Milagres de Jesus

Jesuh nih Bethsaida ah Mitkhang Pa A Damter

22 Cun Bethsaida khua an ban. Mitkhang pa pakhat cu a sinah an tianpit ih tham dingah Jesuh cu an hler. 23 Cun Jesuh nih mitkhang pa cu a kut in a tlai ih khaw lengah a ṭhi ta. Cule a mit ah cihrit a khak ih a tlunah a kut a suang. Cun Jesuh nih a sinah, "Zangtu tal hmu thiam cim?" tiah a sut.

24 Mitkhang pa cu tlun la a zoh ih, "Minung pawl ka hmu thei, asinain thingkuang feh deido mang an i," tiah a ti.

25 Cun Jesuh nih a mit cu a tham sak sal ih a mit cu a hrak. A mit cu a damsal ih zang hmahhmah fiangten a hmu thei. 26 Cule Jesuh nih, "Khaw sungah lut vai hlah," tiah thu a pe ih inn ah a tlung ter.

Jesuh nih Naset Ṭonthiamlo A Damter

31 Cun Jesuh cu Tai-ar peng a ramta ih Sidon peng pal pah pit in Dekhapolis ram Galilee Tili ah a feh. 32 Cun naset le fiangngai ih ṭonthiamlo pa pakhat cu Jesuh sinah an tianpit. Cule cuvai pa ih tlunah a kut suang dingin Jesuh cu an hler. 33 Cun Jesuh nih cuvai pa cu mipi pawl lak in hmun dang deuh ah a ṭhita ih, cuvai pa ih naa sungah a zung in a von tok, a cihrit a kha, cule a lei a tham sak. 34 Cun van la zoh in a thawpi a suah ih, "Ephphatha!" tiah a ti. A sullam cu, "Hong fa seh!" tihnak a i.

35 Cun cuvai pa ih naa cu a theng ih a lei talh dawntu cu a poih, cule fiangngai in a ṭon suak thei. 36 Cun Jesuh nih mipi pawl cu hukhaw sim lo dingin thu a pe. Asinain a kham hnei tam deuhdeuh le tam sinsin in an sim. 37 Cun mipi pawl cu an khuaruah a har ngai ih, "Thil zangkim hi ṭha tuk in a tuah. Naset pawl cu an naa a theng ter ih ṭonthiamlo pawl khaw a ṭon ter," tiah an ti.

Jesuh nih Mitkhang Bartimias A Damter

46 Cun Jesuh le a dungthluntu pawl cu Jerikho khua an ban; cule a dungthluntu pawl le mipi tamngai thawn Jerikho in an pawh zawngah, Timias ih fapa Bartimias, mitkhang kutdawh, cu lampi kap ah a to. 47 Cule Nazareth mi Jesuh a si tih a theih tikah, a hek ih, "Jesuh, David Fapa, ka cungah thinfahnak nei hram!" tiah a ti.

48 Cule mi tamngai nih an tai ih, daiten um an forh. Asinain a hek hlehhlo ih, "David Fapa, ka cungah thinfahnak nei hram," tiah a ti.

49 Cun Jesuh cu a cawlhnga ih, "Ko uh," tiah a ti.

Cule mitkhang pa cu an ko ih, a sinah, "Thin thlangamten um, hang tho, Jesuh nih ta ko," tiah an ti.

50 Cule a hnipuan cu a hlon ta ih, Jesuh sinah cun a pet vervo.

51 Cule Jesuh nih a let ih, a sinah, "Na hrangah zangtu ta tuahsak na duh?" tiah a sut.

Cule mitkhang pa nih a sinah, "Rabbi, khua hmu thei sal ningla ka duh," tiah a ti.

52 Cule Jesuh nih a sinah, "Feh, na zupnak nih ta damter cem," tiah a ti.

Cule hmakhatte ah khua a hmu thei sal ih Jesuh cu zalam ah a thlun.

30 Simon nupi ih nu cu khurhfah in a fak ih a it; Jesuh a tian cang in cuvai thu cu an sim lohli. 31 Jesuh cu a sin a va feh ih a kut in a han tho. A khurhfahnak cu a dam ih a tuamhlawm hnei.

