw nyindeg. Aw migsuguꞌ si Jisus na atagan nilan na kakan ya iseꞌ. To-o nya-enneng-enneng ya manga mangkatikadeng nan sa kyinitaꞌ nilan. Manang piglongan silan ni Jisus, "Ya-i mayu pag-ubat-ubatan adti eped na manga utaw ya nya-imoꞌ."
Ya pagkamatay ni Lazaro
Na, awun utaw na pigngalanan na si Lazaro. Nyeyaꞌ sakanan adti baranggay na Bétaniya, aw matigdaꞌ sakanan. Aw dun uman pag-eyaꞌ ya manga bubay nan na si Maria aw si Marta. Na, ya Maria yeiy, yan ya un mag-asag kagaya sa manimboꞌ adti manga siki ni Jisus aw galisan nan na kanan lugay. Aw asuntu na to-o kyatigda-an si Lazaro, yanagaw pigpatugun na manga bubay nan si Jisus na maglong, "Kay Magpalna-uway, ya ubaybay mu na kanmu pigginawa͡an to-o kyatigda-an." Aw sa pagdengeg ni Jisus sa ubat-ubat yeiy, miglong sakanan, "Ya tengteng na sampetan na kanan magkedel bekeꞌ na matay sakanan manang dun baling kita-a ya katulus na Ama aw magi dun madeyen ya Iseꞌ."
Na, alag pigginawa͡an ni Jisus si Marta aw si Maria aw si Lazaro. Yanagaw, pangkay dyengeg da ni Jisus na kyatigda-an si Lazaro, manang nyatingen pa sakanan adti pig-eya-an nan seled na duwangallaw. Pagkatigkas yan, miglong si Jisus adti manga umagakan nan, "Lumikuꞌ kitadun adti Judiya." Manang law nilan, "Kay Magpalna-uway, bagu pa kaw saba pigbantakan na manga magdadumala͡ay sa manga Judiyu na bintuwun kaw nilan na batu. Anangaꞌ kaliman mu lumikuꞌ adti Judiya?" Aw miglong si Jisus kanilan, "Endaꞌ, sampuluꞌ tag duwa (12) ya udas kada allaw? Yanagaw kun ya utaw manaw na allaw, diliꞌ sakanan pagsungkul asuntu na malalamdag pa ya banwa. Manang ya utaw na nyanaw na gabi, pagsungkul sakanan kay walaꞌ ya kalalamdag na nyaka-ilaw kanan." Pagkatigkas yan, piglongan pa nan silan, "Nyakatulug da ya ubaybay tadun na si Lazaro. Manang adtu aku kay un ku sakanan pukawun." Aw miglong ya manga umagakan nan, "Kay Magpalna-uway, kun nyakatulug sakanan, kaguli-an da." Na, iman nilan aw nyakatulug oloꞌ si Lazaro manang ya pyalabet ni Jisus na nyatay da sakanan. Yanagaw pigbangal ni Jisus kanilan, law nan, "Nyatay da si Lazaro.
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
Ya pagpatangkeꞌ ni Jisus sa samet aw manga baled
Pagkatigkas yan, syumakay si Jisus adti balangay, aw nyagad uman ya kanan manga umagakan. Talana pa nilan dun ni tenga-tengaꞌ na danaw, walaꞌ nilan imanmana biglaꞌ dyumateng ya to-o mabandes na samet, aw syalampawan na manga baled ya balangay na pigsakayan nilan. Manang kenneꞌ baling ni Jisus nyakatulug. Yanagaw pigpukaw sakanan na manga umagakan nan, aw miglong silan, "Kay Magpalna-uway, tabangi beg kami! Kay agpet da kitadun mangkamatay!" Manang miglong si Jisus kanilan, "Anangaꞌ kamu mangkallek? Tay, sa katagbiꞌ na pagsalig mayu kanak!" Aw migbangun si Jisus aw piglongan nan ya samet aw manga baled, "Tangkeꞌ kamu!" Aw dayaw migkalinaw ya kadég. Aw to-o nya-enneng-enneng ya manga umagakan nan, aw miglong silan, "Singalan kaꞌ ya utaw yeiy? Pangkay ya samet aw ya manga baled magka͡agad sa suguꞌ nan!"
Pagka͡ambung da, dyumulud kan Jisus ya kanan manga umagakan aw miglong silan, "Ambung da to-o aw walaꞌ ya makan asini banwa ini. Ayin ya madyaw kun papanawun da ya manga utaw pada makabayad silan sa makan nilan dun ni manga baranggay." Manang tyumubag si Jisus kanilan, "Diliꞌ ka-ilangan na manaw silan. Kamu baling ya matag kanilan sa un nilan makan." Aw miglong silan kanan, "Oloꞌ da limallapid ya pan aw duwambulus ya isdaꞌ ini." Yanagaw miglong si Jisus kanilan, "Dala͡a mayu adi kanak." Tigkas yan, piglongan nan ya manga utaw na dayaw silan mingkud dun ni sakati. Aw pigkamang nan ya limallapid ya pan aw ya duwambulus ya isdaꞌ, aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ nan ya pan aw pig-atag nan adti kanan manga umagakan aw pyan-atped-atped nilan adti manga utaw. Aw kyuman ya kadég nilan, aw alag silan nyangkabiyag. Aw pigpan-imun na kanan manga umagakan ya nyangkasamaꞌ, aw nyangkatmuꞌ ya sampuluꞌ tag duwa (12) ya be-en. Na, ya kadég na kyuman dun, manga limammalalan (5,000) ya eseg aw walaꞌ pa ya labet na manga ka͡ubayan aw mangayseꞌ.
Na, sa pagpakallawunun da, nyanaw si Jisus adti tas na tubig aw migpasinan adti kanilan.
Ya pagpakan ni Jisus sa sobla upatemmalalan (4,000) ya manga utaw
Paglabay da na tulungallaw, pigtawag ni Jisus ya kanan manga umagakan aw piglongan nan silan, "Nyallat aku sa manga utaw ini, kay seled da na tulungallaw gayed silan ini sayid tadun, aw walaꞌ da ya un nilan makan asini. Diliꞌ aku malim na muliꞌ silan na walaꞌ pa silan pakakan pagaw to-o magkalumay silan dun ni dalan." Yanagaw nyusip ya manga umagakan nan, "Ayin kitadun kamang sa makan asini kaligbinan ini na maka-umbaꞌ sa kadég na manga utaw yeiy?" Aw nyusip si Jisus kanilan, "Pilallapid ya pan mayu awun?" Aw tyumubag silan, "Oloꞌ da pitullapid ya pan, aw tabay ya isdaꞌ asini." Aw piglongan ni Jisus ya manga utaw na mingkud silan dun ni sakati. Aw pigkamang nan ya pitullapid ya pan aw ya manga isdaꞌ, aw pigpasalamatan nan adti Tyumanem. Pagkatigkas yan, pigtenga-tengaꞌ nan adti kanan manga umagakan na un nilan uman atped-atped adti manga utaw. Aw kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyasamaꞌ aw pitungka be-en na mabaklaꞌ ya dayaw nyangkatmuꞌ. Na, ya kadég na kyuman dun, manga upatemmalalan (4,000) ya eseg aw walaꞌ pa ya labet na manga ka͡ubayan aw mangayseꞌ nilan.
Ya pagbayad ni Jisus sa buwis na Témplo
Aw sa pagdateng nilan adti Kapirna-um, dyumulud adti kan Pédro ya manga mangungubla͡ay sa buwis na Témplo na awun ni Jérusalim. Aw nyusip silan kanan, "Unu, magbayad ya magpalna-uway mayu sa buwis na Témplo?" Tyumubag si Pédro, "E-e."
