1 Panaa nsiko ya wenga wa Pasakha wa Vayahudi angile ikhale khopikha. Yesu aleamanya ituungo la khowookha paliwelelo angile lapikhaga. Nanoyo alekhovatogwaa vanaa alevakhomogoomba, ne aleavatogwa khwa khapanga.

2 Ituungo lenaa Yesu ne vahemba vakwe angile vakholya endya ya mesee. Khatawe angile taali amwingelaga Yuda, mwana wa Simoni Isikalioti, no khomopeela isiimo la khomogalokha Yesu. 3 Yesu angile amanyile kete Daada yakwe amopelaga vento vyensi. Avivyoo aleamanyile kete apumaga khwa Matuunda ne atuwile khanke khwa Matuunda. 4 Gechoo aleimelela epoo panaa alevakholya, alyola mwenda gwakwe gwa pachanya, atulaa pampelo, asolaa ketambala no khwituunga mo keweno. 5 Apenee atulaa meje mwikhalai, andyaa khovasiinga megolo vahemba vakwe no khoepogusa kho ketambala kenaa aleitungagaa. 6 Panaa aleamopikela Simoni Petelo, nanoyo Simoni Petelo aleamowolya, "Mwene, ndakhowola mbi khokhogombela onsinge megolo jaane?"

7 Yesu amowelaa, "Okhagamanya ganaa nkhonojaa seji, ila oliija khogamanya ituungo lenaa liijile."

8 Petelo amowelaa, "Nkha gechoo, khotopo wiije onsinge megolo jaane ninga nsiko yemwi."

Yesu amowelaa, "Mbe ndeke khokosinga megolo jakhoo, khotopo wiije owe palomwi nane."

9 Apenee Simoni Petelo amowelaa, "Mwene, mbe gechoo okhansinge megolo topo, onsinge mekhono jaane ne itwe laane."

10 Yesu amowelaa, "Muntu yunaa ogagaa, khopogiwa khosiinga megolo topo, kho nguno khoowa elopagaa mowele gwensi, gechoo onywenywe mwelopaga, ila nkha vensi." 11 Yesu aleapalaa gechoo, kho nguno aleamomanyaa oyoo yunaa alamogalokha. Avyenee aleapalaa, "Nkha vensi vanaa mole welo."

12 Yesu panaa aleamalya khovasinga megolo vahemba vakwe, alealyalaa khanke mwenda gwakwe gwa pachanya, aleatuwaa khanke pa lwande ya kholyeela endya, nanoyo avawolya, "Mbi, mwamanyaga ganaa alenavawelaga? 13 Onywenywe mokhonyeeta onene Molaangi, khanke mokhonyeeta Mwene, gechoo mokhopaala visoga kho nguno avyenee venaa mpwale. 14 Onene nde Mwene no Molaangi wenyu, navasinga megolo yenyu. Gechoo nanyu mokhopogiwa mosingane megolo jenyu. 15 Navapelaga mofwano, ili nanyu monoje kete venaa alealenavanojelaga. 16 Nkovaweela khwa khapanga, vatumami nkha valaala khokela vanaa vakhovatomekela, ninga vakhombe nkha valaala khokela vanaa vakhovatoma. 17 Mbe mojemanye mpola eje, Matuunda alavanojela masoga mbe molaganoja.

18 "Nane nkha khovapalela onywenywe vensi, mbamanyile evoo vanaa alenavasagola. Ila lekhaa Maandekho ga Matuunda gadugame, kete venaa gakhopaala, ‘Muntu yunaa kholyaa endya palomwi nane, awaga mobe waa ne.’ 19 Nkhovaweela mpola eje taali panaa jikhale khopumeela, ili panaa jelapumela molaawa mokhongoomba kete ‘Onenee Amwenee.’ 20 Nkhovaweela khwa khapanga, yeyensi yunaa khomopokela oyoo yunaa alenamotoma khompokela onene. Ne yeyensi yunaa khompokela onene, khomopekela oyoo yunaa aleantoma."

21 Yesu panaa aleamalya khopaala egoo, aleasayaa modugo momooyo gwakwe, apalaa, "Nkhovaweela khwa khapanga, yomwi wenyu alangalokha."

22 Vahemba vakwe vensi alevandyaa khwikuuna, ila alevakhamanya kete alekhomopalela ananuu. 23 Yomwi wa vahemba vakwe oyoo yunaa aleatogilwee modugo no Yesu, aleikhala pepi no Yesu. 24 Simoni Petelo aleamosinelya no khopaala, "Mowolye khomopalaa ananuu."

25 Apenee mohemba oyoo yunaa angile pepi no Yesu, amowolya, "Mwene, khomopalelaa ananuu?"

26 Yesu apalaa, "Muntu oyoo yunaa alenamopeela ibande la mokate kenaa alenakiina mwi bakhuli oyoo amwene." Apenee aleasolaa ibande la mokate, iina, amopela Yuda, yunaa angile mwanaakwe Simoni. 27 Panaa Yuda alealya ibande la mokate, Khatawe aleamwingelaa. Apenee Yesu amowelaa, "Kenaa khopooga khonojaa, nogajaa waango waango." 28 Ila khotopo muntu ninga yomwi mo vamoonga vawe vanaa alevapwale epoo. 29 Kho nguno Yuda amwenee angile khowamba mofukho mpia ja vahemba vensi, vamoonga vawe alevakhosiima kete Yesu angile khomowelaa Yuda apete agole vento venaa alevekhopogiwa kho wenga wa Pasakha. Ao khovapeela vapeena.

30 Yuda panaa aleamalya kholya ibande la mokate aleapumaa panji, eloo angile ituungo la otikho.

31 Yuda panaa aleapuma panji, Yesu aleapalaa, "Seji Mwana wa Muntu apelagwa olaala wakwe wa khapanga, no mokhate yakwe Matuunda apelagwa olaala. 32 Kho nguno alagelaga olaala wa Matuunda, Matuunda nanoyo alalagela olaala wa Mwana patopo khotin'yaa. 33 Vanaane amba mpwale nanyu khwi ituungo ikupe topo. Molampoga ila kete venaa alenavaweela valaala Vayahudi kete khonaa mpetile onene, onywenywee khotopo mopete."

34 Nkhovapeela njaanga mpyaa, Mwitogagwe, kete venaa onene alenkhovatogwa onywenywe, avivyoo nanyu mwitogagwe. 35 Mbe moliitogwa, vantu vensi valamanya kete onywenywe mole vahemba vaane.

36 Simoni Petelo aleamowolya Yesu, "Mwene, opetile kwenii?"

Yesu amowelaa, "Okhoo khonaa njile seji, onywenywe khotopo mondonde. Ila molandonda ituungo lenaa liijile."

37 Petelo aleamowolya, "Mwene, kho kee nkhakhowola khokholoonda seji? Afazali mfwee kho nguno yakhoo."

38 Yesu amowolya, "Mbi, olagombaa khofwa kho nguno yaane? Ila nkhokhowela panaa njogolo amba ikhaale khowekha, olapala mala jetato."