1 "Yesu apalaa, onene amwenee mozabibu gwa khapanga, no Daada yaane amwenee molemi. 2 Kela itambe lenaa lakhalekholela viligi, kholedomolaa. Ila kela itambe lenaa lekholela viligi, khopogelela ili lelele viligi vinki modugo. 3 Onywenywe mwisaganja visoga palomwi nane, kho nguno ya maalangi gaane ganaa alenavaligaga. 4 Ikhalagi mokhate yaane, kete venaa onene nkhwikhala mokhate yenyu. Kete venaa khotopo itambe lenaa lekholela lenee patokhola khovambelela pa mozabibu, avivyoo khotopo monojee ganaa khopogaa Matuunda mbe khotopo mwikhale mokhate yaane."

5 "Onene nde itina la mozabibu, nanyu mole matambe. Muntu yunaa khwikhala mokhate yaane, nane nikhale mokhate yakwe, oyoo alalela viligi vinki, onene itina panaa amba ntapoya onywenywe khotopo monoje chechensi. 6 Mbe muntu yeyensi akhakhwikhala mokhate yaane, khwipyana ne itambe lenaa lekhosombwa no khonyaala, matambe egoo gakhokunganywa no khosombwa kho momoto no khopya. 7 Mbe mwikhale mokhate yaane, ne mpola jaane mbe jiikhale mokhate yenyu, lombagi chechensi kenaa mopogile nanyu molapelwa. 8 Daada yaane alakholiwa mbe amolela viligi vinki, eloo lelagela kete mole vahemba vaane.

9 "Kete venaa Daada yaane aleantogwa onene, onene navatogagwa onywenywe. Sigagi kho otogwi waane. 10 Mbe molajewamba njaanga jaane, molasiga kho otogwi waane, kete venaa onene alenkhojelonda njaanga ja Daada yaane no khosiiga kho otogwi wakwe."

11 Navawelaga mpola ejoo, ili mwijolwe ne nsekho kete venaa onene ntite nsekho, ne nsekho yenyu idugame. 12 Njaanga yaane ayenee eye, Mwitogagwe kete venaa onene alenkhovatogwa. 13 Khotopo otogwi mokolo khokela owo, wa muntu khopumya opanga wakwe kho nguno ya valaasi vakwe. 14 Nanyu mwawaga valaasi vaane, mbe molanoja ganaa nkhovaweela. 15 Nkha nkhoveeta khanke vasi, kho nguno mwasi akhamanya kenaa khonojaa mwene wakwe. Ila onene navaetaga onywenywe valaasi vaane, kho nguno navawelaga gensi ganaa nategalaga khopuma khwa Daada yaane. 16 Onywenywe alemokhansagola onene, ila onene amwenee alenavasagolaa mowee vahemba vaane, alenavasagola ili mopete kholela viligi venaa vekhawola, gechoo kela kento kenaa molamolomba Daada kete venaa khopogaa alavapela. 17 Seji nkhovaweela geeke mwitogagwe.

18 "Mbe vantu va paliwelelo vawasimbele onywenywe, manyagi kete alevalongola khonsimbela onene, panaa alevakhale khovasimbela onywenywe. 19 Mbe anga mowee mole vantu va paliwelelo ele, vantu va paliweleo anga avavatogwa onywenywe kete venaa vakhovatogwa vantu vawe. Ila onywenywe nkha vantu va paliwelelo ele kho nguno navasagolaga onywenywe khopuma kho liwelelo ili mowee vantu vaane. Gechoo vantu va paliwelelo vakhovasimbela. 20 Khombolagi ganaa alenavaweela, ‘Mwasi akha mokolo khokela mwene wakwe’ kete venaa alevangayanja onene, valavagayanja ninga nanyu. Mbe valavamba mpola jaane, valavamba ne mpola jenyu. 21 Ila valavanojela ega gensi khonguno mokhondoonda onene, vakhonoja gechoo khonguno vakhamomanya yunaa aleantomaa. 22 Mbe anga ndeke khwija no khopaala nanevo anga amba vatokhola mabe. Ila seji khotopo vasiite kete vatokhola mabe. 23 Muntu yunaa khonsimbela onene, akhomosimbela Daada yaane. 24 Mbe onene anga mbe nkhanoja matuntumu yenaa khotopo muntu yeyensi yunaa aleanoja movamoonga vawe, anga amba vatokhola mabe. Ila seji vawonaga matuntumu ganaa naganogaja, ne vakwendelela khonsimbela onene no Daada yaane. 25 Ega gapumelaga ili Maandekho ga Matuunda ganaa gakhopaala, ‘Vansimbelaga patokhola nguno gadugame.’

26 "Panaa aliija oyoo Mwalya yunaa ndamotoma khwenyu khopuma khwa Daada, oyoo Moye yunaa khovapalelaa okhapanga wa Matuunda. Omwenee alavawela ganaa agamanyile gakhombugela onene. 27 Ninga nanyu molavawela vantu mpola jenaa mojemanyile khombugela onene, kho nguno angile mole palomwi nane khopuma mwandyo.