Pag-uliꞌ da ni Pédro adti balay, nyuna si Jisus miglong kanan, "Kay Simon, adti kanmu anenganeng, singalan galu ya umbaꞌ pabayaden na manga hariꞌ sa manga buwis? Ya kanilan iseꞌ aw kun manga sakup nilan?" Aw tyumubag si Pédro kanan, "Manga sakup nilan." Aw miglong pa si Jisus, "Yanagaw walaꞌ ya labet na tengteng na iseꞌ nilan magbayad. Manang pada diliꞌ kitadun kadamanan na manga mangungubla͡ay sa buwis na Témplo, paminta kaw kanateꞌ adti dulug na danaw. Beklasa ya tagnaꞌ na isdaꞌ na tumubug sa binta mu. Beka-a ya baka nan, aw kita-en mu dun ya kuwalta na bulawan na maputiꞌ. Kamanga ya kuwalta aw bayadi ya buwis ku aw ya kanmu."
Ya kawuy na igira na walaꞌ pamunga
Pagkamaselem yan, talana ni Jisus lyumikuꞌ adti syudad na Jérusalim, nyagetem sakanan. Aw sa pagkitaꞌ nan sa kawuy na igira adti kilid na dalan, migpalapit sakanan adti kawuy, manang walaꞌ ya pigkitaꞌ nan na bunga. Tumalag baling dawun. Yanagaw piglongan ni Jisus ya kawuy, "Lekat adun na allaw yeiy, diliꞌ da kaw makapamunga!" Aw tigkan nyalanes ya kawuy. Pagkitaꞌ na manga umagakan nan sa nya-imoꞌ sa kawuy, to-o silan nya-enneng-enneng aw miglong silan, "Anangaꞌ maksay nyalanes ya kawuy na igira iyan?" Aw tyumubag si Jisus kanilan, "Matinaw ya un ku paglongun kamayu: Kun mangintu-u kamu sa Tyumanem aw diliꞌ magduwaduwa, mabatug mayu uman ya pig-imoꞌ ku adti kawuy na igira. Manang bekeꞌ oloꞌ na maynan, mabatug mayu uman paglongan ya buntud ini, ‘Kay Buntud, kawas kaw adti dagat!’ Aw ma-imoꞌ saba ya piglong mayu. Kun to-o kamu sumalig sa Tyumanem, madawat saba mayu ya pigsekat mayu magi sa kamayu pagpanawagtawag."
Talana nilan dun ni tenga-tengaꞌ na danaw, walaꞌ nilan imanmana biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. Manang nyakatulug si Jisus apit adti moli na balangay na dayaw migkama. Aw pigpukaw sakanan na manga umagakan nan, law nilan, "Kay Magpalna-uway! Walaꞌ kaw kaypeng na un da kitadun mangkamatay?" Yanagaw migbangun si Jisus, aw piglongan nan ya samet aw manga baled, "Tangkeꞌ kamu!" Aw tyumeneng ya samet aw migkalinaw da ya danaw. Aw piglongan silan ni Jisus, "Anangaꞌ kamu mangkallek? Tay, sa katagbiꞌ na pagsalig mayu kanak!" To-o silan nyangkallek aw mig-usip-usipay silan, "Singalan kaꞌ ya utaw yeiy? Pangkay ya samet aw ya manga baled magka͡agad sa suguꞌ nan!"
Pagka͡ambung da, dyumulud kan Jisus ya kanan manga umagakan, aw miglong silan, "Ambung da to-o aw walaꞌ ya makan asini banwa ini. Ayin ya madyaw kun papanawun da mu ya manga utaw pada makabayad silan sa kanilan makan dun ni manga baranggay?" Manang tyumubag si Jisus kanilan, "Kamu baling ya matag sa un nilan makan." Aw miglong silan kanan, "Unu, manaw kami pada mayad sa makan na kadég na utaw yeiy? Ya kakan na maka-umbaꞌ kanilan, walumbulan na utaw talabahuwan!" Aw miglong si Jisus kanilan, "Pilallapid ya pan mayu awun? Tanawa mayu kunu." Aw sa pagka-edeꞌ da nilan, piglongan nilan si Jisus, "Oloꞌ da limallapid ya pan aw duwambulus ya isdaꞌ."
Tigkas yan, pigpa-ingkud ni Jisus ya manga utaw na ubbung-ubbung dun ni sakati. Aw yanagaw nyingkud silan na tag sanggatus (100) ya sangka-ubbung aw tag kaliman (50) ya sangka-ubbung. Pigkamang ni Jisus ya limallapid ya pan aw duwambulus ya isdaꞌ. Aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ nan ya pan aw pig-atag nan adti kanan manga umagakan na un nilan atped-atped adti manga utaw. Maynan uman, pigtenga-tengaꞌ ni Jisus ya duwambulus ya isdaꞌ adti manga utaw. Kyuman ya kadég nilan aw alag silan nyangkabiyag. Aw pigpan-imun na manga umagakan ni Jisus ya nyasamaꞌ na pan aw isdaꞌ, aw nyangkatmuꞌ ya sampuluꞌ tag duwa (12) ya be-en. Sa kadég na kyuman dun, manga limammalalan (5,000) ya eseg.
Pigtandawan nan silan aw kyinitaꞌ nan na migkalug silan nyamegsay kay gayed nilan pigsalumpak ya mabandes na samet. Aw sa pagpakallawunun da, nyanaw si Jisus adti tas na tubig aw migpasinan dun ni kanilan aw un da nan galu silan labayan. Manang pagkitaꞌ nilan na awun nyanaw adti tas na tubig, iman nilan aw ma-allekay sakanan. Aw mig-ulangag silan kay alag nilan pigkitaꞌ aw to-o silan nyallek. Manang maksay si Jisus migtawag kanilan, "Diliꞌ kamu magkallek! Aku saba ya ini! Pakabagsega ya ginawa mayu." Aw syumakay si Jisus adti balangay aw dayaw tyumangkeꞌ ya mabandes na samet. Aw ya manga umagakan nan to-o nya-enneng-enneng.
Ya pagpakan ni Jisus sa upatemmalalan (4,000) ya manga utaw
Dun ni manga allaw yan, migkatipun da uman ya madég to-o na manga utaw adti kan Jisus. Pagkabus da na makan nilan, pigtawag ni Jisus ya kanan manga umagakan, aw piglongan nan silan, "Nyallat aku sa manga utaw ini, kay seled na tulungallaw gayed silan asini sayid tadun, aw walaꞌ da ya un nilan makan. Kun pa-uli-en ku silan na walaꞌ ya pigkan, pagaw to-o silan magkalumay dun ni dalan. Kay awun eped kanilan na mawat pa ya un nilan uli-an." Aw tyumubag ya kanan manga umagakan, "Ayin kitadun kamang sa makan asini kaligbinan ini na maka-umbaꞌ sa kadég na manga utaw yeiy?" Aw nyusip si Jisus kanilan, "Pilallapid ya pan mayu awun?" Aw tyumubag silan, "Pitullapid da." Aw piglongan ni Jisus ya manga utaw na mingkud silan dun ni sakati. Aw pigkamang nan ya pitullapid ya pan, aw pigpasalamatan nan adti Tyumanem. Aw pagkatigkas yan, pigtenga-tengaꞌ nan adti kanan manga umagakan na un nilan uman atped-atped adti manga utaw. Aw pagkatigkas yan, kyumamang uman si Jisus sa mangkayantek na isdaꞌ na awun ni kanilan, aw pigpasalamatan nan ya Tyumanem. Aw piglongan nan ya manga umagakan nan na pan-atped-atpeden uman ya manga utaw na isdaꞌ. Kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyasamaꞌ aw pitungka be-en na mabaklaꞌ ya dayaw nyangkatmuꞌ. Na, ya kadég na utaw na kyuman dun, manga upatemmalalan (4,000). Aw pagkatigkas nilan kuman, pigpapanaw silan ni Jisus.
