1 Nsiko ya otato angile khole wenga kho ihala la Kana, lenaa lepwale kho nse ya Galilaya. Onyinya wa Yesu nanoyo aleapwale okhoo. 2 Yesu palomwi ne vahemba vakwe, nanevo angile valalekhagwa kho wenga. 3 Divai panaa aleyasilaa, onyinya wa Yesu aleamowela, "Vasilelagwa ne Divai!"

4 Yesu amowela, "Maye mpola eye ikhatoloma, leelo nkha nsiko yaane ya kholageela olaala waane."

5 Apenee onyinya wa Yesu aleavawelaa vatomami, "Lelensi lenaa alavawela motomame, tomamagi."

6 Epoo angile jepwale ngeelo nkolo sita jenaa alejenogeleliwe khwa khotomela mabwe, yenaa Vayahudi alekhotomela khwisinga no khosingela vento kete venaa kepogwaa khomokhombekha Matuunda. Ne ngeelo yemwii alekejolaa madebe gataano ao sita ga meje. 7 Yesu avalagelelya, "Ijolaji meje mo ngeelo eje." Apenee vijolyaa pelema. 8 Apenee avalagelelya, "Tapagi meje kedo momokenkele mwimeleli wa wenga." Gechoo vatapa no khomokenkela. 9 Mwimeleli wa wenga panaa aleagemaa meje egoo, aleagawona meje gagalokhaga gawaaga divai. Nanoyo aleakhamanya divai khonaa aleyapumaga, ila evoo vatomami vanaa alevatapa meje egoo alevamanyile khonaa ipumile. Gechoo Mwimeleli wa wenga aleamwetaa mwenga wa kegwisha pampelo. 10 Amowela, "Kela muntu khwandyaa khopumya divai yenaa nsoga. Panaa vantu vensi amba vakholagwa, apenee vakhopumyaa divai yenaa nkha nsoga. Ila ogwegwe wapumajaa divai nsoga khwi ituungo lensi."

11 Ele alenee ituntumu la mwandyo lenaa Yesu aleanojaa, aleawonoja khwi ihala la Kana, yenaa ipwale kho nse ya Galilaya, alealagelaa olaala wakwe ne vahemba vakwe vamogoomba.

12 Panaa alegakela egoo gensi, Yesu palomwi no nyinya ne vadogwakwe ne vahemba vakwe, alevapeta Kapelenaumu khonaa alevikhala kho nsiko ntiiti.

13 Wenga wa Pasakha wa Vayahudi angile ele pepi, gechoo Yesu aleapetaa Yelusalemu. 14 Panaa aleapikha kho Nyoomba ya Matuunda aleavapikha vantu vakhogolya ng'oombe, nkholo ne njewa, khanke aleavawonaa ne vantu vaange kho meza jawe vakhogalolya mpia jawe ili vapate mpia jakhotomela kho Nyoomba ya Matuunda. 15 Yesu aleanogelelya nkhome ya ngosa no khovadaga vantu vensi palomwi ne ng'oombe ne nkholo vapume kho Nyoomba ya Matuunda. Aleapendolaa meza ja vantu vanaa alevakhogalolya mpia no khojiita mpia jawe jeensi. 16 Avawela evoo vanaa alevakhogolya njewa, "Pumaji epa vento eve. Mokhainoje Nyoomba ya Daada yaane pa khogolelya no khogola vento." 17 Vahemba vakwe alevakombola venaa Maandekho alegakhopaala, "Otogwi waane mo Nyoomba yakhoo otite ngulu, okhontima mokhate mwaane kete moto."

18 Valaala va Vayahudi alevamolya Yesu, "Olakhowola khotonojela otuntumu kee, khotolageela kete nagwe otite olaala wa khonojaa ega gensi."

19 Yesu avaweela, "Khompulagi Nyoomba eye ya Matuunda, nane ndanogelelya kho nsiko jetato."

20 Valaala va Vayahudi alevawolya, "Nyoomba eye ya Matuunda aleyajengwaa khwi ituungo la myakha makomi ganee ne sita. Mbi, ogwegwe olakhowola khojeenga kho nsiko jetato?"

21 Ila Nyoomba ya Matuunda yenaa Yesu angile khopalelaa a mowele gwakwe mwenee. 22 Panaa aleafufokhaa, vahemba vakwe alevakhombola kete angile avapalelaga mpola eye. Apenee alevagoomba Maandekho ga Matuunda ne mpola ejoo jenaa Yesu aleapalagaa.

23 Yesu panaa aleapwale Yelusalemu kho wenga wa Pasakha, vantu vinki alevamogomba panaa aleviwonela matuntumu ganaa aleaganojaa. 24 Ila Yesu angile akhavagombela, kho nguno aleagamanyile ga momeoyo jawe. 25 Angile akhaloma muntu yeyensi amowelee venaa vantu vapwale, kho nguno Yesu aleamanyile masiimo gensi ga vantu evoo.