1 Yanagaw ayawi mayu ya kadég na malatay: Diliꞌ da kamu maglong sa galuꞌ, aw diliꞌ da kamu magtallalingu. Diliꞌ kamu mag-inga-inga-ay. Aw diliꞌ da kamu maglong sa tingeg na makapagkalat sa dengeg na kamayu manga eped. 2 Kasiling na iseꞌ na bagu nya͡utaw na to-o magkalim sa gatas na ina nan, kalimi mayu uman ya palangad gatas na yan ya tengteng matinaw na palna-u na makapatulin sa kamayu pagpangintu-u, pada malingeb ya pagpakaluwaꞌ mayu. 3 Kay pig-apet da mayu ya kadyaw na Tyumanem.

4 Yanagaw pagpalapit kamu adti kan Kristu na yan ya lyekatan sa ginawa na walaꞌ ya katigkasan, kay yan ya batu na sumalem na to-o masalig. Pigkele͡an sakanan na manga utaw, manang pigtani sakanan na Tyumanem aw to-o nan pigginawa͡an. 5 Aw kamu uman nya-imoꞌ da kasiling na manga batu na sumalem asuntu na pig-atagan da kamu sa bagu na ginawa na lekat adti kan Kristu. Yanagaw tumbayan mayu ya kamayu pagka-utawun na ma-imoꞌ palangad témplo na pig-eya-an na Ispiritu Santo. Aw pigtani la kamu na Tyumanem na ma-imoꞌ magdadugsu-ay kanan. Aw yan ya pagdugsuꞌ mayu ya pangkay unu na makatutuk sa Tyumanem. Aw magi kan Jisu-Kristu, dawaten na Ama ya dugsuꞌ mayu. 6 Kay awun pigpasulat na Tyumanem:

"Tanawa! Awun batu na pigpaligenaꞌ ku dun ni Ziyon,*

aw yeiy ya batu na sumalem na nya-imoꞌ masalig to-o na tullukanan.

Ya palangad batu yeiy, yan ya pigtani ku

aw to-o pigginawa͡an.

Aw pangkay singalan ya mangintu-u kanan, diliꞌ kabullugan."*

7 Yanagaw ya kadég mayu na nyangintu-u kanan, to-o mayu uman sakanan pigginawa͡an. Manang ya manga utaw na walaꞌ ya pagpangintu-u kanan, anenganengen nilan galu ya pigpasulat na Tyumanem asini muna:

"Ya batu na pigkele͡an na manga panday,

yan baling ya nya-imoꞌ madyaw na tullukanan."*

8 Aw awun pigpasulat nan uman:

"Yeiy ya batu na magpakasungkul sa manga utaw aw magpakatuwad kanilan."*

Pigsungkul silan asuntu na walaꞌ nilan daluga ya tingeg nan. Aw yan ya pagbayaꞌ kanilan na Tyumanem.

9 Manang kamu, bekeꞌ na maynan. Kay kamu ya kasakupan na pigpamalliꞌ na Tyumanem. Kamu ya manga magdadugsu-ay na un magsanggilaꞌ sa tengteng na Hariꞌ. Pigtani kamu nan na un ma-imoꞌ kanan nasud. Aw pigtawag kamu nan pada pa-edeꞌ mayu adti manga eped ya kanan kadyaw, kay pigkamang kamu nan lekat adti kangitngitan aw pigbetang adti kanan kalalamdag na to-o makameyameya. 10 Idtu muna bekeꞌ kamu na kasakupan na Tyumanem, manang adun, kasakupan da kamu nan. Idtu muna walaꞌ kamu nan kallati, manang adun, pigkallatan da kamu nan.

