Milagres de Jesus

Yesu akhovapon’ya vatulu vawele

27 Yesu panaa alekhowokhaa epoo, vatulu vawele vamoloonda, oko vakojoma no khopaala, "Wee, Mwana wa Daudi, khowonelee losongo."

28 Yesu panaa aleingela mokhate ya nyoomba, vatulu evoo vamopetela. Nanoyo avawolya, "Mbi, mokhogombaa kete ankhowola khovapon’yaa?"

Nanevo vamoweela, "Avyenee Meyaa tokhogoomba."

29 Papenee Yesu akavapalya miso gawe no khopaala, "Inojeke gechoo kete venaa mokhogoomba." 30 Apaponye miso gawe gadigokha no khwandya khokuuna. Yesu akavagilya khwa okhakha kete, "Mokhamowele muntu yeyensi mpola eje."

31 Ninga gechoo vapeta no khwandya khosambalya mpola ja Yesu kho nse eyoo yensi.

Yesu akhovapon’ya vatulu vawele

29 Yesu palomwi ne vahemba vakwe panaa valevakhopuma kho ihala la Yeliko, idale ikolo la vantu lalelamoloonda khonyuma. 30 Mompelo mwa njela monaa Yesu angile khokelaa, angile vapwale vatulu vawele. Apenee panaa valevategeela kete Yesu khokelaa epoo, alevajoma vapaala, "Meyaa, Mwana wa Daudi, khowonelee losongo."

31 Vantu evoo vinki, valevavakhakela vapombole, ila evenee vendelela khojoma, "Meyaa, Mwana wa Daudi, khowonelee losongo."

32 Apenee, Yesu akaimelela no khoveeta, avawolyaa, "Mokhopooga nevanojele chanuu?"

33 Vakamoweela "Meyaa, tokhopooga miso gisu gawone!"

34 Apenee Yesu avawonela losongo, avapalya miso gawe, ne apaponye vandya khowona, nanevo vamoloonda.

Yesu khomopon’ya mtulu

22 Yesu aleapikhaa Betisaida palomwi ne vahemba vakwe. Okhoo vantu alevamoletela mtulu, vamoloomba Yesu amopalye. 23 Apenee Yesu amowambaa mokhono mtulu oyoo, amopumya panji ya ihala. Yesu aleamotyela matye mo miso no khomotolela mekhono mo miso ga mtulu, amowolyaa, "Mbi, owine kento chechensi?"

24 Mtulu oyoo akunaa, "Apalaa nkhovawona vantu, ila vakhwigela kete mapeke ganaa gakhogeenda."

25 Apenee Yesu aleamotolelaa khanke mikhono mo miso. Apenee miso gakwe gadigokha ne ngulu jakwe ja khowona alejamotuwela, andyaa khowona vento vyensi visoga. 26 Apenee Yesu amodayaa, amowela apete khokhayakwe, apalaa, "Okhiije otuuwe khanke kho ihala!"

Yesu khomopony’a muntu yunaa angile kameme no velembaa

31 Apenee Yesu aleawokhaa pepi ne lwande ja ihala la Tilo. Akelelaa Sidoni apikha Dekapoli emaana yakwe mahala ikomi, khokelela ilambo la Galilaya. 32 Epoo vantu alevamoletela Yesu muntu yomwi yunaa angile kameme no nkiwa, vamoloomba amotolele mokhono gwakwe muntu oyoo ili amopon’ye. 33 Yesu aleamokenkha muntu oyoo khompelo khonaa alekhotokhola vantu, amoketela lojala mo matwi, apenee atyela matye mo lojala no khopalyaa lolemi lwa muntu oyoo. 34 Apenee Yesu aleakunaa pachanya khwa Matuunda, aputelaa kho ngulu amowelaa, "Efata," emaana yakwe "Digokhaa."

35 Apaponye muntu oyoo andyaa khotegeela no lolemi lwakwe lwatungolwa, andyaa no khopaala.

36 Yesu aleavawelaa vakhamowele muntu yeyensi mpola eyoo. Ila venaa alekhovagilya, avyenee alevakhwendelela khosambalyaa mpola ejoo. 37 Vantu vensi alevakhumya modugo, vandyaa khopaala, "Khonojaa gensi visoga, avaalaja velembaa khotegeela, ne makameme khopaala."

Yesu khomopon’ya Batimayo yunaa angile mtuluu

46 Apenee vapikha Yeliko. Yesu panaa alekhowokhaa ne vahemba vakwe kho nse eyoo palomwii ne idale ikolo la vantu, alevamopikha muntu yomwi mtuluu lina lakwe Batimayo Mwana wa Timayo, aleikhalagaa pampelo ne njela, kholombalombaa. 47 Panaa aleategela kete a Yesu wa kho Nazaleti amwenee alekhokela epoo, Batimayo aleandyaa khopaala kho lolii nkolo, "Yesu Mwana wa Daudi, mbonelee losongo."

48 Vantu vinki alevamokhakela ili apombule. Ila omwenee aleakelelya khopaala kho lolii nkolo, "Mwana wa Daudi mbonele losongo."

49 Yesu aleimelela, apalaa, "Momwete."

Apenee vamweta mtuluu oyoo, vamowela, "Ipelee mooyo, imelelaa, Yesu khokhwetaa."

50 Nanoyo aleajutaa mwenda gwakwe khotale, Batimayo imelelaa nyango, amopetelaa Yesu.

51 Yesu amowolya, "Khopogaa nkhonojele chanuu?"

Mtuluu oyoo amowela, "Molaangi, nkhopooga nkhowole khowona."

52 Yesu amowelaa, "Petaa khokhaye, kho nguno khogoomba khwako khwakhopon’yajaa."

Apaponye mtuluu oyoo, andyaa khowona, amolondaa Yesu monjela.

Yesu khomopony’a muntu yunaa angile alelilwe mtulu

1 Yesu panaa angile khokelaa, aleamowona muntu yomwii, yunaa angile mtulu mpuma kholelwa khwakwe. 2 Vahemba vakwe alevamowolya, "Molaangi! Ananuu yunaa anojagaa mabe, ninga muntu oyo alelwaa mtulu, a muntu oyo ao valeli vakwe?"

3 Yesu avawelaa, "Nkha muntu oyo, ninga valeli vakwe vanaa alevanojaa mabe. Ila alealelwaa mtulu ili olaala wa Matuunda wigele kho wome wakwe. 4 Khokhopogiwa khonoja molemo gwa oyoo yunaa aleantoma panaa khokhale lyonse, otikho panaa okhwingela khotopo muntu yeyensi yunaa alakhowola khonojaa melemo. 5 Ituungo panaa nkhale mpwale paliwelelo, onene nde welo wa vantu va paliwelelo."