Jesuh nih Miphar Pakhat A Damter

40 Miphar pa pakhat cu Jesuh sin a feh ih, khuk bil in bopnak a hler ih, "na duh ah cu, ka na thiangter thei,"* tiah a ti.

41 Jesuh nih a thinfak* ih a kut dawh pit in a tham. Cule a sinah, "Ta ka thianter ka duh, thiang i," tiah a ti. 42 Hmakhatte ah a pharfah a dam ih a thiang.

3 Minung pali nih taksaze pa cu an zawn fa ih Jesuh sinah an tian pit. 4 Mi an tam tuk ih Jesuh ih hram an tian pit thei lo ruangah Jesuh umnak zawn inn tlun khuh cu an bal; an bauh colh ih taksaze pa cu a tangthah thawn an ron ṭhum. 5 Jesuh nih an zupnak a hmuh tikah, taksaze pa sinah, "Ka fapa, na sual pawl cu ngaihthiam na i cem," tiah a ti.

6 Cun cuvai hmun ih a to ve mi daanthiam hrekkhat pawl nih an thinlung te in, 7 "Zangruangah hivai pa cu aitin a ṭon? Pathian thangsiat a i. Pathian hrel lo hutu nih sual pawl a ngaihthiam thei?" tiah an ti.

8 Jesuh nih an thinlung te in himang thu an ruah cu hmakhatte ah a thlarau nih a fiah ih an sinah, "Zangruangah nan thinlung te in himang thu cu nan ruat? 9 ‘Na sual pawl cu ngaihthiam na i cem,’ tih maw, ‘Hang tho la na tangthah la pitin feh,’ tih, khoitu sawn hi hivai taksaze pa sinah sip bai sawn? 10 Asinain Minung Fapa nih leitlun ah sual pawl ngaihthiam theinak thuneihnak a nei tih nan fiahnak dingah hihi tuah a i," tiah a sim. Taksaze pa sinah, 11 "Na sinah ta sim, hang tho, na tangthah la piʼn na inn ah ṭin," tiah a ti.

12 Cun taksaze pa cu a hang tho ih hmakhatte ah a tangthah la pitin an zate hmuhhngan ah a feh. Curuangah an zatein an mangbang tuk ih, "Aimang thil cu kan hmu kel lo," tiah an ti ih Pathian an thangṭhat.

Kutze Pa

1 Cun Jesuh cu Sinakok ah a lut sal ih, cuva ah kutze pa pakhat a um. 2 Mi hrekkhat nih Jesuh cu sual an puh theinak dingah, Sabbath ni ah cupa cu a damter thok maw damter thok lo tiah ṭhangai in an zoh. 3 Jesuh nih cuvai kutze pa cu, "Hang ding la, hmai ah va suak hnik," tiah thu a pe. 4 Cun Jesuh nih an sinah, "Daan nih Sabbath ni ah thil ṭha tuah maw, thil ṭha lo tuah hi a kham? Mi nunnak run maw, thah hi a kham?" tiah a sut hnei.

Asinain an dai ṭhipṭhep. 5 Cun Jesuh nih thinsia in a zoh hnei vivo ih an thinlung a ruh tuk ruangah a riah a se ngai. Cun cuvai kutze pa cu, "Na ban cu pharh," tiah a ti.

25 Cuvai hmun ah kum hleinih sung thi-dok fahnak ih a faktu numi pakhat a um. 26 A neihmi hmahhmah ne kau in sibawi tamngai sinah a tuamhlawm fa cem naʼn dam hoi loʼn a bese deuhdeuh. 27 Cuvai nu cu Jesuh ih thuhla a thei ih mipi pawl lakin Jesuh cu a dung laʼn a thlun, cule Jesuh ih puan cu a tham. 28 Zangahtihle, "A puan tal ka tham ngah ahcun ka dam kau thok," tiah a ti.