Ya kawuy na igira na walaꞌ ya bunga
Pagkamaselem da, nyindeg silan adti Bétaniya aw syuminan adti Jérusalim. Aw sa pagpanaw nilan, nyagetem si Jisus, aw adti mawatawat awun kyinitaꞌ nan na kawuy na igira na to-o dyumawun. Migpalapit si Jisus na un nan tanawun pagaw awun bunga. Pagdateng nan adti kawuy, walaꞌ ya kyinitaꞌ nan na bunga, oloꞌ manga dawun, kay bekeꞌ pa na timpu na timpamunga. Yanagaw piglongan ni Jisus ya kawuy, "Lekat adun na allaw yeiy, diliꞌ da kaw makapamunga!" Aw dyengeg na manga umagakan nan ya kanan piglong.
Ya palna-u na makamang adti kawuy na igira
Pagkamaselem da, lyumikuꞌ silan adti Jérusalim aw kyinitaꞌ nilan ya kawuy na igira na nyalanes da lekat adti dalid taman adti dawun. Aw kya-anenganengan ni Pédro ya piglong ni Jisus, aw law nan, "Kay Magpalna-uway, tandawi pagaw! Ya kawuy na igira na kyatullunan sa tingeg mu kagabi, nyalanes da!" Aw miglong si Jisus kanilan, "Pangintu-u kamu sa Tyumanem. Matinaw saba ya un ku paglongun kamayu: Pangkay singalan ya maglong sa buntud ini, ‘Kay Buntud, ka-alin kaw aw kawas kaw adti dagat,’ kun awun pagpangintu-u nan aw diliꞌ magduwaduwa na ma-imoꞌ yeiy, ma-imoꞌ saba ya piglong nan. Yanagaw paglongun ta kamu: Pangkay unu ya sekaten mayu adti Tyumanem magi sa pagpanawagtawag, pangintu-uwi na madawat mayu, aw matagtun mayu saba. Manang kun manawagtawag kamu adti Tyumanem aw awun utaw na pigkalatan mayu na ginawa, una mayu silan pasinsiyayi pada lanasen uman na Ama mayu adti tas na langit ya kamayu manga salaꞌ.
Ya pagtawag ni Jisus sa manga mangisda-ay
Na, sambuk na allaw, nyindeg si Jisus adti baklayan na Danaw na Génésarét na migpalna-u sa manga utaw, aw mig-insekay silan migpalapit adti kanan kay kaliman nilan magpakanyeg sa tingeg na Tyumanem. Aw kyinitaꞌ ni Jisus ya duwa ya balangay adti ligad na danaw, manang ya manga mangisda-ay, nyanog pa silan pada mag-ugas sa kanilan manga pukut. Na, ya sambuk na balangay si Simon ya tagtun. Yanagaw nyanik dun si Jisus, aw piglongan nan si Simon na tulud tagbiꞌ ya balangay lekat adti ligad. Aw nyingkud si Jisus dun ni balangay aw pigpalna-uwan nan ya manga utaw.
Pagkatigkas da nan magpalna-u, piglongan nan si Simon, "Pagpalawud kamu aw tontona mayu ya manga pukut pada makakamang kamu sa isdaꞌ." Aw tyumubag si Simon, "Kay Magpalna-uway, sanggabi pa nami ya nyamukut aw walaꞌ ya nyakamang nami! Manang asuntu na ikaw ya miglong kanami, tontonun pa nami uman salut ya manga pukut." Sa pagtonton da nilan sa kanilan manga pukut, madég to-o ya manga isdaꞌ na nyakamang nilan, aw nyangkakéséꞌ da galu ya kanilan manga pukut. Yanagaw pigkapay nilan ya manga eped nilan adti sambuk na balangay pada tumabang kanilan. Aw migpalapit ya manga eped nilan aw pig-atmuꞌ nilan na isdaꞌ ya duwa ya balangay aw agpet da galu malened asuntu sa kadég na nyakamang nilan. Pagkitaꞌ ni Simon sa nya-imoꞌ yeiy, lyumuhud sakanan dun ni asdangan ni Jisus aw piglongan nan, "Kay Magpalna-uway, pagpa-awat kaw beg kanakeꞌ kay makasasalaꞌ aku!" Piglong yeiy ni Simon kay nya-enneng-enneng sakanan aw ya kanan manga eped asuntu sa kadég na isdaꞌ na nyakamang nilan. Aw ya manga eped ni Simon na si Santiago aw si Juan na alag mangayseꞌ ni Zibidiyo, nya-enneng-enneng uman silan. Aw miglong si Jisus kan Simon, "Diliꞌ kaw magkallek. Lekat adun imo-un da ta kaw mangisda-ay sa manga utaw." Pagkatigkas yan, pigguyud nilan ya kanilan manga balangay adti ligad na danaw aw pig-ayawan nilan ya kadég aw nyagad silan kan Jisus.
Ya pagpatangkeꞌ ni Jisus sa samet aw baled
Na, sambuk na allaw, miglong si Jisus adti kanan manga umagakan, "Naten tumalipag sa danaw." Yanagaw syumakay silan adti balangay aw syuminan adti dipag. Talana nilan syumakay, nyakatulug si Jisus. Aw biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. Aw agpet da galu silan malened. Yanagaw, maksay dyumulud kan Jisus ya manga umagakan nan aw pigpukaw nilan na miglong, "Kay Magpalna-uway! Un da kitadun mangkamatay!" Aw migbangun si Jisus aw pigsagda nan ya samet aw baled, law nan, "Tangkeꞌ kamu!" Aw tyumangkeꞌ ya samet aw migkalinaw da ya danaw. Miglong si Jisus sa manga umagakan nan, "Ayin da saba ya pagsalig mayu kanak?" To-o silan nyallek aw nya-enneng-enneng aw mig-usip-usipay silan, "Singalan kaꞌ ya utaw yeiy? Pangkay ya samet aw ya manga baled magka͡agad kanan!"
Ya pagpatangkeꞌ ni Jisus sa samet aw baled
Na, sambuk na allaw, miglong si Jisus adti kanan manga umagakan, "Naten tumalipag sa danaw." Yanagaw syumakay silan adti balangay aw syuminan adti dipag. Talana nilan syumakay, nyakatulug si Jisus. Aw biglaꞌ dyumateng ya to-o mabandes na samet, aw syalampawan na manga baled ya balangay nilan aw un da matmuꞌ na tubig. Aw agpet da galu silan malened. Yanagaw, maksay dyumulud kan Jisus ya manga umagakan nan aw pigpukaw nilan na miglong, "Kay Magpalna-uway! Un da kitadun mangkamatay!" Aw migbangun si Jisus aw pigsagda nan ya samet aw baled, law nan, "Tangkeꞌ kamu!" Aw tyumangkeꞌ ya samet aw migkalinaw da ya danaw. Miglong si Jisus sa manga umagakan nan, "Ayin da saba ya pagsalig mayu kanak?" To-o silan nyallek aw nya-enneng-enneng aw mig-usip-usipay silan, "Singalan kaꞌ ya utaw yeiy? Pangkay ya samet aw ya manga baled magka͡agad kanan!"
Ya pag-alilin ni Jisus sa manga busaw na syumeled adti utaw
Aw migpadeleg si Jisus aw manga umagakan nan syumakay sa balangay aw tyumalipag sa danaw, aw dyumateng silan adti banwa na pig-eya-an na manga taga Girasa dun ni dipag na Galiliya.
