1 Yesu panaa aleamanyaa kete Mafalisayo vategelaga kete khokongany'aa no khobatijaa vahemba vinki khokela Yohana. 2 Kho khapanga nkha Yesu yunaa angile khobatijaa, ila vahemba vakwe avenee vanaa angile vakhobatija. 3 Kho gechoo Yesu palomwi ne vahemba aleavawookha kho nse ya Yudea no khotuuwa kho nse ya Galilaya. 4 Kho mosingi gwakwe aleyamopogaa akelele kho nse ya Samalia.

5 Yesu apikhaa panaa pakwetwa Sikali, kho nse ya Samalia. Epoo angile pepi no mogoonda gonaa Yakhobo aleamopelaga mwanaakwe Yusufu. 6 Ne isima la Yakhobo angile lepwale epoo. Yesu angile akhatalaga kho nguno ya mosingi, gechoo aleibwetekhaa panse pampelo ne isima eloo. Ituungo eloo lyonse angile lapikhaga pakhate.

7 Apenee mokhiima yomwi wa khopuma Samalia aleiija khotapa meje. Yesu amowelaa, "Nkholoomba meje ng'weele." 8 Ituungo eloo vahemba vakwe alevapetaga khwi ihala khogula endya.

9 Mokhiima oyoo Mosamalia aleamowelaa, "Ogwegwe a Moyahudi, nane nde Mosamalia, kho kee khondoomba meje?" Aleapalaa gechoo, kho nguno Vayahudi alevakhasalenkanaga ne vantu va Samalia kho vento vyawe.

10 Yesu amowelaa, "Mbe angaomanye mfinga yenaa alakhopela Matuunda, no ananuu yunaa khokowelaa mpelee meje ng'weele, anga omoloombe nanoyo anga khakopelaa meje ganaa gakhokhonoja owee no opanga." 11 Mokhiima oyoo amowelaa, "Meyaa, ogwegwe otokhola igegele la khotapela meje khopuma mwisima, ne isima ele a itale. Olapata khwenii meje ganaa gatite opanga? 12 Mbi ogwegwe ole molaala khokela okoko wisu Yakhobo yunaa akhopelaga isima ele? Yakhobo mwenee palomwi ne vana vakwe ne metugo yakwe angile vakhong'weela meje ga isima ele."

13 Yesu amowelaa, "Yeyensi yunaa khong'welaa meje khopuma mwisima ele, alategelaa nyoota khanke. 14 Ila vensi vanaa valang'wela meje ganaa ndavapela onene, valalekha khotegeela nyoota khanke. Meje ganaa ndavapela onene, galaawa gakholyela mokhate mwawe, no khomopeela opanga wa nsiko jensi."

15 Mokhiima oyoo amowelaa Yesu, "Meyaa, nane mpelee meje egoo ng'weele, ili nkhiije ntegeele nyoota khanke no khwijaa epa khotapa meje khanke."

16 Yesu amowelaa, "Petaa omwete mogwisha wakhoo, wiije nanoyo epa."

17 Mokhiima oyoo amowelaa, "Onene ntokhola mogwisha." Yesu amowela, "Wapalaga avyenee kete ogwegwe otokhola mogwisha. 18 Kho nguno wawaga ne vagwisha vataano, no yunaa khwikhala nanoyo kho seji nkha mogwisha wakhoo. Kenaa wapalaga achenee cha khapanga."

19 Mokhiima oyoo amowelaa, "Meyaa, nkhowona kete ogwegwe ole mokuuni wa Matuunda. 20 Vakoko visu alevakhwikumbeka kho ketonda eke, ila onywenywe Vayahudi mokhopaala kete Yelusalemu akhwene vantu vakhopogiwa khopeta khomokumbekha Matuunda."

21 Yesu amowelaa, "Mokhiima, gombaa kenaa nkhopaala, ituungo lijile lenaa molakumbekha Daada, ila nkha pachanya ya ketonda eke, ninga okhoo Yelusalemu. 22 Onywenywe Vasamalia mokhamanya yunaa mokhomokhombekha, ila osweswe Vayahudi khomomanyile yunaa khokhomokhombekha, kho nguno opon'ye okhopuma kho Vayahudi. 23 Ituungo lijile, ne seji lapikhaga, panaa vantu vakhomokumbekha Daada khwa khapanga, valamokhombekha Daada khopuma kho meoyo jawe okho vakhovambela okhapanga. Kho nguno Daada khovapogaa vantu kete evoo vamokumbekhe. 24 Matuunda amwenee Moye, kho gechoo evoo vanaa vakhomokumbekha, vakhopogiwaa khomokumbekha khopuma kho meoyo jawe okho vakhovambelela okhapanga."

25 Mokhiima oyoo amowelaa, "Manyile kete Masiya ijile. Nanoyo amwenee Kilisto yunaa aleasagolwa no Matuunda, nanoyo panaa aliija alatowelaa vento vyensi."

26 Yesu amowelaa, "Onene yunaa khopalaa nagwe epa, amwenee oyoo."

27 Ituungo aleloo vahemba vakwe alevatuuwa, nanevo alevakhumya kho nguno alevamowona Yesu khopalaa ne mokhiima oyoo. Ila khotopo yunaa aleawolyaa, "Khopooga kee?" Ao, "Kho kee khopaala no mokhiima oyo?"

