1 Yesu panaa aleamalya kholoomba, omwenee palomwi ne vahemba alevalowokha ikhwawa la Kidiloni, vapeta kho lwande yenaa angile khole no mogonda gwa mapeke ga mizeituni, nanevo aleviingela omoo. 2 Yuda yunaa alamogalokha Yesu, aleapamanyile pa lwande eyoo, kho nguno Yesu ne vahemba vakhwe alevamanyiine khwitanga okhoo. 3 Gechoo Yuda aleapeta kho mogonda ogoo, vilongolaja ne masinjala, palomwi ne valendeleli va Nyoomba ya Matuunda vanaa alevatomwile ne valaala va vapumya matambekho ne Mafalisayo. Nanevo angile vakepwile tala ne nyeenge ne chaanjo. 4 Apenee Yesu okho amanyile gensi ganaa galamopumela, ipumelya paulongolo wawe, avawolya, "Mokhomopooga ananuu?"

5 Nanevo alevamoweela, "Khokhomopooga Yesu wa kho Nazaleti!"

Yesu avawelaa, "Onene amwenee." Yuda yunaa alamogelokha, nanoyo angile imelile palomwi nanevo. 6 Yesu panaa aleavawelaa, "Onene amwenee," alevatuuva kho nyuma no khogwa. 7 Yesu aleavawolya khanke, "Mokhomopooga ananuu?" Vamoweela, "Yesu wa khokhomopooga Yesu wa kho Nazaleti!" 8 Yesu avawelaa, "Navawelile onene amwenee. Mbe monkhompooga onene, valekhagi vanaa vapwale nane vapetage." 9 Aleapala gechoo ili ganaa angile apalagaa gadugame, "Daada vantu evoo vanaa alewampelaga, nkhamopwelya ninga muntu yomwi." 10 Apenee Simoni Petelo yunaa angile atite mpanga, aleausolomola, amoputula itwi la molyelo motomami wa mopumya matambekho molaala. Mwasi oyoo alekhwetwa Malukusi. 11 Yesu amolagelelya Petelo, "Tuvyaa mpanga mo ala yakhwe. Mbi, okhamanya kete nkhopogiwa mpokeele magayo, ganaa Daada yaane khopogaa nkelele?"

12 Apenee masinjala evoo, ne valaala vawe ne valendeli va Nyoomba ya Matuunda, alevamogweela Yesu no khomotuunga. 13 Molaala wa mwandyo khonaa alevamokenka Yesu angile a Anasi, yunaa angile mokhwingwa wa Kayafa. Kayafa amwenee angile mopumya matambekho molaala kho mwakha ogoo. 14 Kayafa amwene angile avayangola valaala va Vayahudi kete amba visoga mbe muntu yomwi khaafwa kho nguno ya vantu vensi.

15 Simoni Petelo palomwi no mohemba yoonge alevamoloonda Yesu. Kho nguno mohemba oyoo angile vimanyile no mopumya matambekho molaala, gechoo aleingelaa mo ibololo la mopumya matambekho molaala. 16 Ila Petelo aleimelelaga panji ya molyango gwa khwingelela mo ibololo. Apenee mohemba oyoo yunaa angile vimanyine no mopumya matambekho molaala aleapuma panji, apalaa no mwalele yomwi molindelelya molyango, ne amwingelya Petelo mokhate. 17 Mwalele oyoo yunaa angile molendelelya molyango, aleamowolya Petelo, "Mbi, ninga ogwegwe ole yomwi wa vahemba wa muntu oyo?" Petelo aleamowela, "Khotopo nkha nenee."

18 Ituungo eloo angile ituungo la mpepo, vasi ne valendeleli angile vakholajaa moto gwa makhala, nanevo angile vagopilimaga vakhota. Nanoyo Petelo aleimelela palomwi nanevo khota moto.