Pagka͡ambung da, dyumulud kan Jisus ya sampuluꞌ tag duwa (12) ya umagakan nan aw miglong kanan, "Ayin ya madyaw kun papanawun da ya manga utaw adti manga baranggay na malapit asini, pada makabayad silan sa un nilan makan aw makapaninaw silan sa balay na kabantukan nilan. Kay kaligbinan ya banwa ini." Manang tyumubag si Jisus kanilan, "Kamu baling ya matag sa un nilan makan." Aw miglong silan kanan, "Ya asini kanami oloꞌ da limallapid ya pan aw duwambulus ya isdaꞌ na yan ya diliꞌ pa maka-umbaꞌ. Unu, kaliman mu na mayad pa kami sa kakan na maka-umbaꞌ sa kadég nilan?" Na, ya kadég na manga eseg dun, manga limammalalan (5,000) silan. Aw piglongan ni Jisus ya kanan manga umagakan, "Pa-ingkuda mayu ya manga utaw na tag kalima͡an (50)." Aw pigtuman nilan ya piglong ni Jisus aw pigpa-ingkud nilan ya manga utaw. Pagkatigkas yan, pigkamang ni Jisus ya limallapid ya pan aw duwambulus ya isdaꞌ, aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ ni Jisus aw pig-atag nan adti kanan manga umagakan aw pig-atped-atped uman nilan adti kadég na manga utaw. Kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyangkasamaꞌ, aw nyatmuꞌ ya sampuluꞌ tag duwa (12) ya be-en.
Ya kasal adti Cana
Na, paglabay da na duwangallaw, awun kasal adti baranggay na Cana sakup na probinsiya na Galiliya. Aw nyadtu ya ina ni Jisus, aw si Jisus sambuk uman na pyamilit aw ya kanan manga umagakan. Sa pagka͡abus da na bino, miglong kan Jisus ya ina nan, "Nyabus da ya bino nilan." Aw miglong si Jisus kanan, "Kay Neꞌ, anangaꞌ kaw maglong adi kanak na nyabus da ya bino nilan? Walaꞌ pa saba dateng ya allaw na pakitaꞌ ku ya kanak katulus adti manga utaw." Manang miglong ya ina nan adti manga sugu-anen dun ni kasal, "Imo-a mayu ya pangkay unu ya paglongun nan kamayu."
Na, dun ni balay yan, awun enem ya mangkabaklaꞌ na betanganan sa tubig na pag-unaw na manga Judiyu sa diliꞌ pa silan kuman, kasiling na pa-agi na pigdalug na kanilan mangkabaklegay. Ya manga betanganan yeiy alag batu, aw kun magpangkatmuꞌ da, ya seled na tagsambuk kanilan tag kaluwa͡an (20) kun bekeꞌ yan katluwan (30) ka galun. Aw miglong si Jisus adti manga sugu-anen, "Pan-atmu-a mayu na tubig ya manga betanganan ini." Aw dayaw nilan pigpan-atmuꞌ ya kadég na manga betanganan. Pagkatigkas yan, miglong si Jisus kanilan, "Na! Sagad kamu tagbiꞌ aw tigisi ya pigsaligan sa pista pada témtéman nan." Aw syumagad silan aw pigdala nilan adti pigsaligan. Aw pigtémtéman nan ya tubig na nya-imoꞌ da bino, manang walaꞌ nan ka-ede-i kun ayin lekat ya bino yeiy. Yan oloꞌ ya nyaka-edeꞌ ya manga sugu-anen na syumagad. Yanagaw pigpatawag na pigsaligan ya eseg na bagu nyangugnan aw piglongan nan, "Ya katanem tadun pagpa-inem una ya madyaw na bino, aw kun dakulaꞌ da ya ma-inem nilan, bagu la uman pa-inem ya diliꞌ to-o madyaw. Manang ikaw, bagu mu baling adun paluwa-en ya to-o madyaw na bino."
Yeiy ya nya-imoꞌ adti Cana, sakup na Galiliya, aw yan ya tagnaꞌ na milagru na pig-imoꞌ ni Jisus adti asdangan na manga utaw. Aw magi sa milagru yeiy, dun kita-a ni kanan ya katulus na pagka Tyumanem nan. Aw nyangintu-u kanan ya manga umagakan nan.
Na, maynan ya usip nan kay kaliman nan tanda-en ya pagpangintu-u ni Pilipi. Manang kya-ede-an ni Jisus kun unu ya un nan imo-un. Aw tyumubag si Pilipi kanan, "Pangkay ya walumbulan na utaw talabahuwan, diliꞌ pa maka-umbaꞌ pagbayad sa makan na kadég na manga utaw ini, pangkay tagbiꞌ oloꞌ ya atag adti tagsambuksambuk kanilan." Manang miglong ya inulug ni Simon Pédro na si Andrés na sambuk uman na umagakan ni Jisus, "Awun iseꞌ asini na eseg na awun limallapid ya pan aw duwambulus ya isdaꞌ. Manang unun nan ya pagpaka-umbaꞌ sa kadég na manga utaw ini?" Miglong si Jisus adti manga umagakan nan, "Pa-ingkuda mayu ya manga utaw." Dun ni banwa yan to-o madég ya sakati aw nyingkud silan dun. Na, ya kadég na manga eseg dun, manga limammalalan (5,000) silan. Pagkatigkas yan, pigkamang ni Jisus ya pan, aw pigpasalamatan nan adti Tyumanem, aw pyan-atped-atped adti kadég na nyan-ingkud dun. Aw maynan uman ya pig-imoꞌ nan sa manga isdaꞌ. Aw kyuman ya kadég nilan aw alag silan nyangkabiyag. Pagkatigkas nilan kuman, miglong si Jisus adti manga umagakan nan, "Pan-imuna mayu ya nyangkasamaꞌ pada diliꞌ masapad." Yanagaw pigpan-imun nilan ya kadég na nyasamaꞌ, aw sampuluꞌ tag duwa (12) ya be-en na dayaw nyangkatmuꞌ.
Na, ya kawat na pigbegsayan da nilan sobla limangka kilomitro, aw kyinitaꞌ nilan si Jisus na nyanaw dun ni tas na tubig na migpasinan adti balangay. Aw to-o silan nyallek, manang migtawag si Jisus kanilan, "Diliꞌ kamu magkallek! Aku saba ya ini!" Aw migleya silan migpasakay kan Jisus dun ni tampid nilan aw maksay dyumateng ya balangay adti banwa na pigkadtuwan nilan.
Ya pagpakitaꞌ salut ni Jisus kan Pédro aw manga eped nan
Paglabay da na pilangallaw, migpakitaꞌ da uman si Jisus adti kanan manga umagakan dun ni ligad na Danaw na Tibériyas. Maynini ya nya-imoꞌ: Migkatipun si Simon Pédro, aw si Tomas na pagtawagen uman na Pingin, aw si Natanyél na taga Cana sakup na Galiliya, aw ya duwa ya iseꞌ ni Zibidiyo na eseg, aw ya duwa pa uman na umagakan ni Jisus. Aw miglong si Simon Pédro adti manga eped nan, "Un pa aku mamiyala." Aw law nilan, "Magad kami kanmu!" Aw syumakay silan sa balangay aw syuminan adti tenga-tengaꞌ na danaw. Aw sanggabi nilan ya nyamiyala manang walaꞌ ya nyakamang nilan.
