1 Cun tikcu rei deuh hnukah, zumtu an karhzai vivo ih Hebru mi pawl le Grik ṭon hmang Judah mi pawl karlak ah thubuai a um. Grik ṭon a hmangtu Judah mi pawl nih ni cang thil an zep tikah an nuhmei pawl nih an co ding zat an co lo, tiah thu a um. 2 Cutikah forhthlah hleinih pawl nih zumtu pawl hmahhmah cu hmun khatah an ko khawm ih, "Pathian thu sipphuan daithlang in cabuai ṭuan kan ṭuan a sih ahcun a dik thok lo. 3 Curuangah u le nau pawl, nanma lakah mi hminṭha, Thlarau Thianghlim le fitnak in a khatmi mi pasarih hril uhla anni pawl cu hivai ṭuanvo hi kan pe thok. 4 Kan cu thlacamnak le thusipnak ah kan pefa thok," tiah an ti.

5 Cule cuvai thu nih mipi hmahhmah lung a awiter ih zupnak le Thlarau Thianghlim ih a khatmi Stefen, Filip, Prokhoras, Nikanor, Timon, Parmenas, le Antiok khua ihsin Judah biaknak ih a luttu Zentail mi Nikolaus pawl an hril. 6 An pasarih in forhthlah pawl sinah an fehpit ih an lu tlunah an kut an suang ih thla an cam sak.

7 Cule Pathian thu cu a karhzai. Zumtu pawl khaw Jerusalem khuapi sungah an karh mepmo ih puithiam tamngai nih an zupnak cu an pom ve.

8 Pathian ih thlawsuah mi le cahnak huham thawn a khatmi Stefen cu misenpi lakah khawruahhar le hmuhsaknak mak ngaingai tamngai a tuah. 9 Cun miluat* pawl ih Sinakok tih ih an kawh mi sungin mi hrekkhat pawl nih Stefen cu an dokalh. Cuvai dokalhnak ah cun Sairin ram, Alexandria khua, Silisia ram le Asia ram ih Judah mi pawl an tel. 10 Asinain Stefen cu Thlarau nih fitnak a pe ih a ṭon tikah hutu khaw nih an el thei lo. 11 Cun mi hrekkhat cu, "Moses le Pathian thangsiat in a ṭon kan thei," tiah ti dingah nawhthuh an pe. 12 Cutih in misenpi pawl, upa pawl le Daanthiam pawl cu thinse kau in an forh. Stefen cu an tlai ih Khonsil upa hmai ah an suahpit. 13 Cule fiahpittu diklo pawl cu an tiang ih, "Hi pa nih kan Biakinn Thianghlim le Moses Daan khaw hi dokalh in a ṭon ringring. 14 Nazareth mi Jesuh nih hi hmun hi a ṭhiatbal thok ih, Moses ih kan na pekmi nunphung pawl a thleng colh thok, tiah a ṭon lai kan thei," tiah an ti. 15 Khonsil ih a totu hmahhmah nih Stefen cu an zoh ih a mithmai cu vancungmi mithmai mangin an hmu.