1 Cuvai tikcu hrawngah Siangpahrang Herod* nih kawhhran sungih Khristian hrekkhat pawl hrem a thok. 2 Cun Johan ih unaupa James cu ralnam thawn a that. 3 Cuvai nih Judah mi pawl an lung a awiter tih a hmuh ruangah, Peter khaw a tlai ter hnei. Cuvai cu Colh tello Sang Puai tuah laifang a i. 4 Peter cu an tlai ih thawng ah an thla, cule bur khat ah mipum pali a ummi ralkap bur li sinah an ap. Lantak Puai colh hnukah Peter cu mipi hmai ah suah in a thu rel dingah Herod nih khua a khang. 5 Curuangah Peter cu thawng ah an thla, asinain kawhhran nih a hrangah cat loin Pathian sinah thla an cam.

6 Peter cu Herod nih a thu rel dingin mipi hmai ih a suah hlan, a nizan ah thawnginn kiltu ralkap panih karlak ah a it. Thirhri panih in an khit ih thawnginn suahka khaw an kil. 7 Rinlopi in Bawipa ih vancungmi cu a tiang ih meisa nih thawnginn khan sung cu a tlet. Vancungmi nih Peter cu a hnin ih, "Zamrang in hang tho!" tiah a ṭhang. Cule Peter kut ih thirhri pawl cu an poih. 8 Cun vancungmi nih, "Na taikap kap fa la na kedap khaw hru," tiah a ti. A tih mangin Peter nih a tuah. Cule vancungmi nih, "Na hnipuan hru la ka thlun," tiah a ti. 9 Peter cu a feh ih vancungmi cu a thlun. Cule vancungmi ih a tuahmi cu thutak ah a ruat lo, latnak ka hmu a i thok tiah a ruat fa. 10 Ralkap ih an kilnak a pakhatnak kotka le a panihnak kotka cu an lan ih khawpi sung fehnak thir kotka an ban. Cuvai thir kotka cu an hrangah ama tein a hong fa ih an suak. Cule zalam pakhat an thlun ih rinlopi in vancungmi nih a zuangta hnei.

11 Cun Peter cu a lung a fim ih, "Herod ih thuneihnak sung le Judah mi pawl nih ka cungih tuah an duhmi hmahhmah lak sungin ka na runsuak dingah, Bawipa nih a vancungmi a ron thlah, tih atun cu ka fiah taktak i," tiah a ti.

12 Cule thil cangmi a fiah ngah hnukah Marka an tihmi Johan ih nu Mary ih inn ah a feh; cuva ah mi tamngai an hmuakkhawm fa ih thla an cam deido. 13 Cun Peter nih suahka a king hnei ih Rhoda tihmi sinum nu cu kotka hong dingin a feh. 14 Cuvai nu nih Peter ih aw a si tih a fiah tikah a lungawi tuk ih suahka hman hong loin inn songah a lut sal ih, "Suahka hmai ah Peter a ding," tiah a sim hnei. 15 Cule anni nih, "Na aa mawh!" tiah an ti. Asinain, a si taktak tiah a tih thotho ruangah, "A vancungmi si lai tu!" tiah an ti.

16 Asinain Peter cu cat loin suahka a king ngelngo. Cule suahka cu an hong ih Peter a si tih an hmuh tikah an khawruah a har. 17 Daitein um dingah Peter nih a kut a zap hnei, cule Bawipa nih thawnginn sungin a suahnak thuhla cu an sinah a sim hnei. Peter nih, "Hi thu hi James le a dang zumtu pawl sim uh," tiah a ti hnei. Cun a suak ih hmun dangah a feh.

18 A zingla khua a van tikah, Peter cungih thil cangmi thuhla ah ralkap pawl cu an buai setak. 19 Herod nih Peter cu a hrawl nain a hmu lo. Curuangah thawnginn kiltu pawl cu an thu a zingzawi ih that dingin thu a pe hnei.

Cule Herod cu Judea peng in Sisaria khawpi ah a feh. Cuva ah can tawkfang a um.

20 Cun Herod cu Tai-ar mi pawl le Sidon mi pawl cungah a thin a se ngai. Curuangah cuvai khawmi pawl cu Herod sinah a bur in an feh. A hmasabik ah siangpahrang ih ihnak khan kiltu Blastas cu an sin la ah ṭang dingin an sawm. Cule Herod sinah an feh ih remnak tuah dingin an sut. Zangahtihle an ram mi pawl ih ticaw an ngahnak cu Herod siangpahrang ukmi ram sungta a ih ruangah a si.

21 An ni khiahmi ni ah Herod cu a siangpahrang thuam a hru ih a thuṭhennak tokheng cungah to pit in mipi pawl sinah thu a sim. 22 Cule mipi pawl nih, "Hivai hi pathian ih aw a i, minung ih aw a i lo!" tiah an hek. 23 Veikhatte ah Bawipa ih vancungmi nih Herod cu a fakter, zangahtihle Herod nih Pathian sinah sunloihnak a pek lo ruangah a si. Cule Herod cu zangrual nih an ei ih a thi.

24 Asinain Pathian ih thu cu a ṭhang ih a karhzai.

25 Cule Barnabas le Saul cu an ṭuanṭuan an colh tikah Jerusalem in* an kirsal ih, Marka tihmi Johan cu an sinah an ṭhita.