1 Panaa egoo alegakela, Yesu aleagendela mahala minki ga nse ya Galilaya. Aleakhaloma khopeta kho mahala ga nse ya Yudea, kho nguno valaala va Vayahudi alevakhopooga khomowologa. 2 Ituungo eloo wenga wa Vayahudi wa vidindiga angile watelelaga. 3 Apenee vadogo va Yesu alevamowelaa, "Wokhaa epa opete Yudea ili vahemba vakhoo vawone matuntumu ganaa khoganojaa. 4 Khotopo muntu yunaa khopogaa amanyike khwa khonoja mpola khwa khwisweekha. Mbe khonojaa mpola eje, wilageele kho vantu va paliwelo." 5 Valunakwe alevapaala gechoo kho nguno nanevo angile vakhamogomba kete omwene amwenee Kilisto.

6 Apenee Yesu avawelaa, "Ituungo laane lekhale lepikhe. Ila onywenywe namokhowola khopeta ituungo lelensi okhoo. 7 Vantu va paliwelelo khotopo vawasimbile onywenywe, ila vakhonsimbela onene kho nguno nkhovaweela kete manyile manoji gawe a mabe. 8 Onywenywe petagi kho wenga owo, onene khotopo mpete, kho nguno ituungo lenaa nkhopogiwa mpete Yelusalemu lekhale lepike." 9 Panaa aleamalya khopaala egoo, aleendelelaa khosiiga Galilaya.

10 Valunaakwe panaa alevapeta kho wenga, Yesu nanoyo aleapetaa ila khwa khwiswekha. 11 Valaala va Vayahudi angile vakhomopooga kho wenga owoo, angile vakhowolya, "Mbi muntu oyoo apwale khwenii?"

12 Vantu vinki angile vakhololoma kho madale khomowugela omwene. Vamoonga vawe alevakhopaala, "Muntu oyo atite losongo modugo." Vaange angile vakhopaala, "Khotopo! Khokhoshaa vantu." 13 Ila khotopo yunaa angile khokuwa mbuuto mpola ja Yesu patokhola khwesweekha, kho nguno alevakhovogopa valaala va Vayahudi.

14 Ituungo panaa nsiko ja wenga jekhowa japikhaga pakhate, Yesu aleapetaa ingela mo lokinga lwa Nyoomba ya Matuunda no khwandya kholiga. 15 Apenee Valaala va Vayahudi alevakhumya ne vawaa vakhopaala, "Muntu oyo apatagaa khwenii omanyi mokolo kete ogo, ninga akhale iligage kwekwensi?"

16 Yesu avawelaa, "Malaangi ganaa nkhovaliga nkha gaane, ila gakhopuma khwa Matuunda yunaa aleantomaa. 17 Muntu mbe khopogaa khonoja mpola jenaa Matuunda khopogaa, alamanya kete malaangi gaane gakhopuma khwa Matuunda, ao nkhopaala masiimo gaane nenee. 18 Muntu yunaa khwipalela mpola jakwe mwenee, khopooga khwikholya mwenee, ila muntu yunaa khwipogela olaala wa oyoo yunaa aleamotoma, amwenee wa khapanga ne akhakhovapepela vantu vaange. 19 Mbi, Musa aleakhavapela njaanga? Ila movamoonga venyu, khotopo ninga yomwi yunaa angile alondaa njaanga. Kho kee mokhopooga khombolaga?"

20 Epoo idale la vantu alelamoweela, "Ogwegwe otite mademi. Ananuu yunaa khopogaa khokhowolaga?"

21 Yesu avawelaa, "Alenanojaa ituntumu lemwi Nsiko ya Khosuupa, nanyu vensi alemwakhumya. 22 Musa aleavalagelelya movagotole vana venyu, ila nkha kho njaanga ya Musa, ila aleyapumaa kho vakoko venyu, nanyu mokhovagotola vana venyu ninga Nsiko ya Khosuupa. 23 Mbe onywenywe mokhomogotola mwana Nsiko ya Khosuupa, ili khovaamba njaanga ja Musa, kho kee onywenywe mokhonsimbela onene kho nguno namoponyajaa muntu Nsiko ya Khosuupa? 24 Mokhamotengemeke muntu kete venaa khwigela, ila tengemekhagi khwa kholoonda okhapanga."

25 Apenee vantu vamoonga va Yelusalemu angile vakhwiwolya, "Mbi, oyo nkha amwenee yunaa valaala angile vakhomopooga vamoolage? 26 Kunagi seji khopalaa ne vantu pawelo, ninga valaala akhavakhomogilya kento chechensi. Mbi, valaala amba vamanyaga kete oyo amwene Kilisto? 27 Ila Kilisto panaa aliija khotopo muntu yunaa alamanya khonaa aleapumagaa, ila osweswe khomanyile khonaa apumagaa muntu oyo."

