1 Cun ni nga hnukah Puithiam Lubik Ananias cu upa hrekkhat le sih-ni Tertullas thawn Sisaria khawpi ah an feh. Sih-ni pa nih ram uktu Felix hmai ah Paul sual an puhnak thu cu a sim. 2 Cule Paul cu an ko ih, sih-ni Tertullas nih Paul sual an puhnak thu cu Felix hmai ah hitih in sip a thok:

"Nangmai uknak tangah can reingai daihnak kan ngah ih na zawnruahnak thawngin hi miphun sinah rep ṭulmi pawl na rem cem. 3 Upat tlak ngai mi Felix, hmunzakip ah le khawtik lai khawah lungawinak tamngai thawn ta cohlang ringring. 4 Reingai ta hnaihnok lonak dingah thinfahte in ka ṭonkam temte ka na ngaisak dingah ta dil. 5 Zangahtihle hivai pa hi mi buaitertu a i tiah kan hmu. Leilung pumpuluk ih Judah miphun pawl hmahhmah a buaiter reuhro ih Nazareth bu hruaitu a i. 6 Cule Biakinn borhhlawhter a tum ih kan tlai. 7 * 8 Nangma nih hivai pa hi na zingzoi a sih ahcun sual kan puhmi pawl hi na hmufiang thok," tiah an ti. 9 Cun Judah mi pawl nih an bawm ih a sipmi pawl hi a dikmi an i, tiah an ti.

10 Cun ram uktu pa nih Paul cu thu sim ve dingah a kut in a zap ih Paul nih a sinah,

"Nang cu kum tamngai sung hi vai miphun thuṭhentu na i tih ka fiah ih atun na hmai ah humfaknak can ka ngah ruangah ka lung a awi setak. 11 Jerusalem ah Pathian be dingih ka fehnak hi ni hleinih nakin a tam rih lo tih cu na fiah kau. 12 Cule Biakinn sungah hutu thawn khaw thu kan al fa lo ih Sinakok ah le khawpi sung khoitu hmun khawah mi ka tokhrolh lo, tih cu Judah mi pawl nih an fiah colh kau. 13 Cun atun ah na hmai ih sual ka na puh hnei mi pawl hi a dik taktak tiah ta hmuh eng thei thok lo. 14 Ka tuah taktak tiah na hmai ih ka sip duhmi cu hihi a si: Kan pupa pawl ih Pathian ka biaknak ah Zalam kan tihmi ka thlun; anni nih cuvai Zalam cu a dik lo tiah an ti. Asinain Moses Daan sungih nganmi hmahhmah le profet pawl ih nganmi cabu sung ummi hmahhmah khaw ka zum colh. 15 Anni mangin kei khaw Pathian sinah ruahsatnak ka nei ve. Cuih ruahsatnak cu miṭha khaw iseh, miṭha lo khaw iseh, mi hmahhmah cu thihnak in an thosal thok, tihmi hi a si. 16 Curuangah Pathian hmai le minung hmai ah sia le ṭha fiahthiamnak nei dingin ka zuam reuhro.

17 ✝ "Kum reingai sung Jerusalem khawpi ih ka um i lo hnukah, ka miphun pawl bopnak tangka pe ding le thawinak pe dingin Jerusalem khawpi ah ka feh. 18 Daan mangin thianfai faknak ka tuah colh hnukah a tlun ih ka sipmi pawl ka tuah vekvo lai ah, Biakinn sungah ka na hmu eng. Culai ah ka sinah mipi an um lo ih buainak khaw a um lo. 19 Asinain cuvai hmun ah Asia ram ih a tiangmi Judah mi hrekkhat an um. Cuvai pawl cu ka cungah lungkim lonak an neih a si ahcun na hmai ah anma rori nih sual ka puh seu. 20 Asihlole hiva ih a ummi Khonsil upa pawl hmai ih ka din lai ah ka tuahsualmi an hmuh asihle ta sim seu. 21 ✝ An hmai ih ka din lai ah thil pakhat kau ka sipmi a um: ‘Mithi pawl cu an thosal thok,’ tih ih ka zup ruangah nihinni ah tazacuai in ka um," tiah a sim.

22 Cule Felix cu cuvai Zalam thuhla ṭhangai in a fiah ruangah an thurel cu a cawlhngater hnei ih, "Ralbawipi Klaudius Lisias a tian tikah nan thu cu ka rel leh thok," tiah a ti. 23 Paul kiltu ralbawi sinah, "Paul cu ṭhangai in kil uh, cule zalennak temte tal pe uh la a rualpi nih a ṭulhaimi pawl tawlrelsak seu," tiah thu a pe.

24 Ni tawkfang a reih hnukah, Felix cu a nupi Drusilla thawn an tiang. Drusilla cu Judah mi a i. Paul cu a ko ih, Paul ih Jesuh Khrih zupnak thuhla a sip mi cu a ngai. 25 Asinain Paul nih dingfelnak thu, ma le ma supfaktheinak thu le a tianglai dingmi Thuṭhennak Ni thu pawl a sip tikah Felix nih a ṭih ih, "Atun cu tawkrih seh! Na tlung thei. Tikcu remcang ka neih tikah ta ko leh thok," tiah a ti. 26 Cuvai can ah Paul nih tangka ka pe sehla tiah Felix nih ruahsatnak a nei. Curuangah Paul cu a ko ṭiṭia ih a be leplo.

27 Kum nih a reih hnukah, Porsius Festas nih Felix ih ai a awh. Asinain Felix cu Judah mi pawl lungawiter a duh ruangah Paul cu thawnginn sungah a ramta.