1 Panaa alegakela egoo, Yesu alealowokha kho nkelo yiilambo la Galilaya, khanke angile lekhwetwa iilambo la Tibelia. 2 Idale ikolo la vantu angile lekhomoloonda kho nguno alevawona lomekho jenaa aleanojaa khwa khovapon'ya valwile. 3 Apenee Yesu aleatantaa kho ketonda no khwikhala okhoo palomwi ne vahemba vakwe. 4 Nsiko ejoo, wenga wa Pasakha wa Vayahudi alewatelelaga. 5 Yesu panaa aleakunaa, aleawona idale ikolo la vantu lekhomopetela, amowolya Filipo, "Akhogola kwenii endya jakhovakhwela vantu vensi ewa?" 6 Yesu aleamowolya Filipo gechoo ili amogeme, kho nguno omwene aleamanyile lenaa alanoja.

7 Filipo amowelaa, "Ninga vebaande magana gawele ga madini ga mpia jekhakwela khovagolela endya vantu vensi ewa."

8 Yomwi wa vahemba vakwe yunaa alekhwetwaa Andelea, yunaa angile molunaakwe Simoni Petelo, amowelaa Yesu, 9 "Epa pale no molomyana yomwi yunaa atite mikate jetaano ja ngano ne nshe jewele, ila evee vikhakwela kho vantu vinki kete ewa."

10 Yesu apalaa, "Vawelegi vantu vensi vikhale panse." Epoo alepatite masanje masapu minki, kho gechoo vantu alevikhala panse ne vagwisha alevapwale kete elufu jetaano. 11 Yesu aleaesolaa mikate eyoo no khosongela khwa Matuunda, apenee andyaa khovagawela vantu vanaa angile vikhalaga epoo, anojaa aviyoo no kho nshe ejoo, kela muntu aleapataa kete venaa alekhopoga.

12 Vantu vensi panaa alevikhota, Yesu aleavawela vahemba vakwe, "Solangelagi masigelo gensi, kekhapwele chechensi." 13 Gechoo alevasolangela masigelo gensi no khwijolya vekhapu ikomi ne vewele vya mikate yenaa alevalya vantu.

14 Vantu panaa alevawona lomekho eyoo yenaa Yesu aleaenogajaa, vandya khopaala, "Khapanga oyo amwenee alaawa mukuuni wa Matuunda yunaa iijile paliwelelo." 15 Yesu panaa aleatembola kete vantu vakhopooga vamonojee awee mwami wawe kho ngulu, aleanyelemokhaa no khopeta kho ketonda aleemwi.

16 Lyonse panaa angile lagweela, vahemba vakhwe alevasulumokela khwi ilambo la Galilaya, 17 alevataanta mwipogo ili valowokhe khopeta Kapelanaumu, otikho angile wingelega, no Yesu angile akhale apikhe. 18 Iputa ikhakha alelandya khoputa vekhamu, apenee alegapumeela magelekha makolo ga meje. 19 Vahemba panaa alevapetaga ne ipogo otale wa kilomita jetaano ao sita, alevamowona Yesu khogendaa pachanya ya meje khotelela pipogo, epoo alevatungumala modugo. 20 Ila Yesu avawelaa, "Nenee, mokhatungumale." 21 Apenee vamopooga ataante mwipogo. Apaponye ipogo yawaa yapikhaga kho nse nkhaku khonaa alevaile.

22 Igolo lakwe idale la vantu vanaa alevasigaga lwande yeenge ya ilambo alevaewona ipogo yemwi topo yasigaga. Khanke alevawona kete Yesu angile akhapeta palomwi ne vahemba vakwe. Ila vahemba vakwe avenee vanaa alevapeta ne ipogo valeemwi. 23 Mapogo gaange khopuma Tibelia alegapikha pepi ne epoo khonaa vantu alevalyelaga mikate ejoo, panaa Mwene aleamalagaa khomosongela Matuunda. 24 Vantu panaa alevawona kete Yesu ne vahemba vakwe angile vatapoyaa epoo, alevingela kho mapogo gawe khopeta Kapelanaumu khomopooga Yesu.