Na, sa to-o pa maselem, kyinitaꞌ nilan si Jisus nyinindeg adti baklayan dun ni ligad na danaw, manang walaꞌ nilan kilala͡a kun singalan sakanan. Aw migtatawag si Jisus kanilan, "We…Lew! Awun nyakamang mayu?" Aw tyumubag silan kanan, "Walaꞌ kay Lew, pangkay sambuk." Aw migtatawag pa uman si Jisus kanilan, "Agbelan ya biyala mayu apit adti kalintu aw awun makamang mayu." Yanagaw pig-agbel nilan ya kanilan biyala apit adti kalintu, aw to-o madég ya isdaꞌ na nyakamang nilan aw walaꞌ nilan kabatug engata. Aw miglong kan Pédro ya sambuk kanilan na to-o pigginawa͡an ni Jisus, "Wettay, ya migtatawag kadiꞌ kanaten, yan ya Matas na Pangulu tadun!" Aw sa pagdengeg ni Simon Pédro na si Jisus ya adti baklayan, maksay nan pigsut ya sa-ul na pigluwas nan, aw kyumawas sakanan adti tubig aw kyumapay pasinan adti kan Jisus. Manang ya manga eped na umagakan, kenneꞌ pa nilan adti balangay aw pigguyud nilan ya biyala na nyatmuꞌ na isdaꞌ. Kay ya kawat lekat adti ligad na danaw, manga kalima͡an (50) ka depa. Sa pagpakataklang da nilan adti baklayan, awun kyinitaꞌ nilan na manga baga na uling aw isdaꞌ na pigpasagan, aw awun uman pan. Aw miglong si Jisus kanilan, "Dala kamu kanaten adi sa isdaꞌ na nyakamang mayu!" Yanagaw nyanik si Simon Pédro sa balangay aw pigbeklas nan ya biyala na kenneꞌ pa nyatmuꞌ na manga mangkabaklaꞌ na isdaꞌ. Sanggatus aw kalima͡an tag tulu (153) ya kadég na isdaꞌ adti seled manang walaꞌ kakéséꞌ ya biyala.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
Ya pagguliꞌ ni Jisus sa sugu-anen na kapitan na manga sundalu
Pagdateng ni Jisus adti lunsud na Kapirna-um, lyumagbet kanan ya sambuk na kapitan sa manga sundalu aw nyanginayuꞌ sakanan kan Jisus sa tabang, miglong sakanan, "Kay Sir, kyedelan beg ya sugu-anen ku. Gayed da sakanan kyumulang kay diliꞌ da magpaka-inang, aw tengteng na migti-is." Aw miglong si Jisus kanan, "Magad aku kanmu adti kanmu balay aw guli-en ku ya magkedel nan." Manang tyumubag ya kapitan, "Kay Sir, diliꞌ aku makatumbuk magpapanik kanmu adti balay ku. Manang pangkay oloꞌ da tingeg mu, kaguli-an saba ya magkedel na kanak sugu-anen. Kya-ede-an da ku ya utaw na matas ya katundanan. Kasiling ku uman, pagka͡agadan ku ya matas pa kanak. Aw awun katundanan ku sa manga sundalu na madalem pa kanak. Kun sugu-un ku ya sambuk na ‘Kadtu kaw,’ na, maksay sakanan madtu. Aw kun paglongun ku uman ya sambuk na ‘Adi kaw,’ madi sakanan. Aw pangkay unu ya paglongun ku adti kanak sugu-anen, ka͡agadan nan saba. Yanagaw, kya-ede-an ku na kun oloꞌ kaw maglong pangkay mawat kaw, kaguli-an ya magkedel na kanak sugu-anen." Sa pagdengeg ni Jisus sa piglong na kapitan, miglong sakanan, "Tay sa kadakulaꞌ na pagpangintu-u na utaw yeiy!" Aw piglongan nan ya manga utaw na nyagad kanan, "Matinaw ya un ku paglongun kamayu: Ya eseg ini pangkay Héntil sakanan, manang walaꞌ pa ku kita-a asini manga utaw na Isra-él ya maynini na pagpangintu-u. Paglongun ta kamu uman na adtu kagaya ni moli na allaw awun madég na utaw na Héntil na un lumekat adti manga banwa apit adti silatan aw adti sallepan. Aw mingkud silan adti tampid na tyugbulan tadun na si Abraham aw si Isa-ak aw si Jakub adti dakulaꞌ na katipun dun ni Kasakupan na Pighari-an na Tyumanem adti tas na langit. Manang ya manga buwadbuwad ni Isra-él na maka-akup galu adti Kasakupan nan, ya eped kanilan agbel baling adti banwa na kangitngitan na adti luwaꞌ. Aw dun ni banwa yan, magpanpanguliteb ya manga untu nilan aw magpansisugaw." Pagkatigkas yan, miglong si Jisus adti kapitan, "Uliꞌ da kaw. Asuntu sa pagpangintu-u mu kanak, atag ku saba ya pigpanginayuꞌ mu." Aw dun ni udas yan, dayaw kyaguli-an ya sugu-anen nan.
Ya pag-alilin ni Jisus sa manga busaw na syumeled adti utaw
Aw sa pagdateng ni Jisus adti dipag na danaw dun ni sakup na Gadara, syumungun kanan ya duwa ya utaw na pigseledan na manga busaw. Nyeyaꞌ silan adti manga ilib na paglebengan sa manga utaw. Aw to-o silan mabulut, yanagaw pigkallekan silan na manga utaw aw walaꞌ ya magpaka-agi dun. Pagkitaꞌ nilan kan Jisus, miglong silan sa mabagseg na tingeg, "We… Iseꞌ na Tyumanem, unu ya pigkadi mu? Unu, pamulayaman da mu kami pangkay walaꞌ pa dateng ya allaw na un kami pa-emel-emelen?" Na, awun madég to-o na manga takuꞌ na nyangaliwad na diliꞌ to-o mawat lekat dun ni kanilan. Yanagaw nyanginayuꞌ ya manga busaw kan Jisus, law nilan, "Kun alilinan mu kami, adtu mu beg kami paseleda dun ni manga takuꞌ iyan!" Aw piglongan ni Jisus ya manga busaw, "Luwaꞌ da kamu dun!" Yanagaw lyumuwaꞌ silan adti duwa ya eseg aw syumeled silan adti manga takuꞌ. Aw nyampamalaguy ya kadég na manga takuꞌ dun ni kakayaban aw pyangkawasan nilan ya pangpang adti ligad na danaw aw nyabus silan nyangkalemes. Aw ya manga magdadiyaga͡ay sa manga takuꞌ, nyalaguy silan adti lunsud aw pig-ubat-ubatan nilan ya manga utaw sa kadég na nyangka-imoꞌ dun ni duwa ya utaw na kyaguli-an da. Pagdengeg na manga utaw adti lunsud sa kadég na pig-imoꞌ ni Jisus, madég kanilan ya nyadtu ni kanan. Aw sa pagkitaꞌ nilan kan Jisus, nyanginayuꞌ silan na indegan nan ya banwa nilan.
Ya pagpapaglong ni Jisus sa utaw na nya-umu
Sa pagpanaw da na duwa ya eseg na bayaꞌ kyumitaꞌ, walaꞌ kadugay awun da uman manga utaw na dyumateng dun na migpa-agad sa sambuk na utaw na nya-umu kay pigseledan na busaw. Aw sa pagkatigkas da ni Jisus alilinan ya busaw na syumeled adti utaw yan, dayaw nyakapaglong ya umu. Aw nya-enneng-enneng ya kadég na utaw dun, aw miglong silan, "Walaꞌ pa tadun kita-a ya maynini asini kadakulaꞌ na Isra-él!"
Ya piglekatan sa katulus ni Jisus
Pagkatigkas yan, pigpa-agad adti kan Jisus ya sambuk na utaw na diliꞌ magkitaꞌ aw nya-umu kay pigseledan na busaw. Aw pig-alilinan ni Jisus ya busaw, aw kyaguli-an ya utaw yan aw dayaw nyakapaglong aw kyumitaꞌ da.
