1 Yesu panaa aleamalya khonojaa egoo okhoo Kana, aleapetaa Yelusalemu kho wenga wa Vayahudi. 2 Okhoo Yelusalemu pepi no molyango gonaa alegokhwetwa Molyango gwa Nkholo, angile khole iwoga la meje kho Kiebulania angile lekhwetwaa Betizata, lenaa alelepilimilwe ne mavanza gataano. 3 Kho mavanza egoo valwile vinki alevagonile pampelo pi iwoga la meje, ne valwile evoo vamoonga vawe angile vatulu, valema va megolo ne vanaa alevapolile mowele. Angile valindile meje gaguluungwe, 4 ituungo leenge motomami wa pachanya pa Matuunda alekhotelemokela moiwoga no khogaguluunga meje. Molwile yeyensi yunaa kholongolaa khwingela momeje panaa meje alagagulungagwa, aleaponaa olwile wensi wonaa atite. 5 Mo vamoonga vawe aleapwale mogwisha yomwi yunaa angile molwile kho ituungo lya myakha makomi gatato ne menaane. 6 Yesu panaa aleamowonaa molwile oyoo agonile epoo, okho amanyilee kete oyo angile molwile khwi ituungo itale, gechoo aleamowolya, "Mbi, khopooga khopona?"

7 Molwile oyoo amowelaa, "Meyaa, ntokhola muntu yunaa khonyingelyaa mo iwoga, panaa meje gakhowa gagulungagwaa. Panaa nkhopooga khwingela, muntu yoonge khondongolaa khwingela mo iwoga."

8 Yesu amowelaa, "Imelelaa, solaa mokekha gwakhoo, owooke." 9 Apaponye muntu oyoo aleaponaa, imelela, asolaa mokekha gwakwe awokhaa.

Mpola eye aleyanojekhaa Nsiko ya Khosuupa. 10 Gechoo valaala va Vayahudi alevamoweela muntu yunaa aleaponyajwaa, "Leelo a Nsiko ya Khosuupa, njaanga yisu jekhaloma ogwegwe khokepola mokekha."

11 Ila omwene aleavawelaa, "Muntu yunaa aleamponya amwene yunaa aleambwela, solaa mokekha gwakhoo owooke." 12 Nanevo alevamowolya, "Mbi, ananuu yunaa akhowelaa osole mokekha gwakhoo owooke?" 13 Ila muntu yunaa angile aponyajwa angile akhamomanya muntu yunaa angile amoponyajaa, kho nguno vantu angile vinki, Yesu aleanyelemokhaa.

14 Mpola eje panaa angile jakela, Yesu aleampikhaa muntu oyoo kho Nyoomba ya Matuunda. Amowelaa, "Tegelelyaa, seji waponaga. Okhanojage khanke mabe, okhiije ovambwee khanke ne mabe khokela egoo ganaa angile otite."

15 Epoo papenee muntu oyoo aleawokhaa, apetaa khovaweela valaala va Vayahudi kete Yesu amwenee yunaa angile amoponyajaa.

16 Gechoo Vayahudi alevandya khomogayanja Yesu, kho nguno angile khonojaa mpola eyoo lsiko la Khosuupa. 17 Yesu aleavawelaa, "Daada yaane khotomama molemo nsiko jensi, nane nkhotomama melemo nsiko jensi."

18 Kho egoo ganaa aleanogaja, valaala va Vayahudi alevandya khopooga njela ya khomoolaga Yesu. Alevanoja gechoo nkha kholekha kholoonda njaanga ya Nsiko ya Khosuupa topo, ila avivyoo alekhomwetaa Matuunda Ise. Gechoo alekhwinojaa alekete Matuunda.

19 Yesu avawelaa, "Nkhovaweela kho khapanga, kete Mwana wa Matuunda khotopo anojee kento chechensi kete venaa khwiwonela mwenee. Ila khonojaa topo egoo ganaa khomowona Ise khoganojaa. Chechensi kenaa kekhonojwaa no Daada, Mwana nanoyo khonojaa avivyoo. 20 Kho nguno Daada khomotogwa Mwana, nanoyo khomolageela gensi ganaa khonojaa. Nanoyo alamolagela melemo jenaa mekolo khokela eje, ili mokhowole khokumiwa nanejo. 21 Kete venaa Daada khovafufola vantu no khovapeela opanga, avivyoo ninga Mwana khomopeela opanga yeyensi yunaa amotogwilee. 22 Daada akhakomotengemekhaa muntu yeyensi, ila amopelagaa Mwana olaala wa khotengemekha vantu vensi. 23 Ili vantu vensi vakhowole khomokolya Mwana kete venaa vakhomokholya Daada. Yeyensi yunaa akhakhomotegelelya Mwana amotegelelye Daada yunaa amotomagaa."