28 Apenee mokhiima oyoo angile ailekhaa ngeelo yakwe ya meje epoo, no khotuuwa khwi ihala, okhoo alevawelaa vantu, 29 "Khopetage momowone muntu yunaa aleambwela mpola jensi jenaa alenajenojaa. Mbi, oyo amba nkha amwenee Masiya?" 30 Gechoo vantu alevapuma khwi ihala, vapeta khomowona Yesu.

31 Ituungo aleloo vahemba vakwe alevakhomoweela Yesu, "Molaangi, khokholoomba olyee taali."

32 Ila Yesu avawelaa, "Onene ntite endya yenaa onywenywe mokhakemanya."

33 Apenee vahemba vakwe alevandya khwiwolya venee khwa venee, "Mbi, khole muntu yeyensi yunaa amoletelagaa endya?"

34 Yesu avawelaa, "Endya yaane a khonojaa egoo ganaa Matuunda khogatogwaa, no khomala molemo gwakwe gonaa aleantomaa. 35 Mbi, onywenywe mokhamokhopaala, ‘Ikhale miyeli jenee topo khokungule?’ Ila onene khovaweela kunagi vantu venaa vakhonijela, vale kete, velewaa venaa vyapikelaga khokongolwa. 36 Mokongoli kholepwaa, nanoyo khokongan'yaa velewaa, nanevo avenee vantu vanaa valapokela opanga wa nsiko jensi, gechoo movyali no mokongoli vakhosekelela palomwi. 37 Gechoo opaali wonaa okhopaala a wa khapanga, ‘Yomwii khovyala no yoonge khokongola.’ 38 Onene alenavatoma mokhongole velewaa venaa alemokhavyala wenee. Vantu vaange alevagatomamela melemo mekhamu, nanywi mokholepwa khopumana ne melemo jawe."

39 Vasamalia vinki kho ihala eloo alevamogoomba Yesu, kho nguno mokhiima oyoo angile avawelagaa, "Muntu oyoo ambwelagaa kela kento kenaa alenakenogajaa." 40 Gechoo evoo Vasamalia alevamopetela Yesu vamoloomba ikhale nanevo, nanoyo ikhalaa nanevo kho nsiko jewele.

41 Kho nsiko ejoo vantu vinki alevamogoomba Yesu kho nguno ya okhombe wakwe. 42 Apenee vamoweela mokhiima oyoo, "Seji khokogoomba, nkha kho nguno ya mpola yenaa alewakhowelaga topo, ila khwamotegelaga osweswe venee, seji khomanyile kete oyo amwenee Moponi wa liwelelo."

43 Panaa alejakela ejoo nsiko jewele, Yesu aleawokha Samalia apetaa kho nse ya Galilaya. 44 Yesu aleavawela patokhola khovasweekha, "Mokuuni wa Matuunda akhakhokoliwa kho nse yakwe mwenee." 45 Panaa aleapikhaa kho nse ya Galilaya, Vagalilaya vinki alevamopokeela, kho nguno alevagawona minki ganaa aleaganogajaa kho wenga owoo wa Pasakha, kho nguno nanevo alevapwale okhoo Yelusalumu ituungo la wenga owoo.

46 Yesu aleapeta khanke okhoo khwi ihala la Kana lenaa lepwale kho nse ya Galilaya, khonaa angile agalelolya meje khowa divai. Okhoo angile khole Mwami yunaa mwanaakwe angile molwile, nanoyo angile agonaga kho ihala la Kapelanaumu. 47 Mwami oyoo panaa aleategela kete Yesu aleapikhaga Galilaya. Gechoo aleamopetela Yesu no khomoloomba apete nanoyo Kapelanaumu ili apete amopon'ye mwanaakwe, yunaa angile alepepi afwee. 48 Yesu amowelaa mwami oyoo, "Mbe, onywenywe molalekha khowona lomekho ne matuntumu, khotopo mwiije mogoombe nsiko jensi."

49 Mwami oyoo amowelaa, "Meyaa, nkhokholoomba khopete nagwe panaa Mwanaane akhale afwee."

50 Yesu amowelaa, "Petagaa topo, mwanakhoo aponagaa."

Apenee Mwami oyoo aleagombaa mpola ja Yesu no khwandya khotuuwa khokhaye. 51 Panaa aleakhale alemonjela, alevitaanga ne vasi vakwe, nanevo vamoweela kete mwanaakwe aponagaa. 52 Mwami oyoo aleavawolya, Ituungo kee lenaa molomyana waane aleapona, "Nanevo vamoweela, anga igolo saa saba ja lyonse, apenee homa aleyamolekolaga." 53 Apenee Mwami oyoo aleakhombolaa kete ituungo eloo alenee Yesu aleamowelagaa, "Mwanakhoo aponaga." Gechoo omwenee palomwi ne vantu va khokhayaakwe alevamogoomba Yesu.

54 Eloo angile ituntumu la owele lenaa Yesu aleanogajaa panaa alekhopuma Yudea khopeta Galilaya.