Ya dakulaꞌ na pagpangintu-u na ka͡ubayan na Héntil
Pagkatigkas yan, pig-indegan ni Jisus ya banwa na Galiliya, aw nyadtu sakanan ni banwa na sakup na manga syudad na Tiro aw Sidon. Aw awun nyeyaꞌ dun na ka͡ubayan na Héntil na lekat adti buwadbuwad ni Canaan. Aw sa pagdengeg nan na dyumateng si Jisus, nyadtu sakanan ni sayid nan aw gayed nyanginayuꞌ, law nan, "Kay Sir na buwadbuwad ni Dabid, kallati beg aku! Ya iseꞌ ku na bubay, pigpati-is sakanan to-o na busaw na syumeled kanan." Manang walaꞌ ni Jisus tubaga ya ka͡ubayan. Aw dyumulud uman dun ya kanan manga umagakan aw miglong silan kan Jisus, "Ayin ya madyaw aw papanawun da ya ka͡ubayan yeiy, kay gayed sakanan mig-agad-agad kanaten aw gyumelgel nyangilalat." Pagkatigkas yan, miglong si Jisus adti ka͡ubayan, "Pigpadala aku adti buwadbuwad ni Isra-él kay kasiling silan na manga karniro na nyakasuway asuntu na walaꞌ ya migdiyaga kanilan. Walaꞌ pa saba dateng ya allaw na tabangan ta kamu na manga Héntil." Manang migpalapit kanan ya ka͡ubayan aw lyumuhud adti asdangan nan, aw to-o nyangilalat, law nan, "Kay Sir, tabangi aku beg!" Aw tyumubag si Jisus magi sa pundinganan, "Diliꞌ madyaw kun kamangen ya pan na mangayseꞌ aw agbel adti manga iduꞌ." Manang miglong ya ka͡ubayan, "Kay Sir, matinaw ya piglong mu, manang pangkay ya manga iduꞌ makakan saba sa manga mumuꞌ na mangkataktak lekat adti lamisa na tagtun kanilan." Sa pagdengeg ni Jisus sa tubag na ka͡ubayan, piglongan nan sakanan, "Kay Déꞌ, tay sa kadakulaꞌ na pagpangintu-u mu kanak! Matuman saba ya pigsekat mu." Aw dun ni udas yan, dayaw kyaguli-an ya iseꞌ na ka͡ubayan.
Ya pag-alilin ni Jisus sa busaw na syumeled adti iseꞌ
Paglikuꞌ da ni Jisus aw manga eped nan adti babaꞌ na pigkatipunan na madég na manga utaw, dyumulud kanan ya sambuk na eseg. Aw lyumuhud sakanan adti asdangan ni Jisus aw miglong, "Kay Magpalna-uway, kallati beg ya iseꞌ ku na eseg! Kay gayed sakanan pagtakigan aw to-o migti-is. Malikit sakanan magkalukad adti atulun aw malikit uman magkolug dun ni tubig. Yanagaw pigpa-agad ku sakanan adti manga umagakan mu manang walaꞌ nilan kabatug guli-a." Aw miglong si Jisus, "Tay sa manga utaw adun na manga allaw yeiy na baluk ya anenganeng aw walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?" Tigkas yan, miglong uman si Jisus, "Na, pa-agadan adi sayid ku ya iseꞌ." Aw pigsagda nan ya busaw, aw lyumuwaꞌ lekat adti iseꞌ, aw dayaw migkadyaw ya iseꞌ.
Na, dun ni sinagoga awun sambuk na eseg na pigseledan na busaw. Aw miglong sa mabagseg na tingeg, law nan, "Kay Jisus na taga Nazarit, unu ya tud mu kanami? Unu, nyadi kaw na un apnasen ya kadég nami? Pigkilala ta kaw! Ikaw saba ya pigpadala na Tyumanem!" Manang pigsagda ni Jisus ya busaw, law nan, "Katinep kaw aw luwaꞌ kaw dun ni kanan!" Aw pigpatakig to-o na busaw ya utaw, aw mig-ulangag aw lyumuwaꞌ ya busaw.
Ya pag-alilin ni Jisus sa manga busaw na syumeled adti utaw
Na, dyumateng si Jisus aw ya manga umagakan nan adti dipag na danaw, dun ni banwa na pig-eya-an na manga taga Girasa. Talana ni Jisus nyanog lekat adti balangay, awun eseg na syumungun kanan. Ya eseg yeiy pigseledan na busaw aw nyeyaꞌ adti ilib na yan ya paglebengan sa manga nyangkamatay. Aw diliꞌ da sakanan pagkatagenan pangkay kun eketan pa na sangkaliꞌ. Malikit da pagsangkali-an ya manga bekten aw siki nan, manang pagpamugtu-un nan. Aw pangkay singalan walaꞌ ya makatagen kanan. Allaw aw gabi, maglegeblegeb sakanan adti manga lebeng aw manga buntud. Gayed sakanan mag-ulangag aw pigpali-pali-an nan na batu ya lawas nan.
Sa pagkitaꞌ na utaw yan kan Jisus adti mawat, nyalaguy sakanan pasinan adti sayid nan aw lyumuhud dun ni asdangan nan. Aw pigsuguꞌ ni Jisus ya busaw na syumeled sa utaw yan, law nan, "Luwaꞌ kaw asini eseg ini!" Aw tigkan mig-ulangag ya eseg, "Kay Jisus na Iseꞌ na Tyumanem na To-o Matas, pabaya-i la aku! Nyanginayuꞌ aku kanmu dun ni ngalan na Tyumanem na diliꞌ aku mu beg pamulayaman!" Aw pig-usip ni Jisus ya busaw, "Singalan ya ngalan mu?" Tyumubag sakanan, "Si Légion, kay to-o kami madég." Aw gayed sakanan nyanginayuꞌ kan Jisus na diliꞌ nan silan alilinan lekat adti banwa yan.
Na, awun madég to-o na takuꞌ na nyangaliwad adti kakayaban na malapit dun. Aw nyanginayuꞌ kan Jisus ya manga busaw, law nilan, "Tumbayan beg kanami na sumeled adti manga takuꞌ iyan." Yanagaw pigtumbay silan ni Jisus. Aw ya kadég nilan lyumuwaꞌ lekat adti eseg yan aw adtu la silan seled ni manga takuꞌ. Aw nyampamalaguy ya kadég na manga takuꞌ lekat adti kakayaban aw kyumawas silan dun ni pangpang adti ligad na danaw. Aw manga duwammalalan (2,000) ya kadég na takuꞌ na nyabus nyangkalemes.
Aw ya manga magdadiyaga͡ay sa manga takuꞌ, nyalaguy silan adti lunsud, aw pig-ubat-ubatan nilan ya manga utaw dun ni lunsud aw ya manga nyakapalibed dun. Yanagaw nyangkadtu ya madég na utaw na un magtanaw sa nya-imoꞌ.
Manang sangkamuluꞌ ya pigpalna-u mayu. Kay pigpalna-uwan mayu ya manga utaw na maglong silan adti kanilan ama aw ina, ‘Pasinsiyayi beg aku, kay walaꞌ da ya kabatug ku magtabang kamayu, kay pigtani la ku adti Tyumanem ya un ku galu atag kamayu.’ Kasiling na pigtumbay mayu baling adti utaw na pabaya-an nilan ya kanilan mangkatikadeng. Yanagaw magi sa manga katanem na pigpalna-u mayu adti manga eped, pig-imoꞌ mayu kasiling na walaꞌ ya guna ya tengteng suguꞌ na Tyumanem. Aw madég pa uman ya baluk na pigpan-imoꞌ mayu kasiling na maynan."
