1 Panaa alegakela egoo, Yesu angile avapumela khanke vahemba vakwe kho mpelo ya ilambo la Tibelia. Angile avapumela geeke, 2 Angile vamoonga va vahemba vikonganajaa palomwi, vahemba evoo angile, Simoni Petelo, Tomasi yunaa alekhwetwaa ipasa, no Natanaeli khopuma ihala la Kana la Galilaya, vana vawele va Zebedayo ne vahemba vaange vawele. 3 Simoni Petelo aleavawelaa, "Mpetile kholuwa nshe."

Vahemba vaange nanevo alevamoweela, "Osweswe vensi kholapeta palomwi nagwe." Gechoo vensi vapuma no khwingela mwipogo. Ila otikho wensi angile vakhapata kento chechensi. 4 Igolo lakwe makingilima, Yesu aleijaa no khwimelela mompelo ya ilambo, ninga gechoo vahemba vakwe alevakhamotembola kete amwenee angile Yesu. 5 Apenee Yesu avawolya, "Valaasi vaane, mbi, mokhapata kento chechensi?"

Evenee vamoweela, "Avyenee khokhapata kento chechensi."

6 Apenee avawelaa, "Telemoli megonyo lwande lwa molyelo wa ipogo lenyu, nanyu molapata nshe." Gechoo, alevatelemola megenyo kho lwande eyoo, vapata nshe nyinki ninga vakonya khovanyenyola no khovingelya mwipogo.

7 Mohemba yunaa aleatogwilwe no Yesu aleamowela Petelo, "A Mwene." Apaponye Simoni Petelo panaa aleategela kete a Mwene, aleitungaa mwenda gwakwe kho nguno angile apwale bwiinda, adikelaa mo meje. 8 Ila vahemba vaange alevakowa mintikho khoekenkha ipogo kho nse nkhaku, okho vakhokweesa megonyo jenaa angile jiijwile nshe mpakha kho nse nkhaku. Kho nguno angile vapwale khotale kete mita igana lemwi topo mpakha kho nse nkhaku. 9 Panaa alevapikha pampelo ya nse nkhaku ya ilambo, alevawona makhala ga moto gakholaga. No momoto ogoo alejipwale nshe ne mikate. 10 Apenee Yesu avawelaa, "Leti nshe jemoonga jenaa mwaluwaga ituungo ele."

11 Apenee Simoni Petelo aleatanta mwipogo no khwandya khokweesa mogonyo gonaa alegwijwile nshe mpakha pampelo ya ilambo, mogonyo ogoo alegotite nshe nkolo jenaa angile jepikile igana lemwi ne makomi gataano ne gatato. Ninga venaa nshe angile nyinki, mogonyo ogoo alegokhawunekha. 12 Yesu avawelaa, "Mwiije kholyee endya." Khotopo ninga mohemba yomwi yunaa aleamowolya, "Ogwegwe a nanuu?" Kho nguno angile vamanyaga kete a Mwene. 13 Yesu aleiijaa, asolaa mikate eyoo no khovapeela, avivyoo aleasola ne nshe ejoo avapelaa.

14 Eye angile mala ya otato Yesu khovapumela vahemba vakwe mpuma panaa aleafufokha.

15 Panaa alevamalya kholya, Yesu aleamowolya Simoni Petelo, "Simoni mwana wa Yohana, mbi, ontogwile onene khokela ewa?"

Nanoyo amowelaa, "Avyenee Mwene, omanyile kete nkhotogwile."

Yesu amowelaa, "Lisaji nkholo jaane."

16 Apenee Yesu amowolya khanke, "Simoni, mwana wa Yohana ontogwile onene?"

Nanoyo amowelaa, "Avyenee Mwene, ogwegwe omanyile kete nkhotogwile."

Apenee Yesu amowelaa, "Songagaa nkholo jaane."

17 Yesu amowolya khanke mala ya otato, "Simoni, mwana wa Yohana, ontogwile onene?"

Petelo aleasayaa kho nguno Yesu angile amowolya mala jetato, "Ontogwile?" Amowelaa, "Mwene, omanyile vyensi, omanyile kete onene nkhotogwile."

Yesu amowelaa, "Lisaji nkholo jaane. 18 Nkhokoweela khwa khapanga, panaa angile ole molomyana, angile okhwituunga mokhanki gwakhoo pakeweno no khopeta khonaa opogile. Ila panaa olakhombimpa olagolola mekhono jakhoo, muntu yoonge alakutunga mokhanki gwakhoo, alakhokenka khonaa olaawa okhatogwa khopeta." 19 Yesu aleapalaa geeke khomolageela Petelo venaa alaafwa, ne venaa alamopela loojo Matuunda. Panaa aleamalya khopaala gechoo, amowelaa, "Ndondee."

20 Petelo aleagalokha no khomowona mohemba yoonge yunaa Yesu aleamotogilwe khovalondaa. Mohemba oyoo amwenee aleikhala pepi no Yesu panaa angile vakholya endya, no khomowolya Yesu, "Ananuu yunaa alakhogalokha?" 21 Petelo panaa aleamowona, amowolya Yesu, "Mwene, no khwa oyo mpola kee yenaa elamopumela?"

22 Yesu amowelaa, "Mbe nkhopooga asiige mopanga mpakha panaa ndatuuwa, eloo lekhalekhokwalya, ogwegwe ndondagee onene." 23 Gechoo mpola eyoo aleyasambala movamoonga mwa vadogo evoo, kete mohemba oyoo khotopo afwee. Ila Yesu aleakhamowela mohemba oyoo kete khotopo achee. Ila omwene aleapalaa topo, "Mbe nkhopooga asiige mopanga mpakha panaa ndatuuwa, eloo lekhalekhokwalya."

24 Mohemba oyoo amwenee yunaa aleagawona mapola ega ganaa khotowelaa, nanoyo amwenee yunaa aleavandekela mpola eji. Nasu khomanyile kete gensi ganaa khotowelaa a ga khapanga.

25 Khole mpola nyinki jenaa Yesu angile anogajaa. Mbe gensi anga gandekwe, nkhosiima kete anga amba khotopo chumba cha khokweela khovetuula evyoo.