1 Cun hitih in a i, Ikoniam khawpi ah Paul le Barnabas cu Judah mi pawl ih sinakok ah an lut ih thu an sim. Cule Judah mi tamngai le Grik mi tamngai nih an zum. 2 Asinain a zum duh lo tu Judah mi pawl nih Zentail pawl an tokhrolh ih zumtu unau pawl cungah thinlung sia nei kau an tuah. 3 Curuangah Paul le Barnabas cu cuva ah reingai an cam ih ralṭha ngai in Bawipa ih thu cu an phuang. Bawipa ih thinfahnak thu an phuanmi a dik ti ih nemhngetnak ah hmuhsaknak pawl le mangbangza pawl tuah theinak cu pek an i. 4 Asinain khaw sung mipi pawl cu an ṭhen fa colh. Mihrek nih Judah mi an ṭan ih mihrek nih forhthlah pawl an ṭan.

5 Cule Judah mi pawl le Zentail mi pawl cu an hruaitu pawl thawn forhthlah pawl hmualphoter ding le lung in nam dingah thu an relcat. 6 Cuvai cu forhthlah pawl nih an fiah tikah Likaonia ram Listra khawpi, Derbe khawpi le a kiangkap ram ah an zuang. 7 Cule cuva ah Thuthang Ṭha cu an phuang.

8 Cun Listra khua ah a ke ṭhalo mi pa pakhat cu a to. Ani cu a suahkeh in keze a i ih veikhat khaw a feh dah kel lo. 9 Cupa nih Paul ih thusip cu a ngai. Cule Paul nih cuvai pa cu mit ṭhep loin a zoh ih dam dingah zupnak a nei tih a hmuh tikah, 10 aw thang ngai in, "Ding ngai in hang ding!" tiah a ti. Cule cuvai pa cu a han sawsokfa ih a feh. 11 Mipi pawl nih Paul ih thil tuahmi an hmuh tikah, an hek ih, Likaonia ṭon in, "Khawzing pathian pawl cu minung mangah cang in kan sinah an rong ṭum silai tu!" tiah an ti. 12 Barnabas cu Zeus tiah hmin an sak ih Paul cu thusimtu bik a sih ruangah Hermes tiah an ko. 13 Zeus ih biakinn cu an khawhnar lengah a um, Zeus pathian ih puithiam nih cawtum le pangpar pawl cu kotka ah a tianpit, zangahtihle mipi pawl thawn forhthlah pawl sinah raithawinak pek an duh ruangah a si.

14 Cuvai thu cu forhthlah Barnabas le Paul nih an theih tikah an hnipuan an phat fa ih mipi lakah hek pah in an zuang. 15 Cule, "Zangruangah hivai thil hi nan tuah? Kan khaw nan mangin minung menmen kan i ve. A ṭhahnem lomi himang thil nan tuah nakin lei le van, tifingriat le a sungih ummi hmahhmah a tuahtu Pathian nung sinih nan kirhsalnak dingah, kan cu nan sinah Thuthang Ṭha nan ta sim. 16 Hlanlai ah cun Pathian nih miphun hmahhmah anma an duhmi zalam feh dingin a sian hnei. 17 Asinain thil ṭha a tuah mi nih ama le ama minung sinah phuangfa loin a um kel lo. Van in a zuah a zu ter ih anma le tikcu teah thlairah pawl nan ta pe. Cule ticaw khopkhamnak le lungawi-diriamnak thawn nan thinlung cu a khatter," tiah an ti. 18 Cuvai thu pawl an sim na hratin an sinih raithawi lo dingah mipi pawl cu harsa ngai in an dawn thei fangfang.

19 Cun Judah mi hrekkhat pawl cu Antiok le Ikoniam khawpi in an tiang ih mipi pawl cu an la ah ṭang dingin an sawm hnukah, Paul cu lung in an nam. A thi cem ah an ruat ih khaw lengah an dukta. 20 Asinain dungthluntu pawl a hramih an pumkhawm fak lai ah Paul cu a tho ih khaw sungah a feh sal. A zingthlala ah Barnabas thawn Derbe khawpi ah an feh.

21 Cule Paul le Barnabas cu Derbe khawpi ah Thuthang Ṭha an sim ih, dungthluntu tamngai an ngah. Cuhnukah Listra, Ikoniam khawpi le Pisidia ram Antiok khawpi ah an kir sal. 22 Dungthluntu pawl cu thinlung thazang an pe ih zupnak sungah rinsattlak ngai in um dingah an forh. "Pathian Uknak sungih a luttu ding kan pawl cu harsatnak tamngai hmuak ding hrimhrim kan i," tiah an ti. 23 Cun kawhhran cangcang ah kawhhran upa an hril sak ta ih cawul in thla an cam hnukah, zumtu pawl cu Bawipa sinah an ap ta.

24 Pisidia ram an lat hnukah Pamfilia ram an tiang. 25 Perga khua ah Thuthang Ṭha an sip hnukah Attalia khawpi la ah an feh. 26 Cuva in Antiok khawpi ah lawng thawn an feh. Antiok khawpi cu ṭuan an ṭuan colh cemmi ṭuan dingah Pathian thinfahnak in an apfak tadahnak hmun a i.

27 Antiok an tian tikah kawhhran mipi pawl an ko khawm ih, Pathian nih a hman hnei zia le Zentail mi pawl sinah zupnak suahka a hon sak hnei zia pawl an sim. 28 Cuva ah dungthluntu pawl thawn reipi an um khat.