Aw pigtawag da uman ni Jisus ya madég na utaw, aw piglongan nan silan, "Kadég mayu, pakanyegi ya un ku kamayu paglongun aw anenganenga mayu yeiy: Bekeꞌ na pagkanen na utaw ya makapalipaꞌ kanan, manang ya kadég na malatay na lyumekat adti kanan anenganeng, yan saba ya makapalipaꞌ kanan.
Ya pagpangintu-u na ka͡ubayan na Héntil
Pagkatigkas yan, nyindeg si Jisus lekat adti Galiliya aw nyadtu ni banwa na sakup na syudad na Tiro na pig-eya-an na manga utaw na Héntil. Syumeled sakanan adti sambuk na balay aw diliꞌ galu sakanan malim na ka-ede-an na manga utaw na awun sakanan, manang maksay baling nyabekkal ya ubat-ubat sa pagdateng nan. Na, dun ni banwa yan, awun sambuk na ka͡ubayan na Héntil na buwadbuwad na manga taga Ponisiya sakup na Sirya, aw awun iseꞌ nan na bubay na pigseledan na busaw. Yanagaw, pagdengeg na ka͡ubayan yan na dyumateng si Jisus adti kanilan banwa, maksay sakanan nyadtu aw lyumuhud dun ni asdangan nan, aw nyangilalat kan Jisus na alilinan ya busaw lekat adti iseꞌ nan. Manang miglong si Jisus kanan, "Pabiyagen pa una ya mangayseꞌ, kay diliꞌ madyaw kun kamangen ya pan nilan aw agbel adti manga iduꞌ." Tyumubag ya ka͡ubayan kan Jisus, "Matinaw yan kay Sir, manang pangkay ya manga iduꞌ adti dalem na lamisa makakan pa sa manga mumuꞌ na mangayseꞌ na mangkataktak." Aw piglongan ni Jisus ya ka͡ubayan, "Asuntu sa tubag mu, uliꞌ da kaw, kay lyumuwaꞌ da ya busaw lekat adti iseꞌ mu." Yanagaw nyuliꞌ ya ka͡ubayan aw kyinitaꞌ nan ya iseꞌ nan na kyumulang da adti kulanganan nan aw walaꞌ da ya busaw dun ni kanan.
Aw miglong ya sambuk na eseg dun, "Kay Magpalna-uway, pigpa-agad ku adi kanmu ya iseꞌ ku na eseg kay syeledan sakanan na busaw aw walaꞌ da sakanan pakapaglong. Aw kun magseled ya busaw kanan, magkatuwad sakanan dun ni lupaꞌ, aw magsulaꞌ ya bakaꞌ nan aw magpanguliteb ya untu nan aw magkeseg ya kanan lawas. Yanagaw migsekat aku adti manga umagakan mu na alilinan nilan ya busaw yan, manang walaꞌ nilan kabatug." Aw miglong si Jisus, "Tay sa manga utaw adun na manga allaw yeiy na walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?" Tigkas yan, miglong si Jisus, "Na, pa-agadan adi sayid ku ya iseꞌ." Yanagaw pigpa-agad nilan ya iseꞌ adti kan Jisus. Manang pagkitaꞌ na busaw kan Jisus, to-o nan pigpatakig ya iseꞌ aw nyalukad adti lupaꞌ, aw gayed migtambulilid aw migsulaꞌ ya bakaꞌ nan. Aw pig-usip ni Jisus ya ama na iseꞌ, "Kanu pagpalekat ya bati-enen na iseꞌ mu?" Aw tyumubag ya ama nan, "Lekat pa na pagkatagbiꞌ nan. Malikit da na busaw paglukaden ya iseꞌ ku adti atulun aw adti tubig na un nan galu patayen. Manang kun mabatug mu, kallati aw tabangi beg kami!" Aw miglong si Jisus, "Anangaꞌ kaw maglong, ‘Kun mabatug mu’? Mabatug saba adti utaw ya kadakulaꞌ kun awun pagpangintu-u nan kanak." Aw maksay tyumubag ya ama na iseꞌ yan, "Nyangintu-u aku kanmu, manang diliꞌ pa umbaꞌ! Tabangi beg aku na kadugangan ya kanak pagpangintu-u kanmu!"
Pagkitaꞌ ni Jisus sa to-o madég na manga utaw na maksay migpasinan adti kanan, pigsuguꞌ nan ya busaw na migpabengel aw migpa-umu sa iseꞌ, law ni Jisus, "Paglongun ta kaw kay busaw: Luwaꞌ kaw asini iseꞌ ini, aw diliꞌ da mu pagliku-an!" Aw tigkan mig-ulangag ya busaw, aw to-o nan pigpatakig ya iseꞌ, aw tigkas yan, lyumuwaꞌ ya busaw. Iman mu aw walaꞌ da ya ginawa na iseꞌ, aw madég kanilan ya miglong, "Nyatay da ya iseꞌ iyan." Manang pig-awidan ni Jisus ya tulluꞌ na iseꞌ aw banguna nan aw nyindeg ya iseꞌ dun ni asdangan nilan.
Ya pagpangguliꞌ ni Jisus sa madég na utaw
Pagkatigkas yan, nyindeg si Jisus lekat adti sinagoga, aw nyadtu sakanan ni balay ni Simon. Na, ya ugangan ni Simon na ka͡ubayan to-o migkapasuꞌ. Yanagaw nyanginayuꞌ silan kan Jisus na guli-en nan. Aw nyindeg si Jisus adti tampid nan, aw pigsagda nan ya kapasuꞌ, aw dayaw pig-uwasan ya ugangan ni Simon, aw maksay migbangun aw migsanggilaꞌ kanilan.
Sa pagpanog ni Jisus lekat adti balangay, awun eseg na syumungun kanan. Na, ya eseg yeiy nyeyaꞌ idtu muna adti lunsud, manang pigseledan sakanan na madég na busaw, yanagaw madugay na walaꞌ da sut sa kadégkadég aw walaꞌ uman sakanan pag-eyaꞌ adti balay, manang adtu baling pag-eyaꞌ ni ilib na paglebengan sa nyangkamatay. Sa pagkitaꞌ nan kan Jisus, mig-ulangag sakanan aw nyangillupung adti asdangan nan aw miglong sa mabagseg na tingeg, "Kay Jisus na Iseꞌ na Tyumanem na To-o Matas, pabaya-i la aku! Nyanginayuꞌ aku kanmu na diliꞌ aku mu pamulayaman!" Yan ya piglong nan kay tolobo pa ni Jisus pigsuguꞌ ya busaw na lumuwaꞌ dun ni utaw yan. Ya utaw yeiy madugay da sakanan pigseledan na manga busaw. Aw pangkay pigtunggu-an aw pigsangkali-an ya manga siki aw ya taklayan nan, manang diliꞌ sakanan pagkatagenan. Pagpamugtu-un nan baling ya sangkaliꞌ aw pagbalukun nan ya putaw. Aw paggagaden sakanan na busaw adti kaligbinan. Tigkas yan, pig-usip sakanan ni Jisus, "Singalan ya ngalan mu?" Aw law nan, "Si Légion." Kay madég saba ya manga busaw na syumeled kanan. Aw nyanginayuꞌ pa silan kan Jisus na diliꞌ nan silan pakawasen dun ni gawang na walaꞌ ya katantanan na yan ya banwa na adtu silan kagaya pa-emel-emela.
