1 Cun forhthlah pawl le Judea ram sungih a ummi zumtu pawl nih Pathian thu cu Zentail mi pawl khaw nih an pom ve tih an thei. 2 Cule Peter cu Jerusalem a tian tikah, serhtan mi zumtu pawl nih Peter cu an dokalh ih, 3 "Serhtan lo Zentail pawl inn ah na feh ih an sinah caw na ei," tiah an ti. 4 Asinain Peter nih thil cangmi cu a thok in a sangsang tein a sim hnei:

5 "Joppa khawpi ih thla ka cam laiah, latnak ka hmu. Puan mang a i mi thil pakhat cu a kil li in an thlai ih van in ka sinah an ron ṭhup cu ka hmu. 6 Ṭhangai in a sung ka zoh ih leilung ih um ke li nei ramsa pawl, sahrang pawl, bokvak ramsa pawl, le van ih a hawi mi vate pawl ka hmu. 7 Cule aw pakhat ka thei ih, ‘Peter, hang tho. That pit in ei,’ tiah ka na ti. 8 Asinain kei nih, ‘Bawipa, a i lo! A thiang lo mi le a borhhlawh mi ziangkhaw ka kaa sungah a lut dah kel lo,’ tiah ka ti. 9 Cule vancung in aw nih, ‘Pathian nih a thiangter cem mi cu thiang lo ah ruat hlah,’ tiah veinihnak ka na ti sal. 10 Cutih in veithum tiang rori a cang ih netabik ah a zatein van ah lak kir sal a i. 11 Cu laifang ah Sisaria khawpi in ka sinih an thlah mi, mi pathum cu ka* riahnak inn hmai ah an ding. 12 Cule ṭhukṭhunnak um loin an sinih feh dingah Thlarau nih ka na forh. Hivai Joppa khawmi kan unau minung paruk khaw ka na thlun eng ih Kornelias inn ah kan lut. 13 Kornelias nih a inn ih vancungmi a hmuh thu kan na sim. Vancungmi nih Kornelias sinah, ‘Joppa khawpi ah mi thlah hnei lai cikhaw Peter tiah an kawhmi Simon tihmi pa ko ter hnei. 14 Ani nih thu nan ta sim thok ih cuvai thu nih nangma le na innsungsang hmahhmah nan ta rundam thok,’ tiah a ti. 15 Cule thusip ka thawh cangin a hramthok ih kan cungih Thlarau Thianghlim a tian mangin an cung khaw ah a tiang ve. 16 ✝ Cun Bawipa nih, ‘Johan nih cu ti thawn baptisma nan ta pe, asinain nan cu Thlarau Thianghlim thawn baptisma pek nan i thok,’ tiah a sipmi ka cing sal. 17 Curuangah Bawipa Jesuh Khrih a zumtu kan sinah Pathian nih laksawng kan na pek mangin, Zentail mi pawl sin khaw pek an ih ahcun Pathian ih zalam dawnkham dingah kei cu hutu ka si?" tiah a ti.

18 Cuvai thu an theih tikah an dokalhnak cu an cawlhnga ih Pathian thangṭhat in, "Pathian nih Zentail mi pawl nunnak an co theinak dingah sualsirnak cu an sin khaw ah a pe hnei ve," tiah an ti.

19 ✝ Stefen thahnak thu ih a suakmi hremnak ruangah a ṭekdarh mi pawl cu Fonisia, Saipras le Antiok khawpi tiang an ban ih Judah mi pawl sin kau ah Thuthang Ṭha cu an phuang. 20 Asinain cu pawl lakih mi hrekkhat cu Sairin khua le Saipras tikulh mi an i. Cu pawl cu Antiok khawpi tiang an feh ih Bawipa Jesuh ih Thuthang Ṭha cu Zentail* mi pawl sin khaw ah an sim. 21 Cun Bawipa ih kut cu an sinah a um ih mi tamngai nih an zum ih Bawipa la ah an herfa.

22 Cuvai thu cu Jerusalem khawpi ih um kawhhran sinah a ban, cule Barnabas cu Antiok khawpi tiang feh dingin an thlah. 23 Barnabas cu Antiok khawpi a tian tikah Pathian nih mipi pawl thlawsuah a pekzia a hmu ih a lung a awi setak. Cule an thinlung zatein Bawipa an zum ih rinsattlak zumtu an ih theinak dingah thazang a pe hnei. 24 Zangahtihle Barnabas cu mi ṭha, zupnak le Thlarau Thianghlim thawn a khatmi a i. Cule mi tamngai cu Bawipa sinah a ṭhi hnei.

25 Cun Barnabas cu Saul hrawl dingah Tarsas khawpi ah a feh. 26 Saul a hmuh tikah Antiok khawpi ah a ṭhita. Cule kum khat sung cuva ih kawhhran thawn an pawlkom fa ih mi tamngai thu an zirh. Cun Antiok khawpi ah dungthluntu pawl cu Khristian tiah kawh hmasabik an i.

27 Cuvai tikcu hrawngah profet pawl cu Jerusalem in Antiok khawpi ah an feh. 28 ✝An lakih mi pakhat, Agabus tihmi pa cu a ding ih, leilung pumpi ah mangṭam maktara a tlung tawn thok, tiah Thlarau ih fiahternak in thu a phuang. Caesar Klaudius nih Rom siangpahrang a ṭuan lai ah cuvai mangṭam cu a tlung. 29 Dungthluntu pawl cu anma le tihthei zat in Judea ram ih a ummi zumtu unau pawl bopnak pe dingah an tawlrel. 30 Cule an tawlrel cia mangin an ngahmi tangka cu Barnabas le Saul sin in kawhhran upa sinah an kuat.