1 Cun hitih in a i, Korin khawpi ih Apollos a um lai ah, Paul cu cuvai ram sungah khual a tlawn ih Efesa khawpi ah a ban. Cava ah dungthluntu hrekkhat pawl a hmu hnei ih, 2 Paul nih an sinah, "Zumtu nan sih tikah Thlarau Thianghlim ngah u cim?" tiah a sut hnei.

Anni nih, "Thlarau Thianghlim a um le um lo hman kan fiah lo," tiah an let.

3 Cule Paul nih an sinah, "Asihle zangtu baptisma maw nan co?" tiah a sut hnei.

Anni nih, "Johan ih Baptisma," tiah an ti.

4 ✝ Cutikah Paul nih, "Johan ih pekmi baptisma cu sualsirnak baptisma a i. Johan nih ka dungih a tiang dingmi pa cu zum uh tiah a ti, cucu Jesuh hi a i," tiah a ti.

5 Cuvai thu an theih tikah, Bawi Jesuh hmin in baptisma an co. 6 Paul nih an cungah a kut a suang ih, an sinah Thlarau Thianghlim a rong ṭum. Cule ṭon phun dangdang in an ṭon ih profet thuphuan in thu an phuang. 7 An zatein pacang hleinih hrawng an i.

8 Cun Paul cu sinakok ah a feh ih thla thum sung ralṭha ngai in thu a sim. Pathian Uknak thu an rel khat ih zum thei dingin a simfiang hnei. 9 Asinain mi hrekkhat cu an thinlung a ruh tukih an zum duh lo; curuangah miburpi hmai ah Bawipa ih Zalam thuhla cu zohsuam in an rel. Curuangah Paul nih a zuangta hnei ih dungthluntu pawl khaw a ṭhita hnei. Cule Tirannas ih thuzirhnak inn ah ni cangcang* thu a zirh hnei. 10 Cun hitih in a i, kum nih sung a ṭuan ih Asia ram sungih a ummi Judah mi iseh, Zentail mi iseh, an zatein Bawipa ih thu cu an thei.

11 Cun Pathian nih Paul hmangin mangbangza thil hleice pawl a tuah. 12 A ṭaval le a taingerh puan pawl hman mifak pawl sinih an ken tikah an fahnak a dam ih an sungin khawsia pawl an suak. 13 Hmunkakip ah vak pit in khawsia a dawitu Judah mi hrekkhat nih Bawi Jesuh hmin in Paul mangih tuah ve an tum. Anni nih khawsia pawl sinah, "Paul ih a sipmi Jesuh ih hmin in nan ta dawi," tiah an ti. 14 Judah mi Puithiam upa Skeva tihmi pa ih fapa, unau pasarih nih cumangin an tuah ve.

15 Asinain khawsia nih a let hnei ih an sinah, "Jesuh cu ka fiah, Paul khaw ka fiah, asinain nan cu hutu le nan i?" tiah a ti hnei.

16 Cun khawsia luhhnawhmi pa nih unau pasarih pawl cu a vel hnei ih a neh hnei colh. Curuangah an hnipuan a pat colh ih hmaliam pi thawn cuvai inn in an zuang. 17 Cuvai thuhla cu Efesa khawpi ih a ummi Judah mi le Zentail mi hmahhmah nih an theih tikah an ṭih setak ih Bawi Jesuh hmin cu an thangṭhat. 18 Zumtu lakin mi tamngai an tiang ih an tuahsual mi pawl an phuang ih mi zapi hmuhhngan ah an thuthup pawl an phorh. 19 Mitkher thiam mi tamngai khaw nih an mitkher cabu pawl an keng ih mi zapi hmuhhngan ah an hul. Cuvai an hul mi an mitkher cabu pawl cu a man an kop tikah ngun tangka* zoh). 50,000 a i. 20 Cutih in Bawipa ih thu cu* huham cahnak in a ṭhang ih hmun kakip ah a karhzai.

21 Hih thil pawl a can colh hnukah Paul cu Masidonia peng le Akhaia peng tlawn ta pit in Jerusalem ih feh dingah a thinlung in a tum.* "Cuva ih ka tian hnukah, Rom khawpi khaw ka feh tengteng a ṭul," tiah a ti. 22 Curuangah ama bawmtu lakih panih Timote le Erastas cu Masidonia ah a thlah hnei ih ama cu Asia ram sungah can tawkfang a umta.