6 Panaa aleamalya khopaala gechoo, aleatyaa matye panse, aleakhadanga maloongo, apenee amopakhaa mtulu oyoo momiso, 7 no khomoweela, "Yagaa okhalawe khwi iwoga la Siloamu, emaana yakwe yunaa aleatomwa." Epoo apenee mtulu oyoo aleapetaa khokhalawa miso gakwe ne atuuwa khowonaa.

2 Apaponye, muntu yomwii wa malimwa aleijaa, amotungamelaa Yesu no khomoweela, "Mwene, mbe otogwee, nokhowola khonenoja ngombwee khomokumbekha Matuunda." 3 Yesu agololaa mokhono gwakwe amopalyaa no khomoweela, "Nkhopooga opone" Apaponye, olwile wakwe wensi, alewamosila. 4 Apenee Yesu akamoweela, "Kunaa, okhamowele muntu yeyensi mpola eye, ila petaa wilagele khwa mopumya matambekho venaa seji opwale, khanke petaa opumye sadakha kholageela kete waponaga, kete venaa njaanga ya Musa kelagelelya."

2 Panaa aleapikha okhoo, vantu vamoonga vamoletela muntu yunaa angile apolile oko agonilee kho mokekha. Yesu akamoweela oyoo yunaa angile apolilee, "Mwanaane ipele mooyo, wawokelajwaa mabe gakhoo."

3 Apenee vamoonga va valaangi va njaanga ja Matuunda jenaa aleapelwaa Musa vanaa angile vapwale epoo, vipalela momeoyo jawe, "Muntu oyo akhomotokha Matuunda."

4 Ila Yesu aleamanya gensi ganaa alevakhoheewa, avawolya, "Kho kee mokhoheewa mabe momeoyo jenyu? 5 A kento kee kenaa kepelu khwenyu, ‘Khomoweela wawokelajwaa mabe gakhoo,’ ao khomoweela imelelaa opete. 6 Ila nkhopooga momanye kete Mwana wa Muntu atite olaala kholekolela mabe ga vantu." Apenee Yesu akamoweela muntu oyoo yunaa angile apolajaa mowele, "Imelelaa osole mokekha gwakhoo, opete khokhayakhoo."

7 Apaponye muntu oyoo akaimelela no khopeta khokhayakwe.

10 Mokhate omoo angile khole muntu yunaa angile apolile mokhono. Vantu vamoonga vanaa angile vapwale omoo, angile vakhopooga nguno ya khomositachaa Yesu, gechoo vakamowolya Yesu, "Mbi, njaanga ja Musa, jekhogoomba khomopon’ya muntu Nsiko ya Khosuupa?"

11 Yesu akavaweela, "A nanuu movamoonga venyu, yunaa kete nkholo wakwe, agwelaga mwilende kho Nsiko ya Khosuupa, akhakhowola khomogweela no khomopumya omoo. 12 Ila muntu a mosoga khokela nkholo. Gechoo njaanga ja Musa jekhogombela khonoja masoga Nsiko ya Khosuupa." 13 Papenee Yesu akamoweela oyoo muntu, "Goloola mokhono gwakhoo."

Nanoyo awogolola, ne apaponye waawa mopanga kete owoo woonge.

30 Okhoo mokhoyakwe no Simoni angile agonagaa pa ketanda oko alwalagaa homa nkhaka, vamoweela Yesu mpola eyoo, ituungo aleloo. 31 Yesu aleamopetela maye oyoo, amowambaa mokhono no khomonyanyola, ne apaponye aleaponaa no khwandya khovatomekela.

Yesu khomopon’yaa molwile wa malimwa

40 Molwile yomwii wa malimwa aleamopetela Yesu amotungamela no khomoloomba, "Mbe khotogwa, nkholoomba onoje ngombwe khomokumbekha Matuunda."

41 Yesu amowonela losongo muntu oyoo, agololaa mokhono gwakwe, amopalyaa no khomoweela, "Nkhopooga! Ogoombwe khomokumbekha Matuunda!" 42 Apaponye aleaponaa egoo malimwa, agombiwa khomokumbekha Matuunda.

3 Ituungo aleloo vantu alevamoleeta molwile yomwii yunaa angile apolile, aleakepolagwaa ne vantu vanee. 4 Kho nguno angile khopwale idale ikolo la vantu alevakhonya khomopicha molwile pepi no Yesu. Apenee alevaloma khodola idoli edali la ituntuga panaa Yesu aleapwale. Alevamotelemola molwile oyoo oko agonile kho ketanda cha ngosa. 5 Yesu panaa aleawonaa khogoomba khwawe, aleamowelaa molwile oyoo yunaa aleapolile, "Mwanaane, wawochelajwaa mabe gakhoo." 6 Valaangi vamoonga va njaanga ja Musa vanaa angile vikhalaga epoo, alevandya khosiima momeoyo jawe. 7 "Kho kee muntu oyo khopalaa gechoo? Epoo khomotokhaa Matuunda! Khotopo muntu yunaa nokhowola khopumya mabe ga vantu, ila topo Matuunda mwenee alemwii!"

8 Apaponye Yesu aleamanya kenaa valaangi va njaanga ja Musa alevakhosiima, apenee aleavawela, "Kho kee mokhosiima gechoo momeoyo jenyu? 9 Mbi, mpola kee yenaa amba mpelu, Khomoweela muntu oyo yunaa apolile, ‘Wawochelajwa mabe gakhoo,’ ao khomoweela, ‘Imelela, usole ketanda chakhoo opete?’ 10 Ila nkhopooga omanye kete Mwana wa Muntu atite olaala wa khowochaa mabe kho vantu va liwelelo." Yesu aleamowela muntu oyoo yunaa apolile, 11 "Nkhokowelaa, imelela, usole ketanda chakhoo opete khokhaye yakhoo!"

12 Apaponye vantu vensi panaa alevakhomokuuna, muntu oyoo aleimelela no khosola ketanda chakwe no khowookha, vantu vensi alevakhumyaa no khomokholya Matuunda khwa khopaala, "Khokale khowonage mpola kete eye."

Yesu khopon’yaa muntu mokhono wunaa opolile

1 Apenee Yesu aleingela kho nyoomba yenaa alevakhwitangela Vayahudi, no omoo alekhole no muntu yunaa angile apolile mokhono. 2 Omoo vantu vamoonga angile vamolindile Yesu amopon’ye muntu oyoo Nsiko ya Khosuupa, ili vakhowole khomositacha. 3 Yesu aleamowela muntu oyoo yunaa aleapolile mokhono, "Wiije epa ili vantu vensi vakhowone." 4 Apenee Yesu avawolya, "Khopumana ne njaanga jisu, khokhopogiwa khonojee mbi Nsiko ya Khosuupa? Mbi, khonojaa masoga ao mabe? Khopon’ya ao khowolaga?"

