1 Yesu panaa angile khokelaa, aleamowona muntu yomwii, yunaa angile mtulu mpuma kholelwa khwakwe. 2 Vahemba vakwe alevamowolya, "Molaangi! Ananuu yunaa anojagaa mabe, ninga muntu oyo alelwaa mtulu, a muntu oyo ao valeli vakwe?"

3 Yesu avawelaa, "Nkha muntu oyo, ninga valeli vakwe vanaa alevanojaa mabe. Ila alealelwaa mtulu ili olaala wa Matuunda wigele kho wome wakwe. 4 Khokhopogiwa khonoja molemo gwa oyoo yunaa aleantoma panaa khokhale lyonse, otikho panaa okhwingela khotopo muntu yeyensi yunaa alakhowola khonojaa melemo. 5 Ituungo panaa nkhale mpwale paliwelelo, onene nde welo wa vantu va paliwelelo."

6 Panaa aleamalya khopaala gechoo, aleatyaa matye panse, aleakhadanga maloongo, apenee amopakhaa mtulu oyoo momiso, 7 no khomoweela, "Yagaa okhalawe khwi iwoga la Siloamu, emaana yakwe yunaa aleatomwa." Epoo apenee mtulu oyoo aleapetaa khokhalawa miso gakwe ne atuuwa khowonaa.

8 Vantu vanaa alevakhwikhala pepi nanoyo ne evoo vanaa alevamowonaga kholoomba loomba, viwolyaa, "Mbi, oyo nkha amwenee oyoo yunaa angile khikhalaga epa no kholoomba loomba?"

9 Vamoonga vawe alevapaala, "Oyo amwenee." Vaange alevapalaa, "Nkha amwenee! Ipyanilee nanoyo topo."

Ila vaange alevapaala oyo amwenee yunaa alekholomba lomba, "Onenee amwenee!"

10 Kho gechoo, angile vakhomowolyaa, "Mbi, miso gakhoo alegadigokha mbi ninga wakhowola khowona?"

11 Avawelaa, "Muntu oyoo yunaa alekhwetwaa Yesu aleakhadanga maloongo, ampakhaa kho miso gaane no khombweela, ‘Mpete Siloamu khokhawala.’ Gechoo alenapeta khokhalawa no khwandya khowona."

12 Vamowolya, "Alekwenii muntu oyoo?" Nanoyo avawelaa, "Onene nkhamanya khonaa apwalee!"

13 Apenee alevamokenkha muntu oyoo yunaa angile mtulu khwa Mafalisayo. 14 Nsiko eyoo yenaa Yesu aleakhadanga maloongo no khomopakha mtulu oyoo momiso, ne miso gakwe gadigokha, angile Nsiko ya Khosuupa. 15 Apenee Mafalisayo alevamowolya khanke muntu oyoo, "Wakhowola mbi khowona?" Nanoyo avawelaa, "Angile ampakhaa maloongo momiso gaane, no khombweela nkhalawe, apenee nandyaa khowona."

16 Mafalisayo vamoonga alevapaala, "Muntu oyo akhakhopumaa khwa Matuunda, kho nguno akhakholondaa njaanga ya Nsiko ya Khosuupa."

Ila vaange alevapaala, "Mbi muntu yunaa atite mabe nokhowolaa mbi khonojaa matuntumu kete ega?" Apenee alevandyaa khwibegola venee kho venee.

17 Alevamowolya khanke muntu oyoo yunaa angile mtulu, "Kho nguno muntu oyoo akhodigolaga miso, okhomopalela mbi muntu oyoo?" Nanoyo avawelaa, "A mokuuni wa Matuunda."

18 Valaala va Vayahudi alevakhagomba kete muntu oyoo angile mtulu, ne seji khowonaa. Gechoo alevaveeta valeli va muntu oyoo. 19 Vavawolya valeli vakwe, "Mbi, oyo amwenee mwanenyu yunaa mokhopaala alealelwa mtulu? Mbi akhowolaa mbi khowona seji?"