29 Hmakhatte ah a thi dokmi cu a dam ih a fahnak in damter a i cem tih khaw a taksa nih a fiah.

22 Cun sinakok uktu pawl lakih pakhat, a hmin ah Jairas tihmi pa a tiangih Jesuh a hmuh tikah a ke hram ah a bok ih, 23 thungai thlakin thinfak a dil, "Ka fanu te a thi i ngaingai thok. A dam ih a nun theinak dingah kan sinah tiangin ka fanu ih tlun ah na kut suang hram," tiah a ti.

24 Cun Jesuh cu cuvai pa thawn an feh. Mipi tamngai nih an thlun ih Jesuh cu an pah pah deido.

38 Sinakok uktu pa ih inn an va bat tikah, mipi pawl ṭap le aihram in an buai deido cu a va hmu hnei. 39 Cun inn songah a lut ih an sinah, "Zangruangah ṭap le aihram in nan buai deido? Hi nappang nute hi a thi lo pi — a ihhmul mi a i!" tiah a ti hnei.

40 Cun mipi pawl nih Jesuh cu an hnihsan. Cun Jesuh nih an zaten lengah a suak ter hnei colh. Nappang nu ih nu le pa le a ṭhit tak hneimi pawl thawn nappang nu ih umnak ah cun an lut. 41 Cun a kut in nappang nu cu a tlai ih, "Talitha, koum!" tiah a ti. A sullam cu "Nute, hang tho ta ti!" tinak a i.

42 Hmakhatte ah nappang nu a hang tho lohli ih a feh. (Zangahtihle cuvai nu cu kum hleinih mi a i.) Cucu an mang a bang taktak.

37 Cun zil fak ngai in a zuang ciamco ih tisuar nih lawng cu a siatsuah ruangah lawng cu ti in a khat. 38 Jesuh cu lawng mei laah a um ih tokheng tlun ah a ihhmul. Cun an ṭhang ih, "Sayapa, kan riaral colh thok hi poi na ti lo maw?" tiah an ti.

39 Jesuh cu a hang tho ih zil cu a tai, cule tisuar sinah, "Dai i! Um zirziar!" tiah thu a pe. Cun zil cu a zuang i lo ih a dai ṭhipṭhep. 40 Jesuh nih a dungthluntu pawl sinah, "Zangruangah aitluk lawmlam in nan ṭih? Zupnak nan nei rih lo maw?" tiah a ti hnei.

41 Cun an ṭih tuk lawmlam ih pakhat le pakhat, "Hi pa hi zangtumang minung zetzo a i si na, zil le tisuar hman nih a thu an ngai?" tiah an ti fa.

35 Cun ni a sim i tikah, a dungthluntu pawl cu Jesuh sinah an feh ih, "Hi hmun hi ram ṭhing a i, ni le a sim ngai i cem. 36 Mipi pawl hi, kiangkap ih lo le khua pawl ah thlah hnei la, ei ding thil zangtumaw tal leih fa seu," tiah an ti.

37 Asinain Jesuh nih, "Ei ding cu nan nih pe uh," tiah a sawn hnei.

Cun an ni nih, "Ngun tangka* 200 man in caw lei pit in mipi pawl hi kan pe thok maw?" tiah an sut.

38 Cule ani nih an sinah, "Sang hlawm khawzat nan nei? Feh uhla zoh uh," tiah a ti hnei.

Cun an va zoh ih, "Sang hlawm nga le nga panih," tiah an ti.

39 Cule a dungthluntu pawl sinah, mipi pawl cu ta hring tlun ah a bur a bur in to ter dingah, thu a pe hnei. 40 Curuangah mipi pawl cu zakhat bur, sawmnga bur tin an to. 41 Cun sang hlawm nga le nga panih cu a la ih, van la zoh in lungawithu a sim. Cule sang cu a seu ih mipi pawl zem dingah a dungthluntu pawl sinah a pe. Cun nga panih khaw cu an zate sinah a zem. 42 Cule an zaten an ei ih an khop ngai. 43 An hlahmi nga le sang nepnawi pawl cu a dungthluntu pawl nih an sar ih khoto hleinih a khat in an sar. 44 Cuvai sang eitu pawl cu pami hlang ah 5,000 an i.