Ila evenee angile vapombola myaa. 5 Yesu aleavakunaa vensi khwa kesila, aleasayaa mudugo kho nguno ya okhaku wa meoyo jawe. Apenee amowela muntu oyoo, "Gololaa mokhono gwakhoo!" Nanoyo agololaa mokhono gwakwe, gwawa mopanga khanke.

Yesu khomopony’a molema wa megolo

1 Yesu panaa aleamalya khonojaa egoo okhoo Kana, aleapetaa Yelusalemu kho wenga wa Vayahudi. 2 Okhoo Yelusalemu pepi no molyango gonaa alegokhwetwa Molyango gwa Nkholo, angile khole iwoga la meje kho Kiebulania angile lekhwetwaa Betizata, lenaa alelepilimilwe ne mavanza gataano. 3 Kho mavanza egoo valwile vinki alevagonile pampelo pi iwoga la meje, ne valwile evoo vamoonga vawe angile vatulu, valema va megolo ne vanaa alevapolile mowele. Angile valindile meje gaguluungwe, 4 ituungo leenge motomami wa pachanya pa Matuunda alekhotelemokela moiwoga no khogaguluunga meje. Molwile yeyensi yunaa kholongolaa khwingela momeje panaa meje alagagulungagwa, aleaponaa olwile wensi wonaa atite. 5 Mo vamoonga vawe aleapwale mogwisha yomwi yunaa angile molwile kho ituungo lya myakha makomi gatato ne menaane. 6 Yesu panaa aleamowonaa molwile oyoo agonile epoo, okho amanyilee kete oyo angile molwile khwi ituungo itale, gechoo aleamowolya, "Mbi, khopooga khopona?"

7 Molwile oyoo amowelaa, "Meyaa, ntokhola muntu yunaa khonyingelyaa mo iwoga, panaa meje gakhowa gagulungagwaa. Panaa nkhopooga khwingela, muntu yoonge khondongolaa khwingela mo iwoga."

8 Yesu amowelaa, "Imelelaa, solaa mokekha gwakhoo, owooke." 9 Apaponye muntu oyoo aleaponaa, imelela, asolaa mokekha gwakwe awokhaa.

Mpola eye aleyanojekhaa Nsiko ya Khosuupa.

46 Yesu aleapeta khanke okhoo khwi ihala la Kana lenaa lepwale kho nse ya Galilaya, khonaa angile agalelolya meje khowa divai. Okhoo angile khole Mwami yunaa mwanaakwe angile molwile, nanoyo angile agonaga kho ihala la Kapelanaumu. 47 Mwami oyoo panaa aleategela kete Yesu aleapikhaga Galilaya. Gechoo aleamopetela Yesu no khomoloomba apete nanoyo Kapelanaumu ili apete amopon’ye mwanaakwe, yunaa angile alepepi afwee. 48 Yesu amowelaa mwami oyoo, "Mbe, onywenywe molalekha khowona lomekho ne matuntumu, khotopo mwiije mogoombe nsiko jensi."

49 Mwami oyoo amowelaa, "Meyaa, nkhokholoomba khopete nagwe panaa Mwanaane akhale afwee."

50 Yesu amowelaa, "Petagaa topo, mwanakhoo aponagaa."

Apenee Mwami oyoo aleagombaa mpola ja Yesu no khwandya khotuuwa khokhaye. 51 Panaa aleakhale alemonjela, alevitaanga ne vasi vakwe, nanevo vamoweela kete mwanaakwe aponagaa. 52 Mwami oyoo aleavawolya, Ituungo kee lenaa molomyana waane aleapona, "Nanevo vamoweela, anga igolo saa saba ja lyonse, apenee homa aleyamolekolaga." 53 Apenee Mwami oyoo aleakhombolaa kete ituungo eloo alenee Yesu aleamowelagaa, "Mwanakhoo aponaga." Gechoo omwenee palomwi ne vantu va khokhayaakwe alevamogoomba Yesu.

54 Eloo angile ituntumu la owele lenaa Yesu aleanogajaa panaa alekhopuma Yudea khopeta Galilaya.

20 Ituungo aleloo mokhiima yomwii yunaa angile molwile wa mosongelo kho ituungo la myakha ikomi je jewele, akamolonda Yesu khonyuma no khopalya ipeembo la mwenda gwakwe. 21 Mokhiima oyoo alekhwipalelaa momooyo gwakwe kete, "Mbe nemopalye topo mwenda gwakwe, ndapona."

22 Apaponye panaa aleamopalya, Yesu akagalokha. Apenee akamowona no khomoweela, "Mokhiima ipelage mooyo, waponaga kho nguno wangombaga." Apaponye mwalele oyoo, aponaa.

25 Kho idale eloo, alekhole no mokhiima yomwii yunaa angile atite mosongelo khwi ituungo la myakha ikomi ne jewele. 26 Mokhiima oyoo aleagayagaa mudugo, khwa khopeta khwa vagaanga vinki no khotomela nsawo yakwe yensi. Ila aleakhapona, no olwile wakwe alegokhongelekha. 27 Mokhiima oyoo aleategelagaa mpola ja Yesu, ne gechoo aleepenyelya mo idale la vantu khopumela khompilimo, no khopalyaa ipeembo la mwenda gwakwe. 28 Aleanoja gechoo, kho nguno alekhwipalelaa momooyo gwakwe, "Mbe, mpalye topo ipeembo la mwenda gwakwe, ndapona."

29 Apaponye panaa aleapalya ipeembo la mwenda gwa Yesu, mosongelo gwakwe alegwalekha, epoo alekhwitegeela momowele gwakwe aponagaa.

Yesu akhomopon’ya mokhiima no khomofufola mwalele

18 Yesu panaa angile akhale khopalaa mpola ejoo, Mwimeleli yomwii wa Keyahudi aleapikhaa, atungumaa paulongolo wakwe, akamoweela, "Mwalele waane afwagaa ituungo aleele, ila nkhokholoomba khopete omotolele mokhono gwakhoo nanoyo alaawa mopanga khanke."

19 Apenee Yesu awokhaa, palomwi ne vahemba vakwe vamoloonda mwimeleli oyoo.

23 Apenee Yesu panaa aleapikha kho nyoomba ya mwimeleli oyoo wa Keyahudi, aleavapikha vakowa mbuuto, vakhwemba nyeembo ja kelelo, ne vantu vinki vakonganaga pa kelelo echoo, oko vakhokoota modugo. 24 Yesu akavaweela, "Mopume epa. Mwalele oyo akhafwa, ila agonaga ndoolo topo." Vantu evoo panaa valevategeela gechoo, vamosekha Yesu. 25 Ne vantu evoo panaa valevadagwa mokhate, Yesu ingelaa khombele no khomowaamba mwalele oyoo mokhono, nanoyo akalawela.

