1 Pentikos ni a tian tikah zumtu hmahhmah cu hmun khat ah an um. 2 Cun hmakhatte ah van in zil fak ngai zuang mangin thawngvang a rong tiang ih an umnak inn pumpi in a khat colh. 3 Cule meisa alh mang a i mi, a ṭhenfa mi lei pawl cu an sinah an lang ih, minung pakhat vek cungah an ṭhumfa. 4 An zatein Thlarau Thianghlim in an khat colh ih Thlarau nih ṭon theinak a pek hnei mangin ṭon dangdang in an ṭon.

5 Leitlun khuakakip in a tiangmi, biaknak la ah a zuamfa ngaimi, leh Judah mi pawl cu Jerusalem ah an um laifang a i. 6 Cuvai ṭon dangdang ih an ṭonmi thawngvang an theih tikah mipi pawl cu an tiang ih an hmuakkhawm fa. Cuvai a tiangmi mipi pawl nih zumtu pawl ih ṭon cu anma ih ṭon mang in an theih vek tikah an mang a bang ngai. 7 Mangbang le khawruahhar in, "Hih a ṭon berbo tu pawl hi Galilee mi an i ko lo maw? 8 Zangtih in kanma kan suahkeh ṭon mangin kan thei thiam? 9 Kan cu Parthia ram, Media ram, Elam ram, Mesopotamia ram, Judea ram, Kappadosia ram, Pontas ram, Asia ram, 10 Frizia ram, Pamfilia ram, Izipt ram le Libia ramsung Sairin khaw hram pawl in a tiangmi kan i. Mi hrekkhat cu Rom khua in a tiangmi kan i ih, 11 Judah mi le Judah biaknak ih a luttu Zentail mi pawl kan i. Mi hrekkhat cu Krete tikulh le Arabia ram in kan tiang — asinain Pathian nih a huham thawn thil mak ngai a tuahmi thu anma ih ṭon ih an sip tikah kanma ṭon mangin kan thei," tiah pakhat le pakhat an ti fa. 12 An zatein, mangbang le awloksong in, "Aihih a sullam zangtu la i na?" tiah pakhat le pakhat an ti fa.

13 Asinain midang pawl nih, "Hi pawl hi wine ri hmah u e!" tiah zohsuam ngai in an ti.

14 Cun Peter cu a dang forhthlah hleikhat lakah a hang ding ih, aw thang ngai in an sinah: "Judah mi pawl le Jerusalem ih a ummi pawl, hivai hi fiah uhla, ka ṭonkam pawl hi ngai uh. 15 Nan ruah mangin hi pawl hi an ri lo; mawla nazi pakua kau a i rih. 16 Hivai hi profet Joel nih:

17 " ‘Ni neta ah cun hitih in a i thok; Pathian nih a ti:

Minung hmahhmah cungah ka Thlarau ka burh thok;

Nan fapa pawl le nan fanu pawl nih profet thuphuan in thu an phuang thok;

Nan mino pawl nih latnak pawl an hmu thok;

Cun nan puhram pawl nih mang an man thok;

18 Cule ka sal nu le sal pa pawl cung khawah,

Cuvai can ah cun ka Thlarau ka burh thok ih,

Profet thuphuan in thu an phuang thok.

19 Cule van cungah mangbangza pawl le

leilung ah hmuhsaknak pawl ka langter thok.

Thisen, meisa le meikhu sah ngai a um thok;

20 A maktara mi le a sunglawimi Bawipa ih Ni a tian hlanah,

ni cu a mawk thok ih

thlapa cu thisen ah a cang thok;

21 Bawipa ih hmin a ko tu pawl hmahhmah cu rundam an i thok,’ tiah a sip cia mi khi a i.

22 "Israel mi pawl, hi ṭonkam pawl hi ngai hnik uh! Nanma rori ih nan fiah mangin, Nazareth mi Jesuh hmangin Pathian nih nan lakih thilmak pawl, mangbangza pawl le hmuhsaknak pawl thawn nan sinih a nemhnget mi, 23 ✝ Jesuh cu Pathian ih a fiahcianak le khawkhannak mangin nan sinah pek a i. Nan nih daan nei lo pawl kut in nan tlai ih nan khenbet ih nan that. 24 ✝Asinain Pathian nih thihnak in a thoter sal ih thihnak huham sungin a luatter cem. Zangahtihle ani cu thihnak ih tlaih theihmi a i lo. 25 David nih ani ih thuhla cu hitih in a sim:

" ‘Bawipa cu ka hmai ah ka hmu ringring;

Ka vorhla ih a um ruangah ka hnin thok lo.