25 Vantu panaa alevamowona Yesu nkelo ya ilambo vamowolya, "Molaangi, epa alewapikha nale?"

26 Yesu aleavawelaa, "Nkhovawela khwa khapanga, monkhopooga onene nkha kho nguno ja lomekho jenaa alemwawonaga, ila onenee manyile kete mokhompooga kho nguno alemwalya mekhate eyoo no khwikota. 27 Mokhagayele endya kenaa kekhononekha, ila gailagi endya yenaa kekholeeta opanga wa nsiko jensi. Echoo achenee endya kenaa Mwana wa Muntu alavapela, kho nguno Daada Matuunda andagelaga onene amwenee."

28 Apenee vamowolya, "Mbi, khonojee chanuu ili khokhowole khonojaa melemo ja Matuunda?"

29 Yesu avawelaa, "Molemo gonaa Matuunda khopogaa monojee, a khomogoomba oyoo yunaa amotomaga."

30 Gechoo vamowolya, "Olatunojela lomekho kee ili khowone no khokhogoomba? Mbi olanoja ituntumu kee? 31 Vakoko visu alevalya endya jenaa alejekhwetwa mana okhoo pitenengwa, kete venaa Maandekho ga Matuunda venaa gakhopaala, ‘Aleavapelaa endya khopuma khochanya khwa Matuunda.’ "

32 Yesu avawelaa, "Nkovaweela khwa khapanga, nkha Musa yunaa aleavapela endya khopuma khochanya pa Matuunda, ila Daada yaane amwenee yunaa khovapelaa endya ya khapanga khopuma khochanya khwa Matuunda. 33 Kho nguno endya kenaa Matuunda khovapela akechoo kenaa kekhotelemokha khopuma khochanya khwa Matuunda no khovapeela vantu va paliwelo opanga nsiko wa nsiko jensi."

34 Apenee vamowelaa, "Meyaa, okhopelage endya eye nsiko jensi."

35 Yesu avawelaa, "Onenee amwenee endya kenaa kekhovapela vantu opanga wa jelele. No muntu yeyensi yunaa khwijaa khwaane khotopo ategeele njala, no oyoo yonaa khongombaa khotopo ategeele nyoota khanke. 36 Ila alenavawelaga, mwambonaga ila mokhamokhongoomba. 37 Vantu vensi vanaa Daada khompela, valiija khwaane, ne yeyensi yunaa khwijaa khwaane khotopo mbosombe ninga nsiko yemwii. 38 Kho nguno onene natelemokhaga khopuma khochanya pa Matuunda, nkha kho nguno ya khonoja ganaa onene nkhopooga, ila nijaga khonojaa ganaa Matuunda khopogaa. 39 Ega agenee khogapoga oyoo yunaa aleantoma, kete nkhamopwele ninga muntu yomwi movamooga va evoo vanaa aleampelaa, ila mbafufole vensi nsiko ya odugo. 40 Kenaa khopogaa Daada yaane achenee eke, yeyensi yunaa khomowonaa Mwana no khomogoomba, khaawa no opanga wa nsiko jensi. Nane ndamofufola nsiko ya odugo."

41 Apenee vamoonga va Vayahudi alevandya khomololomela Yesu kho nguno aleapalaa, "Onene amwenee endya yenaa ketelemokhaa khopuma khochanya pa Matuunda." 42 Vapaala, "Mbi, oyo nkha mwana wa Yusufu? Khomomanyile ise no nyinya, seji khokhowolaa mbi khopaala kete atelemokhaa khopuma khochanya khwa Matuunda?"

43 Yesu avawelaa, "Lekhagi khong'ung'uunta nywenywe khwa nywenywe. 44 Khotopo muntu yunaa nokhowolaa kwijaa khwaane, mbe Daada yunaa aleantomaa akhamolongolya khomoleeta khwaane, nane ndamofufola nsiko ya odugo. 45 Vakuuuni va Matuunda alevandekha, ‘Vantu vensi valaligwa no Matuunda.’ Kela muntu yunaa ategelagaa no khwiliga khopuma khwa Daada, amwenee yunaa aliija khwaane. 46 Khotopo muntu yeyensi yunaa aleakhowola khomowona Daada Matuunda, ila topo oyoo yunaa aletelemokha khopuma khwa Matuunda, oyoo amwenee aleemwi yunaa aleamowonaa Daada. 47 Nkhovaweela khwa khapanga, yeyensi yunaa khongombaa, oyoo amwenee khaawa no opanga wa nsiko jensi. 48 Onene amwenee endya ya opanga wa nsiko jensi. 49 Vakoko venyu alevalya endya jenaa alejekwetwa mana okhoo pitenengwa, ila angile vafwa. 50 Eye ayenee endya kenaa kekhotelemokha khopuma khochanya pa Matuunda, ili muntu apate kholya ne akhafwe. 51 Onene amwenee endya ya opanga yenaa kekhotelemokha khopuma khochanya pa Matuunda. Yeyensi yunaa khaalya endya eyoo alaawa no alikhala nsiko jensi. Endya yenaa nkhopumya onene a mowele gwaane, gonaa nkhopumya khwa vantu vensi va paliwelo."

