1 Ila Yesu aleapetaa kho ketonda cha Mizeituni. 2 Igolo lakwe melaawo Yesu aleatuuwa khanke kho Nyoomba ya Matuunda. Vantu vinki alevamopetela, nanoyo aleikhala palomwi nanevo andyaa khovaliga. 3 Apenee, valaangi va njaanga ja Musa palomwi ne Mafalisayo alevamoletela mokhiima yomwi yunaa aleagwelwaa khonojaa osencha. Vamoleeta no khomwimelekha paolongolo ya vantu vensi. 4 Apenee vamowela Yesu, "Molaangi, mokhiima oyo amwenee yunaa agwelagwaa khonojaa osencha. 5 Kho njaanga, Musa aleatopogaa khomokowa mabwe mokhiima kete wa geeke mpakha achee. Mbi, ogwegwee khowona mbi?" 6 Vantu evoo alevamowolya gechoo ili vamogeme Yesu ili vapate njela ya khomositachaa. Ila Yesu aleasunamaa panse no khwandyaa khwandekha paolongo kho lojala lwakwe. 7 Panaa alevendelela khomowolya, Yesu aleimelelaa no khovaweela, "Muntu yeyensi movamoonga venyu yunaa akhale anojage mabe awee wa mwandyo khomojutela ibwe." 8 Apenee Yesu aleasunama khanke, no khwandya khwandekha paolongo. 9 Vantu evoo panaa alevategela gechoo, alevandyaa khowookha muntu yomwii, vakhombi alevalongola khowookha. Yesu aleasigaa aleemwi okho mokhiima oyoo imelelagaa paolongolo wakwe. 10 Yesu aleimelelaa no khomowolyaa mokhiima oyoo, "Valekwenii vanaa angile vakhosikhajaa? Mbi, khotopo muntu yunaa aleakhotengemekha?"

11 Mokhiima oyoo amowelaa, "Meyaa, khotopo ninga yomwii!" Apenee Yesu amowelaa, "Ninga nene nkhakhokhotengemekha. Seji petegaa, ne khwandelelya seji okhanoje khanke mabe."

12 Yesu panaa aleapalaa nanevo khanke, aleavawelaa, "Onene amwenee welo wa vantu va paliwelelo. Muntu yeyensi yunaa khongombaa no khontegelelya, khotopo ikhale kho kiiti nsiko jensi, ila alaawa atite welo wa opanga wa nsiko jensi."

13 Apenee Mafalisayo vamoweela, "Ogwegwee khwipalela patokhola muntu yoonge kholageela ganaa khopaala, gechoo ganaa khwipalela ogwegwee nkha ga khapanga."

14 Yesu avawelaa, "Ninga mbe nkhwipalela ganaa manyile onene, ila mpola jaane a ga khapanga, kho nguno onene manyile khonaa alenapuma no khonaa mpetile. Ila onywenywe mokhamanya khonaa napumaga ninga khonaa mpetile. 15 Onywenywe mokhontengemekha kete venaa vantu vakhovatengemekha vaange. Ila onene nkhakhomotemengekha muntu yeyensi. 16 Ninga mbe ntengemeke, matengemekho gaane a ga khapanga, kho nguno nkhankhotengemekha ndeemwi, ila onene no Daada yunaa aleantomaa khokhotengemekha palomwi. 17 Yandekhwagwa kho njaanga jenyu kete owoni wa vantu vawele awenee wa khapanga. 18 Vawoni vawele a nenee no Daada yunaa aleantomaa, kho gechoo owoni wisu a wakhapanga." 19 Apenee vamowolya, "Iso apwale khwenii?" Yesu avawelaa, "Onyweywe mokhammanya onene ninga Daada yaane mokhamomanya. Mbe anga mommanye onene, no Daada yaane nanoyo anga amomomanya."

