1 Cutih in mipi pawl sinih thu an sip berbo lai ah puithiam pawl* le biakinn kiltu bawi le Sadusi pawl an tiang. 2 Mithi pawl an nung sal thok tih fiangternak ah Jesuh cu thihnak in a tho sal tiah forhthlah panih nih an phuan le an zirh ruangah an thin a phang ngai. 3 Curuangah cuvai forhthlah panih cu an tlai ih zanla a kim cem ruangah a zingthlala sun tiang thawng ah an thla. 4 Sikhawsehla an thusipmi a theitu mi tamngai nih an zum; a zumtu pawl cu an karh sinsin ih, mi 5,000 tluk an kim.

5 A zingthlala sun ah Judah mi hruaitu pawl, upa pawl le Daanthiam pawl cu Jerusalem ah an hmuakkhawm fa. 6 Puithiam Lubik Annas, Kaiafas, Johan, Alexander le Puithiam Lubik ih sungkhat dang pawl khaw an um ve. 7 Cun an laifang ih an dinter hnukah, "Zangtu huham cahnak asihlole hutu ih hmin in hivai thil hi nan tuah?" tiah an sut.

8 Cule Peter cu Thlarau Thianghlim in a khat ih an sinah, "Mipi hruaitu pawl le upa pawl, 9 nihin sun ah hi keze pa a damnak thu le a cungih thilṭha tuahmi thu kan na sut a sih ahcun, 10 nan zate le Israel mipi hmahhmah ih nan fiah colh dingmi cu hivai hi a i: nan hmai ih a dingmi pa a fimdamnak hi Nazareth mi — thinglamtah cungih nan thahmi, thihnak in Pathian ih a thawhter salmi Jesuh Khrih ih hmin in a si. 11 Jesuh thu ah Ca Thianghlim nih:

" ‘Inn satu pawl ih nan hnonmi lung cu

a kil ih lung thupi bik ah a cang,’ tiah a ti.

12 Rundamnak cu hutu dang sin khawah a um lo; zangahtihle rundam kan sih theinak dingah van tang minung lakah hmin dang a um lo," tiah Peter nih a ti.

13 Khonsil upa pawl nih Peter le Johan cu fitnak le thiamnak a nei lomi mi menmen an i nain zangtlukin an ral a ṭha tih an hmuh tikah an mang a bang ngai. Cule anni cu Jesuh ih rualpi an sih khi an fiah sal. 14 Asinain an fimdamter mi pa cu Peter le Johan hramih a din ringring ruangah an ṭon theimi zangkhaw a um lo. 15 Curuangah Khonsil khan sungin suak dingah thu an pe ih anma hlang thu an rel. 16 "Zangtih in kan tuah thok? Huhman nih an tuah thei lomi hmuhsaknak thilmak an tuah tih cu Jerusalem khawsung ih a ummi hmahhmah nih an thei colh cem ih hukhaw ih el theihmi a i lo. 17 Asinain hivai thu hi mipi sinih a karhzai lonak dingah, Jesuh hmin in hutu sin khawah thu sim i hlah uh, tiah kan hringhro thok," tiah an ti.

18 Cule an ko kir sal ih, Jesuh hmin in thu zirh lo ding le thu sim hrimhrim lo dingin an dawn. 19 Asinain Peter le Johan nih, "Nanmai thu ngai maw Pathian ih thu ngai hi Pathian hmai ah a dik sawn? nanma tein ṭhen hnik uh! 20 Zangahtihle kanma rori ih kan hmuhmi le kan theihmi cu sim loin kan um thei lo," tiah an ti. 21 Curuangah Khonsil upa pawl nih rauh deuh in an hringhro ih an thlah. Mi hmahhmah nih an lakih thil a cangmi an hmu ih Pathian an thangṭhat ruangah forhthlah pawl hrem cu a cang thei lo tiah an ruat. 22 Hmuhsaknak ah damnak a ngahtu pa hi kum sawmli tlun a i.

23 Peter le Johan cu thlah an ih cangka in an rualpi pawl sinah an kir, puithiam upa pawl le upa pawl ih an sipmi thu pawl cu an sim. 24 Cuvai thu cu an theih tikah hmunkhatte ah Pathian sinah an aw suahin thla an cam ih, "Van le leilung, tifingriat le a sungih ummi hmahhmah a tuahtu, maw Cungnungbik Bawipa, 25 Na Thlarau Thianghlim hmangin na siahhlawh kan pu David sinah thu na sim ih:

" ‘Zangah Zentail mi pawl hi an thin a se?

Zangah minung pawl hi thil lolak men an tuah?

26 Bawipa le Khrih dokalh dingah,

leilung siangpahrang pawl an tuahsifa ih,

Uktu bawi pawl thawn hmun khatah an hmuakkhawm fa,’ tiah a ti.

27 ✝ Zangahtihle hriak na culh mi na Siahhlawh Thianghlim Jesuh dokalh dingah Herod le Pontius Pilat cu khawpi sungah Zentail mi pawl le Israel mi pawl thawn an hmuakkhawm fa taktak. 28 Na huham le na tumtahnak in a cang leh thok tih ih na khiah ciami kimter colh dingah an hmuakkhawm fa. 29 Maw Bawipa, a tun ah anni nih kan na hringhro mi khaw hi nangma nih kan ron theihsak hram la kan na sal pawl nih na thu cu ralṭha ngai in kan sip theinak dingah kan bawm hram. 30 Na Siahhlawh Thianghlim Jesuh hmin in mi fimdamter dingah na ban ron pharh hram la hmuhsaknak le khawruahhar thil pawl tuah theinak kan ron pe hram," tiah an ti.

31 Thla an cam colh tikah an hmuakkhawm faknak hmun cu a hnin colh. Thlarau Thianghlim in an khat ih Pathian thu cu ralṭha ngai in an phuang.

32 ✝ Zumtu pawl cu thinlung le ruahnak hmunkhat an nei. Hutu khaw nih an neihmi thilri cu, ka bulta a si, an ti lo; an neihmi hmahhmah cu pakhat le pakhat an ṭawm fa. 33 Bawi Jesuh thawhsalnak thu cu forhthlah pawl nih a nasa ngaimi huham thawn an sim ih Pathian nih an zate tlunah thlawsuah tamngai a ron burh. 34 An lakah hutu khaw a tlasam mi an um lo. Hmunram a neitu le inn a neitu pawl nih an hmunram le an inn pawl cu an zuar ih an ngahmi tangka cu, 35 forhthlah pawl kutah an ap. Cule cuvai tangka cu a ṭulsamtu pawl ih ṭulnak mangin an zem.

36 Cun Saipras tikulh ih a suakmi Levi mi, forhthlah pawl nih Barnabas tiah an kawhmi (Barnabas tih cu "Thazang petu ih Fapa" tihnak a i), Joses nih, 37 a neihmi hmunram cu a zuar ih a ngahmi tangka cu forhthlah pawl ih kut sungah a ap.