1 Judea peng in mi hrekkhat pawl cu Antiok khawpi ah an tiang ih, "Moses Daan mangin serh nan tan lo ahcun rundam nan i thei thok lo," tiah zumtu unau pawl cu an zirh. 2 Paul le Barnabas nih cuvai thu cu rauh ngai in an el. Cule cuvai thu thawn pehpar in forhthlah pawl le kawhhran upa pawl thawn hmuak fa dingin Jerusalem ih feh dingah Paul, Barnabas le zumtu dang hrekkhat pawl cu an forh.

3 Cun an pok ih kawhhran pawl nih an thlah. Cule Fonisia ram le Samaria ram an pal pah ih Zentail mi pawl zangtih mangin an lung an thleng fa tihmi thu an sim pah riahro. Cuvai thu an theih tikah zumtu unau pawl cu an lungawi setak. 4 Jerusalem an phak tikah, forhthlah pawl, kawhhran upa le kawhhran pawl nih an hmuak. Cule anma hmangin Pathian ih a tuahmi thil hmahhmah cu an sim. 5 Asinain Farasi pawl lakih a telmi zumtu hrekkhat pawl cu an ding ih, "Zentail mi pawl cu serh an tan tengteng a ṭul ih, Moses Daan thlun dingin kan forh a ṭul," tiah an ti.

6 Cule cuvai thu ruat dingah forhthlah pawl le kawhhran upa pawl cu an hmuakkhawm fa. 7 ✝ Reinawn an relkhawm hnukah, Peter cu a dingih an sinah, "U le nau pawl, Zentail mi pawl nih Thuthang Ṭha an thei ih an zup theinak dingah aihlan deuh ah Pathian nih nan lakin kei hi ka na hril tih cu nan fiah. 8 ✝ Cule thinlung fiahtu Pathian nih Zentail mi pawl a cohlang hnei ih kan sinih Thlarau Thianghlim kan na pek mangin an sin khaw ah Thlarau Thianghlim a pekhneinak thawngin a cohlan hnei nak a langter. 9 Pathian nih Zentail mi le kan karlakah thleidannak a nei lo, zangahtihle zupnak thawngin an thinlung cu a thiangfaiter cem. 10 Curuangah kanma le kan pupa pawl ih kan phurh thei lomi kawn cu zumtu pawl ih liang ah phurter pit in zangruangah Pathian cu nan hneksak? 11 Asilo! Bawi Jesuh ih thinfahnak thawngin rundam kan ih mangin, Zentail mi pawl khaw rundam an i ve, tih hi kan zum," tiah a ti.

12 Cun mipi hmahhmah cu daitein an um ih, Paul le Barnabas nih anma hmangin Pathian nih Zentail mi pawl sinah mangbangza le hmuhsaknak a tuahmi pawl hmahhmah an sipmi cu an ngai. 13 An sip colh hnukah, James cu a ding ih, "U le nau pawl, ka ngai hnik uh! 14 Pathian nih ama hmin hrangah Zentail mi pawl lakin minung hrekkhat pawl la dingah hmasabik a vehvaih hneinak thu cu Simon nih a sim cem. 15 Cuvai thu cu Profet pawl ih thu thawn a ṭiah fa. Ca Thianghlim nih:

16 " ‘Hi hnukah ka kirsal thok ih,

A ok cem mi David ih biakbuk cu ka sa sal thok.

A siat cem mi cu ka sa sal thok ih,

ka tungding sal thok.

17 Cutih in a tangrih mi minung pawl le

ka hmin ih ka hrilmi Zentail mi pawl hman nih Bawipa an ko thok.