22 Aleijaa muntu yomwii yunaa khwetwaa Yailo, molaala wa nyoomba ya khwitangela Vayahudi. Aleapikhaa epoo, nanoyo panaa aleamowona Yesu, aletungama pamegolo jakwe, 23 amolombaa no khopaala, "Mwalele waane modo a molwile alepepi achee. Nkhokholoomba khopete, omolombele apate khopona no khwikhala."

24 Apenee Yesu awokhaa palomwi nanoyo. Ne idale ikolo la vantu alelamoloonda no khwandya khomobunkhaanga.

38 Panaa alevapikha khokhaye khwa Yailo, Yesu aleategelaa madoolo no khowona vantu vakhokhoota no khoombolelya kho lolii nkolo. 39 Aleingelaa mokhate, avawelaa, "Kho kee mokhokhowa madoolo no khokoota? Mwalele wenyu akhafwa, ila agonilee topo."

40 Ila evenee alevamosekha, apenee aleavapumyaa vensi panji, aleavasolaa maye no daada wa mwalele oyoo palomwii ne evoo vahemba vakwe vatato, avenee vanaa alevingela khombele monaa mwalele oyoo aleapwale. 41 Apenee amowambaa mokhono oyoo mwalele yunaa aleafwagaa, amowelaa, "Talita, koum," emaana yakwe, "Mwalele nkhokhoweela lawelaa!" 42 Apaponye mwalele oyoo alealawelaa, andyaa khogeenda, nanoyo aleatite myakha ikomi ne jewele, vantu alevakhumyaa modugo panaa alevawona gechoo.

Khocha kwa Lazalo

1 Aleapwale muntu yomwii lina lakwe Lazalo, nanoyo angile molwile. Omwenee angile khwikhalaa Betania khonaa alevakhwikhala Malia no Malita vilombolakwe. 2 Malia oyo amwenee yunaa aleamwetela Mwene makhuta gakhotukelela mo megolo no khomopogosa nyele jakwe, seji mokolwawe Lazalo angile molwile. 3 Gechoo viloombo vakwe alevatoma okhombe khwa Yesu khomoweela, "Mwene, molaasi wakhoo yunaa omotogwile a molwile."

4 Yesu panaa aleapata okhombe owoo, apalaa, "Olwile khotopo omowolage, ila olalageela venaa Matuunda a molaala. Ili Mwana wa Matuunda akholiwe khokelela owoo olwile."

5 Ninga venaa Yesu angile khovatogwa Malita no Malia palomwi no Lazalo, 6 panaa aleategela kete Lazalo a molwile, aleikhala akhokhonye no khokelelya nsiko jewele. 7 Apenee Yesu avawelaa vahemba vakwe, "Khotuuwe Yudea."

8 Vahemba vakwe vamowela, "Molaangi, ituungo ikupe topo lakelaga Vayahudi alevakhopooga khokhowolaga ne mabwe, kho kee khopooga khotuuwa khanke okhoo?"

9 Yesu avawelaa, "Mbi lyonse letokhola matuungo ikomi ne gawele? Muntu mbe ageende lyonse khotopo ikumpe kho nguno gopwale welo wa paliwelelo. 10 Ila yeyensi yunaa khogendaa otikho alaikumpa kho nguno welo otapoya mokhate yawe."

11 Yesu panaa aleamalya khopaala egoo, aleapala, "Molaasi wisu Lazalo seji agonagaa, ila onenee ndapeta khomolawelya."

12 Vahemba vakwe vamoweela, "Mwene, mbe agonagaa ndoolo, alapona."

13 Yesu angile khopalela ncha ya Lazalo, ila evenee alevakhosiima khogona ndoolo.

14 Apenee, Yesu aleavawela patokhola khovaswekha, "Lazalo afwagaa.

Yesu akhogilya kewalawumbe

23 Apenee Yesu akaingela mo ipogo, nanevo vahemba vakwe alevamoloonda. 24 Panaa valevapikha pakhate ya ilambo, timpu, alechapumeela kewalawumbe ne magelekha makolo ga momeje no khwandya khoekuumba ipogo. Ila Yesu angile agonagaa ndoolo. 25 Vahemba vakwe vamolawelya no khomoweela, "Mwene, okhopon’ye." "Khokhofwa."

26 Yesu akavaweela, "Onywee vantu vanaa mokhogoomba kedo, kho kee mokhotungumala?" Apenee Yesu akaimelela no kholekhakela lekewalawumbe, ne ikhwa yapola, khwawa visoga.

27 Vahemba vakwe valevakumya no khopaala, "Mbi oyo a muntu wa mbi? Yunaa ninga kewalawumbe ne ikhwa vekhomotegelelya."

15 Panaa yaleyapikha mesee, vahemba vakwe vamopetela no khomoweela, "Epa khopwale pipalangwa ne otikho watelelaga, gechoo vadaye vantu ewa vapete kho mahala vigolele endya."

16 Ila Yesu akavaweela, "Khotopo nguno ya evenee khowookha, gechoo onywenywe movapele endya."

17 Ila evenee vakamoweela, "Khotite mekate jetaano ne nshe jewele topo," Avaweela.

18 Yesu akavaweela, "Moleete khwaane mekate ne nshe ejoo." 19 Apenee akavaweela vantu vikhale kho masanje, akasola mekate eyoo metaano ne nshe ejoo jewele, akunaa khochanya pa Matuunda, amosongela Matuunda. Papenee amegan’ya mekate eyoo, akavapela vahemba vakwe, nanevo vavagawela vantu. 20 Vantu vensi valevalya, vikota. Papenee vahemba vakwe vakungan’ya masigelo, vijolya vekhapu ikomi ne vewele. 21 Vantu vanaa angile valya endya eyoo angile vagwisha elufu jetaano, patokhola khovalya vakhiima ne vana.

25 Makingilima, Yesu aleapikha khonaa vahemba vakwe angile vapwale, okho akhogenda pachanya ya meje.

Yesu akhovapeela endya vantu elufu jinee

32 Apenee Yesu avetaa vahemba vakwe no khovaweela, "Nkhovawonela losongo vantu ewa, kho nguno vawaaga nane kho ituungo la nsiko jetato, ninga vatokhola endya, nane khotopo nevadaye patokhola kholya endya kho nguno valaagwa wesa monjela."

