1 "Yesu aleendelela khopaala, navawelaga mpola eje jensi, ili mokhaleke khongoomba. 2 Valaala va nyoomba yakhwitangela Vayahudi, khotopo vawagombele khonojaa melemo jenyu omo, ituungo liijile panaa evoo vanaa vakhovawolaga valasiima khwa khonojaa gechoo vakhomotomamela Matuunda. 3 Vantu evoo valanoja gechoo kho nguno vakhamomanya Daada ninga onene. 4 Navawelaga mpola eji seji, ili ituungo eloo panaa lelapikha mwiije mokhombolage kete navawelile.

"Alenkhavawelaa mpola eji mpuma mwandyo, kho nguno angile nkhale nde palomwi nanyu. 5 Ila seji ntuwile khwa oyoo yunaa aleantoma khwenyu, no khotopo muntu ninga yomwi yunaa khombolya, ‘Opetile khwenii?’ 6 Mokhosaaya vikhamu momeoyo jenyu kho nguno navawelaga mpola eji. 7 Khapanga a kete geeke, khowookha khwaane khokhovalya onywenywe, kho nguno mbe nkhawookha, Mwalya khotopo iije khwenyu. Ila mbe ndawookha, ndamotoma khwenyu. 8 Mwalya panaa aliija alavalagela vantu vensi va paliweleo chanya ya mabe gawe, ne alavalagela chanya ya khogombelwa khwawe paulongolo wa Matuunda, ne chanya khotengemekhwa khwawe. 9 Mwalya oyoo alavalagela kete vatite mabe, kho nguno alevakhangomba onene. 10 Alavalagela kete onene nkhogombekha ne Matuunda, mpetile khwa Daada, gechoo khotopo mombone khanke. 11 Kho mpola ja khotengemekha, kho nguno Khatawe, yunaa a molaala wa liwelelo ele, atengemekhagwa no Matuunda.

12 "Nkhale ntite minki gakhovaweela, ila kho seji khotopo khonguno mogamanye. 13 Moye wa Matuunda panaa aliija, Moye yunaa khovapalelaa okhapanga wa Matuunda, omwenee alavalongolya no khovaliga khapanga yensi. Khotopo avalige ganaa gakwe mwenee, ila alavaliga egoo gensi ganaa khogategela khopuma khwaane, nanoyo alavawela mpola jenaa jelapumela nsiko jenaa jiijile. 14 Moye wa Matuunda oyoo yunaa khovapalela okhapanga, alankholya onene khonguno alavawela mpola jensi jenaa alaawa ategelaga khopuma khwaane. 15 Vento vyensi venaa atite Daada a vyaane. Avyenee napalaga kete oyoo Moye wa Matuunda alaosola okhombe waane no khovaweela onywenywe.

16 "Yesu aleavawela vahemba vakwe, lekhale ituungo ikupe topo moleke khombona, ne ituungo ikupe lenaa lejile khanke molambona."

17 Apenee vamoonga va vahemba vakwe vandya khwiwolya, "Okhopalelaa kee panaa okhopala? Lekhale ituungo ikupe topo moleke khombona, ne panaa okhopala ituungo ikupe lenaa lijile molambona khanke, ‘Avivyoo panaa okhopala kho nguno mpetile khwa Daada.’ 18 Vendelela khwiwolya, Khopalelaa kee panaa khopalaa, ‘Lekhale ituungo ikupe’? Khokhamanya ganaa khopalela."

19 Yesu aleamanyaa kete vahemba vakwe alevakhopooga khomowolya, gechoo avawelaa, "Mbi mokhwiwolya moleemwi kete angile nkhopalela kee, lekhale ituungo ikupe khotopo mombone, ne ituungo ikupe lenaa lejile molambona?" 20 Nkhovaweela khwa khapanga, molakota no khosaaya, ila vantu va paliwelelo valasekelela, onywenywe molasaya ila masaayo genyu galagalokha gawe nsekho. 21 Mokhiima panaa khwitungulaa mwana, khwitegela osati mokhakha, kho nguno ituungo lakwe la magayo lapikhaga, ila mbe mwana alelagwa, akhakhokombolaa khanke osati owoo, kho nguno khowaa ne nsekho ya khomoleeta muntu paliwelelo. 22 Nanyu avivyoo seji mopwale ne osaati, ila ndavatuwela khanke ne meoyo jenyu jelaawa ne nsekho, ne khotopo muntu yunaa alavasukha nsekho yenyu.

23 Nsiko eyoo khotopo mondombe chechensi. Nkhovaweela khwa khapanga, Daada yaane alavapela chechensi kenaa molamolomba kho olaala waane. 24 Mpakha seji mokhalomba chechensi kho olaala waane, molombagi Matuunda, nanoyo alavapela, gechoo nsekho yenyu iladugama.

25 "Navawelaga mpola ejoo khwa mefwano. Ila ituungo lijile lenaa ndapala nanyu khwa mefwano, gechoo ndavawela mpola ja Daada pawelo. 26 Nsiko eyoo molamolomba Daada khwa olaala waane, nkhankhovawelaa kete ndavalombela khwa Daada. 27 Kho nguno Daada mwenee avatogwile, kho nguno onywenywe montogwile onene, nanyu mwagombaga kete onene napumaga khwa Matuunda. 28 Nalenapuma khwa Daada, niija paliwelelo ne seji nkhowookha paliweleo mpetile khwa Daada."

29 Apenee vahemba vakwe vamoweela, "Amba visoga! Seji khopaala naswi patokhola khosweekha ninga nkha khwa mefwano. 30 Seji khomanyile kete ogwegwe ogamanyile gensi, gechoo muntu yeyensi khotopo akhowolye khonguno ogamanyile ninga ganaa vantu vakhosiima. Khwa mpola eye khokogoomba kete ogwegwe wapumaga khwa Matuunda."

31 Yesu avawolya, "Mbi, seji mokhogoomba? 32 Gechoo ntegelelaji, ituungo lijile ne taali lapikhapa, onywenywe molasambala, ne kela muntu alapeta khokhayakwe, nane molandekha ndeemwi, ila onene nkha ndeemwi kho nguno Daada apwale palomwi nane. 33 Navawelaga mpola eji ili mowee no wikhalo mosoga mokhate yenyu, kho liwelelo ele molagaya, ila ipelagi mooyo kho nguno onene nalisumaga liwelelo."