1 Makingilima nsiko ya mwandyo wa juma, panaa lyonse alelekhale ledole, Malia wa khupuma Magidala aleapikha kho khabuli, awonaa ibwee lawokhajwa pa molyango. 2 Apenee, aleakembela lowelo mpakha khwa Simoni Petelo no khwa mohemba oyoo yunaa angile atogwilwe no Yesu, avawelaa, "Vawokhaja mowele gwa Mwene mokhabuli, ninga khokhamanya khonaa vamotulaga."

3 Gechoo Petelo no mohemba oyoo yoonge alevapuma vapeta kho khabuli eloo. 4 Vensi vawele angile vakhokembela ila mohemba oyoo yoonge aleatite lowelo khokela Petelo, omwene amwenee awaa wa mwandyo khopikha khokhabuli. 5 Aleasunama khosonokeela mokhate, aleawonaa shanda topo mokhate ya ikhabuli, ila angile akhaingela mokhate. 6 Apenee Simoni Petelo aleapikha kho khabuli no khwingela mokhate, nanoyo aleajipikha shanda topo, 7 ne echoo ketambala kenaa aleapilingagwa Yesu khwi itwe. Angile kekhatulwa palomwi ne shanda, ila angile chapilingagwa no khotulwa keleemwi. 8 Apenee no mohemba oyoo yoonge yunaa alealongola khopikha avivyo nanoyo aleingela mokhabuli, iwonela no khogoomba. 9 Kho nguno vahemba angile vakhale vatembole ga Maandekho ga Matuunda kete venaa gakhopaala, Yesu angile khopogiwa khofufokha. 10 Apenee vahemba evoo alevatuuwa khomakhayawe.

11 Ila Malia akasiiga imelelaga panji yikhabuli okho khokotaa. Panaa angile akhale khokotaa, aleasunamaa no khosonekela mokhabuli, 12 avawonaa vatomami va pachanya va Matuunda vawele vanaa valyalile myenda myelo, vikhalaga lwande yenaa mowele gwa Yesu angile wagonaga, yomwi angile ikhile khonaa itwe angile lepwale no yoonge angile ikhile khonaa megolo alejepwale. 13 Vatomami va pachanya pa Matuunda alevamowolya Malia, "Maye, kho kee khokoota?" Malia avawelaa, "Vawokhaja mowele gwa Mwene yaane, ninga nkhamanya khonaa vagotulaga." 14 Panaa aleapala gechoo, aleagalokha khonyoma no khomowona Yesu imelelaga epoo. Ila aleakhamotembola kete oyoo angile amwenee Yesu. 15 Yesu amowolya, "Maye, kho kee khokoota? Khomopooga ananuu?" Malia, aleasiima kete oyoo angile mwangaleli wa mogoonda gwa mapeke, gechoo amowelaa, "Meyaa, mbe wagokenkhaga mowele gwakwe lwande yeyensi, mbwelee khonaa wagotulaga, nane ampete khogosola." 16 Yesu eetaa, apalaa, "Malia!"

Malia agalokha, amowelaa kho Kiebulania, "Laboni!" Emaana yakwe, "Molaangi".

17 Yesu amowelaa, "Okhambambe, nkhale khopeta khochanya khwa Daada." Ila petaa kho vadogwaane ovawele, "Onene nkhopapamokha khopeta khochanya khwa Daada yaane, yunaa ninga nanyu a Daada yenyu, Matuunda waane yunaa Matuunda wenyu." 18 Apenee Malia wa kho Magidala aleapetaa vahemba ne avaweela, "Namowonaga Mwene." Khanke aleavasonsomolela egoo ganaa Yesu aleamoweela.

19 Panaa aleyapikha mesee ya nsiko eyoo ya mwandyo ya ijuma, vahemba angile vapwale mokhate ya nyoomba, nanevo angile vadendaga melyango kho nguno ya khovatungumala valaala va Vayahudi. Yesu aleavapumelaa no khovaweela, "Wikhalo mosoga owee palomwi nanyu." 20 Yesu panaa aleamalya khopaala gechoo, aleavalageela mekhono jakwe no lowalu lwakwe. Vahemba vakwe panaa alevamowona Mwene, alevasekelela modugo. 21 Yesu avawelaa khanke, "Wikhalo mosoga owee palomwi nanyu. Kete venaa Daada aleantoma onene, nane nkhovatoma onywenywe." 22 Nanoyo panaa aleamalya khopaala gechoo, aleavaputelelya mwayo, avawelaa, "Pokelagi Moye wa Matuunda. 23 Mbe molamosamehi muntu yeyensi mabe gegensi, Matuunda nanoyo alamosamehi muntu oyoo mabe gakwe gensi. Mbe molalekha khomosamehi muntu yeyensi mabe, muntu khotopo asamehewi."

24 Tomasi yunaa alekhwetwa ipasa angile yomwi wa vahemba ikomi ne vawele va Yesu, ila angile atapoya palomwi ne vahemba vayakwe panaa Yesu aleavapumela. 25 Gechoo vahemba evoo vayakwe vamoweela, "Khwamowonaga Mwene." Ila Tomasi avawelaa, "Mbe ndeke khowona mo mekhono jakwe mavamba ga mesumali no khoketela lojala lwaane kho momavamba egoo no khotuula mokhono gwane molowalu lwakwe, khapanga, khotopo ngoombe."

26 Panaa nsiko monane alejakela, vahemba vakwe angile viitaanga khanke palomwi kho nyoomba, nanoyo Tomasi angile apwale palomwi nanevo. Ninga venaa melyango angile idendilwe, Yesu aleapumela no khwimelela pakhate yawe, avawelaa, "Wikhalo mosoga owee palomwi nanyu." 27 Apenee amowelaa Tomasi, "Ijo otoole lojala lwakhoo epa mekhono jaane, apenee ovambe ne mekhono jakhoo pa lowalu lwaane. Lekha wowa, ila gombagaa." 28 Tomasi amowelaa, "Mwene waane no Matuunda waane."

29 Yesu amowolya, "Mbi, khogoomba kho nguno wambonaga? Vanogelajwa masoga evoo vanaa vakhambona, ila vangombaga."

30 Yesu aleanojaa lomekho jiinge nyinki jenaa vahemba vakwe alevajewona, jenaa angile jekhandekhwa kho ketabu eke. 31 Ila lomekho jenaa jepwale mo ketabu eke, jandekhagwa ili mokhowole khogoomba kete Yesu amwenee Kilisto, Mwana wa Matuunda, no khwa khomogoomba mowee no opanga wa nsiko jensi.