33 Vahemba vakwe vakamowolya, "Kholapata khwenii mekate ya khovakweela vantu vensi ewa, nasu khole pipalangwa?"

34 Yesu avawolyaa, "Motite mekate jiinga?" Vakamoweela.

"Khotite mekate saba ne nshe nndo ntiiti."

35 Apenee Yesu alagelelya kete vantu vensi vikhale panse. 36 Papenee ajesola ejoo mekate saba ne ejoo nshe, akamosongela Matuunda, amegan’yaa no khovapeela vahemba vakwe, nanevo vahemba vakavagawela vantu evoo. 37 Vantu vensi valyaa, vikota. Apenee vahemba vakwe, vakungan’yaa masigelo, vijolya vekhapu saba. 38 Vantu vanaa angile valya endya, vagwisha angile elufu jinee, ne patokhola khovalya vakhiima ne vana.

Yesu akholepa khodi ya Nyoomba ya Matuunda

24 Yesu ne vahemba vakwe panaa valevapikha Kapelanaumu, vantu vanaa angile vakukungan’ya khodi kho nguno ya Nyoomba ya Matuunda, vapeta khwa Petulo, no khomowolya, "Mbi, molaangi wenyu akholepa khodi ya Nyoomba ya Matuunda?"

25 Petulo akavaweela, "Avyenee, akholepa."

Petulo panaa aleingela mokhate ya nyoomba, ne panaa angile akhale khopaala ninga mpola yeyensi, Yesu akamowolya, "Simoni, ogwee okhowona mbi? Vami va liwelelo ele vakukungan’ya khodi khopuma khwa vananuu? Mbi, khopuma khwa vantu va nse jawe, ao khopuma khwa vantu va nse jiinge?"

26 Petulo akamoweela, "Vakukungan’ya khopuma kho vantu va nse jiinge."

Yesu akamoweela, "Kho gechoo, vahenja vakhavakholepa khodi. 27 Ila khokhavakilye vantu ewa. Petaa kho ilambo, no ojutele ndowano mo meje. Ne nshe wa mwandyo yunaa olapata, omotungule molomo, nagwe olawona omoo mpia. Osole mpia eyoo opete olepe khodi yaane ne yakhoo."

Yesu akholigita ipeke la motini

18 Igolo lakwe melawo, Yesu panaa alekhotuwaa Yelusalemu, itegelaa njala. 19 Apenee alewona ipeke la motini mompelo ya njela, awotelela pepi, ila awopikha otokhola viligi, ila angile otite matiti topo. Papenee agowela, "Okhalele khanke viligi khwandelya leelo mpakha nsiko jensi patokhola odugo." Apaponye ipeke eloo lanyaala.

20 Vahemba panaa valevawona mpola eyoo, vakumyaa modugo. Vamowolya, "Kho kee ipeke ele lanyalaga timpu?"

21 Yesu akavaweela, "Nkhovaweela khapanga, mbe mokhomogoomba Matuunda patokhola matungumalo, nanyu molakhowola khonoja kete venaa yaleyanojekha kho motini ogo, ninga mbe molakewela ketonda eke, ‘Okumpoke, wijutele mo ikhwa,’ ne ilanojekha gechoo. 22 Ne mbe mokhogomba, chechensi kenaa molalomba Matuunda alavapela."

37 Tiimpu, iputa ikhakha mudugo alelandyaa khoputa, magelekha makolo ga meje alegaesunkha ipogo eyoo ninga khoekenkelelya khwijola meje. 38 Yesu angile agonilee ndoolo pa mpilimo ya ipogo oko atolagaa motwe gwakwe pa mosago. Apenee vahemba vakwe alevandyaa khomolawelya no khomoweela, "Molaangi, okhamanya kete khokhofwaa?"

39 Apenee, alealawela, andyaa kholegilyaa iputa eloo, no khogaloma magelekha makholo ga meje, "Pombolaa! Myaa!" Apenee iputa lapola paawa visoga. 40 Apenee Yesu aleavawolya vahemba vakwe, "Kho kee mole no wowa? Mbi, mokhale mokhamokhongoomba?" 41 Epoo alevogopa modugo, vaawa vakhwiwolya, "Mbi oyo a ananuu, yunaa iputa ne magelekha makolo ga meje, vekhomotegelelya?"

35 Lyonse panaa angile lekhopooga khogweela. Vahemba alevamopetela Yesu, vamoweela, "Epa khole khotale ne khaye ja vantu, ne seji a mesee. 36 Vawelee vantu vapete kho mahala ne lwande ja pepi ili vigolele endya."

37 Ila Yesu avawelaa, "Vapelagi nywenywee endya." Nanevo vamowolya.

"Mbi, khopete khogole mikate ja magana gawele ga madini ga mpia? Mpia ejoo amba nyinki khogolela endya vantu vensi ewa."

38 Yesu avawolyaa, "Motite mikate jiinga? Petagi mokuune."

Ne panaa alevakuuna, vatuuwa no khomowela, "Jepwale mekhate jetano ne nshe jewele."

39 Apenee, Yesu avalagelelyaa vahemba vawawele vantu vensi vikhale mo malondo londo pa masanje masapu. 40 Nanevo alevikhala kho malondo ga vantu igana ne vaange alevikhala vantu makomi gataano. 41 Yesu aleasolaa eyoo mikate jetaano ne nshe jewele, akunaa khochanya, amosongela Matuunda no khwandya khoemeganyaa mikate no khovapela vahemba vakhwe ili vawapele vantu vensi ne nshe ejoo jewele aleajemeganyaa no khovagawela jensi. 42 Vantu vensi alevalyaa no kwikota. 43 Vahemba vakwe alevakongan’yaa nshe ne mikate jenaa alejasigaga no khovijolyaa vekhapu ikomi ne vewele. 44 Vagwisha vanaa alevalya endya angile elufu jetaano.

48 Yesu avawonaa vahemba vakwe venaa angile vakhogayaa khokowa mentinkho khoelongolya ipogo, kho nguno iputa angile lekhovagilya khopeta paulongolo. Pepi ne makingilima, epoo papenee Yesu avapetela vahemba vakwe, oko khogendaa pachanya ya meje. Angile pepi avakele. 49 Ila panaa alevamowona khogendaa pachanya ya meje, alevasiima hamo isambwaa, vandyaa khohuuma. 50 Kho nguno vensi alevamowona, alevogopa mudugo. Apaponye Yesu apalaa nanevo, "Mokhagaye, nenee, mokhanyogope!" 51 Apenee aleingela mwipogo yenaa alevapwale ne iputa lyapola. Nanevo alevakumyaa modugo,

Yesu khovapelaa endya valyee vantu elufu jinee

1 Kho nsiko ejoo idale lya vantu alelikhongan’ya khanke, ne alevatokhola endya, apenee Yesu aleavetaa vahemba vakwe avawelaa, 2 "Nkhovawonela losongo vantu ewa kho nguno vawaaga nane kho nsiko jetato ne vatokhola ninga endya. 3 Mbe mbaleke vapete khokhaye yawe ne njala valaagwa weesa monjela, kho nguno vamoonga vawe vapumaga khotale mudugo." 4 Kho gechoo vahemba vakwe alevamowolya, "Epa khole khwipolu, mbi, akhopata khwenii mikate ja khovikhotya vantu vensi ewa?"