20 Valeli vakwe vavaweela, "Khomanyile kete oyo amwenee mwaniisu, ne angile alelwaa mtulu. 21 Ila khokhamanya venaa akhowola khowona. Ninga muntu yunaa aleamodigola miso gakwe khokhamomanya. Mowolaji mwenee, kho nguno muntu oyo a mokolo nokhowolaa khwipalela mwenee." 22 Valeli vakwe alevapaala gechoo kho nguno alevakhovogopa valaala va Vayahudi, kho nguno valaala evoo alevigombajaa kete, mbe muntu yeyensi yunaa alamogomba Yesu amwenee Masiya, khanke yunaa khwetwaa Kilisto, aladagwa kho nyoomba ya khwitangela Vayahudi. 23 Avyenee valeli vakwe alevapaala, "Oyo a muntu mokolo, mowolaji mwenee."

24 Apenee, alevamweta khanke oyoo yunaa angile mtulu, vamoweela, "Mopele Matuunda olaala. Osweswee khomanyile kete muntu yunaa aleakhodigolaga miso gakhoo muntu oyoo atitee mabe."

25 Muntu oyoo avawelaa, "Onene nkhamanya kete muntu oyoo atitee mabe ao atokhola mabe. Kento kemwii kenaa manyile, angile nde mtulu ne seji nkhowona." 26 Apenee vamowolya muntu oyoo, "Mbi akhonojelaa chanuu? Aleakhodigola mbi miso gakhoo?" 27 Muntu oyoo avawelaa, "Navawelaga ila alemokhantegelelya. Kho kee mokhopooga mbawele khanke? Mbi, nanyu mokhopooga mowee mole vahemba vakwe?" 28 Alevamotokha no khomoweela, "Ogwegwee ole mohemba wa muntu oyo, ila osweswee khole vahemba va Musa. 29 Osweswee khomanyile kete Matuunda aleapalaa no Musa, ila muntu oyo khokhamanya khonaa apumagaa!" 30 Muntu oyo avawelaa, "Mpola eyoo ya khokumyaa! Mokhamanya khonaa apumaga, ila muntu oyo andigolaga miso gaane. 31 Khomanyile kete Matuunda akhakhovategelelya vantu vanaa vatite mabe, ila khovategelelya vantu evoo vanaa vakhomkumbekha no khoganoja ganaa khopogaa. 32 Khopuma khowombwa khwa liwelelo khokhale khotegeele kete muntu yeyensi agadigolaga miso ga muntu yunaa angile alelagwa mtulu. 33 Mbe muntu oyo aleakhapuma khwa Matuunda, anga khotopo anojee chechensi."

34 Valaala va Vayahudi vamoweela, "Ogwegwee angile walelwaa no khokolela kho mabe, mbi nokhowola mbi khogema khotoliga osweswee?" Apenee, alevamodaga apume panji.

35 Yesu panaa aleategelaa kete muntu oyoo adagagwaa omoo. Panaa alevitaanga nanoyo aleamowolya, "Mbi, ogwegwee khomogoomba Mwana wa Muntu?"

36 Muntu oyoo aleapalaa, "Meyaa, muntu oyoo a ananuu? Mbwelee ili nane mbomogombe."

37 Yesu amowelaa, "Ogwegwe taali wamowonaga, oyoo amwene yunaa khopalaa nagwe seji." 38 Apenee, oyoo muntu apalaa, "Mwene nkhogoomba." Epoo apenee aleatungumaa no khomokumbekha Yesu.

39 Yesu aleapalaa, "Onene nijaga paliwelelo ili khovatengemekha vantu, ili vanaa vatulu vandyee khowona, ne vanaa nkha vakhowona vawee vatulu."

40 Mafalisayo vamoonga vanaa angile vapwale pepi no Yesu alevategeela venaa angile khopalaa, vamoweela, "Mbi, ninga nasu khole vatulu?" 41 Yesu avawelaa, "Mbe anga mowee vatulu, anga amba motokhola mabe, ila kho nguno mokhopaala mokhowona, mokhawochelwa mabe genyu no Matuundaa."