24 Nkhovawela khwa khapanga, yeyensi yunaa khotegeela mpola yaane no khomogoomba yunaa antomagaa atite opanga wa nsiko jensi no akhakhotengemekhwaa. Seji nkha mochi khanke, ila a mopanga. 25 Nkhovaweela khwa khapanga, ituungo lijile, ne ituungo eloo lapikhaga, lenaa vantu vanaa vafwiile valategela lolii lwa Mwana wa Matuunda, nanevo valafufokha ne valaawa no opanga wa nsiko jensi. 26 Kete venaa Daada amwenee mwandyo wa opanga, avyenee ninga Mwanaakwe amopelegaa mwandyo wa opanga nsiko jensi. 27 Nanoyo amopelaga Mwanaakwe olaala wa khotengemekha, kho nguno omwenee amwenee muntu wa yunaa Matuunda amotomaga. 28 Mokhakumye mpola eye, ituungo lijile panaa vantu vensi vanaa vapwale momakhabuli, valategeela lolii lwakwe, 29 vensi valapuma momakhabuli gawe. Evoo vanaa alevakhonoja masoga avenee valafokha no khopelwaa opanga nsiko jensi, ila evoo vanaa alevakhonoja mabe valafufokha no khotengemekhwa.

30 Onene nkhakhonojaa mpola yeyensi kete venaa nkhopooga, onene nkhotengemekha vantu kete venaa Matuunda khotogwaa, ne nkhotengemekha patokhola khosagoola, kho nguno nkhakhonoja venaa onenee nkhotogwaa, ila nkhonoja ganaa khotogwaa yunaa aleantoma.

31 Mbe anga mpaale ganaa manyile khwiwugela nenee, ganaa nkhopaala anga amba akha ga khapanga. 32 Ila apwale yunaa khopalaa ganaa agamanyile khombugela onenee, ganaa gakholageela kete ganaa nkhopaala agenee ga khapanga, nane manyile kete mpola jakwe ajenee ja khapanga.

33 Onywenywe alemwavatoma vakhombe vapete khwa Yohana Mobatiji, nanoyo avawelagaa mpola ja khapanga jenaa amanyile khombugela onene. 34 Onene nkhaloma khomanyikha khopumana ne egoo ganaa muntu khopalaa khombugela onene, ninga gechoo nkhovaweela ganaa aleapalaa Yohana, ili mokhowole khoponiwaa. 35 Yohana angile kete etala yenaa alekewakhaa no khopumya welo, nanywi alemokhosekelela welo gwakwe khwi ituungo ikupe. 36 Ila ambawela mpola nkolo jenaa alenajiwona khokela jenaa aleavawelaa Yohana, kho nguno melemo jenaa ampela Daada ili njimale, melemo ejoo jenaa nkhonojaa, jekholageela kete Daada antomagaa. 37 Daada yaane yunaa aleantoma apalagaa khapanga khombugela onene. Onywenywe mokhale motegeele lolii lwakwe ninga khogowona osho wakwe. 38 Mokhamokhogagoomba visoga mpola jenaa khopalaa, kho nguno mokhamokhomogoomba oyoo yunaa aleamotomaa. 39 Onywenywe mokhoyakunelelya Maandekho ga Matuunda kho nguno mokhosiima khopumana nanego molapata opanga wa nsiko jensi. Ila Maandekho agagoo agenee gakhompalela onene. 40 Ninga gechoo, onywenywe mokhosiita khwija khwane ili mopate opanga nsiko jensi.

41 "Onene nkhaloma vantu vampele olaala. 42 Ila onene mbamanyile onywenywe venaa mokhamotogwa Matuunda. 43 Onene nijaga khwenyu ili mpaale egoo ganaa Daada yaane khopogaa mpaale, ila onywenywe mokhonsiita. Ila mbe muntu yoonge yeyensi khiija patokhola khotomwa no muntu yeyensi, onywenywe molamopokela. 44 Onywenywe motogwile khwikholya nywenywe kho nywenywe. Ila mokhatogwa khopokela okolo khopuma khwa Matuunda mwenee. Gechoo molakhowola mbi khongoomba onene? 45 Mokhasiime kete onenee ampeta khovasitacha khwa Daada, ila Musa yunaa mokhwisowelela amwenee alavasitacha. 46 Mbe alemwamogoomba Musa kho khapanga, anga mongoombe nane, kho nguno omwenee aleandekha mpola jaane. 47 Ila mbe mokhagagomba ganaa aleandekhaa Musa, molakhowala mbi khogagomba ganaa gechoo ninga ganaa nkhovaweela khotopo mogagombe?"