1 Cun Stefen a thih cu Saul a lung a kim.

Cuvai ni in Jerusalem khawpi sungih kawhhran cungah hremnak rauhngai a tiang ih forhthlah pawl siarlo, an zatein Judea ram le Samaria ram ah an ṭekdarh colh. 2 Stefen cu Pathian a ṭihzahtu pawl nih an phum ih nasa ngai in an ṭah.

3 ✝ Asinain Saul cu kawhhran siatsuah a thok; inn khat hnuk inn khat a lut ih zumtu numi le pami pawl cu a duk hnei ih thawng a thla hnei.

4 A ṭekdarh mi zumtu pawl cu an fehnak kip ah thuthangṭha an phuang. 5 Filip cu Samaria khawpi* ah a feh ih an sinah Khrih ih thuhla a sim. 6 Cun mipi pawl nih Filip ih tuahmi thilmak pawl an thei ih an hmuh tikah, a sipmi thu pawl cu thinlung takin an ngai. 7 Zangahtihle thlarau thianglo pawl cu an molhmi minung pawl sungin aw thang ngai in an hek ih an suak; cule taksaze le keze pawl cu an dam. 8 Curuangah cuvai khawpi ah cu lungawinak tamngai a um.

9 Cun cuvai khua ah Simon an tihmi pa a um. Mi maktara ka i a ti fa ih, hlanah cun dawi hmangin Samaria khawmi pawl a mol hnei. 10 An zatein mi fate bik in mi hnem bik tiang a thu an ngai ih, "Ani hi, ‘Maktara,’ tihmi Pathian ih cahnak huham a i," tiah an ti. 11 Caan reipi dawi thiamnak hmangin a dawi hnei ruangah thinlung takin a thu an ngai. 12 Asinain Filip ih thuthang ṭha sipmi Pathian Uknak le Jesuh Khrih hmin thuhla an theih tikah an zum ih numi pawl le pami pawl khaw baptisma an co. 13 Simon rori khaw a zum ve; baptisma a lak hnukah Filip cu a thlun. Filip ih mangbangza le hmuhsaknak thil a tuahmi pawl a hmuh tikah a mang a bang.

14 Jerusalem khawpi ih a ummi forhthlah pawl nih, Samaria khawmi pawl khaw Pathian thu an cohlang, tih an theih tikah an sinah Peter le Johan an thlah. 15 An sinih an tian tikah, Thlarau Thianghlim an co theinak dingah an hrangah thla an cam. 16 Zangahtihle an lakih hutu sin khawah Thlarau Thianghlim a rong tiang rih lo; Bawi Jesuh hmin in baptisma kau an la rih. 17 Cule Peter le Johan nih an cungah an kut an suang ih Thlarau Thianghlim an co.

18 Forhthlah pawl ih kut suannak thawngin Thlarau pek an ih cu Simon nih a hmuh tikah paisa pe hnei pitin, 19 "Ka kut ka suanmi pohpoh nih Thlarau Thianghlim an co theinak dingah hi thuneihnak hi ka pe ve uh," tiah a ti.

20 Asinain Peter nih a sinah, "Pathian ih pekmi laksawng hi tangka thawn lei theih ih na ruah ruangah nangma cu na tangka thawn va riaral uh! 21 Pathian hmai ah na thinlung a dik lo ruangah kan ṭuanṭuanmi sungah na tel lo, covo khaw na nei lo. 22 Curuangah hivai na sualralnak in sirfa la Bawipa sinah thlacam, na thinlung ih na tumtah mi hi ta ngaihthiam mahna. 23 Zangahtihle nahsuahnak ih khatmi le dingfel lonak ih ṭemṭawn mi na i, tih kan hmu," tiah a ti.

24 Cule Simon nih, "Na sipmi thil pawl zangtu khaw ka cungih a tian lonak dingah Bawipa sinah thla ka cap sak hram," tiah a hler.

25 Peter le Johan cu Bawipa ih thu an phuang ih an hmuhtonmi an sip hnukah Jerusalem khawpi an kirh la ah, Samaria khua hmun tamngai ah thuthang ṭha an sim.

26 Bawipa ih vancungmi nih Filip sinah, "Tho la, thlangla* ah Jerusalem in Gaza fehnak zalam ah feh," tiah a ti. (Atun cu hi zalam cu an hmang i lo.)* 27,28 Filip cu a tho ih a feh. Cule Ethiopia pa pakhat, Ethiopia siangpahrang bawinu Kandake ih hlawnthil hmahhmah kilkhawitu bawi, thuneihnak sang ngai nei mi, tilkheimi pa, cu Pathian be dingah Jerusalem ah a feh. A kirhsal la ah, saileng cungah to in profet Isaiah cabu a siar berbo. 29 Thlarau Thianghlim nih Filip sinah, "Khivai saileng khi va naih la, a hram in feh," tiah a ti. 30 Filip cu cuvaipa sinah a va zuang ih, profet Isaiah cabu a siar berbo tih a fiah tikah, "Na siar berbo mi hi a sullam fiah cim?" tiah a sut.

31 Cuvaipa nih, "Hutal nih ka na sipfiang lo ahcun zangtih in ka fiahthiam thok?" tiah a sawn. Cule cuvaipa nih Filip cu a saileng cungah kai in to dingah a sawm. 32 A siar berbo mi Ca Thianghlim cu:

"Ani cu thah dingmi tuu mangin an hruai ih,

A hmul mettu hmaiah tuu fano daite ih a um mangin

a kaa a cip.

33 Hmuhsuam nautatnak a tuar, thuṭhensaknak dik a co lo;

A cithlai pawl ih thuhla hutu nih a than i nawn thok,

Zangahtihle leitlun ih a nunnak cu an laksak," tihmi a i.

34 Cuvaipa nih Filip cu, "Hivai profet ih sipmi hi hutu ih thu a sim tih ka sim hram, amaih thu maw mi dang ih thu a sim?" tiah a sut. 35 Cun Filip nih, cuvai Ca Thianghlim in a thok ih, Jesuh ih Thuthang Ṭha cu a sim. 36 Cutih in zalam ah an feh vivo ih ti umnak hmun an tiang. Cule cuvai pa nih, "Hiva ah ti a um. Baptisma co dingah zangtu nih ka na dawnkham?" tiah a ti. 37 *

38 Cule Ethiopia pa cu a saileng a ding ter ih Filip thawn ti sungah an ṭum ih, Filip nih baptisma a pe. 39 Ti sungin an hang suah tikah Bawipa ih Thlarau nih Filip cu a la ih, cuvai bawi pa nih Filip cu a hmu i lo; asinain lungawi ngai in a feh. 40 Asinain Filip cu Azotas khawpi ah an hmu; Sisaria ah a feh ih zalam tluan khua cangcang ah Thuthang Ṭha a sim.