23 Cuvai can hrawngah Bawipa ih Zalam thuhla ah buainak hnemngai a suak. 24 Ngun ih so tuahtu Demetrias tihmi pa nih Artemis khawzing nu ih biakinn zuklem cu ngun in a tuah ih zungthiam pawl cu hlawknak tamngai a pe. 25 Cun cu pawl le anma mang ṭuanṭuantu dangpawl cu a kokhawm hnei ih an sinah, "Unau pawl, hih ṭuanṭuannak ruangah kan neinung tih cu nan fiah. 26 Cule Efesa khawpi le Asia ram pumpi deuhthaw ah Paul nih mi tamngai a lem hnei ih a hruai sual hnei tih cu nan hmu ih nan fiah. Ani nih, minung kut ih tuahcop mi pathian pawl cu pathian an i lo, tiah a ti. 27 Cun kan sumtuahnak hi a hmin a se thok tih hi phan a um kau lawng i loin, Asia ram le leilung cung khawkakip ih an biakmi Artemis khawzing nu ih biakinn khaw hi nautat a i thok ih a maktaratnak pawl khaw hi siatsuah a i pang thok tih hi phan a um," tiah a ti.

28 Cuvai cu mipi nih an theih tikah, an thin a se setak ih, "Efesa khawmi pawl ih Artemis cu a maktara setak," tiah an hek. 29 Cun khaw sung cu buainak in a khat. Cule Paul ih khualtlotpit Masidonia mi Kaias le Aristarkas cu an tlai ih puai zohnak bualrawn ah an suahpit. 30 Paul cu mipi hmai ah suah a duh nain dungthluntu pawl nih an sian lo. 31 Cun Asia ram ih thuneitu pawl lakih a rualpi hrekkhat khaw nih cuvai puai zohnak bualrawn ah feh hrimhrim lo dingin thu an cah. 32 Mipi lakin buainak a um ruangah, mi hrekkhat nih thu pakhat an hek ih mi hrekkhat nih thu dang an hek ve; mi hrekkhat cu zangruangah kan pumkhawm fa tih hman an fiah lo. 33 Judah mi pawl nih Alexander cu hmai ah suakter pit in buainak thu simfiang dingah an ngen. Cun Alexander nih daitein um dingah mipi pawl cu a kut a zap ih ama le ma humfak a tum. 34 Asinain Alexander cu Judah mi a i tih an fiah tikah, "Efesa khawmi pawl ih Artemis cu a maktara taktak," tiah nazi panih sung hrawng an hek.

35 Cule cuvai khua ih cazi pa nih mipi pawl cu a daiter hnei ih an sinah, "Efesa khawmi pawl, Efesa khawpi cu a maktara mi Artemis khawzing nu ih biakinn le van in a rong ṭil mi milem kilkhawitu a i tih a fiah lotu hutu a um? 36 Hivai thil pawl cu el theih pawl a i lo. Curuangah daite in um uhla ruatta hmasak loin zangkhaw tuah hlah uh. 37 Zangahtihle anni pawl cu biakinn siatsuahtu an i lo ih, kan khawzing nu khaw an relsiat lo nain, hiva ah nan suahpit. 38 Curuangah Demetrias le a rualpi zungthiam pawl nih mi pakhat khat sual mawhpuh ding an neih a sih ahcun thuṭhennak zung cu hon a i. Cuva ah thuṭhentu khaw an um kau ruangah pakhat le pakhat sual puhfa seu. 39 Asinain thu rel duhmi dang nan neih asihle daan mangin mipi thurelnak hmun ah relcat thok a i. 40 Zangahtihle nihin ni ih thil cangmi ruangah buainak nan suahpit tiah kan na mawhthluk pang thok tih phan a um. Hivai buainak thu ah puhmawh ding kan nei lo, zangahtihle a duhsatnak rel ding zangkhaw kan nei lo," tiah a ti. 41 Cuti ih a tih hnukah mipi thurelnak cu a cawlhngater.