1 Cun Italy ram ah lawng thawn kan feh thok, tiah thu an ṭhencat tikah, Paul le thawngtla dang pawl cu "Caesar Ralkap Burpi" hohatu ralbawi Julius tihmi ralbawipi ih kut ah an pe. 2 Cule Adaramittium khawpi in a tiang mi, Asia ram lawng cawlhngatnak cangcang ih a cawlhnga pah dingmi lawng cu kan to ih kan feh. Masidonia ram Thesalonika khawmi Aristarkas khaw kan sinah a tel ve. 3 A zingthlala ah Sidon khawpi kan ban. Cule Julius nih Paul cu a thinfak ih a ṭulhai mi pawl an pek theinak dingah a rualpi pawl sinih feh khaw a sian. 4 Cuvai hmun in kan pok sal ih zil cu kan la hlang ih a zuan ruangah Saipras tikulh zil zuan lonak la in kan feh. 5 Cun Silisia ram le Pamfilia ram hram ih tifingriat tan in kan feh ih Lisia ram Mira khawpi ah kan ban. 6 Cuva ah ralbawi pa nih Alexandria in a tiang ih Italy ram a feh dingmi lawng a hmu ih, cuvai lawng cu kan na to ter.

7 Nuamtete in ni tamngai sung kan feh hnukah, harsa ngai in Snidas khawpi zawn kan ban. Cuva la in feh bet ding cu zil nih kan na kham ruangah Salmon ram khatla ral Krete tikulh zil zuan lonak la in kan feh. 8 Harsa ngai in kan feh ih Lasia khawpi hram ih "Himnak Lawng Cawlhngatnak" tihmi hmun pawl ah kan ban.

9 Tikcu tamngai a liam cem ih Sualtlatnak Ni* a luan cem ruangah lawng thawn khualtlot cu ṭih a nung i. Curuangah Paul nih an sinah ralrinnak a pe hnei. 10 Paul nih an sinah, "U le nau pawl, kan khualtlotnak cu ṭihkhaiza a i tiah ka hmu. Nan phurhmi thilri pawl le lawng hi rauhngai a siat thok ih kan nunnak khaw a riaral thok," tiah a ti. 11 Asinain ralbawi pa nih Paul ih thusipmi nakin lawng mawngtu bawi le lawng neitu pawl ih thu a ngai sawn. 12 Cuvai an lawng cawlhngatnak cu isik can ah cawlhngat a ṭhat lo ruangah mi tam sawn nih feh pehzom ding an duh. Finiks khawpi tian ding le cuva ah isik sung um ding an ruahsan. Finiks cu Krete tikulh ih lawng cawlhngatnak hmun a i ih ni tlaknak thlangla le ni tlaknak sakla* tut in a um.

13 Thlangla in zil nemte cu a zuang ih an saduhthah mangin feh thei dingah an ruat. Curuangah lawng an dinternak cu an phoih ih Krete tikulh kapin an feh. 14 Asinain a rei hlanah, "Nisuah Sakla ih Zilpi" an tihmi cu Krete tikulh la in rauhngai in a zuang. 15 Zilpi nih kan lawng cu a pah ih kan lawng cu hmala a nor thei i lo. Curuangah kan lawng cu kan thlah ih zil nih a duhnak nak ah kan na fehpit. 16 Cun Kauda tihmi tikulh fate zil zuan lonak la in kan feh lai ah harsa ngai in vokkuang lawng cu kan tuah thei. 17 Cule vokkuang lawng cu lawng cungah an duk ih lawng kimvel ah hri thawn khoh ngai in an khit. Sirtis vutnel pawl a rawt pah ding an phan ruangah lawng puanzar cu an ṭhum. Cule zil nih a duhnak nak ah kan na fehpit. 18 Cule zilpi nih rauhngai in kan na thawi ih a zingthlala ah lawng ih phurhmi thilri pawl cu ti sungah an hlon. 19 A tipsun ah kan kut rori in lawng thilri pawl cu kan hlon. 20 Ni tamngai sung ni le arsi pawl an lang lo ih zilpi cu rauhngai in a zuang. Netabik ah kan nung thok tih ih kan ruahsatnak hmahhmah an lo colh.