Na, awun madég to-o na manga takuꞌ na nyampangaliwad adti kakayaban na malapit dun. Yanagaw nyanginayuꞌ kan Jisus ya manga busaw na tumbay galu kanilan na sumeled adti manga takuꞌ. Aw pigtumbay silan ni Jisus. Aw ya kadég nilan lyumuwaꞌ lekat adti eseg aw syumeled silan adti manga takuꞌ. Tigkas yan, nyampamalaguy ya kadég na manga takuꞌ dun ni kakayaban aw pyangkawasan nilan ya pangpang adti ligad na danaw aw ya kadég nilan nyabus nyangkalemes.
Na, ya manga magdadiyaga͡ay sa manga takuꞌ, sa pagkitaꞌ nilan sa nya-imoꞌ, nyalaguy silan adti lunsud aw pig-ubat-ubatan nilan ya manga utaw dun ni lunsud aw ya nyakapalibed dun. Yanagaw nyangkadtu ya manga utaw na un nilan tanawun ya nya-imoꞌ. Aw sa pagdateng da nilan adti kan Jisus, kyinitaꞌ nilan ya eseg na abus da ka-alilini sa madég na manga busaw, aw nyingkud da sakanan adti asdangan ni Jisus na awun da kadégkadég aw migkadyaw da ya kanan anenganeng, aw nyangkallek silan.
Matinaw saba ya un ku paglongun kamayu: Awun eped asini kamayu na diliꞌ nilan apeten ya pagkamatay mendaꞌ na kita-en nilan ya paghariꞌ na Tyumanem."
Ya pagka-uman na gya ni Jisus
Na, paglabay da na walungallaw lekat na paglong ni Jisus sa kadég yeiy, tyumukud sakanan adti sambuk na buntud na un manawagtawag adti Tyumanem. Aw pigpa-agad nan si Pédro, si Juan, aw si Santiago. Talana ni Jisus nyanawagtawag, nya-uman ya gya nan, aw ya kadégkadég nan to-o migkaputiꞌ aw masilang. Aw tigkan migpakitaꞌ ya duwa ya utaw na si Moysis aw si Éliyas, aw migbalawbalaw silan si Jisus. Kya-ilawan uman silan na kalalamdag. Aw yan ya pigbalawbalawan nilan ya pagkamatay ni Jisus na agpet da matuman adti Jérusalim.
Na, si Pédro aw manga eped nan to-o silan nyakatulug. Manang sa pagmata nilan, kyinitaꞌ nilan ya dakulaꞌ na kalalamdag na pagka Tyumanem ni Jisus, aw kyinitaꞌ nilan uman ya duwa ya eped nan na nyindeg dun ni sayid nan. Aw sa un da manaw ya duwa ya utaw yeiy, miglong si Pédro kan Jisus, "Kay Magpalna-uway, madyaw kay ini kami. Magtulluk kami sa tulu ya layag, sambuk ya kanmu, sambuk ya kan Moysis aw sambuk uman ya kan Éliyas." Manang walaꞌ ni Pédro ka-ede-i kun unu ya piglong nan.
Aw dun ni kadég nilan, awun sambuk na eseg na miglong sa mabagseg na tingeg, law nan, "Kay Magpalna-uway, tanawa beg ya iseꞌ ku na eseg, kay yeiy ya iseꞌ ku na tamisa. Malikit sakanan pagseledan na busaw aw tigkan sakanan mag-ulangag aw pagtakigan mendaꞌ na magsulaꞌ ya bakaꞌ nan. Gayed sakanan pagpati-isen na busaw na syumeled kanan aw diliꞌ da malim lumuwaꞌ ya busaw lekat adti kanan. Nyanginayuꞌ da aku sa manga umagakan mu na alilinan nilan ya busaw adti kanan, manang walaꞌ nilan kabatug." Aw miglong si Jisus, "Tay sa manga utaw adun na manga allaw yeiy na baluk ya anenganeng aw walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?" Aw piglongan ni Jisus ya ama na iseꞌ, "Pa-agadan adi sayid ku ya iseꞌ mu." Aw sa pagpa-agad da sa iseꞌ adti kanan, piglagpes na busaw ya iseꞌ dun ni lupaꞌ aw to-o pigtakigan. Manang pigsagda ni Jisus ya busaw aw dayaw migkadyaw ya iseꞌ, aw piglikuꞌ ni Jisus adti ama nan. Aw ya kadég na kyumitaꞌ sa nya-imoꞌ yan, nya-enneng-enneng silan sa kadakulaꞌ na katulus na Tyumanem.
Ya kadwa na pagpa-edeꞌ ni Jisus sa pagkamatay nan
Aw sa talana pa nya-enneng-enneng ya manga utaw sa kadég na nya-imoꞌ ni Jisus, miglong sakanan adti manga umagakan nan,
Si Jisus aw si Bilsibul
Na, sambuk na allaw, mig-alilin si Jisus sa busaw na syumeled adti utaw aw nyakapa-umu kanan. Sa abus da ni Jisus alilini ya busaw, nyakapaglong da ya utaw yan. Aw to-o nya-enneng-enneng ya kadég na utaw.
Aw pigtibas na sambuk kanilan ya sugu-anen na pangulu na manga magdadugsu-ay, aw dayaw nya-ilap ya kalintu na talinga nan. Manang pigsagda sakanan ni Jisus, "Umbaꞌ da yan!" Aw pig-uliꞌ nan ya talinga na sugu-anen aw dayaw nyaka-uliꞌ.
Ya piglong ni Jisus kun singalan si Juan na Magba͡utismuway
Sa pagpanaw da na manga pigsuguꞌ ni Juan, pigkasampetan ni Jisus si Juan adti manga utaw na migkatipun, law nan, "Sa pagkadtu mayu adti kan Juan dun ni kaligbinan idtu muna, unu kaꞌ ya punganan na utaw na kamayu pig-iman na kita-en? Pagaw nyadtu kamu na oloꞌ magtandawtandaw sa utaw na maksay magkadaladala na kasiling na tigbaw na pig-eyeng-eyeng na samet. Bekeꞌ saba na maynan si Juan! Manang unu ya pigkadtu mayu adti kaligbinan na un mayu tanawun? Pagaw iman mayu aw kumitaꞌ kamu sa utaw na syumut sa kadégkadég na mayaman. Ya utaw na maynan, adtu saba sakanan pagkita-en ni palasyo. Manang bekeꞌ saba uman na maynan si Juan! Yanagaw unu kaꞌ ya pig-iman mayu na un mayu kita-en dun ni kaligbinan? Pig-iman gya mayu na kumitaꞌ sa propita. Paglongun ta kamu na si Juan bekeꞌ oloꞌ na propita manang matas pa sakanan sa manga muna propita. Kay si Juan yeiy, yan ya pigkasampetan dadan dun ni pigpasulat na Tyumanem asini muna: ‘Pa-una͡en ku kanmu ya kanak mag-ubat-ubatay pada tagilanen nan ya un mu agiyan.’ Paglongun ta kamu: Ya kadég na utaw na nya͡utaw asini tas na lupaꞌ, walaꞌ ya pangkay sambuk na matas pa kan Juan na Magba͡utismuway. Manang ya to-o madalem na utaw na nyaka-akup adti Kasakupan na Pighari-an na Tyumanem, matas pa sakanan kan Juan."
Na, pagdengeg da na kadég na manga utaw sa piglong ni Jisus, tyumandeꞌ silan na matinaw saba ya pigpa-edeꞌ na Tyumanem magi kan Juan. Kay idtu muna sa pag-ubat-ubat pa ni Juan, migpaba͡utismu silan kanan, dala ya manga mangungubla͡ay sa buwis. Manang awun madég na manga Parisiyo aw manga magpalna-uway sa Uldin na walaꞌ nilan daluga ya tud na Tyumanem kanilan kay walaꞌ silan pagpaba͡utismu kan Juan.