1 Na, kamu na manga ka͡ubayan, magpasakup kamu sa kamayu manga eseg. Kun awun eseg mayu na walaꞌ dalug sa tingeg na Tyumanem, madala mayu silan magi sa bet mayu na madyaw, pangkay kun diliꞌ pa mayu silan paglongan. 2 Kay kita-en nilan dun ni bet mayu na walaꞌ ya pagsalaꞌ kamayu asuntu na to-o mayu pigbasa͡an ya Tyumanem dun ni pigpan-imoꞌ mayu. 3 Yanagaw kun kaliman mayu ma-imoꞌ matinaw na ka͡ubayan, bekeꞌ yeiy oloꞌ na pagpakanenggeya sa kamayu pagka-utawun aw pagpakadyaw sa lugay aw pagbetang sa manga pagkanaꞌ na bulawan dun ni lawas mayu aw pagsut sa kadégkadég na dakulaꞌ ya alagaꞌ. 4 Manang tibagsegi mayu baling ya pagpakanenggeya magi sa malinis na anenganeng na munga sa madyaw na bet aw pagpadalem. Dun ni anenganeng na Tyumanem, yeiy ya tengteng na katinaw na ka͡ubayan na diliꞌ malagak. 5 Maynan ya bet na manga ka͡ubayan asini muna na nyatibulluk adti Tyumanem aw migpakawat adti kadég na punganan na malatay. Mangkadyaw ya kanilan kanenggeya asuntu na migpasakup silan sa kanilan manga eseg, 6 kasiling ni Sara asini muna. Pigka͡agadan nan ya kanan eseg na si Abraham, kay adti kanan anenganeng, yan ya tagtun kanan. Aw kamu ya palangad manga iseꞌ ni Sara kun imo-un mayu ya madyaw aw walaꞌ ya pagkallek sa pangkay unu ya un dumateng.

7 Aw kamu uman na manga eseg, diliꞌ mayu pagpakalaten ya ginawa na kamayu ka͡ubayan, kay ya kanilan kabagseg walaꞌ pag-unawa sa kamayu. Pakadyawa mayu baling silan, kay alag kamu saba pig-atagan na Tyumanem sa ginawa. Kun diliꞌ mayu silan pakadyawun, diliꞌ pakanyegan na Tyumanem ya panawagtawag mayu.

8 Na, awun pa uman palna-u ku adti kadég mayu: Pagsambuka ya kamayu ginawa. Aw agad kamu uman sa pagti-is na kamayu manga eped. Maggaginawa͡ay ya kadég mayu na nyangintu-u kan Kristu. Pagkakallatay aw pagpadalem kamu. 9 Kun awun utaw na mag-imoꞌ sa malat adti kamayu, diliꞌ kamu magbalus kanilan. Aw kun awun maglong sa malat kamayu, diliꞌ kamu uman maglong sa malatay adti kanan. Yan baling ya umbaꞌ mayu imo-un na pakadyawun ya utaw yan. Kay pigtawag da kamu na Tyumanem na mag-imoꞌ sa maynan pada pakadyawun kamu nan. 10 Kay maynini ya pigpasulat nan asini muna:

"Kun malim kaw na madyaw ya kanmu pag-eyaꞌ,

tageni ya paglong mu sa malatay aw diliꞌ kaw maggaluꞌ.

11 Talikudi ya imo-unun na malatay, aw pag-imoꞌ kaw baling sa madyaw.

Tibagsegi na awun gayed kalinaw.

12 Kay tamengan na Tyumanem ya manga utaw na dyumalug sa kanan pagkaliman,

aw pakanyegan nan ya pagpanawagtawag nilan.

Manang talikudan nan ya manga utaw na gayed mig-imoꞌ sa malatay."*

13 Na, singalan kaꞌ ya magkalat kamayu kun gayed mayu pig-imoꞌ ya madyaw? 14 Manang kun pigpamulayaman kamu asuntu na dyumalug kamu sa pagkaliman na Tyumanem, madyaw saba ya kamayu. Yanagaw diliꞌ kamu magkallek kanilan, aw diliꞌ kamu magkaypeng sa pangkay unu ya un nilan imo-un kamayu. 15 Yan baling ya kallekan mayu si Kristu aw simba͡en dun ni kamayu anenganeng, kay yan saba ya kamayu Matas na Pangulu. Aw kun awun usip na manga utaw kun unu ya pig-iman mayu, nyatagilan da dadan ya madyaw na un mayu tubag kanilan. 16 Aw dun ni pagtubag mayu, diliꞌ mayu silan pagpamuligsa-an manang basa͡an mayu baling silan. Aw tibagsegi na gayed malinis ya kamayu anenganeng, pada mamulamula ya manga utaw na miglong kamayu sa malat asuntu sa pagdalug mayu sa palna-u ni Kristu. 17 Kay kun tumbay na Tyumanem na magti-is kamu asuntu sa pag-imoꞌ mayu sa madyaw, yan ya to-o pa madyaw kay sa magti-is kamu asuntu na mig-imoꞌ kamu sa malatay. 18 Kay migti-is uman si Kristu pangkay walaꞌ ya salaꞌ adti kanan. Minsan da sakanan kamatay pada kanaten na manga utaw na makasasalaꞌ, pada malanas ya kanaten manga salaꞌ aw madala kitadun nan adti Tyumanem. Pigpatay ya kanan lawas manang ya kanan kalaluwa kenneꞌ awun. 19 Aw ya kalaluwa nan nyadtu ni manga kalaluwa na manga utaw na nyangkamatay asini muna na nyakalabusu adti gawang na walaꞌ ya katantanan, aw pig-ubat-ubatan nan ya manga 20 walaꞌ dalug sa pagkaliman na Tyumanem asini muna dun ni manga allaw ni Nuwi. Tyumagad ya Tyumanem sa manga utaw na magselsel galu talana ni Nuwi mig-imoꞌ sa arka. Manang pagkatigkas na lenep, dakman oloꞌ walu ya utaw na nyasamaꞌ na nyakaluwaꞌ lekat adti lenep. 21 Aw adun na allaw yeiy, ya tubig yeiy pundinganan sa pagba͡utismu kanaten na ya kakawasan nan na nyakaluwaꞌ da kitadun magi sa pagkataw ni Jisu-Kristu. Aw ya ba͡utismu yeiy, bekeꞌ na pagkamang sa taping na lawas tadun manang yan baling ya paglinis sa kanaten anenganeng adti asdangan na Tyumanem. 22 Aw si Kristu, adtu la sakanan ni tas na langit, aw nyingkud apit adti kalintu na Tyumanem, aw kya͡agadan sakanan na manga anghil aw kadég na awun katundanan aw kadég na awun katulus.