26 Curuangah ka thinlung cu a aipuang ih

ka hmurka cu a lungawinak in a khat.

Ka taksa ruangpum khaw

ruahsatnak ah a cawlhnga thok.

27 Zangahtihle ka thlarau cu mithi khua ah na ramta thok lo ih,

Na mi thianghlim cu siatralnak a hmuah ding na siang fawn thok lo.

28 Nunnak zalam cu ka na fiahter cem ih

Na umpitnak thawn lungawinak in ka na khat ter thok,’ tiah a ti.

29 "U le nau pawl, kan pu David ih thu cu nan sinah fiang ngai in nan ta sim thok. David cu a thi ih an phum; a thlan khaw nihin ni tiang kan lakah a um. 30 Profet a i ih Pathian ih a kam ciami thu a fiah; ama David mangin a tesinfa pakhat khat cu siangpahrang tokheng ih to dingah Pathian nih thu a tiam. 31 Pathian nih hmaila caanah zangtu a tuah thok tih cu David nih a hmu cia; curuangah Khrih a thawhsalnak ding thu cu hitih in a sim,

" ‘Mithi khua ah ama cu a ramta thok lo ih;

a taksa ruangpi cu thlan sungah a ciamdah thok lo,’ tiah a ti.

32 Pathian nih Jesuh cu thihnak in a thoter sal ih a fiahpittu cu kan zate hi kan si. 33 Curuangah Pathian nih a vorhla ah sunglawi ngai in a khaisang ih Pa ih a tiamkam mi Thlarau Thianghlim cu a sinah a pe. Cuvai a pekmi cu atun ih nan hmuhmi le nan theihmi hi a si. 34 Zangahtihle David cu vancung ah a hang kai lo; ama rori nih,

‘Bawipa nih

ka Bawipa sinah:

35 Na ral pawl na ke tang, na ke cilnak ih ka canter hlan lo ka vorhla ah to,’ a ti," tiah a ti.

36 "Curuangah Israel miphun pawl hmahhmah nih hivai hi fiang ngai in fiah uh, nan khenbet mi Jesuh cu Pathian nih Bawi le Khrih ah a tuah cem," tiah a ti.

37 Mipi pawl nih cuvai thu an theih tikah, an thinlung a khoih hnei ngai ih, Peter le forhthlah pawl sinah, "U le nau pawl, zangtu tuah lausing?" tiah an sut.

38 Cun Peter nih an sinah, "Nan sualnak pawl ngaihthiam a ih theinak dingah nan sual sir uhla Jesuh Khrih hmin in baptisma la uh; cule Thlarau Thianghlim laksawng nan co thok. 39 Zangahtihle thutiamkam cu nanma, nan tefa pawl le hmunhla ih a um mi pawl hrang khaw ah a i — Bawipa kan Pathian ih a kawhmi zate hrang khaw ah a i," tiah a let.

40 Cule thudang tamngai a sim hnei ih a forh hnei. "Tunsan misualral pawl lakin nanma le nanma humhim fa uh," tiah a ti. 41 A thusipmi cu mi tamngai nih an zum ih baptisma an co; cuvai ni ah minung 3,000 hrawng nih an bet. 42 An zatein forhthlah pawl sinin an zir ih, ti-caw ei khatnak le thlacam khatnak thawn pawlkop faknak an nei ringring.

43 Cun mi hmahhmah ih thinlung ah ṭihnak a tiang, cule forhthlah pawl cu mangbangza le khawruahhar tamngai an tuah. 44 ✝ Cun zumtu hmahhmah cu hmun khat ah an umkhat ih an neihmi thil zangkim in an hlawmfa. 45 An neihmi pawl le thilri pawl an zuar ih, an ṭuldan ih zirin an zatein an zem fa. 46 Ni cang Biakinn ah an hmuakkhawm fa. Inn khat hnuk inn khat caw an ṭawm fa ih lungawinak le tangdornak thinlung thawn caw an ei khat. 47 Pathian an thangṭhat ih, mi hmahhmah sinin mithmai ṭha an co. Cule ni cang in Bawipa nih rundamnak cotu pawl cu an sinah a bet hnei.