5 Yesu avawolya, "Motite mikate jiinga?"

Vamowela, "Khotite mikate saba."

6 Apenee avapogaa vantu vikhale panse. Asolaa eyoo mikate saba, amosongelaa Matuunda, amegan’yaa no khovapeela vahemba vakwe vawagawele vantu, nanevo vawagawela vantu. 7 Alevatite ne tonshe todoo todo vatiiti. Yesu amosongela Matuunda kho nguno ya nshe ejoo, avapelaa vahemba vakwe, vawagawele vantu. 8 Vantu alevalyaa no khwikota, apenee alevakhongan’yaa masigelo endya vijolya vikhapu saba. 9 Vantu vanaa alevalyaa angile kete vantu elufu jinee, apenee Yesu avadayaa vapetage,

Yesu kholegetaa ipeke la mtini

12 Igolo lakwe panaa alevakhopuma Betania, Yesu aleatite njala. 13 Panaa alewonaa ipeke la mtini khwa otale lenaa angile letite matiti minki. Awopetela ili awokune mbe aleotite viligi vyevyensi. Panaa aleaupekila, awopikilee otite matiti topu otokhola viligi, kho nguno angile nkha ituungo la cha viligi. 14 Yesu angile alewelaa ipeke eloo, "Khwandelya leelo ne nsiko jensi muntu yeyensi akhiije alyee viligi vyakhoo."

Nanevo vahemba vakwe alevamotegeela khopalaa gechoo.

Ilaangi kowugela ipeke la mtini wonaa wanyalaga

20 Igolo lakwe melaawo, panaa alevakhokela alevagowona motini gwakhalaga khopuma kho matambe mpakha kho milii yakwe. 21 Petulo aleakhombolaa mpola ejoo jenaa Yesu aleapalaa kowogela owoo mtini, apenee amowelaa, "Molaangi, kunaa! Ipeke eloo la mtini wonaa alewagolegeta gwakhalaga." 22 Yesu avawela, "Momogombage Matuunda. 23 Khapanga nkhovawela, mbe muntu khakewela ketonda eke, ‘Limbokhaa wisombele mo ikhwa,’ no okhawe no wowa momooyo gwakhoo kho echoo kenaa khopalaa, ila agoombe kete mpola jensi jenaa khopalaa gakhonojekha, khanojelwa mpola eyoo. 24 Kho gechoo nkovaweela, chechensi kenaa mokhopogaa khwa khomoloomba Matuunda, gombagi kete mwapokelaga ne kelaawa chenyu. 25 Panaa amba mokholoomba, movasamehi vensi vanaa alevawanojela mabe, ili Daada yenyu wa pachanya khotopo avasamehi nanywi mabe genyu."

Wenga kho ihala la Kana

1 Nsiko ya otato angile khole wenga kho ihala la Kana, lenaa lepwale kho nse ya Galilaya. Onyinya wa Yesu nanoyo aleapwale okhoo. 2 Yesu palomwi ne vahemba vakwe, nanevo angile valalekhagwa kho wenga. 3 Divai panaa aleyasilaa, onyinya wa Yesu aleamowela, "Vasilelagwa ne Divai!"

4 Yesu amowela, "Maye mpola eye ikhatoloma, leelo nkha nsiko yaane ya kholageela olaala waane."

5 Apenee onyinya wa Yesu aleavawelaa vatomami, "Lelensi lenaa alavawela motomame, tomamagi."

6 Epoo angile jepwale ngeelo nkolo sita jenaa alejenogeleliwe khwa khotomela mabwe, yenaa Vayahudi alekhotomela khwisinga no khosingela vento kete venaa kepogwaa khomokhombekha Matuunda. Ne ngeelo yemwii alekejolaa madebe gataano ao sita ga meje. 7 Yesu avalagelelya, "Ijolaji meje mo ngeelo eje." Apenee vijolyaa pelema. 8 Apenee avalagelelya, "Tapagi meje kedo momokenkele mwimeleli wa wenga." Gechoo vatapa no khomokenkela. 9 Mwimeleli wa wenga panaa aleagemaa meje egoo, aleagawona meje gagalokhaga gawaaga divai. Nanoyo aleakhamanya divai khonaa aleyapumaga, ila evoo vatomami vanaa alevatapa meje egoo alevamanyile khonaa ipumile. Gechoo Mwimeleli wa wenga aleamwetaa mwenga wa kegwisha pampelo. 10 Amowela, "Kela muntu khwandyaa khopumya divai yenaa nsoga. Panaa vantu vensi amba vakholagwa, apenee vakhopumyaa divai yenaa nkha nsoga. Ila ogwegwe wapumajaa divai nsoga khwi ituungo lensi."

11 Ele alenee ituntumu la mwandyo lenaa Yesu aleanojaa, aleawonoja khwi ihala la Kana, yenaa ipwale kho nse ya Galilaya, alealagelaa olaala wakwe ne vahemba vakwe vamogoomba.

6 Yesu aleamowolya Filipo gechoo ili amogeme, kho nguno omwene aleamanyile lenaa alanoja.

7 Filipo amowelaa, "Ninga vebaande magana gawele ga madini ga mpia jekhakwela khovagolela endya vantu vensi ewa."

8 Yomwi wa vahemba vakwe yunaa alekhwetwaa Andelea, yunaa angile molunaakwe Simoni Petelo, amowelaa Yesu, 9 "Epa pale no molomyana yomwi yunaa atite mikate jetaano ja ngano ne nshe jewele, ila evee vikhakwela kho vantu vinki kete ewa."

10 Yesu apalaa, "Vawelegi vantu vensi vikhale panse." Epoo alepatite masanje masapu minki, kho gechoo vantu alevikhala panse ne vagwisha alevapwale kete elufu jetaano. 11 Yesu aleaesolaa mikate eyoo no khosongela khwa Matuunda, apenee andyaa khovagawela vantu vanaa angile vikhalaga epoo, anojaa aviyoo no kho nshe ejoo, kela muntu aleapataa kete venaa alekhopoga.

12 Vantu vensi panaa alevikhota, Yesu aleavawela vahemba vakwe, "Solangelagi masigelo gensi, kekhapwele chechensi." 13 Gechoo alevasolangela masigelo gensi no khwijolya vekhapu ikomi ne vewele vya mikate yenaa alevalya vantu.

