1 Apenee Pilato alealagelelya Yesu afwembwee menyepo ja ntila. 2 Nanevo masinjala vasola miyaa vanogelelya nkhofila kete ya kewami, vapeta khomolyekha Yesu khwi itwe. Khanke vamolyekha mwenda mokhasuku gwa kewami. 3 Vaawa vakhomopetela no khomolamocha khwa mabyeedo, "Kasinde Mwami wa Vayahudi!" Apenee vamopatolanga nkhofi.

4 Pilato apuma panji khanke avaweela Vayahudi, "Kunagi, nkhomopumya khwenyu, kho nguno onene nkhawona ibe lelensi la khomotengemekha muntu oyo." 5 Apenee Yesu aleapuma panji okho alyalaga nkhofila eyoo ya miyaa ya kewami no mwenda mokhasuku gwa kewami. Pilato avawelaa, "Kunagi, muntu mwenee amwenee oyo."

6 Vapumya matambekho valaala ne valendeleli va Nyoomba ya Matuunda, panaa alevamowona alevajoma, vapaala. "Mokoweleli pamosalaba! Mokoweleli pamosalaba!"

Ila Pilato avawelaa, "Mosolagi nywenywee mopete momokoweleli pamosalaba, kho nguno onene nkhawona ibe lelensi lenaa anogaja."

7 Valaala va Vayahudi vamowelaa, "Osweswe khotite njaanga, no kho njaanga eye, khetopogaa muntu oyo achee, kho nguno angile khwinojaa amwenee Mwana wa Matuunda."

8 Pilato panaa aleategela mpola ejo aleingelwa no wowa modugo. 9 Apenee ingela khanke kho nyoomba ya kewami, amowolya Yesu, kwenii khonaa apumagaa?

Ila Yesu aleakhamowela chechensi. 10 Gechoo Pilato amowolya, "Okhosiita khopaala nane? Mbi, okhamanya kete onene ntite olaala wakhokholekolela ao khokhowolaga, ne wa kokokowelela pamosalaba?"

11 Apenee Yesu amowelaa, "Anga mbe otokhola olaala owo, mbe Matuundaanga alekhe khokhopeela. Kho gechoo muntu yunaa aleandeta momekhono jakhoo amwenee atite mabe makolo khokela gensi."

12 Khwandelya epoo, Pilato aleapogaa njela ya khomolekolela Yesu, ila Vayahudi alevajoma no khopaala, "Mbe khomolekolela muntu oyo, ogwegwe amba nkha molaasi wa Kaisali, muntu yeyensi yunaa khwinojaa mwami khomositaa Kaisali!"

13 Pilato panaa aleategela mpola ejoo, amopumya Yesu panji, ikhala pa kegoda cha khotengemekhela, kenaa angile kepwale pa lwande yenaa angile yanogelelajwa ne mabwe, kho Kiebulania vakwetaa, "Gabata". 14 Ne ituungo eloo, angile kete saa sita ja lyonse, nsiko ya wiyandaleli kho nguno ya nsiko ya Pasakha. Pilato avawelaa Vayahudi, "Oyeepa Mwami wenyu!"

15 Ila evenee vajomaa, "Mowolage! Mowolage! Mokoweleli pamosalaba!"

Pilato avawolya "Mbi, mbokoweleli Mwami wenyu pamosalaba?"

Vapumya matambekho valaala vamoweela, "Osweswe khotokhola Mwami yoonge ila Kaisali topo."

16 Apenee Pilato aleavapelaa Yesu ili vamokowelele pamosalaba.

Apenee masinjala vamosola Yesu no khowookha nanoyo. 17 Yesu apuma panji okho akepolaga mosalaba gwakwe khogokenkha panaa angile pakhwetwa "Ibankha la Motwe" Vaebulania angile vakhweta "Goligota." 18 Panaa alevapikha epoo alevamokowelela Yesu palomwi ne vantu vaange vawele, yomwi lwande lwa molyelo no yoonge lwande lwa mokege, nanoyo Yesu angile alepakhate yawe.

19 Pilato alealagelelya maandekho gandekhwe no khotuungwa pachanya ya mosalaba. Maandekho egoo alegandekhwaga geeke, "Yesu wa kho Nazaleti Mwami wa Vayahudi." 20 Ne maandekho egoo angile gandekwa kho Kiebulania, Kilatini, ne Kiyunani, Vayahudi vinki alevasoma maandekho egoo, kho nguno pa lwande yenaa Yesu aleakowelelwa angile pepi ne ihala. 21 Apenee, vapumya matambekho valaala ne Vayahudi, vamoweela Pilato, "Okhaandeke, ‘Mwami wa Vayahudi’, ila wandeke muntu oyo aleapalaa, ‘Omwene a Mwami wa Vayahudi.’ "

22 Pilato avawelaa, "Kenaa alenandekha, avivyoo nandekhaga!"

23 Masinjala panaa alevamalya komokowelela Yesu pamosalaba, alevasola myenda jakwe, no khojegawan'ya maloondo ganee, kela sinjala alepata iloondo lemwi, avivyoo alevasola mwenda gwakwe gwa mokhate gonaa angile gosunilwe khwi ibande lemwi topo la ketambala khopuma pachanya mpakha panse. 24 Masinjala alevawelana, "Khokhaidemole, ila khowokowele ndiku ndikuka khowone ananuu yunaa khapata." Ele alelapumeela ili Maandekho ga Matuunda gadugame, ganaa gakhopaala,

"Alevigawelaa myenda jaane,

no mwenda gwaane gwa mokhate khopuma pachanya mpakha panse alevawokowela ndiku ndikukha."