21 Lawng cungih minung pawl cu caw ei lo in ni tamngai an um hnukah Paul cu an hmai ah a ding ih, "U le nau pawl, ka thu ka ngai pit in Krete tikulh la in feh usingla, hiti mang siatralnak le lawhralhnak kan hmuak thok lo. 22 Asinain atun ah hnangamte in um dingah nan ta forh, zangahtihle hutu ih nunnak khaw a loral thok lo; kan lawng belte cu a siat thok. 23 Zangahtihle ka na neitu le ka biak mi Pathian ih vancungmi cu nizan ah ka hramah a ding ih ka sinah, 24 ‘Paul, ṭih vai hlah. Caesar ih hmai ah na ding tengteng thok ih, nang thawn lawng a totu hmahhmah ih nunnak cu Pathian nih na sinah ta pe cem,’ tiah ka na ti. 25 Curuangah u le nau pawl, hnangamte in um uh, zangahtihle Pathian ka zum ih ka na sipcia mangin a cang tengteng thok. 26 Asinain zil nih tikulh pakhat khat ih tikap leilung ah tang kau kan na zuanpit thok," tiah a ti.

27 Zan hleilitnak ah, Adriatic tifingriat ah cun zil nih kan na thawi nianno. Zanruang hrawngah lawng mawngtu pawl cu tikap leilung kan naih i tiah an ruat. 28 Cule ti a thuk le thuk lo an tah ih pi za le kul a thuk tih an hmu. Temte a reih hnukah an tah sal ih pi sawmkua a thuk tih an hmu. 29 Cun lung an pah pang ding an phan ruangah lawng mei la in thirkawn pali an ron ṭhil ih khua vang dingin thla an cam. 30 Cule lawng mawngtu pawl cu zuan an tum ih vokkuang lawng pawl cu ti sungah an ron ṭhum, cule lawng hmala in thirkawn pawl ṭhil ding mangin an umfater. 31 Cun Paul nih ralbawi pa le ralkap pawl sinah, "Lawng mawngtu pawl lawng sungih an um lo asihle, nan luat thei thok lo," tiah a ti hnei. 32 Curuangah ralkap pawl nih vokkuang lawng khihnak hri pawl cu cat in an sat ih vokkuang lawng pawl cu ti an phuanter.

33 Cule khua a van hlante ah an zatein caw ei dingah Paul nih a forh hnei. Paul nih, "Ticaw zangkhaw ding ei lo in nan hngahnak ni hleilitnak a i cem. 34 Curuangah caw ei dingin nan ta forh. Nan nunnak dingah caw nan ei a ṭul. Nan lu cungih nan sam fang khat hman a lo thok lo," tiah a ti. 35 Cuvai thu pawl a sip colh hnukah, sang temte a la ih an zate hmai ah Pathian sin lungawithu a sim, cule a seu ih an ei. 36 Midang khaw an hna a ngam ih caw an ei ve. 37 Lawng sungih a um hmahhmah cu minung 276* kan i. 38 An duh zat vek an ei colh hnukah, lawng zangter dingah sangvut pawl cu tifingriat sungah an hlon.

39 Khua a hang van i tikah, khoitu ram a i tih an fiah lo. Asinain tikap leilung an hmu ih, a canthiam ahcun, cuva ah an lawng cawlhngatter an tum. 40 Cule thirkawn pawl cu cat in an sat ih tifingriat sungah an pilter. Cun hri thawn an khih mi lawng hlauhnak cu an phoih. Cule lawng hmala ih puanzar cu zil nih sem dingin an zar ih tili kap la an feh. 41 Asinain tifingriat panih hmuahfaknak hmun kan ban ih lawng nih lei a sawh, cule lawng hmala cu vutnel ah a dawt fa ih thawn theih loin a tang. Tisuar nih lawng mei cu a parh ter colh.

42 Ralkap pawl nih, thawngtla pawl cu ti hlau pit in an zuang pang thok, tih an phan ruangah, thah an duh. 43 Asinain ralbawi pa nih, Paul cu a hum duh ruangah a kham hnei. Cule ti hlauh thiam pawl cu lawng sungin dawp dingah le tikap la ah hlau dingin thu a pe hnei. 44 A tangmi pawl nih thingtlep maw, lawng a siatmi thil maw, an awh ih an thlun. Cutih in kan zatein tikap ah himdamte in kan ban.