48 Zil cu anma la ah a zuan ruangah, a dungthluntu pawl cu harsa ngaiin lawng an to cu a hmu hnei. Curuangah zingmaw khawvang hlan hrawngah tili tlunin an sinah a feh. An sin a tian tikah lattak* hnei a tum. 49 Cun ti tlunih a feh cu an hmuh tikah, muthla ah an tih ih an hek ciamco. 50 Zangahtihle an zaten an hmu ih an ṭih tuk.

Asinain hmakhatte ah Jesuh nih an sinah, "Thinphang hlah uh, kei ka si, ṭih hlah uh," tiah a ti hnei. 51 Cun a dungthluntu pawl sin lawng sungah a lut ih zil cu a dai. Cun dungthluntu pawl cu an mang a bang ngai.

Jesuh nih Mi 4,000 Caw A Dar

1 Cuvai can ah, minung tamngai cu an hmuakkhawm fa seisei ih ei ding zangkhaw an neih lo tikah, Jesuh nih a dungthluntu pawl cu a ko hnei ih an sinah, 2 "Mipi pawl hi ka thinfak hnei tuk, zangahtihle ka sinah an umnak ni thum lai a rei i cem ih ei ding zangkhaw an nei lo. 3 Zangkhaw ei lo in ka tlun ter hnei asihle, lam lakah an caw ṭam in an ba colh thok. Zangahtihle mi hrekkhat cu lam hlapi in a tiangmi an i," tiah a ti hnei.

4 Cun a dungthluntu pawl nih, "Aimang ramṭhing lakah hutu nih minung hi zat hrangah caw a hrawl thei thok?" tiah an sawn.

5 Jesuh nih an sinah, "Sang hlawm khawzat nan nei?" tiah a sut hnei.

Cule an ni nih, "Hlawm sarih," tiah an ti.

6 Cun Jesuh nih mipi pawl cu leilung ah to dingin thu a pe hnei. Cule sang hlawm sarih cu a la ih lungawithu a sip hnukah, a seu ih mipi pawl zem dingah a dungthluntu pawl sinah a pe. Cule an ni nih mipi pawl cu an zem. 7 Nga fate te khaw temte an nei. Lungawithu a sip hnukah mipi pawl zem thotho dingin thu a pe hnei. 8 Cun mipi pawl cu an ei ih an khop ngai. Cule an hlahmi nepnawi pawl cu an sar sal ih kho sarih khat an sar. 9 Cun a eitu mipi pawl cu 4,000 hrawng an i. Jesuh cu mipi pawl a tlunter hnei.

Jesuh nih Thei Kuang A Camsiat

12 Cun a zingthlala ah, Bethani khua in an kirhsal tikah, Jesuh cu a caw a ṭam. 13 Cule lamhla nawnah a hnah a nim ngaimi thei kuang pakhat a hmu ih a thei ka hmuh pangah tiah thei kuang la cu a feh. Thei kuang umnak a bat tikah, a hnah hrello zangkhaw a hmu lo; zangahtihle thei a thei can a i lo. 14 Cutikah Jesuh nih thei kuang cu, "A kumkhua in hutukhaw nih na thei ei i nawn hlah seu," tiah a ti.

Cule a dungthluntu pawl nih a ṭonmi cu an thei.

Thei Kuang sin in Zirnak

20 Cun a zingthlala zalam ih an feh laiah, a tawhram in a rocar mi thei kuang cu an hmu. 21 Cun Peter cu a cing sal ih Jesuh sinah, "Rabbi, Zohhnik aw! Na camsiatmi thei kuang cu a rocar colh," tiah a ti.

22 Cule Jesuh nih a let ih an sinah, "Pathian zum uh. 23 ✝Thutak in nan ta sim, hutukhaw a thinlung sungah rinhelhnak nei lo in a sipmi mangin a cang tengteng thok tiah a zup ahcun, hivai tlang hi, thawnfa pit in tipi thuanthum sungah ṭil, tiah a titu cu a ṭon mangin tuahsak a i thok. 24 Curuangah nan ta sim, thlacamnak thawn nan hlerhmi hmahhmah hi kan ngah cem tiah zum uh la, cule nan ta a si thok. 25 ✝Cun thla cam dingih nan din tikah, Van ih a um mi nan Pa nih nan sualnak pawl nan ta ngaihthiam theinak dingah, mi pakhat khat cungah lungkim lonak nan neih asihle ngaihthiam uh," tiah a ti hnei.