19 Apenee Anasi angile awilee mopumya matambekho molaala aleamowolya Yesu mpola ja vahemba vakwe ne malaangi gakwe. 20 Yesu amowelaa, "Kela ituungo alenkholiga pawelo, kho nyoomba ya khwitangela Vayahudi no kho nyoomba ya Matuunda, khonaa avitangaga Vayahudi vensi, khotopo kento kenaa angile naligaga khwa osweki. 21 Kho kee khombolya? Vawolye evoo vanaa alevategela kenaa alenkhovaweela. Evenee vamanyile ganaa alenavaweela." 22 Panaa aleamalya khopaala gechoo sinjala yomwi yunaa angile imagaa pepi nanoyo alemopatula nkhofi Yesu no khomoweela, "Mbi, gechoo avyenee nomowela mopumya matambekho molaala?" 23 Yesu amowelaa, "Mbe napalaga mpola yenaa nkha nsoga, palaa ganaa napalaga nkha masoga, ila mbe napala visoga, kho kee wanipatula?" 24 Apenee Anasi aleamokenkha Yesu khwa mopumya matambekho molaala yunaa angile khwetwaa Kayafa okho atungagwa.

25 Simoni Petelo panaa angile apwale epoo khotaa moto, vamowolya, "Mbi, ninga nagwe okha ole yomwi wa vahemba vakwe?"

"Khotopo onene nkha yomwi wawe."

26 Mwasi yomwi wa mopumya matambekho molaala, modoakwe no oyoo yunaa aleaputulwa itwi no Petelo, aleamowolya, "Mbi, alenkhakhowona ogwegwe ole palomwi no Yesu okhoo kho mogonda gwa mapeke ga mezaituni?"

27 Petelo aleasitaa khanke, apaponye njogolo aleyawekhaa.

28 Angile makingilima ne melawo, alevamosola Yesu khopuma khokhaye khwa Kayafa, vamokenkha kho ikolo la mwami Pilato, yunaa angile Mwami wa Valoma. Vayahudi alevakhaingela kho ikolo la Valoma, ili nanevo vakhowole khogombwa kho njaanga ja khomokumbekha Matuunda, ne vakhowole kholya endya ya Pasakha. 29 Gechoo, Pilato aleapuma panji khovawolya, "Mokhomositachaa muntu oyo kho mabe kee?" 30 Vamoweela, "Mbe muntu oyo anga awee nkha monoja mabe, anga khotopo khomolete khwakhoo." 31 Pilato avawelaa, "Seji mosolagi mopete momotengemeke kho njaanga jenyu."

Valaala va Vayahudi vamoweela, "Osweswe khokhalomwa khomowolaga muntu yeyensi." 32 Aleyapumela gechoo ili mpola jenaa aleapala Yesu kete alafwa ncha kee yadugame.

33 Apenee Pilato aleingela khanke mo ikolo la kewami, aleamweta Yesu no khomowolya, "Mbi ogwegwe amwene Mwami wa Vayahudi?"

34 Yesu amowolya, "Mbi, ogwegwe khopaala ega khwa masiimo gakhoo mwenee ao vantu vaange vakhowelaga mpola jaane?" 35 Pilato nanoyo amowelaa, "Mbi, onene nde Moyahudi? Vantu vakhoo mwenee ne vapumya matambekho valaala avenee vakholetaga khwaane. Mbi wanogaja ibe kee?" 36 Yesu nanoyo amowelaa, "Owami waane nkha wa paliwelelo ele. Mbe owami waane anga owee wa paliwelelo ele, valondi vaane anga valikowa ili nkhagwelwe ne Vayahudi. Ila owami waane nkha wa paliwelelo ele." 37 Epoo Pilato amowolya, "Kho gechoo ogwegwe ole Mwami?"

"Yesu nanoyo amowelaa, ogwegwe khopaala kete onene nde Mwami. Onene alenalelwaa kho nguno ya ele, aleniija paliweleo ili khovaweela vantu okhapanga. Kela muntu yunaa khotogwa okhapanga khotembola kete ganaa nkhopaala a ga khapanga."

38 Pilato amowolya, "Okhapanga a chanuu?"

Pilato panaa aleamalya khopaala gechoo, aleapuma khanke panji panaa alevapwale Vayahudi, avawelaa, "Onene nkhawona ibe lelensi lenaa anogaja muntu oyo. 39 Ila onywenywe motile omanyani kela ituungo la wenga wa Pasakha, khomolekolela motungwa yomwi. Mbi mokhopooga mbopumye Mwami wa Vayahudi?" 40 Apenee vantu vensi alevajoma madoolo no khopaala, "Okhamodigolele oyo! Khodigolele Balaba." Nanoyo Balaba angile mosuki.