1 Alejasigaga nsiko sita wenga wa pasakha opike, Yesu aleapetaa Betania khokhaye khwa Lazalo oyoo yunaa Yesu aleamofufola. 2 Okhoo alevamwandalela endya ya mesee, no Malita alekhovatomamelaa. Lazalo angile yomwi wawe wa vanaa alevakholya endya palomwi no Yesu. 3 Malia aleasola nusu lita ya nsopa ya makhuta gakhotokela ga mpia nyinki, ganaa gakhonogelelwa khopuma kho ipeke gonaa gokhwetwaa nado, amwitekelya kho megolo Yesu no khopogusa ne nyele jakwe. Nyoomba yensi angile ketukelela otukeleli mosoga wa makhuta egoo. 4 Apenee Yuda Isikaliote yomwi wa vahemba va Yesu, yunaa alamogalokha Yesu, awolyaa, 5 "Kho kee khokhagolye makhuta egoo kho mpia nyinki ne mpia ejoo vapelwee vapeena?" 6 Aleapalaa gechoo, nkha kho nguno angile khovasosopaa vapeena, ila angile mwiwi. Yuda amwenee alekhowamba mufukho gwa khotolela mpia ne kela mala angile khwiwa mpia ejoo.

7 Yesu aleapalaa, "Molekhagi mokhiima oyo, akhagagolya makhuta ega, kho nguno ya nsiko yaane ya khozyekhwa. 8 Vapeena mole nanevo nsiko jensi, ila onene khotopo nde palomwi nanyu."

9 Vayahudi vinki alevategela kete Yesu angile apwale Betania. Gechoo alevapetaa okhoo nkha khomowona Yesu topo, ila alevapeta no khomowona Lazalo, yunaa aleafufolwa no Yesu. 10 Kho nguno angile Masadukayo, alevakhagomba mpola ja ofufolo, alevakhopooga khomowolaga Lazalo, 11 kho nguno ya khofufolwa khwakwe, Vayahudi vinki alevibegola ne Masadukuyo no khomogoomba Yesu.

12 Igolo lakwe, idale ikolo la vantu vanaa alevijaga kho wenga wa Pasakha, alevategeela kete Yesu angile ijilee Yelusalemu. 13 Apenee alevasola matambe ga matende, vapeta khomowawola Yesu, no khomopongela ili khomokholya, vajoma kho lolii no khopaala

"Hosana, emaana yakwe Khomokolye Mwene! Khomokolye yunaa khotonojela masoga yunaa ijile kwisu kho lina la Mwene.

Anojelwe masoga Mwami wa Izilaeli."

14 Yesu panaa aleamopata mwana wa ndogowe, amotantaa kho mogoongo kete venaa Maandekho ga Matuunda venaa gakhopaala.

15 "Onywenywe vantu va ihala la Yelusalemu mokhatungumale,

Kunagii, Mwami wenyu ijile,

Amotantagaa mwana ndogowe khwa opanga."

16 Ituungo eloo vahemba va Yesu alevakhamanya mpolo ejoo taali, ila Yesu panaa aleafufokha no khopelwa olaala, epoo alevakhombola kete egoo gensi alegandekwaga kho Maandekho ga Matuunda khomopalela mwenee, nanevo alevamonojela kete venaa aleyandekhwaga.

17 Vantu vanaa alevapwale palomwi no Yesu ituungo lenaa Lazalo alekhopuma mwikhabuli, alevendelela khovaweela vantu vaange egoo ganaa alevagawonaga. 18 Eye ayenee nguno yenaa vantu alevateegela kete Yesu amwenee yunaa aleanogaja ituntumu ele, alevapeta khomowawola. 19 Apenee Mafalisayo alevakhopalana, "Mowine? Khotopo monojee chechensi, kunagi vantu vensi vakhomolonda."

20 Angile khole ne Vayunani vatiiti movamoonga va vantu vanaa alevapikha Yelusalemu khomkumbekha Matuunda ituungo la wenga wa Pasakha, 21 Vayunani evoo alevamopetela Filipo, mwikhali wa Betisaida kho nse ya Galilaya, vamoweela "Meyaa, osweswe khokhopooga khomowone Yesu." 22 Filipo aleapetaa khomoweela Andelea mpola ejoo, apenee vensi vapeta khomoweela Yesu.

23 Yesu avawelaa, "Ituungo la Mwana wa Muntu khopokeela olaala wapikhaga. 24 Nkhovaweela khwa khapanga, mbe nsanka ya ngano ikhapuselwa panse no khowola, ilasiga yemwi kete venaa ipwale. Ila mbe yapuselagwa no khowola, ilalela nsanka nyinki. 25 Muntu yeyensi yunaa khotogwa opanga wakwe khaupwelya, ila muntu yunaa khosimbela opanga wakwe kho liwelelo ele, oyoo kholindaa opanga wakwe nsiko jensi. 26 Muntu yeyensi yunaa khontomamela onene khopogiwa andonde, pepensi panaa amba mpwale, apenee no motomami waane alaawa. Daada alamokholya muntu yeyensi yunaa khontomamela onene.