23 Cuvai can ah thlarau sia ih molhmi pa pakhat cu Sinakok sung ah a tiang ih, 24 "Nazareth mi Jesuh, zangtu ah kan na ṭul? Kan na siatsuah dingah maw na tiang? Hu na si tih ta fiah — nang cu Pathian ih mi Thianghlim Pakhat na si," tiah a hek.

25 Cun Jesuh nih cupa cu, "Daite in um, cupa ih sung in suak!" tiah a tai.

26 Thlarau sia nih cupa cu thangai in a caihter ih thangngai a heh hnuk ah, cupa ih sung in a suak.

Jesuh nih Thlarau Sia ih Molhmi Pa A Damter

1 Cun Jesuh le a dungthluntu pawl cu Galilee tili khatla ral ih Gerasene ram an va ban. 2 Cun Jesuh cu lawng sung in a ṭum ih, thlarau sia ih molhmi pa pakhat cu thlan sung in suak pit in Jesuh sinah a tiang lohli. 3 Cuvai pa cu thlan lakih ummi a i. Hutu khaw nih thirhri hman in an khih thei lomi pa a si. 4 Ke khihnak hri le thirhri pawl thawn hma tamngai an khit na in cuvai hri pawl cu a catter hnei colh ih hutu khaw cuvai pa neh thei dingin an tha a ṭha lo. 5 Sun zan in thlan lak le tlang lakah a hek ih ama le ma khaw lung thawn a at fa.

6 Cun lam hla in Jesuh a hei hmuh tikah, a va zuang ih Jesuh ih hmai ah cun a khuk a bil. 7 Cun a aw neih patawp in a hek ih, "Cungnungbik Pathian ih Fapa, Jesuh! Nang le kei cu zangtu kan pehtlai fa? Pathian hmin in ta ka dil, ka hrem hram hlah!" tiah a ti. 8 (Zangahtihle Jesuh nih a sinah, "Nang thlarau sia, hi pa ih sung in suak!" tiah a tih takdah ruangah a si.)

9 Cun Jesuh nih, "Na hmin hu a si?" tiah a sut.

Cuvai pa nih, "Ka hmin cu ‘Burpi’ a si — zangahtihle kan tam setak!" tiah a sawn. 10 Cun cuvai pa nih thlarau thianglo pawl cuvai ram in dawi hnei colh lo dingah Jesuh cu thungai thlak in a dil.

11 Culaifangah cuvai kiangkap tlanghmual hrial ah vok rual tamngai an tlang deido. 12 Cun thlarau thianglo pawl nih Jesuh sinah, "Vok rual sinah kan hei thlah, an sungah kan lut ter," tiah an hler. 13 An hlerh mangin Jesuh nih a sian hnei. Thlarau thianglo pawl cu cuvai pa ih sungin an suak ih vok rual sungah an lut. Cun vok rual pawl — an zatein 2,000 hrawng — cu kak lakah an dawp ih tili sungah ṭil pit in an thi.

14 Vok kiltu pawl cu an va zuang ih, cuvai thuhla cu khawpi sung le ram sungah an than ciamco. Cun mipi pawl cu thil cangmi zoh dingah an va feh.

11 Asinain nan nih cu, ‘Mi pakhat khat nih a nu le a pa hrangah thil ṭha pakhat khat nei na kau in "Korban a tih" a sih ahcun (Korban tihmi cu Pathian sinih pekhlanmi tinak a i), 12 cuvai pa cu a nu le pa zohkhentu sihnak in a luat,’ tiah nan ti. 13 Nan zirhsinmi nan dun le daan hmangin, Pathian ih thu cu zanghmanlo ah nan tuah. Cule cuvai mang thil tamngai khaw nan tuah," tiah a ti.