Gechoo avyenee masinjala evoo alevanojaa.

25 Pepi no mosalaba wa Yesu, angile vimelelaga, nyinya no nyinya mokolo no Malia moliji wa Kileopa no Malia wa kho Magidala. 26 Yesu panaa aleamowona nyinya imelelaga pepi no mohemba oyoo yunaa angile amotogwile modugo, aleamowela nyinya, "Maye, seji oyoo amwenee a mwanaakho." 27 Khanke amowelaa mohemba oyoo, "Kunaa, seji oyoo amwenee nyokho." No khwandelya epoo mohemba oyoo aleamosola nyinya wa Yesu no khwikhala nanoyo khokhayakwe.

28 Yesu panaa aleawona molemo gwakwe gwasilaga, ili khoganoja Maandekho ga Matuunda gadugame apalaa, "Ntite nnyoota." 29 Ne epoo angile papwale ne ibakhuli lenaa angile lijwile divai yenaa angile yasasukhaga, apenee vadobya siponji mwi bakhuli la divai eyoo, vapagekha kho nkhome yenaa yekwetwa isopo, vanyanyola pachanya vamoketela momolomo. 30 Yesu panaa aleagemaa divai eyoo, apalaa, "Molemo gwaane gwasilaga."

Panaa alekhotankha mooyo, aleasunamya motwe afwaa.

31 Angile nsiko ya wiyandaleli wa nsiko ya Khosuupa, khanke kho nsiko eyoo angile nsiko ya wenga wa Pasakha, Vayahudi alevakhapoga mevimba isiige pachanya pa mesalaba kho Nsiko ya Khosuupa. Gechoo alevapeta khwa Pilato, vamoloomba ili alagelelye megolo ja vantu evoo iwunwe ili vafwe nyango, vanaa angile vakowelelwaga pamosalaba, apenee mevimba jawe jetelemolwe khopuma pamosalaba. 32 Apenee masinjala alevapeta vamowuna megolo ja muntu wa mwandyo, no wa owele, vanaa angile vakowelelagwa pampelo ya Yesu. 33 Ila panaa alevapikha khwa Yesu, alevamopikha afwagaa, gechoo alevakhamowuna megolo. 34 Ila sinjala yomwi aleamodola Yesu palowalu no mokhosa, apaponye chaji ne meje alevyandya khopuma 35 Omwene yunaa aleawona mpola eye, apalaga ganaa agawonaga ili mopate khogoomba. Mpola yenaa aleawona ya khapanga ne amanyile kete lenaa khovaweela a khapanga. 36 Mpola eyoo aleyapumela ili Maandekho ga Matuunda gadugame, ganaa gakhopaala, "Khotopo ninga ikupa lakwe lenaa lelawunwa." 37 Ne Maandekho ga Matuunda gaange gakhopaala, "Valamokuna muntu yunaa angile vamolasa."

38 Panaa egoo gensi alegakela, Yusufu muntu yunaa khopumela Alimataya, yunaa angile mohemba wa Yesu khwa khwiswekha swekha kho nguno ya khovatungumala Vayahudi, aleamolomba Pilato amogombele khogosola mowele gwa Yesu. Pilato amogombela khogowocha mowele ogoo. Gechoo Yusufu aleagowocha 39 Yusufu angile vilongolaja no Nikodemo. Nikodemo amwenee oyoo yunaa angile amopetela Yesu otikho, aleiija okho akepolagaa makhuta ganaa gasalinkhine ne makhuta ga mpia nyinki ganaa gakhwetwaa manemane no obani wa kilo makomi gatato. 40 Apenee vensi vawele alevagosola mowele gwa Yesu, alevamopakha makhuta ganaa gakhotukelela visoga, vaolyekha shanda njelo kete venaa aleipwale njaanga yawe ya Vayahudi ya khozyekha. 41 Lwande yenaa Yesu alevamokowelela pamosalaba, angile pepi no mogoonda gwa mapeke ga mizabibu, no kho mogoonda ogoo alepatite ikhabuli epyaa lenaa angile lekhale lezyekhe movimba yeyensi. 42 Gechoo, kho nguno angile nsiko ya wiyandeleli wa Nsiko ya Khosuupa, ne ikhabuli eloo angile lelepepi, vagotuula mowele gwa Yesu omoo.