52 Apenee Vayahudi alevandya khwisookha khwa kesila. "Muntu oyoo khakhowola mbi khopumyaa mowele gwakwe kholyee?"

53 Yesu avawelaa, "Nkhovaweela khwa khapanga, mbe molalekha kholya mowele gwa Mwana wa Muntu no khong'weela chaji yakwe, molaawa motokhola opanga wa nsiko jensi mokhate mwenyu. 54 Muntu yunaa kholyaa mowele gwaane no khong'weela chaji yaane, oyoo khaawa ne opanga wa nsiko jensi, gechoo nane ndamofufola nsiko ya odugo. 55 Kho nguno mowele gwaane agwene endya ya khapanga ne chaji yaane a keng'weela cha khapanga. 56 Muntu yeyensi yunaa kholya mowele gwane no khong'weela chaji yaane, alaikhala mokhate yaane, nane ndikhala mokhate mwakwe. 57 Kete venaa Daada yunaa aleantomaa venaa atite opanga, nane nkhwikhala khwa njela yakwe, avyenee yeyensi yunaa khondyaa alikhala khwa njela yaane. 58 Gechoo, eye ayenee endya yenaa yatelemokhaga khopuma khochanya khwa Matuunda, kekhakekhwipya ne endya yenaa alevalya vakoko venyu, nanevo vafwaa. Ila muntu yeyensi yunaa kholyaa endya eye, khotopo afwe, ila alikhala nsiko jensi." 59 Yesu aleapalaa gechoo, panaa alekholigaa kho nyoomba yenaa Vayahudi angile vakhwitangela okhoo Kapelanaumu.

60 Vahemba vakwe vinki panaa alevategeela mpola ejoo, vapaala, "Malaangi ega a makhamu. Mbi ananuu yunaa nokhowolaa khogapokeela?" 61 Yesu aleamanya kete vahemba vakwe alevakhololoma kho nguno ya malaangi gakwe, gechoo avawolya, "Mbi, malaangi ega gakhovanoja molekhe khongoomba? 62 Ilaawa mbi panaa molamowona Mwana wa Muntu khopapamokha khopeta khochanya khwa Matuunda khonaa angile apwale pamwandyo? 63 Moye wa Matuunda amwenee kholetaa opanga wa nsiko jensi. Muntu khotopo akhowole khonojaa chechensi kho ngulu jakwe topo. Mpola yenaa navawelaga gakhovanoja mopate Moye wa Matuunda yunaa khovapelaa opanga. 64 Ila movamoonga venyu vapwale vaange vanaa akhavakhongoomba." Kho nguno Yesu aleavamanyaa khopuma pamwandyo vananuu vanaa akhavakhomogoomba ne aleamomanyaa yunaa alamogalokha. 65 Yesu aleendelelaa khovaweela, "Avyenee alenavawelaa, muntu yunaa alakhowola khwijaa khwaane mbe Daada akhamolongolya iije khwaane."

66 Khwa khopaala gechoo, vahemba vakwe vinki alevalekha khomoloonda, no kholekha khopeta nanoyo kho mosingi gwakwe. 67 Apenee Yesu aleavawolya vahemba evoo ikomi ne vawele vanaa angile avasagolaa, "Mbi, nanyu mokhopooga khowookha?"

68 Simoni Petelo amowelaa, "Mwene, akhopeta khwa ananuu? Ogwegwe otite mpola jenaa jekhotoletela opanga wa nsiko jensi. 69 Osweswe khokhogoomba no khomanyile kete ogwegwe ole wa Matuunda no watomagwa no Matuunda."

70 Yesu avawelaa, "Mbi, angile nkhavasagola onywenywe ikomi ne vawele? Ila yomwi wenyu a Khatawe." 71 Yesu angile khomopalela Yuda, mwana wa Simoni Isikaliote, ninga venaa Yuda angile yomwi wa vahemba ikomi ne vawele, amwenee yunaa angile apetile khomogalokha.