1 Cun hitih in a si, kan na thlatu pawl kan ramtak hnukah ding ngai in kan feh ih, Kos tikulh kan tiang. A zingthlala ah Rhodes tikulh in Patara khawpi ah kan feh. 2 Cuva ah Fonisia peng ih a feh dingmi lawng kan hmu, cuvai lawng cu kan to ih kan feh. 3 Saipras tikulh a latnak hmun kan tiang ih cuva in thlangla ah kan her ih Siria ram la ah kan thulh. Cule Tai-ar khawpi ah kan ṭum, zangahtihle cuva ah lawng ih thil phurhmi pawl ṭhilh thok a i. 4 Cule cuva ah dungthluntu pawl kan hmu ih an sinah ni sarih kan cam. Thlarau ih sipnak in cuva ih dungthluntu pawl nih Paul cu Jerusalem khawpi ah feh lo dingin an dawn. 5 Kan sihkhat can a ne i ih kan suak ih kan feh. Cule dungthluntu pawl nih an nupi le fale pawl thawn khaw leng tiang kan na thlah eng. Cun tikap ah kan khuk kan bil ih thla kan cam. 6 Pakhat le pakhat cibai kan buk fa ih lawng cungah kan kai, cule anni khaw an inn ah an tlung.

7 Cun Tai-ar khawpi in lawng thawn kan feh ih Ptolemais khawpi ah kan tiang, cuva ah zumtu unau pawl kan hmu ih an sinah ni khat kan cam. 8 ✝ A zingthlala ah kan pok sal ih Sisaria khawpi ah kan tiang. Cuva ah Jerusalem khawpi ih upa pasarih hrilmi lakih pakhat a i mi Pathian thu simtu Filip ih inn ah kan cam. 9 Filip nih profet thuphuan ih thuphuangtu lengfa him fanu pali a nei. 10 ✝ Ni tawkfang kan cam hnukah, Judea ram in profet pakhat Agabus tihmi pa a tiang. 11 Kan sinah tiang pit in Paul ih taikap cu a la ih a kut le ke a khit fa, cule, "Thlarau Thianghlim nih hitih in a ti: Hivai taikap neitu pa hi Jerusalem khawpi ah Judah mi pawl nih an khit thok ih Zentail mi pawl ih kut ah an ap thok," tiah a ti.

12 Cuvai thu kan theih tikah kanma le cuva hmun ih a ummi pawl nih, Paul cu Jerusalem khawpi ih feh lo dingin kan ngen deido. 13 Cule Paul nih, "Zangah nan ṭap ih ka thinlung nan kuai ter? Bawipa Jesuh ih hmin ruangah cun Jerusalem khawpi ih thawngtlak kau i lo, thih hman ka tiari fa," tiah kan na let.

14 Kan dawn thei lo ruangah daitein kan um ih, "Bawipa ih duhdan mangin i kau seh," tiah kan ti.

15 Cuvai hnukah kan tim kan tuah ih, Jerusalem khawpi ah kan feh. 16 Sisaria khawpi ih a ummi dungthluntu hrekkhat pawl nih kan na thlun eng ve ih kan riahnak ding Mnason ih inn ah kan na ṭhi eng* — Mnason cu Saipras tikulhmi a i ih dungthluntu hmasa pawl lakih pakhat a i.

17 Jerusalem khawpi kan tian tikah, zumtu unau pawl nih lungawi ngai in kan na hmuak. 18 A zingthlala ah Paul thawn kan zatein James sinah kan feh ih cuva ah kawhhran upa pawl khaw an um. 19 Paul nih cibai a buk hnei ih, an ṭuanṭuannak ah Pathian nih Zentail pawl lakih a thil tuahmi pawl pakhat hnuk pakhat a simfiang hnei. 20 Cule cuvai thu an theih tikah Pathian an thangṭhat. Cun anni nih Paul sinah, "Kan unaupa Paul, Judah mi pawl sungin mi thawng tamngai cu zumtu ah an cang cem ih Daan an thlunnak ah zangtlukin taimak an suah tih cu na hmu. 21 Zentail ram sungih a ummi Judah mi hmahhmah sinah Moses Daan dungtut dingin le an fale pawl cu serhtan lo dingin le Judah daan pawl thlun lo dingin na zirh hnei tiah hiva ih ummi pawl nih thu an thei. 22 Zangtih in kan tuah thok? Mipi pawl nih hiva na tian hi an fiah thok ih kan sinah an tiang thok. 23 Curuangah ta sip mangin tuah lai ci. Hiva kan sinah thukamnak a tuah cemtu mi pali an um. 24 Anni cu ṭhita hnei la anma thawn thianfai fa uh, cule an sam vawhnak* zoh. man khaw peksak hnei. Cutih in na thuhla an theihmi cu a dik lo tihmi mi hmahhmah nih an fiah thok ih Daan na thlun ih Daan mangin na nung tihmi an fiah thok. 25 ✝ Zentail mi zumtu pawl thuhla ah cun himang thil pawl hi tuah lo dingin ca kan kuat cem. Anni cu milem sinih pekmi ticaw ei lo ding, sathi ei lo ding, hngawngrek ih thahmi sa ei lo ding, leh nupa sualnak tuah lo ding, tiah kan relcat," tiah an ti.