20 Yesu aleapalaa mpola ejoo panaa alekholiga kho chumba cha Nyoomba ya Matuunda khonaa mpia ne nsawo alejekhotolwa. Ila khotopo muntu yunaa aleamogwelaa, kho nguno ituungo lakwe angile lekhale khopikha.

21 Yesu aleavawelaa khanke, "Onene nkhowookha onywenywe molampoga, ila molaafwa kho mabe genyu. Onene khonaa mpetile, onywenywee khotopo mwiije."

22 Apenee valaala va Vayahudi vandyaa khwiwolyaa venee, "Apalagaa khonaa apetile osweswe khotopo khopete. Mbi apetile khwiwolaga?"

23 Yesu avawelaa, "Onywenywee mwapumaga apapanye paliwelelo, onene napumaga pachanya. Onywenywee mole vantu va paliwelelo ele, ila onenee nkha wa paliwelelo ele. 24 Avyenee alenavaweela molaafwa kho mabe genyu. Mbe molalekha khogoomba kete, ‘Onene Amwenee’, molaafwa kho mabe genyu."

25 Nanevo vamowolyaa, "Ogwegwee ananuu?"

Yesu avawelaa, "Onene amwenee kete venaa alenavaweela khopuma mwandyo. 26 Ntite minki gakhopaala ne gakhovatengemekha onywenywee. Ila oyoo yunaa aleantomaa awa khapanga. Nane nkhovaweela mpola jenaa alenajitegeela kwakwe."

27 Ninga alevakhatembola kete Yesu khougela mpola ja Ise. 28 Apenee avawelaa, "Panaa molamonyanyola pamosalaba Mwana wa Muntu, epoo apenee molamanya kete, ‘Onene Amwenee,’ ne nkhakhonojaa chechensi kete venaa nkhopooga, ila nkhonoja kete venaa Daada aleandigaa. 29 Oyoo yunaa aleantomaa apwale palomwii nane, akhandekha ndeemwi kho nguno nsiko jensi nkhonojaa egoo ganaa atogilwee."

30 Yesu panaa alekhopalaa mpola ejoo, vantu vinki alevamogoomba.

31 Apenee Yesu aleavawela Vayahudi vanaa alevamogoomba, "Mbe molagalonda malaangi gaane, molaawa vahemba vaane va khapanga. 32 Apenee molamanya khapanga, naneyo ilavanoja mowee no wilegesi."

33 Nanevo vamoweela, "Osweswee khole valelwa va Abulaamu, osweswe khokhale khowee vasi wa muntu yeyensi. Otite maana kee panaa khopaala, ‘Molaawa no wilegesi’?"

34 Yesu avawelaa, "Nkhovaweela khwa khapanga, muntu yeyensi yunaa khonojaa mabe, a mwasi wa mabe. 35 Mwasi akhakhwikhalaa nsiko jensi khokhaye khwa molaala wakwe, ila Mwana khwikhalaa khokayawe nsiko jensi. 36 Gechoo, mbe Mwana alavapela wilegesi, amba mwapataga wilegesi wa khapanga. 37 Manyile kete onywenywee mole valelwa va Abulaamu. Ila mokhopooga khombolaga kho nguno mokhosiita khopokeela malaangi gaane. 38 Nkhovaweela egoo ganaa alenawonaga panaa alempwale no Daada yaane, ila onywenywee mokhonojaa egoo ganaa isenyu alavawelaa monoje."

