1 Cu hnukah, Paul cu Athens khawpi a suahsan ih Korin khawpi ah a feh. 2 Cuva ah Pontas ram ih a suakmi Judah mi Aquila tihmi pa a hmu. Aquila cu a nupi Priscilla thawn tun naite ah Italy ram in a zuangmi an i. Zangahtihle Caesar Klaudius nih Judah mi hmahhmah cu Rom khawpi in a dawi hnei ruangah a si. Paul cu an sinah a feh ih, 3 anni khaw Paul mangin puanthlam ṭhit mi an ih ve ruangah Paul cu an sinah a um ih ṭuan a ṭuan. 4 Cule Paul cu Sabbath ni cangcang sinakok ah thu a ruah hnei ih, Judah mi pawl le Grik mi pawl cu zum thei dingin sipfiang a tum.

5 Silas le Timote cu Masidonia ram in an tian tikah, Paul cu a tikcu neihmi hmahhmah in Pathian thu sipnak ah a hmang ih Jesuh cu Khrih a i tiah Judah mi sinah a sim. 6 Asinain Paul cu an dokalh ih an relsiat tikah, Paul nih a lungkim lonak latternak ah a hnipuan cu a thing ih an sinah, "Nan thisen cu nanma nan lu cungah ṭil seh! Kei cu ka thiang. Atun in cu Zentail mi pawl sinah ka feh i thok," tiah a ti. 7 Cule Paul cu sinakok in a suak ih Titius Justus tihmi pa ih inn ah a lut. Titius Justus cu Pathian betu a i ih a inn cu sinakok hramte ah a um. 8 Cun Sinakok uktu Krispas le a innsang zatein Bawipa cu an zum. Cule Korin khawmi tamngai khaw nih Pathian thu an thei ih an zum ve. Curuangah baptisma an co.

9 Zan ah Paul cu latnak a hmu ih cuvai latnak sungin Bawipa nih, "Paul, ṭih hlah, Sim pehzom kau, daitein um hlah, 10 zangahtihle na sinah ka um. Hukhaw nih harnak ta pe eng thok lo, zangahtihle hivai khua ah minung tamngai ka nei," tiah a ti. 11 Cule Paul cu cuva ah kum khat le thla ruk a um ih an sinah Pathian thu a zirh.

12 Gallio nih Akhaia peng a uk laiah, Korin khawpi ih Judah mi pawl nih Paul cu an dokalh ih thuṭhennak zung ah an fehpit. 13 Cule anni nih, "Hi pa nih daan kalh in Pathian be dingah mipi pawl a lem hnei," tiah an ti.

14 Cun Paul cu a ṭon thok fangah Gallio nih Judah mi pawl sinah, "Nan Judah mi pawl, thil ṭha lo tuah le thil sual tuah ruangah i sehla cu nan thu nan ta ngai ding hi a muimawi ngai kau. 15 Asinain ṭonfang pawl, hmin pawl le nan daan thuhla ih thusuhnak a ih ahcun nanma tein relcat uh. Cumang thuṭhentu sih ka zuam lo," tiah a ti. 16 Cule thuṭhennak zung in Judah mi pawl cu a dawi hnei. 17 Cun mipi pawl nih sinakok uktu Sosthenes cu an tlai ih thuṭhennak zung hmai ah an thawi. Asinain Gallio nih zangkhaw ah a siar lo.

18 Cun Paul cu Korin khawpi ah can tawkfang a um. Cule zumtu unau pawl cu a ramta hnei ih Priscilla le Aquila thawn Siria ah lawng in an feh. Thukamnak a tuah mangin* Kenkhria khawpi ah a lu a kolh fa. 19 Cule Efesa khawpi an ban ih cuva ah Priscilla le Aquila cu a ramta hnei. Sinakok ah a lut ih Judah mi pawl thawn thu an ruah fa. 20 Judah mi pawl nih an sinah rei deuh cam dingin an sawm nain a lung a kim lo. 21 Asinain cibai a buk ta hnei ih an sinah, "Pathian nih rem a tih le nan sinah ka tiangsal leh thok," tiah a ti hnei. Cule Efesa khawpi in lawng thawn a feh.

22 Sisaria khawpi a tian tikah Jerusalem khawpi ah a hang ih kawhhran cibai a buk, cule Antiok ah a rong kir. 23 Cuva ah can tawkfang a um hnukah a pok sal ih Kalatia le Frizia ram a tlawn ih dungthluntu pawl hmahhmah cu an thazang a hngetkhoh ter hnei.

24 Cule Alexandria khawpi ih suak, Judah mi pakhat Apollos tihmi pa cu Efesa khawpi ah a tiang. Ani cu ṭonkam nal ngai le Ca Thianghlim khaw fiah ngai tu a i. 25 Ani cu Bawipa ih zalam thuhla zirh cemmi a i ih thinlung ih duh taktaknak thawn Jesuh ih thu cu dik ngai in a sim ih a zirh. Asinain a fiahmi cu Johan ih baptisma thu kau hi a si. 26 Cule sinakok ah ralṭha ngai in thusip a thok. A thusipmi cu Priscilla le Aquila nih an theih tikah an inn ah an sawm ih Pathian ih zalam thuhla cu felfai sinsin in an simfiang. 27 Cule Apollos cu Akhaia peng ih feh a tum ruangah Efesa khawpi ih zumtu unau pawl nih an bawm ih Akhaia peng ih dungthluntu pawl sinah Apollos an cohlan theinak dingah ca an ngansak. 28 Zangahtihle zapi hmai ih thu alfaknak ah, Apollos nih Judah mi pawl sinah Jesuh cu Khrih a si tiah Ca Thianghlim hmangin a fiangter ih a neh hnei ringirng.