26 Curuangah a zingthlala ah Paul nih cuvai mi pali cu a ṭhita hnei ih an thianfai fa. Cule Biakinn sungah a lut ih thianfainak ni hi khawtikah a ne thok ih khawtik mangah an pakhat fingfing hrangah thawinak pek thok a i, tihmi a sim.

27 Ni sarih a net i thok tikah Asia ram ih a tiang mi Judah mi hrekkhat pawl nih Paul cu Biakinn sungah an hmu. Cule mipi pawl cu an tokhrolh ih Paul cu an tlai. 28 An hek ih, "Israel mi pawl kan bawm uh! Hivai pa nih kan mipi pawl iseh, Moses Daan iseh, hivai Biakinn iseh dokalh in hmunzakip ah mi hmahhmah thu a zirh. Cu hlei ah Zentail mi pawl khaw Biakinn sungah a tianpit hnei ih hivai hmun thianghlim hi a borhhlawh ter," tiah an ti. 29 ✝ Cutih ih an hehnak san cu Efesa khawmi Trofimas khi Jerusalem khawpi ah Paul thawn an hmu ih, Paul nih Biakinn sungah a luhpit, tih ih an ruah ruangah a si.

30 Cuvai thu nih khawpi sung cu buainak in a khatter, cule misenpi pawl cu an tiang deido ih Paul cu an tlai. Cun Biakinn kulh sungin an duk ih kotka pawl cu an khar lohli. 31 Mipi pawl nih Paul cu thah an tum lai ah, Jerusalem khaw pumpi cu a buai tiah Rom ralkap hotu ralbawipi sinah, thu an than. 32 Veikhatte ah cuvai ralbawipi cu ralbawi dang pawl le ralkap pawl thawn mipi sinah an va zuang cih. Mipi pawl nih cuvai ralbawi pa le ralkap pawl an hmuh tikah, Paul an thawi lai cu an cawlhnga. 33 Cun ralbawipi cu a feh ih Paul cu a tlai, cule thirhri panih thawn khit dingah thu a pe. Cun hivai pa hi hutu a si ih zangtu a tuah tadah, tiah a sut hnei. 34 Cule mipi sungin mi hrekkhat nih phun khat in an hek ih, mi hrekkhat nih phun dang in an hek. Thawngvang a tamtuk ruangah thufiang a thei thei lo ih Paul cu ralkap ṭankulh sungah fehpit dingin thu a pe hnei. 35 Mipi pawl an buai tuk ruangah Paul cu likkha a tian tikah ralkap pawl nih a zot in an zawn. 36 Mipi pawl nih an dungla in an thlun ih, "That uh!" tiah an hek pah riangro.

37 Cun Paul cu ralkap ṭankulh sungih an fehpit laifang ah ralbawipi sinah, "Na sinah thu ta sim thei na ing im?" tiah a sut.

Ralbawipi nih, "Grik ṭon na thiam maw? 38 Kan dung ral a thawh lai ih hriamnam thawn ramṭhing ah mi 4,000 a zuanpittu Izipt pa khi na si maw?" tiah a sut.

39 Asinain Paul nih, "Kei cu Judah mi ka i. Silisia ram Tarsas khawpi ih a suakmi, khawpi hminthang ih um ka i. Mipi pawl sinah thusipnak can ka pe hram," tiah a hler.

40 Ralbawipi sinin thusip theinak khuan a ngah hnukah, Paul cu likkha cungah a dingih mipi pawl cu daitein um dingah a kut a zap. Mipi pawl an daih tikah Paul nih Hebru ṭon in an sinah thu a sim.