19 Vahemba panaa alevapetaga ne ipogo otale wa kilomita jetaano ao sita, alevamowona Yesu khogendaa pachanya ya meje khotelela pipogo, epoo alevatungumala modugo. 20 Ila Yesu avawelaa, "Nenee, mokhatungumale." 21 Apenee vamopooga ataante mwipogo. Apaponye ipogo yawaa yapikhaga kho nse nkhaku khonaa alevaile.

Yesu khovapumela vahemba saba

1 Panaa alegakela egoo, Yesu angile avapumela khanke vahemba vakwe kho mpelo ya ilambo la Tibelia. Angile avapumela geeke, 2 Angile vamoonga va vahemba vikonganajaa palomwi, vahemba evoo angile, Simoni Petelo, Tomasi yunaa alekhwetwaa ipasa, no Natanaeli khopuma ihala la Kana la Galilaya, vana vawele va Zebedayo ne vahemba vaange vawele. 3 Simoni Petelo aleavawelaa, "Mpetile kholuwa nshe."

Vahemba vaange nanevo alevamoweela, "Osweswe vensi kholapeta palomwi nagwe." Gechoo vensi vapuma no khwingela mwipogo. Ila otikho wensi angile vakhapata kento chechensi. 4 Igolo lakwe makingilima, Yesu aleijaa no khwimelela mompelo ya ilambo, ninga gechoo vahemba vakwe alevakhamotembola kete amwenee angile Yesu. 5 Apenee Yesu avawolya, "Valaasi vaane, mbi, mokhapata kento chechensi?"

Evenee vamoweela, "Avyenee khokhapata kento chechensi."

6 Apenee avawelaa, "Telemoli megonyo lwande lwa molyelo wa ipogo lenyu, nanyu molapata nshe." Gechoo, alevatelemola megenyo kho lwande eyoo, vapata nshe nyinki ninga vakonya khovanyenyola no khovingelya mwipogo.

7 Mohemba yunaa aleatogwilwe no Yesu aleamowela Petelo, "A Mwene." Apaponye Simoni Petelo panaa aleategela kete a Mwene, aleitungaa mwenda gwakwe kho nguno angile apwale bwiinda, adikelaa mo meje. 8 Ila vahemba vaange alevakowa mintikho khoekenkha ipogo kho nse nkhaku, okho vakhokweesa megonyo jenaa angile jiijwile nshe mpakha kho nse nkhaku. Kho nguno angile vapwale khotale kete mita igana lemwi topo mpakha kho nse nkhaku. 9 Panaa alevapikha pampelo ya nse nkhaku ya ilambo, alevawona makhala ga moto gakholaga. No momoto ogoo alejipwale nshe ne mikate. 10 Apenee Yesu avawelaa, "Leti nshe jemoonga jenaa mwaluwaga ituungo ele."

11 Apenee Simoni Petelo aleatanta mwipogo no khwandya khokweesa mogonyo gonaa alegwijwile nshe mpakha pampelo ya ilambo, mogonyo ogoo alegotite nshe nkolo jenaa angile jepikile igana lemwi ne makomi gataano ne gatato. Ninga venaa nshe angile nyinki, mogonyo ogoo alegokhawunekha.

Yesu akhomopon’ya motomami wa mwimeleli wa masinjala wa Loma

5 Yesu panaa alekhwingela kho ihala la Kapelanaumu, mwimeleli yomwii wa masinjala wa Loma ijaa khwakwe no khomoloomba amwalye, 6 Akamoweela Yesu, "Mwene, khokhayaane khole motomami waane yomwii apolajaa mowele, akhwitegeela osaati mokhakha modugo."

7 Yesu akamoweela, "Aniija khomopon’ya."

8 Molaala wa masinjala avawelaa, "Mwene, onene nkhalomwa khokhopokeela mokhate ya nyoomba yaane. Ila palaa mpola yemwii topo, ne motomami waane alapona. 9 Kho nguno, ninga onene nipwale panse ya vimeleli vaange, khanke nipwale ne masinjala vanaa vapwale panse yaane. Panaa ndamowela yomwii, ‘Petaa,’ apaponye akhopeta. Ne panaa ndamowela yoonge kete, ‘Wiije,’ apaponye khwiija. Ne panaa ndamowela motomami waane, ‘Nogajaa geeke,’ avyeene khonojaa."

10 Yesu panaa aleategelaa mpola ejoo, aleakumya modugo no khovaweela vantu vanaa alevakhomoloonda, "Nkhovaweela khapanga, kho nse ya Izilaeli nkhawona muntu yunaa khomogombaa Matuunda kete oyo. 11 Avyenee nkhovaweela, vantu vinki valaija khopuma lwande ja keeya ne ja meli khwingela mo owami wa khochanya khwa Matuunda. Nanevo valaija kho wenga kholya no khong’weela palomwi no Abulaamu no Isaka no Yakobo kho wa wami wa khochanya khwa Matuunda. 12 Ila evoo vanaa owami wa Matuunda a wakhowawe, valajutwa panji kho kiiti, khonaa valakota no kholoman’ya mino kho nguno ya osaati."

13 Apenee Yesu akamoweela mwimeleli oyoo wa masinjala geeke, "Tuwaa khokhayakhoo, ne ewaage kete venaa wagombaga."

Ne ituungo alelonye alenee oyoo motomami wakwe aponaa.

Yesu akhovapon’ya vantu vawele vanaa vatite mademi

28 Yesu panaa alealowokha ilambo, apikha kho nse ya Vagadala, no okhoo aleitanga ne vantu vawele vanaa vatite mademi, vantu evoo angile vapumile kho malalo, vantu evoo angile vatite mademi makhakha, ninga khotopo muntu yunaa aleagemaa khokela kho njela eyoo. 29 Apenee mademi egoo galegandya khololoma khwa khopaala, "Mbi, ogwegwe Mwana wa Matuunda, otite kee nasu? Mbi, wijaga khotogaya panaa ituungo lekhale lepike?"

30 Pepi ne epoo, alelepwale idale ikolo la ngolowe jekhwipogela endya. 31 Apenee mademi egoo alegamoloomba Yesu, gapaala, "Mbe okhotupumya khogombelee khopete khwingele kho ngolowe ejoo."

32 Yesu akagaweela, "Petagi," apenee mademi egoo, galegapuma mokhate ya vantu evoo no khopeta khwingela mo ngolowe. Idale lensi la ngolowe lalelasulumokha kho mosulumokho no khwingela mo ilambo, ne ngolowe jensi jafweela omoo.