39 Evenee vamowela, "Abulahamu amwene Daada yisu."

Yesu avawelaa, "Anga mowee mole vana va Abulaamu, anga amonoja ganaa aleanojaa Abulaamu. 40 Onene alenavawelaga mpola ya khapanga yenaa alenategeela khopuma khwa Matuunda, ninga gechoo, onywenywee mokhopooga khombolaga. Abulaamu aleakhanoja gechoo. 41 Onywenywee mokhonojaa mpola jenaa Daada yenyu khonoja." Evenee vamoweela, "Osweswee nkha vana va nsalalyo, Matuunda aleemwi amwenee Daada yisu." 42 Yesu avawelaa, "Kete Matuunda anga awe Daada yenyu, anga amontogwa onene, kho nguno onene napumile khwa Matuunda ne seji mpwaale epa, alenkhiija khwa kholoma onene mweene ila a Matuunda aleantoma. 43 Kho kee mokhamanya ganaa nkhopaala? Kho nguno mokhaloma khotegelelya malaangi gaane. 44 Onywenywee mole vana va Khatawe yunaa isenyu, nanyu mokhopooga khonojaa ganaa khopogaa monojee. Omwenee amwenee angile mowolagi khopuma pa mwandyo wa owoombi, ne akhakhwimelela khapanga, kho nguno khotopo khapanga mokhate yakwe. Panaa khopalaa opepi, khopalaa echoo kenaa aleiyandelelaa mwenee, kho nguno omwenee a mopepi no a daada wa opepi. 45 Ila onene nkhovaweela okhapanga, onywenywee akhamokhongoomba. 46 Mbi, ananuu yomwii pakhate yenyu yunaa nopumya owoni kete onenee ntite mabe? Mbe nkhovaweela khapanga, kho kee onywenywee mokhamokhongoomba? 47 Muntu yeyensi yunaa a wa Matuunda khotegelelya ganaa Matuunda khopalaa. Ila onywenywee nkhamokhotegelelya kho nguno onywenywe mokhamokhopuma kwa Matuunda."

48 Vayahudi vamowolya, "Mbi, alekhokhapala khapanga ogwegwee a Mosamalia, ne otite idemi?"

49 Yesu avawelaa, "Onene ntokhola idemi. Onene nkhomopeela Daada loojo yaane, ila onywenywee mokhombyeeda. 50 Onene nkhankhwipogela olaala waane nenee, ila apwale yoonge yunaa khompogela olaala owoo, nanoyo amwenee khotengemekha patokhola khobegola muntu. 51 Nkhovaweela khwa khapanga, yeyensi yunaa khotegelelya malaangi gaane khotopo afwee nsiko jensi."

52 Apenee Vayahudi vamoweela, "Seji khwatembolaga kete ogwegwee otite idemi, Abulaamu ne vakuuni va Matuunda vensi angile vafwaa, ila ogwegwee khopaala, ‘Yeyensi yunaa khotegelelya malaangi gaane khotopo afwee nsiko jensi.’ 53 Mbi, ogwegwee khwinojaa ole molaala khokela daada yisu Abulaamu yunaa aleafwaa? Ninga vakuuni va Matuunda alevafwaa. Gechoo khopaala ogwegwee ananuu?"

54 Yesu avawelaa, "Mbe ndipela loojo nenee, olaala waane amba nkha kento. Daada yaane amwenee khompelaa loojo onene, oyoo yunaa onywenywee mokhopaala a isenyu. 55 Onywenywee mokhamomanya, ila onenee mbomanyile. Ne mbe ampala nkhamomanya, amba nde mopepi kete onywenywee. Ila onene mbomanyile, ne Mpola yakwe nkhoetegelelya. 56 Isenyu Abulaamu, aleasekelelaa modugo panaa aleawonaa nsiko ya khwija khwaane. Ne panaa aleayewonaa, aleasekelelaa modugo." 57 Apenee Vayahudi vamoweela, "Ogwegwee okhale opichee ninga myakha makomi gataano, nagwe wamowonaga mbi Abulaamu?" 58 Yesu avawelaa, "Nkhovaweela khwa khapanga, panaa Abulahamu aleakhale alelwee, onenee angile mpwale." 59 Vayahudi panaa alevategeela egoo, alevasolangela mabwee ili vamojutele, Ila Yesu aleiswekhaa, anyelemokha no khopumaa mo Nyoomba ya Matuunda.