18 Khuahlan lai in hivai thu a fiahtertu Bawipa nih a ti,’ tiah a ti.

19 "Curuangah Pathian la ih a hoitu Zentail mi pawl hi hnaihnok hlah lausing tih hi ka ruahdan cu a si. 20 Cunakin milem biaknak ticaw thianglo ei lo ding, nupa sualnak tuah lo ding, hngawngrek ih thahmi sa le sathi pawl hrial dingin ca kuat sawn lausing. 21 Zangahtihle Sabbath ni cangcang sinakok ah Moses Daan cu kum reingai sung siar cem a i ih khawpi cangcang khaw ah phuan cem a i," tiah a ti.

22 Cun forhthlah pawl, kawhhran upa pawl le kawhhran zaten anma sungin mi hrekkhat hril pit in Paul le Barnabas thawn Antiok khawpi ih thlah dingah thu an ṭhencat. Zumtu pawl lakih hruaitu Barsabbas tih kawhmi Judas le Silas cu an hril. 23 A tangla ih cakuat thawn an thlah:

"Nan unau a i mi, forhthlah pawl le kawhhran upa pawl nih, Antiok, Siria le Silisia ih Zentail zumtu pawl, cibai na ta buk. 24 Kan sinin mi hrekkhat pawl nan sinah an tiang ih an ṭonkam nih buainak nan ta pe ih, nan thinlung a hnaihnok tih kan fiah. Hihi kan forhmi an si lo. 25 Curuangah kanma lakin mi hrekkhat hril pit in kan duhdawt ngaimi Paul le Barnabas thawn nan sinih thlah dingah thu kan ṭhencat. 26 Paul le Barnabas cu kan Bawipa Jesuh Khrih ih hmin hrangah an nunnak tiang a pe ngamtu an i. 27 Curuangah Judas le Silas cu anni sinah kan thlah ih anni nih kan cakuat nganmi cu nan ta sim eng thok. 28 Thlarau Thianghlim le kan cu nih atangla ih thil ṭulmi pawl hrello thilrit dang nan ta phurhter lo ding cu, thil ṭha ah kan ruat: 29 Milem biaknak ticaw, sathi, hngawngrek ih thah mi sa, le nupa sualnak pawl cu hrial uh. Hivai thil pawl nan hrial thei ahcun a ṭha colh thok. Fimdamte in um hram uh," tiah an ngan.

30 Cun Judas le Silai cu an thlah ih Antiok khua ah an feh. Cule mipi pawl an ko khawm ih cakuat cu an pe. 31 Cuvai ca an siar tikah mipi pawl cu an lung a awi ngai, zangahtihle thapeknak ca a sih ruangah a i. 32 Judas le Silas cu profet an ih mangin zumtu unau pawl sinah thu tamngai sim in an hnem ih tha an pe. 33 Cuva ah tawkfang an cam hnukah zumtu unau pawl nih hnangamte in an thlah ih anma thlahtu kawhhran sinah an kir sal. 34 *

35 Paul le Barnabas cu Antiok ah an um rih, midang tamngai thawn Bawipa ih thu cu an zirh ih an phuang.

36 Cun ni tawkfang hnukah Paul nih Barnabas sinah, "Bawipa ih thu kan sipcia nak khua cangcang ah fehsal pit in zumtu unau pawl zang an ṭiah tih va zoh sal sing," tiah a ti. 37 Barnabas nih Marka tih an kawhmi Johan khaw ṭhittak a duh. 38 ✝ Asinain Paul nih Johan Marka ṭhittak ding cu rem a ti lo, zangahtihle Johan Marka nih ṭuanṭuannak ah thlun hnei loin Pamfilia ram in a tluntak hnei dah ruangah a si. 39 Cun Paul le Barnabas karlak ah thu alfaknak cu a luar deuhdeuh ih pakhat le pakhat an ṭhen fa. Barnabas nih Johan Marka cu a ṭhita ih lawng thawn Saipras tikulh ah an feh. 40 Cun zumtu unau pawl nih Paul cu Bawipa ih thinfahnak sungah an ap, cule Paul nih Silas cu a hril ih an feh. 41 Cun Paul le Silas cu Siria ram le Silisia ram an pal pah ih kawhhran pawl tha an pe riahro.