1 ✝Maw Theofilas:

Jesuh ih ṭuanṭuan a thawh ihsin vancung ih lak a ih hlan tiang a tuahmi le a zirhmi hmahhmah pawl cu ka cabu hmasa sungah ka ngan. 2 Vancung ih lak a ih hlanah, a hril cia hnei mi a forhthlah pawl cu Thlarau Thianghlim ih cahnak huham thawn thu a pe hnei. 3 A thih hnuk ni sawmli sung an sinah vei tamngai a phuanglang fa ih, a nung rori tihmi nemhngetnak tamngai a pe hnei. Ama cu an hmu ih Pathian Uknak thu thawn pehpar fami pawl a sim hnei. 4 ✝Cule hmun khatih an hmuahkhawm fak lai ah,* an sinah hitihin thu a pe: "Jerusalem hi suahsan hlah uh. Cunakin ka Pa ih laksawng nan ta pek ding mi, ka sinih nan fiah cemmi thutiam khi, hngak sawn uh. 5 ✝Johan cu nih ti thawn baptisma nan ta pe. Asinain ni rei lo teah Thlarau Thianghlim thawn baptisma pek nan i thok," tiah a ti.

6 Forhthlah pawl cu Jesuh thawn an hmuahfak lai ah anni nih, "Bawipa, atun can ah Israel pawl sinah Uknak cu na pe sal thok maw?" tiah an sut.

7 Ani nih an sinah, "Pa nih a thuneihnak sungih a siahmi caan, a ihlole a cuvai tikcu cu nanmai fiah ding a i lo. 8 ✝Asinain Thlarau Thianghlim nan sinih a rong tian tikah huham cahnak thawn nan khat thok ih Jerusalem khawpi, Judea ram, Samaria ram hmahhmah le leilung tlun a deng tiang ka na fiahpittu nan si thok," tiah a ti. 9 ✝Cutih in a sip colh hnukah, an mit hmuh rori ah ani cu van ah lak a i, cule khawdur nih a phen ih an hmu thiam i lo.

10 Cun a hang kainak van la an zoh ciahco laiah, puan rang hru mi mi panih hmakhatte ah an hramah an rong ding ih, 11 "Galilee mi pawl, zangah van la zoh in nan ding ciahco? Nan sin in van ih a kaimi Jesuh hi, van ih a kai lai nan hmuh mang cekci in a rong kir sal leh thok," tiah an ti.

12 Cule forhthlah pawl cu Olif Tlang in Jerusalem ah an kir, cucu Jerusalem in peng hrek tluk a hla. 13 ✝Cun khua an tian tikah, Peter, Johan, James, Andru, Filip, Thomas, Bartholomeo, Matthai, Alfias ih fapa James, phun ṭantu Simon le James ih fapa Judas pawl umnak tlunta khan ah an lut. 14 Numi pawl, Jesuh ih nu Mary le Jesuh ih naule pawl thawn an zatein an hmuakkhawm fa ih lung khat pu in thlacamnak cat loin an nei.

15 Cun cuvai can ah zumtu hmuakkhawm fa minung 120 hrawng lakah, Peter cu a hang ding ih, 16 "U le nau pawl, Thlarau Thianghlim nih David ih hmurka hmangin a sip ciami Jesuh tlaitu pawl ṭhita hneitu Judas ih thuhla Ca Thianghlim ih sipmi cu a kim ṭul. 17 Zangahtihle Judas cu kan lakih siar telmi a i ve ih, hivai ṭuanṭuannak ah covo a nei ve," tiah a ti.

18 ✝(Judas cu thilsual a tuahmi man ih a ngahmi tangka in hmunram pakhat a lei ih cuvai lo sungah a bah ih a thi; a pum a kek ih a hril pawl khaw a pawt colh. 19 Cun cuvai thu cu Jerusalem ih a ummi mi hmahhmah nih an fiah ih anma ṭon in cuvai hmunram cu Akeldama tiah an ti; a sullam cu, "Thisen Hmunram," tihnak a i.)

20 Peter nih, "Zangahtihle Saam cabu sungah,

" ‘A inn cu lawng sehla

A sungah hukhaw um hlah seu,’ tiah ngan ciami a um.

Cule hmun dang ah,

‘Midang nih a ṭuanṭuan cu la seu,’ tiah a um.

21,22 ✝"Curuangah kan sinih a ummi lak sungin Bawipa Jesuh thawhsalnak fiahpittu ah mi pakhat kan hril a ṭul. Ama cu Bawi Jesuh kan lak ih lut le suak in a um sung hmahhmah ah kan sinih um ringring ve tu a i thok. Johan nih Baptisma thu a sipnak* ih thokin Jesuh van ih lak a ih ni tiang, kan lak ih a tel ve tu a i thok," tiah a ti.

23 Cule minung panih ih hmin an pe. Barsabbas tiah kawhmi Josef (Justus tiah khaw ih an kawhmi), le Matthias an si. 24 Cule thla an cam ih, "Bawipa, nang cu mi hmahhmah ih thinlung fiah colhtu na i; hi panih lakah hutu deuh na hril tihmi kan ron fiahter; 25 a co dingmi hmunah kan na fehtatu Judas ih can-ai ah na forhthlah pawl lakih ṭuanvo la dingah na hrilmi cu kan ron fiangter hram," tiah an ti. 26 Cule an panih sungah hutu hi forhthlah a i thok tih an fiahnak dingah camcawhfung an zuk ih Matthias nih a ngah. Matthias cu forhthlah hleikhat pawl sinah an betcih.