1 Yesu panaa aleamalya khopaala egoo, aleakunaa khochanya khwa Matuunda, apalaa, "Daada, ituungo lapikhaga. Valagelee vantu olaala wa Mwanaakho, ili no Mwanaakho avalageele olaala wakhoo. 2 Kho nguno wamopelaga Mwanaakho olaala khwa vantu vensi, ili avapele opanga wa nsiko jensi, vensi evoo vanaa wamopelaga ogwegwe. 3 No opanga wa nsiko jensi awenee owo, vantu vakhomanye kete ogwegwe amwenee Matuunda oleemwi wa khapanga, ne vammanye onene Yesu Kilisto yunaa alewantoma paliwelelo. 4 Onene nakhokholajaa khwa khomala khotomama molemo gonaa alewampelaga nojee. 5 Seji Daada nkholomba ompele olaala owo wonaa angile ntite palomwi nagwe, panaa liwelelo angile letapoya.

6 "Navalagelaga evoo vantu vanaa alewampela khopuma paliweleo venaa ogwegwe opwale. Angile vantu vakhoo, nagwe wampela onene, nanevo vanogaja ganaa alewavaweela vanoje. 7 Seji vamanyile kete chechensi kenaa alewampela chapumaga khwakhoo, 8 kho nguno egoo ganaa alewambwelaga navaligaga, nanevo vagapokelaga ne vamanyile kete khapanga onene napumaga khwakhoo, ne vagombaga kete ogwegwe alewantoma."

9 "Onene nkhovalombela evenee, nkhakhovalombela evoo vanaa vakhangoomba, ila nkhovalombela evoo vanaa alewampela, kho nguno evoo a vantu vakhoo. 10 Vantu vensi vanaa a vaane, a vakhoo, ne vensi vanaa otite a vaane, nane napelagwa olaala wawe venaa vakhwikhala. 11 Seji nijile khwakhoo, onene ntapoya khanke paliwelelo, ila evene vakhale vapwale paliwelelo. Matuunda yunaa oleemwi modugami, ewa vanaa wampelaga ovasonge kho olaala wakhoo, ili vawee kento kemwii kete venaa osweswe khole kento kemwii. 12 Panaa alempwale palomwi nanevo, onene alenavasonga khwa khovalagela okhapanga wonaa alewampela venaa ogwegwe opwale. Alenavasonga vakhawambwe ne obe, gechoo alenkhamopwelya ninga yomwi, ila topo yunaa aleandekelwa khononwa, ili gadugame egoo ganaa alegandekhwa kho Maandekho ga Matuunda kete galamopikha. 13 Seji nijile khwakhoo, ila nkhopaala mpola eje panaa mpwale paliwelelo, ili vawee ne nsekho ya khapanga kete venaa ntite nsekho yenaa ya khapanga. 14 Onene navaligaga egoo ganaa aleokhopooga mbalige ne vantu va paliweleo vakhovasimbela, kho nguno evenee nkha vantu va paliwelelo ele, kete venaa onene nkha wa paliwelelo ele. 15 Nkhankhokholomba ovawoche paliwelelo, ila nkhokholomba ovasonge no oyoo Mobe Khatawe. 16 Evenee nkha vantu va paliwelelo ele, kete venaa onene nkha wa paliwelelo ele. 17 Kho nguno malaangi gakhoo a ga khapanga, ovanoje nanevo vawee va khapanga. 18 Kete venaa alewantoma khwa vantu va paliwelelo, avyenee nane nkhovatoma khwa vantu va paliwelelo. 19 Nkhwituula khokhotomamela ogwegwe kho nguno yawe, ili nanevo vituule khwakhoo khwa njela ya khapanga.

20 "Nkhankhovalombela ewa topo, ila nkhovalombela ne evoo vanaa valagomba khokelela okhombe vanaa ewa vanaa vangombaga valawatengela. 21 Nkhovalombela vawee kento kemwi, kete venaa ogwegwe Daada, opwale mokhate yaane, nane mokhate yakhoo, nanevo vawee mokhate yisu, ili vantu va paliwelelo vagoombe kete ogwegwe amwenee alewantoma. 22 Loojo yenaa alewampeela onene, nane vavapelaga evenee, ili nanevo vawee kento kemwi kete venaa osweswe khole kento kemwi 23 Onene mbe nde mokhate mwawe, nagwe owee mokhate yaane, ili meoyo jawe jepetane khapanga, apenee vantu va paliwelelo valamanya kete mpumile khwakhoo, ne ovatogwile kete venaa ontogwile onene.

24 "Daada, nkhotamanela evoo vanaa alewampela vawee palomwi nane lwande yenaa ndaawa mpwale, ili vawone olaala no mung'alalo waane wonaa alewampela, kho nguno alewantogwa panaa liwelelo angile letapoya. 25 Daada yunaa khonojaa ganaa gakhapanga, vantu va paliwelelo alevakhakhomanya, ila onene nkhomanyile, ewa nanevo vamanyile kete ogwegwe amwenee alewantoma. 26 Navalagelaga venaa opwale, ne anendelela khonojaa gechoo, ili otogwi wakhoo wonaa otite khwaane, owee mokhate yawe, nane mbe nde mokhate yawe."