11 Kay manga inulug ku na kanak pigginawa͡an, dumadayu kamu oloꞌ asini tas na lupaꞌ. Yanagaw manginayuꞌ aku adti kamayu na diliꞌ kamu magpabuyu sa pagkaliman mayu adti pag-imoꞌ sa malatay, kay yeiy ya gayed tyumanam sa kamayu pagka-utawun. 12 Manang padelega mayu ya imo-unun na madyaw adti manga eped mayu na walaꞌ pa pangintu-u pada kita-en nilan ya bet mayu. Yanagaw, pangkay kun maglong silan sa malat adti kamayu, manang kita-en nilan ya kadyaw na imo-unun mayu, aw un nilan basa͡an ya Tyumanem dun ni allaw na paglikuꞌ ni Kristu.

13 Asuntu na nyangintu-u la kamu sa kanaten Matas na Pangulu, pagka͡agadan mayu ya kadég na manga utaw na awun katundanan na migdumala sa pig-eya-an mayu. Aw basa͡an mayu silan dala ya impirador 14 aw ya manga gubirnador na pig-atagan na impirador sa katundanan magpa-emel-emel sa manga mig-imoꞌ sa malat aw sa pagsayaꞌ sa manga mig-imoꞌ sa madyaw. 15 Kay yan ya pagkaliman na Tyumanem ya pag-imoꞌ mayu sa madyaw. Aw ya sampetan nan, matinep da ya manga utaw na maglong sa malat adti kamayu asuntu na walaꞌ ya kya-ede-an nilan sa tengteng matinaw.

16 Matinaw na pigpaluwaꞌ da kamu, manang diliꞌ mayu pag-imo-un ya kamayu pagpakaluwaꞌ na panalibenanan sa imo-unun mayu na malat. Kay sugu-anen da kamu na Tyumanem, yanagaw imo-un mayu ya makatutuk kanan. 17 Pagbasa͡an mayu ya kadég na manga utaw. Ginawayi mayu ya kamayu manga inulug na nyangintu-u kan Kristu. Kalleki mayu ya Tyumanem. Aw basayi mayu uman ya impirador.

18 Kamu na manga sugu-anen, pagka͡agadan mayu ya manga amu mayu, aw pagbasa͡an mayu silan. Aw bekeꞌ oloꞌ na amu na madyaw ya bet manang pagka͡agadan mayu uman ya amu mayu na malat ya bet. 19 Kay kun pigpati-is kamu nilan pangkay walaꞌ ya nya-imoꞌ mayu na malat adti kanilan, aw kun mati-is mayu asuntu na gayed mayu pig-anenganeng ya Tyumanem, katutukan sakanan kamayu. 20 Manang kun pig-imoꞌ mayu ya malat aw piglabet kamu nilan, unu, umbaꞌ kamu sayaꞌ? Diliꞌ saba! Manang kun pamulayaman kamu nilan pangkay madyaw ya pig-imoꞌ mayu aw mati-is mayu, na, katutukan kamayu ya Tyumanem. 21 Kay pigtawag kamu nan pada mag-imoꞌ sa madyaw pangkay kun magti-is kamu. Si Kristu, migti-is sakanan asuntu kanaten, aw yan ya umbaꞌ tadun dalugun. 22 Walaꞌ sakanan pakasalaꞌ pangkay sambuk, aw diliꞌ uman maggaluꞌ. 23 Sa pag-odoy-odoy na manga po-on ni Kristu, walaꞌ sakanan pagbalus kanilan. Aw sa pagpati-is kanan, walaꞌ sakanan pamantak. Manang pigsalig nan baling ya kanan pagka-utawun adti Tyumanem na alag matinaw ya pag-ukum. 24 Aw sa pagkamatay nan adti krus, pigdala nan ya kanaten manga salaꞌ dun ni kanan lawas, pada matay kitadun adti kanaten manga imo-unun na malatay aw ma-imoꞌ tadun ya kanan pagkaliman dun ni kanaten pag-eyaꞌ asini tas na lupaꞌ. Aw asuntu sa manga paliꞌ nan, pyangkaguli-an kitadun. 25 Idtu muna kasiling kamu na manga karniro na nyakasuway, manang adun, nyakalikuꞌ da kamu adti Magdadiyaga͡ay aw Magtatunggu-ay kamayu.