1 Cun Paul nih, "U le nau, nu le pa pawl, atun nan sinih ka humfaknak thu ka sipmi hi ngai hnik uh," tiah a ti.

2 An sinah Hebru ṭon in thu a sip an theih tikah an dai ṭhipṭhep.

Cule Paul nih: 3 ✝"Kei cu Silisia peng Tarsas khawpi ih suak Judah mi ka i. Asinain Jerusalem khawpi ah ka ṭhanglian ih Gamaliel ih zirhmi ka i. Kan pupa pawl ih daan cu famkim ngai ih zirhmi ka i. Nihin ni ah hivai hmun ih a tiangmi nan mangin Pathian sinah pum petu ka i tadah ve. 4 ✝Bawipa ih zalam thluntu pawl cu thi tiangin ka hrem hnei. Numi tilo, pami tilo in ka tlai hnei ih thawng ka thla hnei. 5 Cun Puithiam Lubik le Khonsil upa pawl cu cuvai thu ah ka na fiahpittu an i. Damaskas khawpi ih unau pawl sin pek ding ca cu cuvai upa pawl sinah ka la. Cule Bawipa ih zalam thluntu pawl cu tlai hnei ding le Jerusalem khawpi ah ṭhi hnei pit in cawhkuan pe hnei dingah Damaskas khawpi ah cu ka feh.

6 "Cule hitih in a i, sun lai hrawng Damaskas khua ka tian sam fangah, veikhatte ah vancung in a tle ngaimi tleunak nih ka kimvel cu a ron tlet. 7 Leilung ah ka ok ih aw pakhat nih, ‘Saul, Saul! zangruangah ka na hrem?’ tiah ka na tih cu ka thei. 8 ‘Hutu na si, Bawipa?’ tiah ka sut ih ani nih, ‘Na hrem ngelngo mi Nazareth mi Jesuh ka si,’ tiah ka na let. 9 Ka rualpi pawl nih meisa tle cu an hmu nain ka na biatu ih aw cu an thei lo. 10 Cun kei nih, ‘Bawipa, zangtu ka tuah thok?’ tiah ka sut. Cule Bawipa nih, ‘Hang tho la Damaskas khawpi ah feh. Cuva ah na tuah dingih ka ruah cia mi thil hmahhmah ta sim eng thok,’ tiah ka na ti. 11 Cule cuvai meisa cu a tle tuk lawmlam ih khua ka hmu thei lo. Cun ka rualpi pawl nih ka kut in ka na sualta ih Damaskas khawpi sungah ka na fehpit.

12 "Cun cuva ah Ananias an tihmi pa cu ka sinah a tiang. Ani cu daan mangin Pathian ngaihsakmi le cuvai khua ih Judah mi pawl hmahhmah ih upatmi a i. 13 Ananias cu ka hramah a ding ih ka sinah, ‘Unaupa Saul, khua hmu sal,’ tiah ka na ti. Cuvai can rori ah khua ka hmu sal ih ama cu ka han zoh. 14 Cule ani nih, ‘Kan pupa pawl ih Pathian nih ama ih duhnak fiahtu dingah le Mi Dingfel Pa hmu dingah le a kaa ih a aw thei dingah ta hril cem. 15 Zangahtihle nang cu mi hmahhmah sinah na hmuhmi hmahhmah le na theihmi hmahhmah fiahpittu na i thok. 16 Atun ah zangtu na hngah ngelngo? Hang tho la Bawipa ih hmin ko pah in baptisma co la na sual pawl thiangter,’ tiah ka na ti.

17 "Cule hitih in a si, Jerusalem ih ka kirhsal hnukah, Biakinn sungih thla ka cam lai ah langnak ka hmu ih, 18 cuvai latnak ah Bawipa cu ka hmu. Bawipa nih, ‘Hriam vengvo, Jerusalem in suak lohli, zangahtihle hivai khawmi pawl nih ka thuhla na phuanmi an pom thok lo,’ tiah ka na ti. 19 Cun kei nih, ‘Bawipa, sinakok ah ka feh ih ta zumtu pawl thawng ka thlak hnei leh ka thawi hnei cu anma rori nih an fiah. 20 ✝Cule na thufiahpittu Stefen ih thisen an suah lai ah, kei khaw an hramte ah ka ding. An thah cu ka lung a kim ih, a thattu pawl ih hnipuan ka kilsak hnei,’ tiah ka ti. 21 Cun Bawipa nih ka sinah, ‘Feh kau, zangahtihle lam hlatpi ih Zentail pawl sinah ta ka thlah thok,’ tiah ka na ti," tiah Paul nih a sim.

22 Cuvai thu a sip tiang cu mipi pawl nih an ngai. Cule an aw neih patawp an suah ih, "Cuvai pa cu leilung in hlon uh, zangahtihle nung tlak a i lo!" tiah an hek. 23 Cun hek pah in an hnipuan an hlon ih zil lakah leivut cu an theh ciamco. 24 Rom ralbawipi nih Paul cu ṭankulh sungih fehpit dingin thu a pe. Mipi pawl nih zangruangah hitih mangin an heh tih fiah dingah fung thawn thawi dingin le thu sut dingin a forh hnei. 25 Cun fung thawn thawi dingin saphaw hri thawn an khih laiah, cuva ih a dingmi ralbawi pa cu Paul nih, "A sual thu ṭhensak rih lo Rom mi pakhat thawi cu daan thawn a kaihfa maw?" tiah a sut.

26 Ralbawi pa nih cuvai thu a theih tikah ralbawi pi sinah a feh ih, "Zangtu na tuah? Hivai pa hi Rom mi a i sangkhaw!" tiah a sim.

27 Cule ralbawipi cu Paul sinah a feh ih, "Rom mi na i maw? Ka sim hnik aw," tiah a sut.

"Hngi, Rom mi ka i," tiah Paul nih a let.

28 Ralbawipi nih, "Kei khaw Rom mi sihnak dingah tangka tamngai ka pe ve," tiah a ti.

Cule Paul nih, "Kei cu ka suahkeh in Rom mi ka i," tiah a sawn.

29 Cule vetein Paul thusuh le thawi a tumtu pawl cu dungah an sip colh. Ralbawipi khaw nih Paul cu Rom mi a i tih le Rom mi pakhat hri thawn a khih tih a fiahfak tikah a thin a phang ngai.

30 Ralbawipi nih, Judah mi pawl nih Paul cungah sual an puhmi hi zangruangah a si, tih thudik a fiah duh ruangah a zingthlala ah Paul cu a suah ih Puithiam upa pawl le Khonsil upa zatein hmuakkhawm fa dingin thu a pe. Cule Paul cu a ṭhi ih an hmala ah a dingter.