Minung Hnawm Tertu Thil pawl

14 Cun Jesuh nih mipi pawl cu a ko hnei sal ih an sinah, "Nan zaten ka ngai uhla cing uh. 15 Lengla in sungla ih a lutmi thil pawl nih minung hi a hnawmter lo; Asinain sungla in a suakmi thil pawl nih a hnawmter sawn," tiah a ti hnei.

Nucang Nu ih Zupnak

24 Cun Jesuh cu cuvai hmun in a pok ih, Tai-ar khuapi hram la ah a feh. Cule inn pakhat sungah a lut ih hutukhaw ih an fiah ding a duh lo, asinain a thupfa thei cuang lo. 25 Zangahtihle a fanu khawsia ih luhhnawh mi ih nu, nucang pakhat nih Jesuh a um tih a fiah ih a sinah a feh, cule hmakhatte ah a ke hram ah a bok. 26 Nucang nu cu Zentail mi Fonisia rammi a i. Cuvai nu nih a fanu sungih khawsia dawisuak dingah Jesuh cu a hler. 27 Jesuh nih a sinah, "Fale nih khop ngai in ei hmasak seu. Zangahtihle fale ih caw laksak pit in uico pek cu a ṭha thok lo," tiah a ti.

28 Asinain cuvai nucang nu nih, "A i hrim, Bawipa, fale ih caw tlawktlau cu cabuai tangih uico pawl nih ei ve kau hmah uh ee," tiah a sawn.

29 Cun Jesuh nih cuvai nu sinah, "Hivai na ṭonkam ruangah, na feh thei i, na fanu sung in khawsia cu a suak cem," tiah a ti.

30 Cun cuvai nu cu inn a bat tikah, a fanu cu ihkhun tlunah it in a hmu. Khawsia cu a suak cem taktak.

17 Cule mipi lakin mi pakhat nih a sawn ih, "Sayapa, nan sinah ka fapa ka tian pit, zangahtihle thlarau sia nih ṭon thiam lo in a tuah. 18 Thlarau sia nih a molh cangcang in leilung ah a hlon fa, a ka in rabuan a suak, a ha a rial ih a ṭhong colh. Cule na dungthluntu pawl sinah, thlarau sia dawisuak dingin ka sim hnei naʼn, an dawisuak thei lo," tiah a ti.

19 Cule Jesuh nih a sawn ih an sinah, "Aw zupnak nei lo a tun san minung pawl, nan sinah khawtik tiang ka um rih thok? Nan tlunah khawtik tiang ka thinsau thok? Cuvai pa cu ka sinah tianpit uh," tiah a ti. 20 Cule cuvai pa cu Jesuh sinah an feh pit.

Thlarau sia nih Jesuh a hmuh cangka in nappang pa cu a caih ter ih leilung ah a ngal, a tawng fa ih a ka in rabuan a suak. 21 Cule Jesuh nih, "Hitin a sihnak hi rei cem im?" tiah a pa cu a sut.

Cule a pa nih, "A nappan lai in a si cem. 22 Vei tamngai cu thlarau sia nih that dingin meisa sung le ti sungah a hlon. Na tuah theimi a sih ahcun kan thinfah la kan bawm hram," tiah a ti.

23 Jesuh nih a sinah, "Na tuah theimi a sih ahcun, tiah na ti. A zumtu hrang ahcun zang hmahhmah hi a cang thei colh," tiah a ti.

24 Hmakhatte ah nappang pa ih pa cu a hek ih, "Ka zum, ka zuplonak ka bawm hram," tiah a ti.

25 Jesuh nih mipi pawl hmuakkhawm fa cu a hmuh hnei tikah, thlarau sia cu a tai ih, a sinah, "Naset le ṭon thiam lo nang thlarau sia, hivai nappang pa sungin suak la lut sal i hlah, tiah thu ta pe," tiah a ti.

26 Cule thlarau sia cu a hek ih nappang pa cu a caih ter hnukah a sungin a suak. Nappang pa cu mithi mangin a um ih, mi tamngai nih, "Nappang pa a thi," tiah an ti. 27 Asinain Jesuh nih a kut in nappang pa cu a la ih a han tho, cule a hang ding.