28 Yesu panaa angile kholigaa kho Nyoomba ya Matuunda alekhokowaa lolii no khopaala, "Momanyile khwa khapanga khonaa alenapuma, onene alenkhiija kho olaala waane ila Matuunda yunaa antomagaa amwene wa khapanga. Onywenywe mokhamomanya, 29 Ila onene mbomanyile kho nguno napumaga khwakwe, nanoyo amwene yunaa aleantomaa."

30 Gechoo vantu alevapooga khomogweela, ila khotopo muntu yunaa aleapeta khomogweela kho nguno ituungo angile lekhale lekhapikha. 31 Vantu vinki vanaa alevapwale pidale alevamogoomba Yesu, angile vakhopaala, "Mbi, Kilisto panaa alaija, alanoja matuntumu makolo khokela ganaa anogajaa muntu oyo?"

32 Mafalisayo alevategeela vantu vakhopwepweta mpola ejoo khomopalela Yesu. Apenee valaala va vapumya matambekho alevawatoma masinjala va nyoomba ya Matuunda vamogweele Yesu.

33 Yesu avawelaa, "Amba mpwale nanyu khwi ituungo ikupe, apenee ndatuuwa khanke khwakwe yunaa aleantoma. 34 Molampoga ila molalekha khombona, khonaa amba mpwale, onywenywee khotopo mopike."

35 Valaala va Vayahudi vawa vakhwiwolya venee, "Muntu oyo alapeta khwenii khonaa kholiilwa khomowona? Mbi, alapeta kho nse ja khotale khonaa Vayahudi vakhwikhala movamoonga va vantu vanaa akha Vayahudi, no khovaliga vantu vanaa akha Vayahudi? 36 Mbi, khopogaa khotoweela chanuu panaa khopalaa, molampoga ila molalekha khombona, khonaa amba mpwale, onywenywee khotopo mopike?"

37 Nsiko yenaa alevakhomalelya wenga angile nsiko nkolo ya wenga. Yesu aleimelelaa apalaa kho lolii lokolo, "Mbe khole muntu yeyensi atitee nyoota iije khwaane ang'weele meje ga opanga. 38 Muntu yeyensi yunaa khongombaa onene, kete venaa gakhopaala Maandekho ga Matuunda, ‘Lweje ja meje ga opanga jiliitekela khopuma khwa evoo vanaa valangomba.’ " 39 Yesu alekhopalelaa Moye wa Matuunda yunaa valapokela vantu vanaa vakhomogoomba Yesu. Ituungo eloo Matuunda angile akhale khomotoma Moye wakwe, kho nguno Yesu angile akhale akhapokela olaala khopuma khwa Daada Matuunda.

40 Vantu panaa alevategeela mpola jenaa alekhopalaa Yesu, vamoonga vawe alevapaala, "Khwa khapanga, muntu oyo amwenee molagoli wa Matuunda!" 41 Vaange alevapaala, "Oyo amwenee Kilisto."

Ila vaange alevawolya, "Mbi, Kilisto khapuma kho nse ya Galilaya? 42 Mbi, Maandekho ga Matuunda akha gakhopaala kete Kilisto alapuma kho odogo wa Daudi ne alalelwa Beselehemu khwi Ihala lenaa alekhwikhalaa Daudi?" 43 Gechoo vantu alevabegonkhana kho mpola ja Yesu. 44 Vantu vamoonga alevakhopooga khomogweela ila khotopo yunaa aleamogweela.

45 Evoo masinjala va Nyoomba ya Matuunda panaa alevatuuwa patokhola Yesu, vapumya matambekho valaala ne Mafalisayo, nanevo alevavawolya, "Kho kee alemokhamogwela no khomoleeta?"

46 Evoo masinjala va Nyoomba ya Matuunda alevavaweela, "Khotopo muntu yunaa khopalaa mpola jenaa jekhokumya kete venaa khopalaa muntu oyo." 47 Mafalisayo vavawolya, "Mbi ninga nanyu mwapepelagwa? 48 Mbi, khole valaala ao Mafalisayo vanaa vamogombaga muntu oyo? 49 Ila vantu vanaa vakhomogoomba muntu oyo, a vantu vanaa vakhamanya njaanga ja Musa, Matuunda khovaligita vantu kete ewa."

50 Yomwi wa Mafalisayo angile apwale epoo yunaa khwetwaa Nikodemo, oyoo yunaa aleamopetela Yesu otikho, nanoyo avawolya vayakwe, 51 "Mbi, njaanga jisu jekhotopooga khomotengemekha muntu patokhola khomotegelelya taali no khomanya ganaa anogajaa?"

52 Valaala va Vayahudi vamoweela, "Khapanga ninga nagwe wapumelaga Galilaya, kunelelya Maandekho ga Matuunda, olawona kete khotopo mokuuni yunaa khotembolwaa khopuma kho nse ya Galilaya."

53 "Apenee kela muntu aleawookhaa no khopeta khokhayaakwe."