27 "Seji mooyo gwaane gokhosata, ampala chanuu? Mbi, mpale, ‘Daada, ompon'ye ituungo ele la magayo?’ Khotopo nkhowole kholoomba gechoo kho nguno nijaga khokelela magayo ega. 28 Daada, lagelaa olaala wakhoo."

Epoo lolii alelwategelekha khopuma khochanya khwa Matuunda, "Nalelagelaga olaala waane, ninga gechoo ndalagela khanke."

29 Vantu vanaa alevimelelaga epoo alevategeela lolii eloo ne vamoonga vawe alevapaalaa a ngilimo ketalamokhaa, ne vaange alevapaala, "Motomami wa pachanya pa Matuunda khopalaa nanoyo."

30 Ila Yesu aleavawelaa, "Lolii lonaa mwalotegelaga lokhiija kho nguno yaane, ila yijaga kho nguno yenyu. 31 Seji a ituungo la liwelelo ele khotengemekhwa, gechoo Khatawe, molaala wa liwelelo ele, alepepi khowopwelya olaala wakwe. 32 Ituungo lenaa onene ndanyanyolwa no khopagekwa pamosalaba, ndavakwesa vantu vensi viije khwaane." 33 Yesu alekhovawelaa venaa vantu valamowolaga.

34 Gechoo, vantu alevamowelaa, "Njaanga yisu kepalaa kete Kilisto alaikhala nsiko jensi. Nokhowola mbi khopaala kete, ‘Mwana wa Muntu alawolagwa pamosalaba?’ Mbi oyoo, ‘Mwana wa Muntu ananuu?’ "

35 Apenee Yesu avawelaa, "Welo ikhale ipwale nanyu khwi ituungo ikupe topo. Endelalagi khogeenda panaa mokhale motite welo, ili kiiti ikhiije khovakhonya, kho nguno muntu yunaa khogendaa kho kiiti akhamanya khonaa apetile. 36 Panaa mokhale motite welo owoo, mowogombage, ili mowee mole vana va welo."

Panaa aleamalya khopaala gechoo Yesu aleawokhaa no khwiswekha ili vantu vakhamowone.

37 Ninga venaa Yesu aleanogaja matuntumu minki paulongolo wawe, ila evenee alevakhamogomba. 38 Ega gensi alegapumela ili gadugame egoo ganaa aleapalaa mokuuni wa Matuunda Isaya.

"Mwene, ananuu yunaa aleagombaa okhombe wisu?

Ananuu yunaa Mwene amolagelaga ngulu jakwe?"

39 Kho gechoo alevakhakhowola khogoomba, avyenee nanoyo mukuuni Matuunda Isaya aleapalaa.

40 "Matuunda agatululagaa miso gawe,

agatungagaa masala gawe,

ili vakiije vawone kho miso gawe,

ninga vakiije khomanya khwa masala gawe,

ne vakiije khopaala mabe gawe no khogalekha

nanoyo Matuunda avapon'ya."

41 Mukuuni wa Matuunda Isaya aleapala mpola eye epoo pamyakha, kho nguno aleawona venaa Mwene angile molaala no khwandekhaa mpola jakwe.

42 Ninga gechoo valaala vinki va Vayahudi alevamogoomba Yesu. Ila kho nguno ya Mafalisayo, alevakhakhola khopaala pawelo, kho nguno ya wowa kete valadagwa khopuma kho nyoomba ya khwitangela Vayahudi. 43 Valaala evoo alevakhotogwa khopelwaa loojo ne vantu khokela khopelwaa loojo no Matuunda.

44 Yesu aleajoma lolii no khopaala, "Muntu yeyensi yunaa khongoomba, akhakhongoomba nenee topo, ila khomogomba no Matuunda yunaa aleantoma. 45 Muntu yunaa khombona onene, khomowona no Matuunda yunaa aleantoma. 46 Onene nijaga kho vantu va paliwelelo ili mbe nde welo wawe wa khapanga, ili vensi vanaa vakhongoomba vakhasige kho kiiti. 47 Onene nkhakhomotengekha muntu yeyensi yunaa khotegeela malaangi gaane ila akhakhogaloonda. 48 Muntu yeyensi yunaa khonsitaa onene palomwi ne malaangi jaane, apwale yunaa alavatengemekha. Malaangi ganaa napalaga agenee galavatengemekha vantu nsiko ya odugo. 49 Onene nkhapala mpola eje kho olaala waane, ila Daada yunaa aleantoma amwenee ambwelaga mpola ja khopaala ne venaa ndapalaa. 50 Nane manyile mpola jenaa andagelelaja mpaale, agenee galavanoja vantu vikhale nsiko jensi."