33 Vasoongi va ngolowe evoo, valevakembela vapeta kho ihala, no okhoo valevavapalela vantu mpola jensi jenaa jalejapumeela khwa vantu evoo vawele vanaa angile vatite mademi. 34 Apenee vantu vensi va ihala eloo, valevapuma no khopeta khwitaanga no Yesu, nanevo panaa valevamowona, vamoloomba apume kho nse yawe.

Yesu akhomopon’ya kameme

32 Vantu panaa angile vakhowookha, vamoonga va vantu valevamoletela Yesu muntu yomwii yunaa angile kameme, kho nguno angile asalenkhanagwa ne idemi. 33 Yesu panaa alealedaga idemi eloo, apaponye muntu oyoo andyaa khopaala khanke, vantu vensi vanaa angile vapwale epoo valevakumyaa modugo no khopaala, "Khokhale khowonage mpola kete eye kho, nse yensi ya Izilaeli."

Yesu no Belizebuli

22 Apenee vantu vamoonga vamoletela Yesu muntu yomwi yunaa angile asalenkhanagaa ne idemi. Muntu oyoo angile mutulu, avivyoo angile khameme. Yesu amopon’yaa ne apaponye andya no khopaala no khowona.

Khogoomba khwa mokhiima wa khopuma kho Kanani

21 Yesu aleawokhaa epoo, akapeta kho mahala ga Tilo ne Sidoni. 22 Apenee itangaa no mokhiima yomwii khopuma kho Kanani, yunaa angile khwikhala kho nse eyoo, amwijela, oko akhokoota kho lolii, "Mwene, Mwana wa Daudi, ombonele losongo. Mwalele waane akhogayanjwa modugo ne idemi."

23 Ila Yesu aleapombolaa. Apenee vahemba vakwe vamopetela vamowelaa, "Mowelee apete jakwe, kho nguno khotogayanjaa ne madoolo gakwe." 24 Yesu akavaweela, "Matuunda aleantoma kho nguno ya Vaizilaeli topo, kho nguno vale kete nkholo jenaa jipwelile."

25 Ila mokhiima oyoo aleatelelaa panaa Yesu aleapwale, akamotungamela no khopaala, "Mwene, nkholoomba onyalye."

26 Yesu akamoweela khwa khotomela mofwano, "Nkha visoga khosola endya ja vana vakhoo no khojejutela embwa."

27 Mokhiima oyoo akapaala, "Avyenee, Mwene, ila ninga embwa gakholya masigilo ganaa gakhogwa panse ya meja ja vameyaa vawe."

28 Yesu amowelaa, "Ogwee, mokhiima khogoomba khwakhoo a mokolo, ne elaawa gechoo kete venaa opogile." Apaponye mwalelee wa mokhiima oyoo aponaa.

Yesu akhomopon’ya molomyana yunaa atite idemi

14 Yesu ne vahemba vakwe panaa alevatuuwa kho idale eloo la vantu, muntu yomwii akamwijela Yesu no khotungama paulongolo wakwe. 15 Amowelaa Yesu, "Mwene, nkholoomba omowonele losongo mwanaane. Atite olwile wa khafunta, ne olwile owoo okhomogayanja modugo, omwene khagwelaga mo moto ne mo meje. 16 Alenamoleeta khwa vahemba vakhoo vamopon’ye ila valevakonya." 17 Yesu apalaa, "Onywee keleli cha vantu vanaa mokhamogomba Matuunda, ne vabe. Ndikhala nanyu mpakha nale? Ndavakhamelelya mpakha nale? Mondetele molomyana oyoo epa." 18 Panaa valevapeta nanoyo, Yesu akaleweela idemi la khwa molomyana oyoo, lepume. Apaponye molomyana oyoo aponaa.

23 Ituungo alelonye, kho nyoomba yakhwitangela Vayahudi aleapwale muntu yomwii yunaa angile asalenkanagwaa ne idemi, alekhokowa madoolo. 24 Aleapalaa, ogwegwe Yesu wa Nazaleti, "Okhopooga chanuu khwisu, mbi wijaga okhowolage? Khomanyile kete ogwegwe ananuu, ogwegwe amwenee yunaa otomilwe no Matuunda!"

25 Ila Yesu alealekhakela idemi eloo, no kholewela, "Pombolaa myaa! Upume khwa muntu oyo!"

26 Apenee idemi eloo alelandyaa khomogayanja muntu oyoo, akhotaa kho lolii ikolo apenee idemi lamopuma.

Yesu khomopony’a muntu yunaa atite idemi

1 Yesu ne vahemba vakhwe alevapikha kho nse ya Vagelasi, nkelo ya ilambo la Galilaya. 2 Yesu panaa alekhotelemokha mwipogo, aleitanga muntu yomwi yunaa angile asalenkanaga ne idemi angile apumaga kho makhabuli. 3 Muntu oyoo alekhwikhala khomakhabuli, khotopo ninga muntu yunaa aleakhowola khomotunga menyololo. 4 Kho nguno alevakhomotunga empingo ne menyololo, ila kela ituungo alekhojedomola menyololo ne emupingo ejoo, gechoo alekhotopo muntu yeyensi yunaa aleakhowolaa khomogilya. 5 Lyonse no otikho alekhikhalaga khomakhabuli no khovetonda, okhoo khokowaa madolo no khwidomolanga ne mabwee. 6 Panaa aleamowonaa Yesu khotale, aleamokembelela no khomotungamela paulongolo wakhwe, 7 apalaa kho lolii nkolo, "Okhopooga onojeee kee nane ogwegwe Yesu, Mwana wa Matuunda yunaa apwale Khochanya Mudugo? Olape kho lina la Matuunda, nkhokholoomba okhandemeke!" 8 Aleapalaa gechoo kho nguno Yesu aleamowelaga, "Ogwegwe idemi mopumee muntu oyo." 9 Apenee Yesu aleamowolya, "Lina lyakhoo ananuu?" "Nanuyo amowelaa lina lyane a ‘Idale,’ kho nguno khole vinki" 10 Apenee aleamolombaa mudugo Yesu akhavadage kho nse eye.

11 Pepi ne epoo angile khole idale ikolo la magolowe, vakhosoonga kho mosulumokho wa ketonda. 12 Apenee mademi alegamoloomba, "Okholeke khwingele kho magolowe egoo." 13 Apenee Yesu aleavagombela, papene mademi alegapuma no khwingela kho ngolowe ejoo. Idale lensi la ngolowe jenaa angile kete elufu jewele, latelemokha kho mosulumokho wa ilambo no khotwiina. 14 Vasoongi va ngolowe ejoo alevakembela, vapeta khovaweela mpola eyoo khwihala no khomengonda. Ne vantu alevapeta khokunaa kenaa alechapumela,